Cara Laho Patoguhon Holong tu Debata dohot tu Dongan Jolma

Saonari, ndang taulahon be Patik ni si Musa, alai dua parenta na umbalga, i ma holong tu Debata dohot tu dongan jolma, dipangido Debata do asa tongtong taulahon. (Mat 22:37-39) Ingkon marsitutu do hita tongtong patuduhon holong. Songon dia carana? Na rumingkot, ingkon tajaha do Bibel ganup ari. Dung tajaha Bibel, taboto ma marragam do parange ni Debata jala taantusi ma “hinadenggan ni Jahowa”. (Ps 27:4) Molo taulahon songon i, lam togu ma holongta tu Debata jala tatiru ma pamingkirion ni Debata. Asing ni i, taronjar ma rohanta laho mangulahon sude parenta ni Debata, tarlumobi patuduhon holong na so mangkaringkothon diri. (Joh 13:34, 35; 1Joh 5:3) Adong tolu cara na boi mangurupi asa lomo rohanta manjaha Bibel:

• Bayangkon jala hilala ma aha na dijaha hamu sian Bibel. Asa boi dapot rohamu, bayangkon ma situasina.

  

• Jaha ma marhite godang cara. Marsoara ma hamu tingki manjaha Bibel. Boi do muse dipangke hamu rekaman audio panjahaion Bibel. Jaha ma hatorangan taringot tu sasahalak na disurat di Bibel manang holan taringot tu sada topik, unang apala manjaha pigapiga bindu. Umpamana, pangke ma Apendiks A7 manang B12 di Kitab Suci Terjemahan Dunia Baru laho manjaha hatorangan taringot Jesus. Jaha ma sude ayat sian bindu na dienet di manulingkit Hata ni Debata ganup ari. Denggan do muse molo dijaha hamu taringot didia inganan ni angka buku di Bibel disurat.

  

• Jaha jala rimangi ma. Molo somal do hamu manjaha Bibel pigapiga bindu ganup ari, alai ndang apala diantusi hamu, dumenggan do molo holan sabindu dijaha hamu, alai boi tangkas diantusi jala dirimangi hamu. Parrohahon ma, boasa masa hatorangan na jinahamuna i. Lului ma godang hatorangan taringot i. Pangke ma peta dohot referensi pinggir. Parsiajari ma sada hatorangan na so diantusi hamu dope. Lehon ma tingki laho mangarimangi aha na dijaha hamu sian Bibel.