‘Mandok Mauliate ma si Paulus tu Debata jala Lam Pos ma Rohana’

Tingki dibege huria na di Rom naeng ro si Paulus, disuru nasida ma piga-piga baoa mardalan hira-hira 64 kilometer laho manjumpangi si Paulus. Aha do pangkorhon ni i tu si Paulus? “Dung diida si Paulus nasida, didok ibana ma mauliate tu Debata jala lam pos ma rohana.” (Ul 28:15) Somalna, si Paulus do na patoguhon angka huria. Alai di tingki i dung gabe tahanan, ibana do na dipatogu.—2Kor 13:10.

Saonari on, ro do pengawas wilayah manjumpangi angka huria laho patoguhon angka dongan. Songon sude naposo ni Debata, tontu olo do sipata nasida loja, holsoan, jala gale. Molo ro pengawas wilayah dohot istrina tu huriamuna, aha do na boi bahenonmu laho patoguhon nasida, asa boi hamu “masipatoguan”?—Rom 1:11, 12.

• 

  Rap marbarita dohot nasida. Las do roha ni pengawas wilayah molo marsitutu hita marbarita saleleng kunjungan ni nasida. (1Tes 1:2, 3; 2:20) Boi ma hita merintis ekstra di bulan i. Boi ma hamu rap marbarita dohot ibana manang istrina. Togihon ma ibana mandongani hamu tingki manguluhon parsiajaran Bibel. Olo do nasida rap marbarita dohot sude penyiar, tarmasuk ma tu angka penyiar na baru dohot na so pola malo dope marbarita.

• 

  Urupi ma nasida. Parade ma inganan dohot sipanganon ni nasida. Molo taulahon i, na patuduhon holong do hita tu nasida. Jala taingot ma ndang pola godang na dipangido nasida.—Luk 10:38-42.

• 

  Tangihon jala ulahon ma tudu-tudu dohot poda na dilehon ibana. Lomo do roha ni pengawas wilayah mangurupi hita asa lam denggan di ulaon marbarita. Ra, olo do ibana mangalehon sipasingot. (1Kor 5:1-5) Las do rohana molo tatangihon jala taihuthon sipasingotna i.—Heb 13:17.

• 

  Dok ma mauliate. Paboa ma tu pengawas wilayah dohot istrina, marlaba do haroroan ni nasida tu hamu. Boi ma dipaboa hamu i marhite surat manang kartu.—Kol 3:15.