Haholongi ma Akka Dongan sian Nasa Roha

1. Aha do paretta na dilehon Jesus tu akka siseanna? (Ida gombar sampul.)

DI BORNGIN andorang so mate Jesus, dipaboa ibana do sada paretta tu akka siseanna. Didok ibana, “Songon ahu na mangkaholongi hamu, hamu pe ingkon masihaholongan ma.” Jala didok ibana muse, “Molo masihaholongan hamu, botoon ni sude jolma ma na siseanku hamu.”​—Joh. 13:34, 35.

2. Boasa rikkot tapatudu holong tu akka dongan?

² Didok Jesus, boi do ditanda halak ise siseanna, molo dipatudu nasida holong songon naung dipatudu Jesus tu nasida. Tutu do masa i di abad na parjolo, jala marlakku dope i di tikkinta saonari. I do umbahen, rikkot situtu do patuduhon holong tu akka dongan nang pe dang mura i taulahon.

3. Aha do na lao taulas di parsiajaran on?

³ Ala jolma na so sempurna dope hita, sipata dang mura patuduhon holong tu akka dongan sian nasa roha. Alai, ikkon marsitutu do hita lao maniru Jesus. Di parsiajaran on, lao taulas ma songon dia do holong boi mangurupi hita asa toktong mardame, dang paimbar-imbarhon, jala rade manamue akka dongan. Dung diparsiajari hamu i, rimangi ma, ‘Aha do na boi huparsiajari sian akka dongan na toktong patuduhon holong nang pe dang mura mangulahon i?’

MARDAME

4. Songon na dipaboa di Mateus 5:23, 24, boasa hita ikkon mardame dohot akka dongan na marsogo ni roha tu hita?

⁴ Dipaboa Jesus do boasa rikkot asa mardame tu dongan na marsogo ni roha tu hita. (Jaha Mateus 5:23, 24.) Didok ibana, ikkon tajaga ma asa toktong denggan hubunganta tu akka dongan asa las roha ni Debata. Las do roha ni Jahowa molo marsitutu hita mardame dohot akka donganta. Dang dijalo Jahowa panombaonta molo sogo dope rohatta tu sasahalak jala dang olo hita mardame.​—1 Joh. 4:20.

5. Aha do na mambahen si Mark gabe maol mardame dohot donganna?

⁵ Sipata maol do asa toktong mardame. Taparrohahon ma aha na masa tu si Mark.b Haccit do rohana tikki adong sahalak donganna baoa na kritis jala makkatahon na so denggan taringot ibana tu akka dongan di huria. Aha ma na diulahon si Mark? Didok ibana, “Gabe muruk jala kasar ma au makkatai tu donganta i.” Alai, ujungna gabe disolsoli si Mark do aha na diulahonna i. Minta maaf ma ibana asa boi mardame dohot donganna i. Alai dang olo donganna i mardame dohot si Mark. Jadi, gabe tubu ma di roha ni si Mark, ‘Boasa pola loja au mardame, molo so olo do ibana?’ Alai, dijujui pengawas wilayah do ibana asa unang menyerah. Jadi aha do na diulahon si Mark?

6. (a) Aha do na diulahon si Mark asa mardame? (b) Songon dia do si Mark mangihutton poda na didok di Kolosse 3:13, 14?

⁶ Tikki dirimangi si Mark aha na tubu di rohana i, gabe diboto ibana ma, dang serep dope rohana saleleng on. Jala ikkon dipauba ibana do pikkiranna na sala i. (Kol. 3:8, 9, 12) Jadi dijuppangi si Mark do muse donganna i, jala serep do rohana minta maaf. Dibahen ibana do piga-piga surat na paboahon na massai disolsoli ibana do pangalahona i. Jala dipangido si Mark do asa boi muse halak i mardongan. Dilehon si Mark do muse hadiah na denggan tu donganna i. Alai tong do muruk ibana jala dang olo manalpuhon hasalaan ni si Mark. Alai nang pe songon i, toktong do diihutton si Mark poda ni Jesus, asa makkaholongi jala manalpuhon hasalaan ni donganna i. (Jaha Kolosse 3:13, 14.) Jadi nang pe adong donganta na so mangargai aha naung taulahon asa mardame, boi do holong mangurupi hita asa toktong manalpuhon hasalaan ni nasida jala martangiang asa boi mardame muse.​—Mat. 18:21, 22; Gal. 6:9.

7. (a) Aha do na didok Jesus na ikkon taulahon? (b) Aha do situasi na maol na ikkon diadopi sada donganta borua?

⁷ Dijujui Jesus do asa tabahen na denggan tu halak na asing, ala tong do lomo rohatta dibahen na denggan tu hita. Didok Jesus muse, unang ma holan tahaholongi akka dongan na makkaholongi hita. (Luk. 6:31-33) Alai songon dia molo adong dongan di huria na so olo mangattoi hita? Nang pe dang jotjot songon i na masa, alai i do na diadopi donganta si Lara. Didok ibana, “Adong sahalak donganta borua na so olo mangattoi au, dang huboto alani aha. Marsak hian do au jala dang hunikmati be parpunguan i.” Mulana, didok si Lara di rohana, ‘Dang au na sala. Jala dongan di huria pe mandok, memang na asing do pangalahoni i.’

8. Aha do na diulahon si Lara asa mardame, jala aha do na boi taparsiajari sian ibana?

⁸ Marsitutu do si Lara asa mardame. Martangiang ma ibana tu Jahowa jala makkatai ma ibana tu donganta i. Dihatahon nasida ma aha do masalahna, masihaolan ma halak i jala mardame. Ninna rohana nungnga denggan be sude. Alai didok si Lara ma muse, “Dang leleng dungkon i, tong do songon najolo i na dibahen ibana tu au. Lam marsak ma au alani i.” Hirim do rohana asa muba pangalaho ni donganna i, jala i do na mambahen las rohana. Alai ujungna, diboto si Lara ma, na undenggan na boi diulahon ibana, i ma toktong makkaholongi jala “rade manalpuhon” hasalaan ni donganna i. (Eps. 4:32–5:2) Diingot si Lara do, “ndang dipaingot-ingot holong i hasalaan ni halak. Tahan manaon sude hasusaan, porsea di sasude, mangkirim di sasude, jala sabar di sasude.” (1 Kor. 13:5, 7) Jadi dang sai holsoan be si Lara tu masalah i. Gabe denggan do muse pangalaho ni donganna i tu ibana. Jadi, molo marsitutu hamu mardame dohot akka dongan jala toktong makkaholongi nasida, ‘sai didongani Debata parholong i do hamu, jala lehononna ma hadameon.’​—2 Kor. 13:11.

DANG PAIMBAR-IMBARHON HALAK

9. Songon na dipaboa di Ulaon ni Apostel 10:34, 35, boasa rikkot hita asa unang paimbar-imbarhon halak?

⁹ Dang olo Jahowa paimbar-imbarhon halak. (Jaha Ulaon ni Apostel 10:34, 35.) Jadi molo dang tapaimbar-imbar halak, on patuduhon akka anak ni Jahowa do hita. Taihutton ma poda na mandok asa tahaholongi donganta na asing songon diritta sandiri. Molo taulahon i, boi ma hita mamboan hadameon tu akka dongan.​—Rom 12:9, 10; Jak. 2:8, 9.

10-11. Songon dia do sahalak donganta borua boi pasidikkon pikkiran na sala i?

¹⁰ Ra dang sai mura hita asa unang paimbar-imbarhon halak. Parrohahon ma aha na masa tu sahalak donganta borua na margoar si Rut. Tikki poso dope ibana, adong do sasahalak sian sada negara na mambahen na so denggan tu ibana. Aha do pengaruh ni i? Didok si Rut, “Sai sogo do rohakku taringot manang aha pe na marhubungan tu negara i. Huhilala sarupa do sude jolma na sian negara i, nang pe Sitindangi nasida.” Songon dia ma si Rut boi pasidikkon pikkiran na sala i?

¹¹ Diboto si Rut, ikkon marsitutu do ibana lao pasidikkon pikkiran na sala i. Jadi dijaha ibana ma akka pengalaman dohot laporan sian Buku Tahunan taringot negara i. Didok ibana, “Marsitutu do au asa toktong mamikkirhon akka na denggan sian akka halak di luat i. Gabe mulai ma huboto, godang do hape akka dongan na marsihohot tu Jahowa disi. Takkas ma huida molo nasida pe bagian sian akka dongan di sude liat portibi on.” Dung i, diboto si Rut do muse ikkon dipatudu ibana do holong. Didok ibana, “Manang andigan pe pajuppang au dohot akka dongan sian negara i, marsitutu do au asa ramah tu nasida. Makkatai ma au tu nasida, jala boi ma lam takkas hutanda nasida.” Aha do hasilna? Didok si Rut, “Ujungna, dang adong be pikkiran na sala i di au.”

12. Boha do cara marpikkir ni si Sarah?

¹² Piga-piga halak dang sadar molo nasida nungnga paimbar-imbarhon halak. Umpamana songon si Sarah. Dirippu ibana do saleleng on dang paimbar-imbarhon halak ibana. Alana didongani ibana do manang ise pe dang soal aha sukuna, songon dia parhepengonna, jala aha tanggung jawab nasida di huria. Alai didok ibana do, “Baru pe sadar au, saleleng on paimbar-imbarhon halak do au.” Boasa? Sarjana do si Sarah dohot keluargana. Jadi umlomo do rohana mardongan tu akka halak na timbo sikkolana. Hea do didok ibana tu donganna, “Holan halak parsikkola na timbo do na hudongani. Molo dang timbo sikkolana, dang pola hudongani i.” Jadi porlu do dipauba si Sarah cara marpikkirna. Boha carana?

13. Aha do na boi taparsiajari sian cara ni si Sarah paubahon cara marpikkirna?

¹³ Adong ma sahalak pengawas wilayah na mangurupi si Sarah paubahon cara marpikkirna. Didok si Sarah, “Dipuji ibana do au ala ringgas marhobas tu Jahowa, denggan do komentarhu jala godang parbinotoanku taringot Bibel. Dung i didok ibana ma, molo tamba parbinotoanta, porlu do tapatudu akka parange na denggan songon serep ni roha, sabar, dohot asi ni roha.” Dirimangi si Sarah ma hata ni pengawas wilayah i. Didok si Sarah, “Saonari nungnga huboto urrikkot do patuduhon holong dohot haburjuon.” Muba ma cara marpikkir ni si Sarah. Didok ibana, “Sai hulului do parange na denggan sian akka dongan, na mambahen nasida mararga di Jahowa.” Aha ma parsiajaranna? Unang ma tapikkir unjago hita sian akka dongan holan ala untimbo sikkolatta! Molo ‘tahaholongi do sude dongan sahaporseaon’ sian nasa roha, dang olo hita paimbar-imbarhon halak.​—1 Ptr. 2:17.

MANAMUE

14. Songon na didok di Heber 13:16, boha do pakkilalaan ni Jahowa molo lomo rohatta manamue dongan na asing?

¹⁴ Las do roha ni Jahowa mangida akka halak na lomo rohana manamue. (Jaha Heber 13:16.) Didok Debata, tarmasuk do manamue i gabe bagian sian ulaonta manomba Ibana, tarlumobi molo taulahon i tu akka dongan na makkaporluhon pangurupion. (Jak. 1:27; 2:14-17) Alani i, dijujui Bibel do hita asa ‘burju manjalo angka dongan na asing’. (Rom 12:13) Molo lomo rohatta manamue, on patuduhon na tasarihon jala tahaholongi do akka dongan, jala lomo rohatta asa solhot tu nasida. Las do roha ni Jahowa molo olo hita mambagi sipanganon, siinumon, dohot tikkinta tu akka dongan. (1 Ptr. 4:8-10) Alai, adong do na mambahen hita gabe maol lao manamue.

15-16. (a) Boasa adong na so pos dope rohana lao manamue halak? (b) Aha do na mangurupi si Emmi gabe olo manamue?

¹⁵ Sipata olo do alani situasitta gabe dang pos rohatta lao manamue halak. Parrohahon ma pengalaman ni sahalak donganta na mabalu na margoar si Emmi. Tikki dang Sitindangi dope ibana, dang pola lomo rohana marsaor tu akka halak. Jala dihilala ibana tumagon do halak na asing na manamue, dang pola ikkon ibana.

¹⁶ Dung gabe Sitindangi si Emmi, muba ma cara marpikkirna. Mulai ma gabe lomo rohana manamue. Didok ibana, “Tikki dibangun Bale Harajaonnami, adong suami istri na naeng ro mangurupi. Disukkun sahalak sintua ma, ‘Boi do halak i manginap di jabum saleleng dua minggu?’ Huingot do songon dia Jahowa mamasu-masu sahalak borua na mabalu na sian Sarpat.” (1 Raj. 17:12-16) Gabe olo ma si Emmi manjalo nasida di jabuna. Pasu-pasu aha do na dapotna? Didok ibana, “Dang holan dua minggu halak i di jabu, alai gabe dua bulan do. Saleleng dua bulan i, gabe lam solhot ma hami.” Gabe lam solhot ma muse si Emmi tu akka dongan di huria. Saonari nungnga gabe perintis ibana, jala lomo do rohana manjalo akka dongan tu jabuna dung sae marbarita. Didok ibana muse, “Las do rohakku ala mangurupi akka dongan! Jala unggodang do muse pasu-pasu na hudapot ala mangulahon i.”​—Heb. 13:1, 2.

17. Aha ma na disadari si Lukas dohot istrina?

¹⁷ Ra saonari nungnga lomo rohatta manamue akka dongan. Alai, boi do gabe lam lomo muse rohatta manamue? Parrohahon ma pengalaman ni si Lukas dohot istrina. Lomo do roha ni nasida manamue. Somal do nasida mangundang natua-tuana, keluargana, ale-alena dohot pengawas wilayah tu jabu ni nasida. Alai didok si Lukas ma, “Baru pe disadari hami, holan halak na jonok tu hami do na diundang hami tu jabu saleleng on.” Jadi, aha ma na diulahon si Lukas dohot istrina?

18. Songon dia do si Lukas dohot istrina patuduhon lam lomo do roha ni nasida manamue?

¹⁸ Dipauba si Lukas dohot istrina ma cara marpikkir ni nasida. Dung dirimangi nasida poda ni Jesus na mandok, “Molo holan halak na mangkaholongi hamu do dihaholongi hamu, dia ma upa sijaloon muna?” (Mat. 5:45-47) Disadari nasida ma, porlu do maniru Jahowa na sai patuduhon haburjuonna tu jolma. Jadi diputushon nasida ma lao mangundang akka dongan na so hea dope diundang nasida. Didok si Lukas, “Massai dinikmati hami do pergaulan sisongon on. Gabe lam solhot ma hami tu Jahowa dohot tu akka dongan.”

19. Songon dia do caratta patuduhon molo hita sisean ni Jesus, jala aha ma na ikkon taulahon?

¹⁹ Nungnga taparsiajari songon dia do carana patuduhon holong tu akka dongan sian nasa roha. On boi mangurupi hita asa mardame, dang paimbar-imbarhon halak, jala asa rade manamue. Ikkon tapasiding do akka pikkiran na sala jala ikkon tahaholongi do akka donganta sian nasa roha. Molo taulahon i, gabe las ma rohatta jala tapatudu ma molo hita sisean ni Jesus.​—Joh. 13:17, 35.