Tutu do Molo Gabe Halak na Burju Boi Menjamin Bahagia Masa Depanta?

Sian najolo, godang do halak na marpikkir molo gabe halak na burju nasida boi do i mambahen bahagia masa depanna. Contohna, godang do halak na sian Asia na porsea tu ajaran ni sahalak guru jala sahalak filsuf na margoar Konghucu (551-479 SM). Didok ibana, “Aha na so lomo rohamuna dibahen halak tu hamu, unang ma bahen hamu songon i tu nasida.”a

AKKA NA DIULAHON GODANG HALAK

Godang do halak porsea, molo gabe halak na burju nasida boi do gabe bahagia ngolu ni nasida. Alani i, berupaya do nasida asa mangargai halak na asing, sopan, dang mangulahon akka ulaon na mambahen targanggu roha ni nasida. Jala diihutton nasida do akka aturan na dibahen tu nasida, songon di jabu, di sikkola, di parkarejoan, dohot manang na didia pe. Sahalak borua na margoar si Linh na tinggal di Vietnam mandok, “Najolo porsea do au, molo jujur au jala tulus pasti bahagia ma ngolukku.”

Sahalak borua mambagi sipanganon tu halak na pogos dohot tu tunawisma.

Adong do tong halak olo mangulahon na denggan, ala mangihutton ajaran ni agama ni nasida. Sahalak bawa na margoar si Hsu-Yun na tinggal di Taiwan mandok, “Najolo diajarhon do tu au, molo burju hita saleleng ngolutta, gabe bahagia do hita tikki dung mate. Alai molo jahat hita saleleng ngolutta, gabe tersiksa do hita molo dung mate.”

AHA DO HASILNA?

Sahalak borua naung loja jala marsak huhut mangabing anakna.

Memang, godang do manfaatna molo burju hita jala tabahen na denggan tu halak na asing. Alai godang do halak, nang pe burju tu halak na asing dang sai dapotna balos na denggan. Sahalak borua na margoar si Shiu Ping na tinggal di Hong Kong mandok, “Sai berupaya do au mambahen na denggan, jala berupaya do au asa denggan mangurus keluargakku. Alai, ditinggalhon suamikku do au rap dohot ianakkokku. Alani i gabe huboto ma, molo burju pe hita jala tabahen na denggan tu halak na asing, dang boi i na menjamin gabe bahagia ngolutta.”

Asing ni i, godang do akka halak na mangida, dang sude halak na ringgas beribadat halak na burju. Sahalak borua na margoar si Etsuko na tinggal di Jepang mandok, “Najolo, ringgas do au beribadat jala dohot do au gabe pengurus tu kegiatan ni akka naposo. Alai tarsonggot do au tikki huida akka halak na adong di agamakku, roa pangalahona, marlumba sai naeng mandapot kekuasaan, jala dipakke nasida do hepeng ni organisasi ni agamanami i tu kepentingan ni nasida sandiri.”

“Sai berupaya do au mambahen na denggan, jala berupaya do au asa denggan mangurus keluargakku. Alai, ditinggalhon suamikku do au rap dohot ianakkokku.”—SI SHIU PING, HONG KONG

Adong do akka halak na ringgas beribadat jala mangulahon akka na denggan na gabe kecewa. Alana, adong do akka na so denggan na terjadi tu nasida na mambahen susa ngolu ni nasida. Songon i ma na dihilala sahalak borua na margoar si Van na tinggal di Vietnam. Didok ibana, “Najolo, ganup ari do huboan buah, bunga, dohot sipanganon lao tu oppungku najolo naung mate. Didok rohakku, molo huulahon songon i, boi do i mambahen gabe bahagia masa depanku. Jotjot do huulahon akka na denggan. Saleleng martaon-taon, sai huulahon do sude akka ulaon na diajarhon agamakku. Alai nang pe huulahon songon i, marsahit na parah do suamikku jala mate do muse borukku na kuliah di luar negeri, hape poso dope ibana.”

BOASA DANG CUKKUP HOLAN GABE HALAK NA BURJU?

Memang, penting do gabe halak na burju. Alai dang gabe jaminan i boi mambahen bahagia masa depanta. Boasa? Pikkirhon ma aha na didok di Bibel.

DANG SUDE HALAK OLO MANGULAHON NA DENGGAN

“Boi do sega godang akka na denggan alani sahalak pardosa.”—PARJAMITA 9:18.

Nang pe berupaya hita asa gabe halak na burju, alai olo do adong na terjadi tu hita na mambahen hita susa alani tindakan ni akka halak na holan mamikkirhon dirina sandiri. Contohna saleleng pandemi, nungnga taihutton akka peraturan na dibahen pamaretta jala nungnga manjaga jarak. Alai ala adong akka halak na so olo mangihutton peraturan i, boi do gabe marsahit hita alani nasida.

BOI DO SALA PANDANGAN NI HALAK TARINGOT DIA NA SITTONG DOHOT NA SALA

“Adong do dalan songon na tigor di roha ni jolma, hape tu hamatean do ujungna.”—PODA 14:12.

Godang do halak na marpikkir, nungnga denggan akka na diulahon nasida i. Hape di pudian ni ari disadari nasida ma, sala do na diulahonna i. Nang pe naung disadari nasida na sala do i, alai ikkon tetap do dihilala nasida akibat ni na sala na diulahon nasida i.

DANG ADONG NA MAMBOTO AHA NA LAO MASA DI NGOLUTTA

“Dang diboto hamu songon dia ngolumuna sogot.”—JAKOBUS 4:14.

Nang pe burju sasahalak, boi do toppu ibana mate. Contohna, saleleng pandemi COVID-19, godang do akka relawan na mate ala mangurupi halak na asing. Asing ni i, parrohahon ma pengalaman ni sahalak borua na margoar si Liting na tinggal di Cina. Mate do bapakna ala kecelakaan mobil. Didok ibana, “Pekerja keras do bapakki, halak na serep roha, jala burju. Dang huboto aha alana boasa mate halak na burju. Tikki na terjadi kecelakaan i, holan bapakku do na mate.”

Jadi, asa boi bahagia masa depanta, dang cukkup holan gabe halak na burju. Molo songon i, aha do na boi menjamin asa bahagia masa depanta? Lao mamboto alusna, porlu do adong petunjuk sian sumber informasi na boi dihaporseai, na boi paboahon tu hita songon dia carana asa boi bahagia masa depanta. Didia do boi tadapot informasi i?

a Lao mamboto informasi tambahan taringot aha na diajarhon si Konghucu, ida ma bukku Pencarian Manusia akan Allah pasal 7 paragraf 31-35. Bukku on diterbitton Saksi Jahowa, jala adong do di www.jw.org/id.