Torus ma ‘Taihutton Hasittongan’

1. Aha do manfaatna molo jotjot tapaboa boasa olo hita gabe Saksi Jahowa?

“AHA do na mambahen hamu olo gabe Saksi Jahowa?” Sering do ra dibege hamu sukkun-sukkun on tikki marsitandaan dohot akka dongan. Lomo do rohatta mamboto songon dia akka donganta boi mananda Jahowa, jala lomo rohatta paboahon boasa olo hita gabe Saksi Jahowa. (Rom 1:11) Alana gabe dipaingot ma hita na massai arga do hasittongan i. Gabe bertekad ma hita “mangihutton hasittongan” jala mangulahon i di parngoluotta, asa tadapot pasu-pasu ni Jahowa jala tabahen las rohana.​—3 Joh. 4.

2. Aha do na lao tabahas di artikel on?

² Di artikel on tabahas ma boasa olo hita gabe Saksi Jahowa. Tabahas ma muse songon dia carana asa torus hita di hasittongan, ala massai arga do i. Artikel on mangurupi hita lam mangargai sude naung dilehon Jahowa lao manogu-nogu hita tu hasittongan. (Joh. 6:44) Jala lam bertekad ma hita mambagihon hasittongan i tu na asing.

BOASA IKKON TAARGAI “HASITTONGAN”

3. Boasa lomo rohatta gabe Saksi Jahowa?

³ Godang do alasanna boasa olo hita gabe Saksi Jahowa. Alasan na utama ala holong rohatta tu Jahowa. Sian Bibel taboto ma balga hian do huaso ni Jahowa. Ibana do Sitoppa langit dohot tano. Alai dang holan i, Bapakta na parholong do Ibana jala parduli do Ibana tu hita. (1 Ptr. 5:7) Taboto ma muse sian Bibel ‘burju jala parasi roha do Jahowa, lambat tarrimas, jala gok holong ni roha dohot hasittongan’ do Ibana. (2 Mus. 34:6) Dihaholongi Jahowa do muse hukum na tigor. (Jes. 61:8) Lungun do rohana mangida hita susa, alani i ma marjanji do Ibana lao pasaehon sude sitaononta. (Jer. 29:11) Pasti tarpaima do hita saut i! On ma alasanna boasa holong hian rohatta tu Jahowa.

4-5. Boasa dipatudos si Paulus janji taringot ari na naeng ro i songon jangkar?

⁴ Alasan na asing boasa olo hita gabe Saksi Jahowa, ala godang manfaat na tadapot sian hasittongan i. Misalna gabe taboto ma janji taringot ngolu na dumenggan di ari naeng ro. Massai arga do janji on. Apostel Paulus mandok, ‘Songon jangkar ni kapal do janji i di ngolutta na mambahen hita togu jala marpos ni roha.’ (Heb. 6:19) Sarupa songon jangkar na mambahen hot kapal di ingananna, janji na adong di Bibel pe mangurupi hita asa toktong tenang tikki marsitaonon hita.

⁵ Janji na dipaboa si Paulus di ayat on, i ma harapan lao mangolu salelengna di surgo tu halak Kristen na dimiahi tondi parbadia. Alai ayat on pe marlakku do tu halak Kristen na naeng mangolu salelengna di tano on. (Joh. 3:16) Takkas ma janji taringot hangoluan saleleng ni lelengna mambahen gabe martujuan ngolutta.

6-7. Manfaat aha do na dihilala si Yvonne ala nungnga diboto ibana hasittongan taringot ari na naeng ro?

⁶ Taida ma jo pengalaman ni donganta si Yvonne. Dang Saksi Jahowa natua-tuana. Tikki gelleng, mabiar hian do donganta on mate. Alana hea do dijaha ibana di sada bukku hata na mandok, “Na lao mate do sude jolma.” Jadi didok donganta on ma, “Alani hata i, gabe jotjot do au dang boi modom bornginna i mamikkiri aha na masa sogot. Sukkun-sukkun do rohakku, ‘Boasa ma holan piga-piga taon jolma mangolu? Aha do tujuanna iba mangolu di portibi on?’”

⁷ Dung remaja, marsiajar ma si Yvonne tu Saksi Jahowa. Didok ibana, “Gabe porsea ma au, adong do harapan mangolu salelengna di Paradeiso di tano on.” Aha do manfaatna dung diboto ibana hasittongan i? Didok ibana, “Nungnga renges be au modom tikki borngin, ala dang mabiar be au tu hamatean jala nungnga adong harapanku.” Pasti massai arga do hasittongan i di si Yvonne jala lomo rohana paboahon i tu na asing.​—1 Tim. 4:16.

8-9. (a) Aha do pengorbanan na dibahen sahalak bawa di perumpamaan ni Jesus i? (b) Sadia arga do hasittongan i di hamu?

⁸ Barita na uli taringot Harajaon ni Debata, termasuk do hasittongan na adong di Bibel. Dipatudos Jesus do i songon arta na buni. Di Mateus 13:44 didok, “Tudos do Harajaon banua ginjang i tu arta na buni di ladang. Adong ma sasahalak na mandapot i, alai ditanom ma muse. Alani las ni rohana, lao ma ibana manggadis sude artana jala dituhor ma ladang i.” Sasittongna dang na berencana bawa i mangalului arta i. Alai tikki diida ibana i, digadis ma sude artana asa dapotna arta na buni i. Boasa diulahon ibana i? Ala diboto ibana massai arga do arta i. Dao do ummarga i dibandingkon sude pengorbanan naung dibahen ibana.

⁹ Pasti songon bawa i do tong perasaanta dung mamboto hasittongan. Las do rohatta manomba Debata Jahowa jala mandapot harapan lao mangolu salelengna di Harajaon ni Debata. Ummarga do i sian manang aha pe na ditawarhon di portibi on. Jala dang sadia dope pengorbanan na tabahen, dibandingkon tu kesempatan boi marale-ale tu Debata Jahowa. Pasti las hian do rohatta mangulahon “lomo ni roha ni Jahowa”.​—Kol. 1:10.

10-11. Boasa olo si Michael mambahen perubahan na balga di ngoluna?

¹⁰ Godang do sian hita na mambahen pengorbanan na balga asa boi mambahen las roha ni Debata. Adong do sian hita na maninggalhon karejo na mantap. Na asing manguba cara pandangna tu hepeng asa unang berfokus mangalului hamoraon. Adong do muse na ikkon mambahen perubahan na balga di ngoluna, songon na diulahon si Michael. Natua-tuana dang Saksi Jahowa, jala tikki poso parkarate do ibana. Didok si Michael, “Ikkon torus do au latihan asa lam jago.” Alai dung marsiajar Bibel ibana, diboto si Michael ma sogo hian do roha ni Jahowa tu kekerasan. (Ps. 11:5) Denggan do cara ni guru studi ni si Michael mangurupi ibana. Didok si Michael, “Pasangan suami istri na mangurupi au marsiajar Bibel dang hea mamaksa au asa so markarate. Na diulahon nasida, torus mangajarhon hasittongan tu au.”

¹¹ Lam godang na diparsiajari si Michael taringot Jahowa, gabe lam balga ma holongna tu Jahowa. Terkesan do ibana mangida songon dia Jahowa marasi ni roha tu akka naposona. Ujungna diboto si Michael ma ikkon muba do ibana. Didok ibana, “Huhilala na paling maol huulahon, i ma maninggalhon karate. Alai huboto do molo hubahen songon i, pasti las do roha ni Jahowa. Jala dao do ummarga hubunganku tu Jahowa sian sude na hutinggalhon lao manomba Ibana.” Massai arga do hasittongan i di si Michael. Alani i ma gabe olo ibana mambahen perubahan na balga di ngoluna.​—Jak. 1:25.

12-13. Manfaat aha do na dihilala si Mayli dung marsiajar Bibel?

¹² Didok Bibel massai arga do hasittongan i. Dipatudos ma i songon sada lampu na mambahen tiur inganan na golap. (Ps. 119:105; Eps. 5:8) Donganta si Mayli sian Azerbaijan patuduhon na diargai ibana do hasittongan. Dang sarupa agama ni natua-tuana. Bapakna maragama Muslim, omakna maragama Jahudi. Didok ibana, “Porsea do au tu Debata, alai gabe sukkun-sukkun do rohakku, ‘Boasa ma ditoppa Debata jolma? Boasa susa ngolu ni jolma jala dung mate disiksa di api narokko?’ Godang halak mandok Debata do na mangarajai portibi on, jadi dirippu nasida lomo ni roha ni Debata do i. Gabe sukkun-sukkun ma muse rohakku, ‘Tutu do i? Memang las do roha ni Debata mangida jolma susa?’”

¹³ Torus do dilului si Mayli alus ni sukkun-sukkunna i. Sada tikki, pajuppang ma ibana dohot Saksi Jahowa. Jala mulai ma ibana marsiajar Bibel. Didok ibana, “Penjelasan na masuk akal na adong di Bibel mambahen au gabe halak na marlas ni roha. Sude na diajarhon di Bibel i mambahen dame perasaanku.” Pasti songon si Mayli do perasaanta. Las do rohatta mamuji Jahowa, Debata ‘na manjou hita kaluar sian na holom tu na tiur’.​—1 Ptr. 2:9.

14. Songon dia do asa lam bertekad hita mampartahatton hasittongan i? (Ida kotak “Ilustrasi na Asing”.)

¹⁴ Asing ni akka ilustrasi na tabahas nakkin, godang dope ilustrasi na manggombarhon sadia arga hasittongan i. Boi do ra talului i tikki belajar pribadi, asa lam taargai hasittongan i jala lam bertekad hita mampartahatton i.

CARA PATUDUHON NA TAARGAI HASITTONGAN I

15. Songon dia do carana patuduhon na taargai hasittongan i?

¹⁵ Asa lam taargai hasittongan i, ikkon ringgas ma hita marsiajar Bibel dohot akka publikasi na diparade organisasi. Jala dang soal nungnga sadia leleng hita manomba Jahowa, ikkon torus do hita marsiajar. Di terbitan ni Joujou Paboahon na parjolo hea do didok songon on, “Dos songon bunga na buni di ramba-ramba do hasittongan i. Godang do ajaran na sala di portibi on, jadi olo do ra maol mamboto dia na sittong. Alai molo torus hamu berupaya mangalului, boi do dapotmuna i . . . Unang ma pittor puas hamu molo dapotmuna sada bunga na bagak, i ma hasittongan i . . . Gariada ikkon torus do dilului hamu.” Tottu ikkon tabahen do pengorbanan lao mandapot hasittongan, alai godang do manfaatna molo taulahon i.

16. Aha do cara na dipakke hamu tikki belajar pribadi? (Poda 2:4-6)

¹⁶ Memang dang sude hita lomo rohana manjaha dohot marsiajar. Alai dipangido Jahowa do asa ‘sai talului’ hasittongan na adong di Bibel. (Jaha Poda 2:4-6.) Molo berupaya hita mangulahon i, pasti godang do manfaat na tadapot. On ma na dihilala si Corey. Tikki manjaha Bibel, berfokus do ibana tu sada-sada ayat. Didok ibana, “Hujaha ma surat na di toru, referensi silangna jala hubahen ma riset . . . Hasilna godang ma hal baru na huboto.” Memang dang sai sarupa cara na tapakke tikki belajar pribadi. Alai molo talehon tikki dohot upaya lao mamparsiajari Bibel, on patuduhon na taargai do hasittongan i.​—Ps. 1:1-3.

17. Boha do carana asa boi hita menerappon hasittongan i? (Jakobus 1:25)

¹⁷ Asa benar-benar bermanfaat hasittongan i, dang cukkup holan na marsiajar Bibel. Alai ikkon taulahon do i di ngolutta. Hasilna gabe tadapot ma las ni roha. (Jaha Jakobus 1:25.) Boha do carana asa boi hita menerappon hasittongan i? Sahalak donganta bawa paboahon, denggan do molo tapareso diritta tikki belajar pribadi. Tujuanna asa taboto nungnga taterappon na taparsiajari i, manang adong dope na ikkon tapadenggan sian diritta. Apostel Paulus mandok, “Molo nungnga togu haporseaotta, toktong ma taulahon songon naung taulahon saleleng on.”​—Plp. 3:16.

18. Aha do manfaatna molo torus hita “mangihutton hasittongan”?

¹⁸ Pikkirhon ma godang ni manfaat na tadapot molo torus hita “mangihutton hasittongan”. Gabe lam denggan ma ngolutta jala gabe las ma roha ni Jahowa dohot akka donganta. (Poda 27:11; 3 Joh. 4) Molo torus tapikkirhon on, pasti gabe lam bertekad hita asa torus mangargai jala menerappon hasittongan i di ngolutta.