Boi do Dapotmuna Las ni Roha na Sasittongna

1. Boasa tadok boi hita marlas ni roha molo tasomba Jahowa?

LAS ni roha na sasittongna i dang parsatokkinan, alai boi do tahilala i saleleng ni ngolutta. Songon dia carana? Di Jamita na di Dolok didok Jesus do, “Marlas ni roha ma na mamboto rikkot ni marale-ale tu Debata.” (Mat. 5:3) Diboto Jesus do tikki ditoppa jolma, dilehon do tu nasida keinginan lao mananda jala manomba Jahowa na manoppa nasida. Asing ni i, Debata na marlas ni roha do Jahowa. Berarti sude halak na melayani Ibana boi do tong marlas ni roha.​—1 Tim. 1:11.

2-3. (a) Sesuai tu hata ni Jesus, halak na songon dia do na boi marlas ni roha? (b) Aha do na lao tabahas di artikel on, jala boasa penting tabahas on?

² Dang ikkon jolo denggan situasi ni sasahalak asa boi ibana marlas ni roha. Di Jamita na di Dolok, didok Jesus boi do marlas ni roha halak “na marsak”. Bisa jadi marsak do ibana alani situasina na borat manang merasa bersalah alani dosana di tikki naung salpu. Didok Jesus do muse, “halak na manaon na haccit alani hasittongan” manang na “dileai” ala gabe murid ni Kristus pe, boi do marlas ni roha. (Mat. 5:4, 10, 11) Boasa boi marlas ni roha nasida nang pe susa situasina?

³ Sian hata ni Jesus i, taboto ma las ni roha na sasittongna dang bergantung tu situasitta. Alai las ni roha i bergantung tu hubungatta dohot Jahowa. (Jak. 4:8) Attong aha ma na porlu taulahon? Di artikel on naeng tabahas ma tolu langkah na ikkon taulahon asa boi dapotta las ni roha na sasittongna.

TAJAHA JALA TAPARSIAJARI MA BIBEL

4. Aha do langkah na parjolo asa boi dapotta las ni roha na sasittongna? (Psalmen 1:1-3)

⁴ LANGKAH 1: Ikkon tajaha jala taparsiajari do Hata ni Debata. Dipatudos Jesus do Hata ni Debata songon sipanganon. Ikkon mangan do jolma dohot binatang asa boi mangolu. Alai holan jolma do na boi manjaha Hata ni Debata, jala porlu do i di nasida. I do alana Jesus mandok, “Dang holan sian roti jolma boi mangolu, alai sian ganup hata na kaluar sian pamangan ni Jahowa.” (Mat. 4:4) Alani i, ikkon tajaha do Hata ni Debata tiap ari. Panurat Psalmen mandok, ‘Marlas ni roha ma halak na mangihutton patik ni Jahowa, jala na mangarimangi i arian nang borngin.’​—Jaha Psalmen 1:1-3.

5-6. (a) Akka aha do na boi taparsiajari sian Bibel? (b) Aha do manfaatna manjaha Bibel?

⁵ Holong hian do roha ni Jahowa tu hita. Marhite Bibel, dipaboa Jahowa do songon dia carana asa marlas ni roha hita. Gabe taboto ma aha do tujuanna hita ditoppa, aha na porlu taulahon asa jonok hita tu Jahowa jala asa disesa dosatta. Asing ni i, dipaboa do muse di Bibel janji ni Debata di ari na naeng ro. (Jer. 29:11) Molo taparsiajari sude hasittongan na adong di Bibel i, gabe marlas ni roha ma hita.

⁶ Disurat do muse di Bibel godang nasehat na marguna di parngoluotta siganup ari. Molo taihutton nasehat i, marlas ni roha ma hita. Molo metmet rohatta alani akka hasusaan na taadopi, talehon ma tikkitta manjaha Hata ni Debata jala mangarimangi isina. Songon na didok Jesus, “Halak na manangihon hata ni Debata jala na mangulahon hata i do na marlas ni roha!”​—Luk. 11:28.

7. Songon dia do carana asa botul-botul taattusi isi ni Bibel?

⁷ Porlu do taparade tikki asa boi taattusi aha na tajaha sian Bibel. Bayakkon ma jo situasi on. Adong ma na mangalehon sipanganon na tabo tu hamu. Alai ala adong na dipikkiri hamu manang lagi buru-buru hamu, gabe dang dinikmati hamu be na mangan i. Songon i ma tikki manjaha Bibel. Molo pahatophu hita manjaha Bibel, gabe dang taattusi na tajaha i. Jadi porlu do taparade tikki lao manjaha Bibel. Ikkon tabayakkon do situasina dohot peristiwa na adong disi jala tapikkirhon ma na tajaha i. Molo taulahon i, gabe las ma rohatta.

8. Songon dia do “naposo haposan” mandalatton tugas ni nasida? (Ida surat na di toru.)

⁸ Dipillit Jesus do “naposo haposan jala na marbisuk” lao paradehon godang petunjuk sian Bibel di tikki na pas asa toktong togu haporseaotta.b (Mat. 24:45) Berdasarkan isi ni Bibel do sude publikasi na diparade nasida. (1 Tes. 2:13) Akka publikasi i ma na mangurupi hita mangattusi cara marpikkir ni Jahowa na dipaboa di Bibel. Jadi ikkon torus do tajaha sude terbitan ni Joujou Paboahon, Dungo ma!, dohot akka artikel na adong di jw.org. Taparade ma bahan tu parpunguan tonga pokan dohot tu parpunguan di ujung ni minggu. Jala tatonton ma program JW Broadcasting^® na adong tiap bulan. Molo sai berusaha do hita manjaha jala mamparsiajari isi ni Bibel, boi ma taulahon langkah na paduahon na mangurupi hita mandapot las ni roha na sasittongna i.

TAULAHON MA STANDAR NI JAHOWA

9. Aha do langkah na paduahon asa boi dapotta las ni roha na sasittongna?

⁹ LANGKAH 2: Ikkon taulahon do standar ni Jahowa. Panurat Psalmen mandok, “Marlas ni roha ma halak na makkabiari Jahowa na mangihutton akka dalanna.” (Ps. 128:1) Molo tahabiari Jahowa, dang olo hita mangulahon akka na so dihalomohon rohana. (Poda 16:6) Sebalikna ikkon tabahen do sian nasa tolapta mangihutton standar ni Jahowa na dipaboa di Bibel. (2 Kor. 7:1) Gabe marlas ni roha do hita molo taulahon akka na dihalomohon Jahowa jala tahasogohon akka na dihasogohon Ibana.​—Ps. 37:27; 97:10; Rom 12:9.

10. Sesuai tu Rom 12:2, aha do na ikkon taulahon?

¹⁰ Jaha Rom 12:2. Pasti taboto do na marhak Jahowa manottuhon dia na sittong dohot na sala. Alai dang cukkup holan i. Ikkon olo do hita mangulahon standar ni Jahowa i. Pikkirhon ma jo on, ra diboto sasahalak do na marhak pamaretta manottuhon batas kecepatan berkendara di jalan raya. Alai molo dang olo ibana mangulahon i gabe pakancanghu ma ibana mamboan kendaraan. Jadi sian on taboto ma, ikkon tabuktihon do sian tindakanta na botul-botul hita porsea holan standar ni Jahowa do na boi mambahen hita marlas ni roha. (Poda 12:28) On ma dihilala si Daud tikki didok ibana tu Jahowa, “Dipatudu Ho do tu au dalan tu hangoluan. Marlas ni roha situtu do au ala lomo do roham mangida au. Jala sonang do rohakku saleleng ni lelengna ala di sabola kananmu do au.”​—Ps. 16:11.

11-12. (a) Aha do na so boi taulahon tikki metmet rohatta manang adong masalahta? (b) Songon dia do Pilippi 4:8 mangurupi hita mamillit hiburan?

¹¹ Tikki adong masalah na taadopi manang tikki metmet rohatta, lomo do rohatta mangulahon kegiatan na asing asa unang masalahta i na sai tapikkiri. Wajar do i, alai manat ma hita asa unang sappe mangulahon akka na dihasogohon Jahowa.​—Eps. 5:10-12, 15-17.

¹² Disuratna tu huria Pilippi, dipaingot si Paulus do halak Kristen asa toktong mamikkirhon ‘akka na sittong, . . . na badia, na mambahen halak marholong ni roha, . . . dohot akka na denggan’. (Jaha Pilippi 4:8.) Memang dang taringot hiburan na dipaboa si Paulus di ayat on. Alai prinsip na adong di ayat on boi mangurupi hita mamillit hiburan, songon ende, film, sijahaon, manang video game. Gabe taboto ma hiburan na songon dia do na sesuai tu lomo ni roha ni Jahowa dohot na dihasogohon rohana. Pasti lomo do rohatta mangihutton standar ni Jahowa. (Ps. 119:1-3) Gabe ias ma panggora ni rohatta jala boi ma taulahon langkah berikutna asa boi dapotta las ni roha na sasittongna.​—Ul. 23:1.

TAUTAMAHON MA IBADATTA TU JAHOWA

13. Aha do langkah na patoluhon asa boi dapotta las ni roha na sasittongna? (Johannes 4:23, 24)

¹³ LANGKAH 3: Tabahen ma ibadatta tu Jahowa gabe na paling penting di ngolutta. Ala Jahowa na manoppa hita, holan Ibana ma tasomba. (Pgk. 4:11; 14:6, 7) Jadi sai tabahen ma melayani Jahowa na paling penting di ngolutta. Jala taulahon ma i sesuai tu lomo ni roha ni Jahowa. Tasomba ma Ibana mangihutton panogu-noguan ni “tondi parbadia dohot hasittongan”. (Jaha Johannes 4:23, 24.) Lomo do rohatta molo diurupi tondi parbadia hita tikki manomba Jahowa asa sesuai ibadatta i tu hasittongan ni Bibel. Ikkon tetap do tabahen ibadatta tu Jahowa na paling penting di ngolutta, bahkan molo diorai pamaretta ibadatta. Saonari adong do lobi sian 100 donganta na dipenjarahon ala Saksi Jahowa nasida.c Nang pe songon i, toktong do nasida marlas ni roha. Torus do nasida martangiang, marsiajar Bibel, jala marbarita na uli taringot Debata dohot Harajaonna. Molo dianiaya hita, boi do hita toktong marlas ni roha ala taboto sai urupan ni Jahowa do hita jala pasti lehononna do upa tu hita.​—Jak. 1:12; 1 Ptr. 4:14.

KISAH NYATA

14. Aha do na masa tu donganta si Jovidon?

¹⁴ Adong do akka donganta na mangadopi situasi na borat alai toktong do nasida marlas ni roha ala diulahon nasida tolu langkah na tabahas nakkin. Parrohahon ma pengalaman ni donganta si Jovidon Bobojonov sian Tajikistan na marumur 19 taon. Ditolak ibana do dinas militer. Di tanggal 4 Oktober 2019 ditakkup ma ibana di jabuna, ditahan ma ibana saleleng piga-piga bulan, jala diperlakukan songon sahalak kriminal. Perlakuan na so adil tu donganta on dibaritahon do di piga-piga negara. Dipukkuli do ibana jala dipaksa asa mandokkon sumpah militer dohot mamakke seragam ni tentara. Dukkon i ditudu ma ibana bersala jala dipenjarahon ma ibana. Ujungna dapot amnesti ma ibana sian presiden jala dibebasson. Saleleng dianiaya ibana, torus do si Jovidon setia jala marlas ni roha do ibana. Boasa boi songon i? Ala diutamahon ibana do parale-aleonna tu Debata.

15. Songon dia do si Jovidon torus marsiajar taringot Jahowa nang pe dipenjara?

¹⁵ Saleleng dipenjara si Jovidon, torus do ibana marsiajar taringot Jahowa. Hape dang adong Bibel dohot publikasina di tikki i. Songon dia ma cara ni ibana marsiajar? Setiap dikirim akka donganna makanan tu ibana, disurat nasida do tong ayat harian di kantong makanan i. Gabe boi ma si Jovidon tiap ari manjaha Bibel dohot mangarimangi i. Dukkon bebas si Jovidon, dilehon ibana ma nasehat on tu akka dongan na so hea dope mangadopi penganiayaan: “Molo bebas dope hamu beribadat tu Jahowa, manfaatton ma kesempatan i. Pabagas ma parbinotoanmuna taringot Jahowa, jala torus ma manjaha Bibel dohot akka publikasi.”

16. Aha ma na torus dipikkirhon si Jovidon?

¹⁶ Diulahon donganta si Jovidon do standar ni Jahowa. Dang olo ibana mamikkirhon jala mangulahon na dihasogohon Jahowa. Sai torus do ibana fokus mamikkirhon aha na dihalomohon Debata. Contohna lomo do rohana mangida akka toppaan. Tiap manogot las do rohana mambege suara kicauan ni burung. Molo borngin las do rohana mangida bulan dohot akka bintang. Didok si Jovidon, “Akka toppaan ni Jahowa i mangurupi au martahan jala toktong marlas ni roha.” Molo taargai sude na dilehon Jahowa tu hita termasuk akka petunjuk na adong di Bibel, pasti boi do hita marlas ni roha jala toktong setia tikki adong hasusaan.

17. Molo sarupa situasitta songon si Jovidon, aha do manfaatna molo toktong hita setia? (1 Petrus 1:6, 7)

¹⁷ Manomba Jahowa do na uppetting di si Jovidon. Diboto ibana, penting hian mampartahatton kesetiaanna tu Debata. Diingot ibana do hata ni Jesus na mandok, “Jahowa Debatam do na ikkon sombaonmu jala ikkon holan tu Ibana do lehononmu ngolum.” (Luk. 4:8) Dipaksa komandan militer dohot akka tentara do si Jovidon asa maninggalhon agamana. Alai torus do martangiang si Jovidon ganup ari asa tetap setia jala dang menyerah. Nang pe diperlakukan tidak adil, torus do si Jovidon setia tu Jahowa. Hasilna, boi ma ibana marlas ni roha nang pe ditakkup, dipukkuli, jala dipenjarahon. Saonari lam togu do haporseaonna ala nungnga taruji.​—Jaha 1 Petrus 1:6, 7.

18. Songon dia do asa boi hita toktong marlas ni roha?

¹⁸ Diboto Jahowa do aha na ikkon taulahon asa boi hita botul-botul marlas ni roha. Molo taihutton tolu langkah na dipaboa di artikel on, boi ma hita toktong marlas ni roha nang pe mangadopi situasi na maol. Dung i boi ma tadok, “Marlas ni roha ma bangso molo Jahowa Debatana.”​—Ps. 144:15.