PARSIAJARAN 30
ENDE 36 Jaga ma Roham
Marsiajar sian Akka Raja di Israel
“Idaonmuna ma imbar ni halak na mangulahon na sittong dohot halak na mangulahon na jahat, imbar ni halak na manomba Debata dohot halak na so manomba Ibana.”—MAL. 3:18.
NA LAO DIBAHAS
Lao tabahas ma songon dia Jahowa mangida akka raja di Israel najolo, asa taboto aha na porlu taulahon lao pasonakkon rohana.
1-2. Aha do na dipaboa di Bibel taringot akka raja di Israel?
DIPABOA do di Bibel, adong lobi sian 40 bawa na mamaretta di Israel.a Terus terang do Bibel paboahon akka naung diulahon nasida. Adong do akka raja na burju na hea mangulahon na so denggan. Contohna Raja Daud. Didok Jahowa, “Si Daud naposokki, . . . diihutton ibana do akka dalanku sian nasa rohana, jala toktong do diulahon ibana lomo ni rohakku.” (1 Raj. 14:8) Alai, hea do si Daud mangalakkup dohot sahalak borua. Jala dibahen ibana do rencana asa dipamate suami ni borua i di parporangan.—2 Sam. 11:4, 14, 15.
2 Asing ni i, dipaboa Bibel do tong taringot akka raja na jahat na hea mangulahon na denggan. Contohna Raja Rehabeam. Bibel mandok, “diulahon [si Rehabeam] do na jahat” di adopan ni Jahowa. (2 Kron. 12:14) Alai, adong do akka na denggan na diulahon ibana. Misalna, dioloi ibana do paretta ni Jahowa asa unang mangalo sappulu marga di Israel na naeng mamillit raja na baru. Dipajongjong ibana do tong akka kota na marbenteng lao melindungi rakyatna sian musu.—1 Raj. 12:21-24; 2 Kron. 11:5-12.
3. Aha do na lao tabahas di artikel on?
3 Alai gabe adong ma sukkun-sukkun: Di adopan ni Jahowa, aha do na manottuhon sahalak raja setia manang na daong? Molo taboto alusna, gabe boi ma taattusi aha na porlu taulahon lao mambahen las roha ni Jahowa. Di artikel on, lao tabahas ma tolu na dipikkirhon Jahowa tikki naeng manottuhon sahalak raja setia manang na daong. Na parjolo, disomba ibana do Jahowa sian nasa rohana? Na paduahon, tutu do ibana bertobat sian dosana? Jala na patoluhon, torus do disomba ibana Jahowa marhite cara na sittong?
HAHOLONGI MA JAHOWA SIAN NASA ROHAMUNA
4. Aha do imbar ni akka raja na setia dohot na so setia?
4 Di adopan ni Jahowa, akka raja na mambahen las rohana, i ma na manomba Jahowa sian nasa roha.b Misalna taringot tu Raja Jehosapat, didok Bibel do, “halak na manomba Jahowa sian nasa rohana” do ibana. (2 Kron. 22:9) Taringot tu Raja Josia, Bibel mandok, ‘Dang hea dope adong raja na songon si Josia, na sian nasa rohana mulak tu Jahowa.’ (2 Raj. 23:25) Boha taringot Raja Salomo na mangulahon na jahat dung matua ibana? Bibel mandok, “Dang sian nasa rohana be ibana manomba Jahowa.” (1 Raj. 11:4) Disurat Bibel do muse taringot si Abiam, raja na so setia. Bibel mandok, “Dang sian nasa rohana ibana mangoloi Jahowa.”—1 Raj. 15:3.
5. Patorang ma aha do lapatanna manomba Jahowa sian nasa roha.
5 Attong, aha do lapatanna manomba Jahowa sian nasa roha? Halak na manomba Jahowa sian nasa roha dang manomba Ibana holan alani kewajiban. Alai alani holong ni rohana do umbahen na disomba ibana Jahowa, jala diulahon ibana do i saleleng ni ngoluna.
6. Aha do na ikkon taulahon asa toktong tasomba Jahowa sian nasa roha? (Poda 4:23; Mateus 5:29, 30)
6 Jadi aha do na ikkon taulahon lao maniru akka raja na makkaholongi Jahowa sian nasa roha? Unang ma taulahon akka ulaon na mambahen gale holongta tu Jahowa. Uppamana, manat ma tapillit aha na lao tatotton manang na lao taulahon di tikki santai. Jala manat ma tikki mamillit dongan asa unang gabe holongan di hepeng hita. Molo tasadari adong tubu di rohatta na boi mambahen gale holongta tu Jahowa, hatop ma tapasiding i.—Jaha Poda 4:23; Mateus 5:29, 30.
7. Boasa ikkon tapadao diritta sian akka ulaon na boi mambahen gale holongta tu Jahowa?
7 Unang ma taloas rohatta gabe tarbagi. Molo dang manat, boi do hita merasa molo sibuk hita melayani Jahowa, dang mungkin be taulahon akka ulaon na jahat. Alai rimangi ma: Tikki mohop ari, pasti godang do diinum hamu aek asa unang mauas. Alai aha do na boi terjadi molo tetap hamu di luar, jala hona mohop ni mata ni ari? Pasti gabe hatop do hamu mauas muse. Aha ma parsiajaranna? Dang sae holan mangulahon akka ulaon na mambahen hita jonok tu Jahowa. Dos songon hita na so olo leleng hona mohop ni mata ni ari, ikkon tapadao do diritta sian akka ulaon na mambahen gale holongta tu Jahowa.—Eps. 2:2.
IKKON BERTOBAT DO HITA SIAN AKKA DOSATTA
8-9. Boha do tanggapan ni Raja Daud dohot Raja Hiskia tikki dipasingot? (Ida sampul.)
8 Songon na didok di paragraf na parjolo, hea do dibahen Raja Daud dosa na balga. Alai tikki dipasingot Panurirang Natan ibana, serep do roha ni si Daud mangakkui kesalahanna i jala bertobat. (2 Sam. 12:13) Sian hata ni si Daud di Psalmen 51, boi ma taida na tutu do ibana bertobat. Dang berpura-pura si Daud manolsoli kesalahanna asa boi mangoto-otoi si Natan manang asa unang dihukum.—Ps. 51:3, 4, 17, superskripsi.
9 Raja Hiskia pe hea do mardosa tu Jahowa. Bibel mandok, “Gabe ginjang do rohana. Alani i, muruk ma Debata tu ibana, tu halak Juda, dohot tu halak Jerusalem.” (2 Kron. 32:25) Boasa gabe ginjang roha ni si Hiskia? Olo do ra ala nungnga dibahen Jahowa ibana mamora. Diurupi Jahowa do ibana manaluhon halak Asiria, jala dipamalum do ibana sian sahit na posi. Ginjang ni rohana i do ra na mambahen si Hiskia patuduhon sude artana tu halak Babel. Alani i, dipaboa Panurirang Jesaya ma na muruk do Jahowa tu si Hiskia. (2 Raj. 20:12-18) Alai songon si Daud, serep do roha ni si Hiskia mangakkui kesalahanna jala bertobat. (2 Kron. 32:26) Aha do hasilna? Di adopan ni Jahowa, “sai diulahon ibana do na sittong”.—2 Raj. 18:3.
Tikki Raja Daud dohot Raja Hiskia dipasingot, serep do roha ni nasida mangakkui kesalahanna i, jala bertobat do nasida (Ida paragraf 8-9)
10. Boha do tanggapan ni Raja Amasia tikki dipasingot?
10 Alai asing do molo Raja Amasia. Memang diulahon ibana do na sittong di jolo ni Jahowa, “alai dang sian nasa rohana ibana mangulahon i”. (2 Kron. 25:2) Aha do haroa na diulahon ibana? Dung diurupi Jahowa si Amasia manaluhon halak Edom, disomba ibana do akka debata ni nasida.c Dung i tikki dipasingot panurirang ni Jahowa ibana taringot i, dang olo ibana manangihon. Gariada disuru ibana do asa sip panurirang i.—2 Kron. 25:14-16.
11. Songon na disurat di 2 Korint 7:9, 11, aha do na ikkon taulahon asa diampuni Jahowa dosatta? (Ida gambar.)
11 Aha do na boi taparsiajari sian akka contoh on? Ikkon bertobat do hita sian akka dosatta. Marsitutu ma hita asa unang taulangi be kesalahan i. Alai, boha do sikapta molo dipasingot akka sintua hita nang pe tahilala dang pola serius kesalahan na tabahen? Unang ma hita merasa na so dihaholongi Jahowa be hita, manang na muruk do akka sintua tu hita. Taingot ma, akka raja na burju di Israel pe porlu do dipasingot jala dipissang. (Heb. 12:6) Jadi tikki dipasingot hita, (1) ikkon serep ma rohatta jala tajalo ma i, (2) muba ma hita, jala (3) toktong ma tasomba Jahowa sian nasa rohatta. Molo bertobat hita, pasti diampuni Jahowa do hita.—Jaha 2 Korint 7:9, 11.
Tikki dipasingot hita, (1) ikkon serep ma rohatta jala tajalo ma i, (2) muba ma hita, jala (3) toktong ma tasomba Jahowa sian nasa rohatta (Ida paragraf 11)f
IKKON TASOMBA DO JAHOWA MARHITE CARA NA SITTONG
12. Aha do perbedaan na takkas tarida sian akka raja na setia dohot na so setia?
12 Di adopan ni Jahowa, akka raja na setia, i ma akka raja na manomba Ibana marhite cara na sittong. Jala dijujui akka raja i do naposo ni Jahowa asa mangulahon na sarupa. Memang songon naung tabahas, hea do nasida mangulahon na sala. Alai berupaya do nasida asa holan manomba Jahowa, jala marsitutu do nasida manghancurhon akka debata na so sittong tikki mamaretta.d
13. Di adopan ni Jahowa, boasa Raja Ahab didok dang setia?
13 Attong, boasa didok Jahowa adong piga-piga raja di Israel na so setia? Memang, dang sai ulaon na jahat na diulahon nasida. Bahkan Raja Ahab na jahat pe hea do patuduhon serep ni roha, jala manolsoli do ibana ala terlibat di parmate ni si Nabot. (1 Raj. 21:27-29) Asing ni i, dibangun ibana do akka kota jala diurupi do halak Israel monang manaluhon akka musu. (1 Raj. 20:21, 29; 22:39) Alai adong do ulaon na massai jahat na diulahon si Ahab. Ala dipengaruhi istrina, gabe dijujui ibana do naposo ni Jahowa asa manomba debata na so sittong, jala dang hea ibana bertobat.—1 Raj. 21:25, 26.
14. (a) Di adopan ni Jahowa, boasa Raja Rehabeam didok dang setia? (b) Aha do na diulahon akka raja na so setia di Israel?
14 Saonari tabahas ma taringot raja na so setia, i ma si Rehabeam. Songon na didok di paragraf dua, godang do akka na denggan na diulahon ibana tikki mamaretta. Alai dung lam margogo harajaonna, dang diihutton ibana be Patik ni Jahowa, jala disomba ibana do akka debata na so sittong. (2 Kron. 12:1) Di pudian ni ari, disomba ibana do Jahowa huhut manomba akka debata na so sittong. (1 Raj. 14:21-24) Memang, dang holan si Rehabeam dohot si Ahab akka raja na manomba Jahowa marhite cara na so sittong. Sebenarna godangan raja di Israel manomba debata na so sittong do, jala dijujui nasida do rakyatna asa mangihutton nasida. Takkas ma, di adopan ni Jahowa massai penting do manomba Ibana marhite cara na sittong, jala i ma na manottuhon sahalak raja i setia manang na daong.
15. Boasa massai penting manomba Jahowa marhite cara na sittong?
15 Di adopan ni Jahowa, boasa massai penting cara ni akka raja i manomba Ibana? Sada alasanna i ma ala raja do na paling bertanggung jawab mangurupi rakyatna manomba Jahowa marhite cara na sittong. Jala molo disomba nasida akka debata na asing, gabe mura ma nasida mangulahon akka dosa na asing jala jahat tu donganna. (Hos. 4:1, 2) Asing ni i, akka raja di Israel dohot rakyatna nungnga dibaktihon tu Jahowa. Alani i molo disomba nasida akka debata na asing, Bibel mandok sarupa do i songon na mangalakkup. (Jer. 3:8, 9) Sasahalak na mangalakkup dang setia tu pasanganna jala mambahen massai haccit roha ni pasanganna. Suang songon i ma, molo dang setia halak Israel tu Jahowa jala manomba akka debata na asing, massai haccit do roha ni Jahowa dibahen nasida.e—5 Mus. 4:23, 24.
16. Di adopan ni Jahowa, aha do na paimbarhon halak na mangulahon na sittong dohot na jahat?
16 Jadi aha ma parsiajaranna tu hita? Saonari, ikkon manat do hita asa unang terlibat di akka ulaon na berkaitan tu agama na so sittong. Alai ikkon toktong do tasomba Jahowa marhite cara na dihalomohon rohana jala toktong sibuk manomba Ibana. Hea do dipatorang Panurirang Maleaki, aha do na dipikkirhon Jahowa tikki manottuhon sasahalak mangulahon na sittong manang na jahat. Didok ibana, “Idaonmuna ma imbar ni halak na mangulahon na sittong dohot halak na mangulahon na jahat, imbar ni halak na manomba Debata dohot halak na so manomba Ibana.” (Mal. 3:18) Pasti lomo do rohatta asa dianggap Jahowa hita halak na mangulahon na sittong. Alani i ikkon manat do hita. Unang ma taloas hagaleonta manang kesalahanta mambahen hita gabe dang olo be manomba Jahowa. Alana dosa na massai balga do molo dang olo be hita manomba Jahowa.
17. Boasa ikkon manat hita tikki naeng mamillit pasangan?
17 Molo lajang dope hamu jala adong rencanamuna naeng menikah, hata ni si Maleaki boi mangurupi hamu lao mamillit pasangan na denggan. Pikkirhon ma on: Mungkin adong do sifat na denggan na dipatudu sasahalak na dihalomohon rohamuna i. Alai dang sisomba Jahowa ibana. Attong di adopan ni Jahowa, halak na mangulahon na sittong do ibana? (2 Kor. 6:14) Molo menikah hamu dohot ibana, boi do ibana mangurupi hamu lam jonok tu Jahowa? Pikkiri ma muse: Bisa jadi adong do sifat na denggan na dipatudu akka istri ni Raja Salomo. Alai ala dang manomba Jahowa nasida, lam leleng gabe dijujui nasida ma si Salomo asa manomba akka debata na so sittong.—1 Raj. 11:1, 4.
18. Aha do na ikkon diajarhon natua-tua tu gelleng ni nasida?
18 Akka natua-tua, paboa ma taringot akka raja na disurat di Bibel lao mangurupi gellengmuna asa lam bertekad melayani Jahowa. Urupi ma nasida mangattusi molo di adopan ni Jahowa, sahalak raja na setia, i ma raja na manomba Jahowa sian nasa roha jala na manjujui rakyatna asa mangulahon na sarupa. Marhite hata dohot teladanmuna, urupi ma gellengmuna manjumolohon akka ulaon na mambahen nasida lam jonok tu Jahowa. Misalna marsiajar Bibel, ro tu parpunguan, dohot marbarita na uli. (Mat. 6:33) Molo dang diurupi hamu gellengmuna, boi ma nasida merasa holan alani mangihutton hamu do nasida gabe Saksi Jahowa. Akibatna, gabe dang penting be melayani Jahowa di nasida. Bahkan boi do gabe dang olo be nasida manomba Jahowa.
19. Aha do kesempatan na dilehon tu akka halak na maninggalhon Jahowa? (Ida ma kotak “Boi do Hamu Mulak tu Jahowa!”)
19 Alai molo adong sasahalak na maninggalhon Jahowa, na so boi be ibana mulak muse gabe ale-ale ni Jahowa? Daong. Boi do ibana bertobat jala mulak muse tu Jahowa. Asa boi mangulahon i, ikkon dipatudu ibana do serep ni roha jala rade manjalo bantuan sian akka sintua di huria. (Jak. 5:14) Memang godang do upaya na ikkon dibahen ibana. Alai ikkon diingot ibana do on: Umbalga do dapotna pasu-pasu molo mulak muse tu Jahowa dibandingkon tu upaya na dibahen ibana.
20. Molo tatiru akka raja na setia, songon dia do Jahowa mangida hita?
20 Jadi aha ma na boi taparsiajari sian akka raja di Israel? Tatiru ma akka raja na setia jala toktong ma tasomba Jahowa sian nasa rohatta. Marsiajar ma hita sian kesalahan na hea tabahen. Bertobat ma hita jala unang ma taulahon muse kesalahan na sarupa. Taingot ma, massai penting do manomba Jahowa marhite cara na sittong. Molo toktong hamu setia tu Jahowa, gabe halak na mangulahon na sittong ma hamu di adopan ni Ibana.
ENDE 45 Na di Bagasan Rohakku
a Di artikel on, hata “akka raja di Israel” maksudna sude raja na mamaretta naposo ni Jahowa, dang soal nasida mamaretta di harajaon dua marga di Juda, harajaon sappulu marga di Israel, manang mamaretta 12 marga i.
b HATA NA DIPATORANG: Di Bibel, jotjot do dipakke hata “roha” lao manggombarhon halak na songon dia hita sasittongna. Termasuk ma i akka na tapikkirhon, tahalomohon, pangalahotta, motifta, dohot tujuan ni ngolutta.
c Di tikki i, somal do akka raja na so halak Israel manomba akka debata ni bangso na ditaluhon nasida.
d Hea do diulahon Raja Asa dosa na balga. (2 Kron. 16:7, 10) Alai didok Bibel, diulahon si Asa do na denggan di adopan ni Jahowa. Memang tikki dipasingot panurirang ni Jahowa ibana, mulana dang olo ibana manangihon. Alai di pudian ni ari bertobat do ibana. Dibandingkon tu kesalahanna, unggodang do akka na denggan na diida Jahowa sian si Asa. Misalna, holan Jahowa do na disomba si Asa, jala marsitutu do ibana manghancurhon akka patung tikki mamaretta ibana.—1 Raj. 15:11-13; 2 Kron. 14:2-5.
e Dua paretta na parjolo di Patik ni si Musa mangorai halak Israel manomba manang aha pe asing ni Jahowa. Sian on boi ma taida na massai penting do manomba Jahowa marhite cara na sittong.—2 Mus. 20:1-6.
f HATORANGAN NI GAMBAR: Sahalak sintua na poso mangalehon nasehat tu donganta bawa na jotjot minum minuman beralkohol. Serep do roha ni donganta i, jala dijalo do nasehat i. Olo do ibana muba jala toktong setia manomba Jahowa.