Lomo do Roha ni Jahowa asa Bertobat Sude Jolma

1. Aha do na ikkon diulahon sasahalak na bertobat?

MOLO mangulahon dosa na balga sasahalak, ikkon muba do ibana manang bertobat. Didok di Bibel, sasahalak na bertobat ikkon sogo do rohana tu dosa na diulahon ibana, dang olo be mangulahon i, jala bertekad asa dang mangulangi kesalahanna i.—Ida hata “Muba” di Kamus ni Bibel Terjemahan Tano na Imbaru.

2. Boasa sude hita porlu bertobat? (Nehemia 8:​9-11)

² Sude do hita porlu bertobat. Boasa? Alana pasti tabahen do kesalahan ganup ari. Asing ni i, ala pinoppar ni si Adam dohot si Hawa do hita, diwarisson nasida do dosa dohot hamatean tu hita sude. (Rom 3:23; 5:12) Jadi sude do hita mardosa. Bahkan akka halak na togu haporseaonna pe, songon Apostel Paulus, dang sai mura mengendalihon diri asa dang mambahen kesalahan. (Rom 7:​21-24) Alai gabe sai metmet do rohatta ala mardosa hita? Dang songon i. Alana, Debata parasi roha do Debatanta Jahowa. Jala lomo do rohana asa marlas ni roha hita. Parrohahon ma pengalaman ni halak Jahudi di jaman ni si Nehemia. (Jaha Nehemia 8:​9-11.) Dang lomo roha ni Jahowa molo sai lungun roha ni nasida ala mangingot dosa ni nasida di tikki naung salpu. Alai, lomo do roha ni Jahowa asa marlas ni roha nasida manomba Ibana. Diboto Jahowa do, molo bertobat sasahalak, boi ma ibana marlas ni roha. Jadi i ma na diajarhon Jahowa tu hita. Molo bertobat hita sian akka dosatta, pos ma rohatta diampuni Jahowa do hita.

3. Aha do na lao tabahas di artikel on?

³ Di artikel on, lao tabahas ma taringot pertobatan. Na parjolo, tabahas ma aha do na diajarhon Jahowa tu halak Israel taringot pertobatan. Dung i, tabahas ma songon dia do Jahowa mangurupi naposona asa bertobat. Jala na parpudi, tabahas ma aha do na diajarhon Jesus Kristus tu akka siseanna taringot pertobatan.

NA DIAJARHON JAHOWA TU HALAK ISRAEL TARINGOT PERTOBATAN

4. Aha do na diajarhon Jahowa tu halak Israel taringot pertobatan?

⁴ Tikki dipillit Jahowa halak Israel gabe bangsona, dibahen Ibana do sada parjanjian tu nasida. Dilehon Jahowa do Patik asa diihutton halak Israel. Molo dioloi nasida Patik i, pasti dilindungi jala dipasu-pasu Jahowa do nasida. Didok Jahowa do, “Akka paretta na hupaboa tu hamu sadari on, dang na pola maol lao attusanmuna jala dang na pola maol i lao ulahononmuna.” (5 Mus. 30:​11, 16) Alai molo dang dioloi nasida i manang molo disomba nasida akka debata na asing, dang olo be Jahowa melindungi nasida jala gabe susa ma nasida. Nang pe songon i, adong dope kesempatan di nasida asa bertobat. Didok di Bibel, ‘Mulak ma hamu tu Jahowa Debatamuna, jala tangihon ma Ibana.’ (5 Mus. 30:​1-3, 17-20) Jadi molo bertobat nasida, pasti olo do Jahowa jonok muse jala mangalehon pasu-pasu tu nasida.

5. Aha do buktina dang menyerah Jahowa mangurupi akka naposona? (2 Raja-Raja 17:​13, 14)

⁵ Alai, mulak-ulak do halak Israel mangalo tu Jahowa. Disomba nasida do akka debata na so sittong, jala diulahon nasida do akka na jahat. Akibatna, gabe susa ma nasida. Alai, torus do berupaya Jahowa mangurupi nasida asa mulak muse manomba Ibana. Mulak-ulak do disuru Jahowa akka panurirangna lao pasingotton bangso i asa bertobat, jala manomba Ibana muse sian nasa roha ni nasida.—Jaha 2 Raja-Raja 17:​13, 14.

6. Marhite akka panurirang, songon dia do Jahowa mangurupi akka naposona lao mamboto na massai penting do pertobatan i? (Ida gambar.)

⁶ Jotjot do disuru Jahowa akka panurirangna lao pasingotton jala mamissang akka naposona. Misalna, marhite si Jeremia, didok Jahowa do, “Mulak ma ho ale Israel naung manimbil . . . Dang na lao muruk be Au tu ho, ai setia do Au . . . Dang na pasombuonku sogo rohakku tu ho saleleng ni lelengna. Alai akkui hamu ma salamuna. Ai nungnga mangalo hamu tu Jahowa.” (Jer. 3:​12, 13) Marhite si Joel, didok Jahowa do, “Mulak ma hamu tu Au sian nasa rohamuna.” (Joel 2:​12, 13) Disuru Jahowa do muse si Jesaya mandok, “Paias hamu ma dirimuna, bolokkon hamu ma hajahatonmuna i sian jolokku, unang be ulahon hamu na jahat.” (Jes. 1:​16-19) Jala marhite si Hesekiel, didok Jahowa do, “Dang lomo rohakku molo mate parjahat i . . . Unlomo do rohakku molo muba ibana sian pangalahona na jahat jala toktong mangolu. Dang lomo rohakku molo mate manang ise pe . . . Alani i, muba ma hamu jala toktong ma hamu mangolu.” (Hes. 18:​23, 32) Massai las do roha ni Jahowa molo bertobat akka jolma. Alana lomo do rohana asa mangolu salelengna nasida. Jadi Jahowa dang paimahon jolo bertobat naposona, baru pe dilehon Ibana bantuan. Saonari taida ma piga-piga contoh na asing.

7. Sian contoh ni Panurirang Hosea dohot istrina, aha do na diajarhon Jahowa tu akka naposona?

⁷ Parrohahon ma aha do na diajarhon Jahowa tu halak Israel marhite na masa tu Panurirang Hosea dohot istrina, si Gomer. Mangalakkup do si Gomer dohot piga-piga bawa, jala ditinggalhon do si Hosea. Adong dope kesempatan di si Gomer asa diampuni? Didok Jahowa siboto roha i do tu si Hosea, “Lao ma ho, haholongi ma muse istrim naung mangalakkup i, na dihaholongi akka bawa na asing i. Haholongi ma ibana dos songon Jahowa makkaholongi bangso Israel, nang pe disomba nasida akka debata na asing.” (Hos. 3:1; Poda 16:2) Tikki i mangalakkup dope istri ni si Hosea. Alai disuru Jahowa do si Hosea asa mengampuni istrina i jala manjalo ibana muse gabe istrina.a Sian contoh on, lomo do roha ni Jahowa asa diboto bangsona i songon dia perasaanna tu nasida. Nang pe diulahon bangso i dope dosa na balga, holong dope roha ni Jahowa tu nasida. Torus do disuru Jahowa akka panurirangna lao mangurupi nasida asa bertobat jala muba. Sian contoh on takkas ma taida, diboto Jahowa do sude na adong di roha ni sasahalak. Nang pe diulahon sasahalak dope dosa na balga, sai dilului Jahowa do cara lao mangurupi ibana asa bertobat. (Poda 17:3) Saonari, taida ma songon dia cara ni Jahowa mangulahon i.

SONGON DIA DO JAHOWA MANGURUPI AKKA NAPOSONA ASA BERTOBAT?

8. Songon dia do cara ni Jahowa mangurupi si Kain asa olo bertobat? (1 Musa 4:​3-7) (Ida gambar.)

⁸ Anak siakkangan ni si Adam dohot si Hawa do si Kain. Alani i nungnga mardosa si Kain mulai sian tubu ibana. Nungnga adong kecenderungan di dirina lao mangulahon na jahat. Didok do di Bibel, ‘Parniulaon ni si Kain i jahat do.’ (1 Joh. 3:12) Alani i do ra ‘dang lomo roha ni Jahowa mangida si Kain dohot peleanna’. Alai dang dipauba si Kain pangalahona, gariada gabe ‘murhing do bohina jala muruk situtu ma ibana’. Aha ma na diulahon Jahowa? (Jaha 1 Musa 4:​3-7.) Molo tajaha di Bibel, denggan jala lambok do Jahowa makkatai tu si Kain. Didok Jahowa molo berupaya si Kain mangulahon na denggan, pasti dipasu-pasu do ibana. Molo torus ibana muruk, boi do gabe diulahon ibana dosa na balga. Alai dang ditangihon si Kain hata ni Jahowa. Dang diargai ibana upaya ni Jahowa lao mangurupi ibana asa bertobat. Ala songon i tanggapan ni si Kain, na gabe so olo be Jahowa mangurupi halak na asing asa bertobat? Daong!

9. Songon dia do Jahowa mangurupi si Daud asa bertobat?

⁹ Taparrohahon ma contoh ni Raja Daud. Massai holong do roha ni Jahowa tu ibana. Didok Jahowa do si Daud ‘halak na boi mambahen las rohana’. (Ul. 13:22) Alai diulahon si Daud ma dosa na massai balga. Mangalakkup do ibana jala mambunu. Menurut Patik ni si Musa, ikkon dipamate do si Daud. (3 Mus. 20:10; 4 Mus. 35:31) Alai lomo do roha ni Jahowa mangurupi si Daud asa bertobat.b Disuru Jahowa ma Panurirang Natan manjuppangi si Daud, nang pe di tikki i dang diakkui si Daud dope dosana jala dang bertobat dope. Dipaboa si Natan ma sada ilustrasi na mangurupi si Daud menyadari kesalahanna. Gabe diboto si Daud ma nga massai haccit roha ni Jahowa dibahen ibana, jala bertobat ma ibana. (2 Sam. 12:​1-14) Dibahen si Daud ma psalmen na patuduhon disolsoli ibana do kesalahanna i. (Ps. 51, superskripsi) Godang do halak na hea mangulahon dosa na balga gabe tarapul rohana tikki manjaha psalmen ni si Daud i. Jala gabe taronjar ma roha ni nasida lao bertobat. Pasti las situtu do rohatta mamboto na diurupi Jahowa do si Daud asa bertobat.

10. Boha do perasaanmuna mamboto na sabar do Jahowa jala rade mengampuni hita?

¹⁰ Sogo do roha ni Jahowa mangida sude ulaon na jahat manang dosa. (Ps. 5:​4, 5) Alai nang pe jolma pardosa hita, holong do roha ni Jahowa tu hita. Jala tikki tabahen kesalahan, lomo do rohana mangurupi hita. Bahkan, nang pe mangulahon dosa na massai balga sasahalak, sai berupaya do Jahowa mangurupi ibana asa bertobat jala jonok muse hubunganna tu Ibana. Pasti tarapul do rohatta mamboto na rade do Jahowa mengampuni dosatta. Molo tarimangi songon dia Jahowa patuduhon kesabaran jala rade mengampuni hita, pasti gabe bertekad do hita asa toktong setia tu Ibana, jala pittor bertobat tikki mambahen kesalahan. Saonari, tabahas ma aha do na diajarhon Jesus tu akka siseanna taringot pertobatan.

NA DIAJARHON JESUS TARINGOT PERTOBATAN

11-12. Ilustrasi aha do na dipakke Jesus lao patuduhon na sai rade do Jahowa mengampuni hita? (Ida sampul.)

¹¹ Di taon 29 M, ro ma Messias tu portibi on. Songon naung tabahas di artikel sebelumna, disuru Jahowa do si Johannes Pandidi dohot Jesus Kristus mangajarhon na massai penting do pertobatan i.—Mat. 3:​1, 2; 4:17.

¹² Saleleng pelayananna di tano on, diajarhon Jesus do tu akka halak na sai rade do Jahowa mengampuni hita. Misalna, dipaboa Jesus do ilustrasi taringot anak na mago. Lao ma anakna sian jabu ni bapakna, jala diulahon ibana ma dosa na balga. Alai dung piga-piga leleng, “disadari” ibana do kesalahanna, jala mulak ma ibana tu jabu ni bapakna. Songon dia do tanggapan ni bapakna? Didok Jesus, ‘Sian na dao dope, nungnga diida bapakna ibana. Gabe asi ma roha ni bapakna. Marlojong ma ibana, dihaol, jala diumma ma anakna.’ Dang berharap anakna i asa diampuni. Dipangido ibana do tu bapakna atik na boi do ibana gabe hatoban di jabu ni bapakna. Alai rade do bapakna mengampuni ibana. Dijou do ibana ‘anakkon’, jala ditogihon asa mulak tu jabu. Didok bapakna do, “Naung mago hian do ibana, alai nungnga juppang be.” (Luk. 15:​11-32) Tikki di surgo Jesus, pasti jotjot do diida ibana Bapakna patuduhon asi ni roha, jala hatop mengampuni akka halak na bertobat. Dipakke Jesus do ilustrasi on lao paboahon Debata parasi roha do Jahowa i. Pasti tarapul do rohatta mamboto on!

13-14. Aha do na diattusi si Petrus taringot pertobatan, jala songon dia do ibana mangajarhon i tu na asing? (Ida gambar.)

¹³ Taida ma pengalaman ni Apostel Petrus. Marsiajar do ibana sian Jesus na sai rade do Jahowa mengampuni halak na bertobat. Jotjot do si Petrus mambahen kesalahan, alai rade do Jesus mengampuni ibana. Misalna, hea do si Petrus mansoadahon Jesus sappe tolu hali. Jala gabe marsak hian ma ibana alani kesalahanna i. (Mat. 26:​34, 35, 69-75) Alai dung hehe Jesus, lao ma Jesus manjuppangi si Petrus tikki sahalakna. (Luk. 24:​33, 34; 1 Kor. 15:​3-5) Diboto Jesus do nungnga bertobat be si Petrus. Jala lomo do roha ni Jesus paposson roha ni si Petrus, nungnga diampuni be ibana.

¹⁴ Balga do manfaat na dihilala si Petrus ala bertobat jala diampuni dosana. Alani i, gabe boi ma ibana mangajarhon taringot on tu na asing. Misalna dung sae perayaan Pentakosta, dipasahat si Petrus ma jamita tu halak Jahudi na so porsea. Takkas do didok ibana, alani nasida do umbahen na dipamate Messias. Alai dukkon i didok si Petrus do tu nasida, “Alani i, muba ma hamu jala mulak ma hamu tu Debata asa disesa dosamuna. Molo diulahon hamu songon i, bahenon ni Jahowa ma hamu margogo.” (Ul. 3:​14, 15, 17, 19) Didok si Petrus molo tutu do sasahalak bertobat, ikkon muba do ibana. Artina, ikkon diuba ibana do cara marpikkirna na sala, dang diulahon be na jahat, jala diulahon ma akka na mambahen las roha ni Jahowa. Dipaboa si Petrus do muse, molo tutu do nasida bertobat, pasti diampuni Jahowa do nasida. Hira na dihapus Jahowa ma dosa ni nasida i sappe dang tarida be. Marpulu taon dukkon i, dipaboa si Petrus do muse tu akka donganna, “Sabar do [Jahowa] tu hamu, ala dang lomo rohana diripasson manang ise pe, alai naeng ma sude jolma marhamubaon.” (2 Ptr. 3:9) Jadi nang pe massai balga dosatta, rade do Jahowa mengampuni hita molo bertobat hita. Pasti las situtu do rohatta mamboto on!

15-16. (a) Aha do na diattusi si Paulus taringot pengampunan? (1 Timoteus 1:​12-15) (b) Aha do na lao tabahas di artikel na mangihut?

¹⁵ Taida ma muse pengalaman ni si Paulus na sian Tarsus. Massai godang do hajahaton na diulahon ibana. Dianiaya ibana do halak Kristen di abad na parjolo. Godangan halak Kristen di tikki i marpikkir dang na lao muba si Paulus. Alai diboto Jesus, boi do ibana muba jala bertobat. Diida Jesus dohot Jahowa do akka sifat ni si Paulus na denggan. Didok Jesus do, “Nungnga hupillit ibana.” (Ul. 9:15) Bahkan dibahen Jesus do sada mukjizat lao mangurupi si Paulus asa bertobat. (Ul. 7:58–8:3; 9:​1-9, 17-20) Dung bertobat jala gabe halak Kristen si Paulus, ditugasson Jesus do ibana gabe apostel. Jotjot do dipaboa si Paulus na massai diargai ibana do asi ni roha dohot haburjuon na dipatudu Jahowa dohot Jesus tu ibana. (Jaha 1 Timoteus 1:​12-15.) Didok si Paulus do tu akka donganna, ‘Burju do Debata mangurupi hamu asa muba hamu.’—Rom 2:4.

¹⁶ Sada tikki, dibege si Paulus ma barita taringot sahalak bawa na mangulahon seks na so patut, na toktong dope dipasombu di huria Korint. Attong, aha do na dipaboa si Paulus tu akka dongan na disi? Sian surat ni si Paulus, boi ma taboto songon dia Jahowa patuduhon holong tikki mamissang naposona, jala patuduhon asi ni roha tikki bertobat nasida. Dung i, lao taparsiajari ma boha carana maniru Jahowa. Di artikel na mangihut, tabahas ma aha do na masa tu huria Korint.