Sukkun-Sukkun sian na Manjaha

Ise do “suru-suruan na pinillit ni Debata” na didok di 1 Timoteus 5:21?

Di surat ni si Paulus tu si Timoteus naung gabe sintua di tikki i, didok ibana do, “Di jolo ni Debata, di jolo ni Kristus Jesus, dohot di jolo ni suru-suruan na pinillit ni Debata, huparettahon ma tu ho asa diihutton ho tudu-tudu on jala unang paimbar-imbar jolma tikki mangulahon on.”—1 Tim. 5:21.

Dang mungkin “suru-suruan na pinillit ni Debata” i si 144.000 halak na miniahan. Boasa? Alana tikki dibahen si Paulus suratna on tu si Timoteus, dang adong dope akka apostel dohot akka na miniahan na asing naung dipahehe tu surgo.—1 Kor. 15:​50-54; 1 Tes. 4:​13-17; 1 Joh. 3:2.

Asing ni i, dang mungkin “suru-suruan na pinillit ni Debata” on suru-suruan na mangalo tu Debata di jaman ni si Noak. Alana didukung nasida do Sibolis jala gabe suru-suruan na jahat ma nasida. Jala didok Jesus ma musuna do nasida. (1 Mus. 6:2; Luk. 8:​30, 31; 2 Ptr. 2:4) Di ari na naeng ro, lao diratte ma nasida di lombang na massai bagas saleleng 1.000 taon. Dung i, diripasson ma nasida rap dohot Sibolis.—Jud. 6; Pgk. 20:​1-3, 10.

Jadi “suru-suruan na pinillit ni Debata” i pasti ma akka suru-suruan na setia tu ‘Debata dohot Kristus Jesus’.

Massai godang do suru-suruan na setia. (Heb. 12:​22, 23) Jala marasing-asing do tugas na dilehon Jahowa tu nasida. (Pgk. 14:​17, 18) Contohna, hea do disuru Jahowa sada suru-suruan pamatehon 185.000 tentara ni Asiria. (2 Raj. 19:35) Adong do muse na ditugasson lao “pakaluarhon sian [Harajaon ni Jesus] sude na mambahen na asing mardosa dohot akka halak na mangalanggar patik”. (Mat. 13:​39-41) Dung i, adong do na ditugasson lao papunguhon “akka na tarpillit” na lao tu surgo. (Mat. 24:31) Jala adong do na disuru lao ‘manogu-nogu hita di sude dalanta’.—Ps. 91:11; Mat. 18:10; bandingkon tu Mateus 4:11; Lukas 22:43.

Jadi “suru-suruan na pinillit ni Debata” na disurat di 1 Timoteus 5:21 i, olo do ra akka suru-suruan na ditugasson lao mangurupi akka huria Kristen. Boi ma taboto taringot i molo tajaha akka ayat na asing di bindu 5 i. Disi si Paulus lagi mamodai halak Kristen di tikki i asa sangap dibahen nasida tu akka sintua. Alai akka sintua pe ikkon denggan do mandalatton tanggung jawabna, jala ‘unang paimbar-imbarhon jolma’. Dung i muse, andorang so mambahen keputusan, ikkon manat do i dipikkirhon nasida. Didok si Paulus, ikkon diihutton akka sintua do nasehat on. Alana “di jolo ni Debata, di jolo ni Kristus Jesus, dohot di jolo ni suru-suruan na pinillit” i do nasida mandalatton tugas ni nasida. Jadi sian on taboto, marragam do tugas ni akka suru-suruan. Adong do na mangurupi akka huria Kristen, manjaga akka naposo ni Debata, mangawasi ulaon marbarita, jala mangalehon laporan tu Jahowa.—Mat. 18:10; Pgk. 14:6