Tiru ma Pikkiran ni Jahowa Dohot Jesus

1-2. (a) Aha do lapatanna makkaholongi Jahowa? (b) Songon dia Jesus patuduhon na dihaholongi ibana Jahowa sian nasa pikkiranna?

HEA DO dipaboa Jesus paretta ni Debata na dia do na uppetting. Didok Jesus, “Ikkon haholonganmu do Jahowa Debatam sian nasa roham, sian nasa ngolum, sian nasa gogom, dohot sian nasa pikkiranmu.” (Luk. 10:27) Jadi sude na adong di hita ikkon talehon do i tu Jahowa, ikkon benar-benar tahaholongi do Jahowa. Tarida ma i sian aha na tahalomohon, aha na taulahon, dohot aha na tapikkirhon. Asa boi taulahon i, ikkon berupaya do hita maniru pikkiran ni Jahowa. Alai memang, dang boi takkas taattusi sude pikkiran ni Jahowa. Alai, boi do taattusi i molo taparsiajari “pikkiran ni Kristus”. Alana, sempurna do Jesus maniru pikkiran ni Bapakna.—1 Kor. 2:16.

² Takkas do diattusi Jesus aha na dipangido Jahowa sian ibana jala berupaya do ibana mangulahon i nang pe ikkon marsitaonon. Boasa olo Jesus mangulahon i? Ala lomo rohana mambahen las roha ni Jahowa. Jadi sian on takkas ma taboto, dihaholongi Jesus do Jahowa sian nasa pikkiranna.

3. (a) Aha do na diparsiajari Apostel Petrus sian Jesus? (b) Aha do na dipangido si Petrus asa diulahon halak Kristen di tikki i? (1 Petrus 4:1)

³ Takkas do diattusi si Petrus dohot akka apostel na asing pikkiran ni Jesus alana leleng do nasida rap dohot Jesus. Tottu sada kesempatan na istimewa do i di nasida. Alani i ma dijujui si Petrus halak Kristen di tikki i asa paradehon diri ni nasida, asa songon Kristus pikkiran ni nasida. (Jaha 1 Petrus 4:1.) Di bahasa aslina, hata “parade hamu ma dirimuna” patuduhon sahalak tentara na paradehon sinjatana lao marporang. Jadi molo tatiru pikkiran ni Jesus, hira na taparade ma sinjatatta asa boi taalo keinginan na sala dohot pengaruh na dibahen Sibolis di portibi on.—2 Kor. 10:​3-5; Eps. 6:12.

4. Aha do na lao tabahas di artikel on?

⁴ Di artikel on, lao tabahas ma songon dia pikkiran ni Jesus jala boha do caratta lao maniru ibana. Dung i, tabahas ma songon dia carana (1) maniru pikkiran ni Jahowa na mambahen hita marsada dohot akka dongan, (2) asa serep rohatta, dohot (3) asa marroha hita jala toktong mangandalhon Jahowa.

TIRU MA PIKKIRAN NI JAHOWA

5. Tikki sadihari do si Petrus dang maniru pikkiran ni Jahowa?

⁵ Hea do sada tikki dang ditiru si Petrus pikkiran ni Jahowa. Tikki i, nungnga dipaboa Jesus tu akka apostelna na ikkon lao do ibana tu Jerusalem, na lao ditakkup pamimpin agama ma ibana disi, dianiaya jala dipamate. (Mat. 16:21) Didok roha ni si Petrus dang mungkin pasombuon ni Jahowa marsitaonon Jesus sahat tu na mate. Alana diboto si Petrus, Jesus do Messias na lao paluahon naposo ni Debata. (Mat. 16:16) Jadi didok si Petrus ma tu Jesus, “Asi ma roham tu dirim Tuan. Dang na lao masa i tu ho.” (Mat. 16:22) Ala dang ditiru si Petrus pikkiran ni Jahowa, gabe dang sadalan be pikkiranna tu pikkiran ni Jesus.

6. Aha do buktina na ditiru Jesus pikkiran ni Jahowa?

⁶ Takkas do diattusi Jesus pikkiran ni Bapakna jala sempurna do ibana maniru i. Didok Jesus ma tu si Petrus, “Lao ma ho tu pudikku Bolis! Batu partuktukan do ho di au, ai dang pikkiran ni Debata dipikkirhon ho, pikkiran ni jolma do.” (Mat. 16:23) Takkas do diattusi Jesus, na ikkon marsitaonon do ibana sahat tu na mate lao mangulahon lomo ni roha ni Jahowa. Alani i ma dang setuju ibana tu hata ni si Petrus i, nang pe alani holong ni roha ni si Petrus do umbahen na didokkon ibana songon i. Sian on gabe diboto si Petrus ma, ikkon sadalan do pikkiranna tu pikkiran ni Debata. Hita pe boi mandapot parsiajaran sian on.

7. Aha do buktina na ditiru si Petrus pikkiran ni Jahowa? (Ida sampul.)

⁷ Di pudian ni ari, ditiru si Petrus do pikkiran ni Jahowa. Sian dia taboto? Di tikki i, dilehon Jahowa do kesempatan tu akka halak sian bangso na asing asa boi gabe naposona. Disuru Jahowa ma si Petrus asa marbarita tu si Kornelius. Pasti dang mura di si Petrus mangulahon tugas on. Boasa? Alana di tikki i, dang olo halak Jahudi berurusan tu halak na sian bangso na asing. Alai dung diattusi si Petrus songon dia pandangan ni Jahowa taringot halak sian bangso na asing, rade do si Petrus manguba cara pandangna. Jadi tikki dipangido si Kornelius asa ro si Petrus tu jabuna, pittor olo do si Petrus ro tusi. (Ul. 10:​28, 29) Marbarita ma si Petrus tu si Kornelius dohot tu keluargana jala tardidi ma nasida sude. Si Kornelius on ma halak na parjolo sian bangso na asing na gabe halak Kristen.—Ul. 10:​21-23, 34, 35, 44-48.

8. Songon dia do hita patuduhon na sadalan pikkiranta tu pikkiran ni Jahowa? (1 Petrus 3:​8, surat na di toru)

⁸ Martaon-taon dukkon i, dijujui si Petrus do halak Kristen di tikki i asa “sapikkiran”. (Jaha 1 Petrus 3:​8, surat na di toru.) Boha do cara mangulahon i? Tatiru ma pikkiran ni Jahowa na taparsiajari sian Bibel. Misalna, dijujui Jesus do akka siseanna asa manjumolohon Harajaon ni Debata. (Mat. 6:33) Ala mangihutton hata ni Jesus i, adong do ra sasahalak di huriamuna na mamillit lao merintis manang dohot tu dinas sepenuh waktu. Molo songon i, patogu ma roha ni nasida asa semangat nasida mangulahon i. Unang ma tadokkon hata na boi mambahen metmet roha ni nasida manang gabe dang semangat.

PATUDU MA SEREP NI ROHA

9-10. Aha do buktina na serep do roha ni Jesus?

⁹ Di borngin andorang so mate Jesus, diajarhon ibana do tu si Petrus dohot tu akka apostel na asing na massai penting patuduhon serep ni roha. Di tikki i, disuru Jesus do si Petrus dohot si Johannes paradehon inganan dohot akka na porlu tusi. Alana naeng rap mangan do nasida jala i ma tikki na parpudi nasida rap mangan dohot Jesus andorang so mate ibana. Termasuk do ra ikkon diparade nasida baskom dohot anduk na gelleng. Tujuanna asa boi do disussi pat ni sude na ro andorang so mangan nasida. Alai, ise ma na lao manussi pat ni nasida?

¹⁰ Jesus do na mangulahon i. Pittor jongjong ma Jesus jala dibukka ibana ma abit luarna. Dung i, dibuat ibana ma anduk jala dialitton tu gottingna. Dibahen Jesus ma aek tu baskom laos disussi ibana ma pat ni akka siseanna i. (Joh. 13:​4, 5) Pasti tarsonggot do akka apostel tikki mangida Jesus mangulahon i. Alana ulaon ni hatoban do i. Pasti leleng do Jesus mangulahon i alana disussi ibana do pat ni 12 apostelna i termasuk ma pat ni si Judas, halak na lao menghianati ibana. Jadi massai serep do roha ni Jesus ala olo mangulahon i. Dung i, didok Jesus ma tu akka siseanna, “Diattusi hamu do na hubahen i tu hamu? Dijou hamu do au ‘Guru’ dohot ‘Tuan’ jala tutu do na nidokmuna i. Nang pe Tuan au jala Guru, husussi do patmuna. Alani i, hamu pe ikkon sussionmuna do pat ni donganmuna.”—Joh. 13:​12-14.

11. Aha do buktina molo si Petrus marserep ni roha? (1 Petrus 5:5) (Ida gambar.)

¹¹ Marsiajar do si Petrus asa patuduhon serep ni roha songon Jesus. Misalna, dung nakkok Jesus tu surgo, dibahen si Petrus ma sada mukjizat. Dipamalum si Petrus ma sahalak bawa na lumpu sian mulai tubu. (Ul. 1:​8, 9; 3:​2, 6-8) Tikki i, pasti gabe tarsonggot do akka halak mangida i jala marroan ma nasida manjuppangi si Petrus. (Ul. 3:11) Boha do tanggapan ni si Petrus? Sasittongna, godang do akka halak di tikki i na lomo rohana asa dipasangap. Alai dang songon i si Petrus. Didokkon ibana do tu akka halak di tikki i asa Jahowa dohot Jesus ma na dipuji nasida. Didok si Petrus, “Alani goar ni Jesus jala ala porsea hami tu goarna, gabe margogo ma bawa na niidamuna dohot na tinandamuna on.” (Ul. 3:​12-16) Di pudian ni ari, dijujui si Petrus ma halak Kristen di tikki i asa marserep ni roha. Di bahasa aslina, serep ni roha i dipatudos songon ikkat pinggang na toktong dipakke. Ra hata on paingotton hita taringot Jesus tikki dialitton ibana anduk di gottingna jala disussi ibana pat ni akka apostelna.—Jaha 1 Petrus 5:5.

12. Songon si Petrus, aha do na porlu taulahon asa tarida na serep rohatta?

¹² Tatiru ma si Petrus, berupaya ma hita asa serep rohatta. Alai unang ma holan hata. Alana istilah marserep ni roha na dipakke si Petrus di ayat i, termasuk ma disi boha do cara pandangta tu diritta dohot tu halak na asing. Alani i tikki taulahon sada tugas, taulahon ma i alani holongta tu Jahowa dohot tu na asing, dang asa dipuji-puji hita. Memang, olo do dang sai diboto halak akka aha na taulahon. Alai molo sian ias ni rohatta do i taulahon, i ma buktina na serep rohatta.—Mat. 6:​1-4.

“MARROHA MA HAMU”

13. Aha do lapatan ni “marroha”?

¹³ Aha do lapatan ni “marroha” manang marbisuk? (1 Ptr. 4:7) Molo marroha sasahalak, manat do dipikkiri ibana aha do na dihalomohon Jahowa sebelum dibahen ibana keputusan. Jala diingot ibana, hubunganna tu Jahowa do na uppetting sian manang aha pe. Asing ni i, disadari ibana do dang untimbo ibana sian halak na asing jala diakkui ibana do dang sai sude diboto ibana. Alai Jahowa do na sai diandalhon ibana jala dipangido ibana do tudu-tudu sian Jahowa.a

14. Aha do na patuduhon dang diandalhon si Petrus Jahowa?

¹⁴ Di borngin andorang so mate Jesus, didok ibana ma tu akka siseanna, “Na lao sude do hamu manadikkon au di borngin on.” Alai didok roha ni si Petrus, dang mungkin ulahononna songon i. Jadi didokkon ibana ma tu Jesus, “Nang pe sude nasida manadikkon ho, alai anggo au dang tadikkonokku ho!” Dung i dipasingot Jesus ma muse nasida, “Toktong ma hamu dungo jala sai martangiang.” (Mat. 26:​31, 33, 41) Autsugari ma diihutton si Petrus nasehat ni Jesus i, pasti barani do ibana mangakkui di jolo ni akka halak na sisean ni Jesus do ibana. Hape disoadahon ibana do guruna i. Pasti disolsoli si Petrus do tindakanna i.—Mat. 26:​69-75.

15. Aha do na patuduhon na toktong marbisuk Jesus di borngin andorang so mate ibana?

¹⁵ Alai molo Jesus, sai diandalhon ibana do Jahowa. Nang pe sempurna ibana, mulak-ulak do ibana martangiang di borngin andorang so mate ibana. I ma na mambahen Jesus barani mangulahon lomo ni roha ni Jahowa. (Mat. 26:​39, 42, 44; Joh. 18:​4, 5) Pasti dang tarhalupahon si Petrus aha na diulahon Jesus di borngin i.

16. Aha do buktina na berupaya si Petrus asa marroha manang marbisuk? (1 Petrus 4:7)

¹⁶ Di pudian ni ari, berupaya do si Petrus asa toktong mangandalhon Jahowa. Sian dia taboto? Dung dipahehe Jesus, didokkon Jesus ma tu si Petrus dohot akka apostel na asing na lao jaloon ni nasida do tondi parbadia asa boi nasida toktong marbarita. Alai andorang so i, dipangido Jesus do nasida paimahon di Jerusalem sahat tu na ro tondi parbadia i. (Luk. 24:49; Ul. 1:​4, 5) Aha ma na diulahon si Petrus saleleng paimahon i? Didok di Bibel “martangiang” do si Petrus dohot akka halak Kristen di tikki i. (Ul. 1:​13, 14) Dung i tikki dibahen ibana suratna na parjolo, dijujui si Petrus do akka halak Kristen di tikki i asa marroha, mangandalhon Jahowa, jala toktong martangiang. (Jaha 1 Petrus 4:7.) Sian sude na diulahon si Petrus i, tarida ma na diandalhon ibana do Jahowa, marbisuk do ibana, jala rade mangurupi akka dongan di huria.—Gal. 2:9.

17. Nang pe didok rohatta mura do taulahon sada ulaon, aha do na ikkon toktong taingot? (Ida gambar.)

¹⁷ Asa boi marbisuk hita, ikkon jotjot do hita martangiang tu Jahowa. Nang pe didok rohatta mura do taulahon sada ulaon, alai ikkon tetap do hita martangiang mangido bantuan ni Jahowa. Tarlumobi ma muse tikki naeng tabahen keputusan na balga, tapangido ma bantuan ni Jahowa. Alana, pos do rohatta Jahowa do na mamboto aha na dumenggan tu hita.

18. Aha do na ikkon taulahon asa lam sarupa pikkiranta tu pikkiran ni Jahowa?

¹⁸ Mandok mauliate do hita tu Jahowa ala ditoppa Ibana do hita boi maniru akka sifatna. (1 Mus. 1:26) Alai memang, dang boi sempurna hita maniru Jahowa. (Jes. 55:9) Nang pe songon i, tatiru ma si Petrus. Berupaya ma hita maniru pikkiran ni Jahowa, toktong marserep ni roha, jala marroha manang marbisuk.