Bahen Hamu ma Keputusan Mangihutton Haporseaon

1. Aha do na mambahen puas jala marlas ni roha Apostel Paulus?

TIKKI naeng dihukum mate si Paulus, diingot ibana do sude na mambahen ibana marlas ni roha jala puas. Didok ibana, “Nungnga marlojong au sahat tu ujungna, jala nungnga huihutton haporseaon songon na dibahen Kristus i.” (2 Tim. 4:​6-8) Boasa boi didokkon si Paulus songon i? Alana saleleng gabe halak Kristen ibana, godang do keputusan na denggan naung dibahen ibana. Jala pos do rohana, las do roha ni Jahowa tu akka keputusanna i. Dos songon si Paulus, pasti lomo do rohatta mambahen keputusan na denggan, jala mambahen las roha ni Jahowa. Alai, boha ma carana?

2. Aha do lapatan ni hata ni si Paulus na disurat di 2 Korint 5:7?

² Hea do didok si Paulus tu halak Kristen na di Korint songon on, “Ai mangihutton haporseaon do hita mangolu, dang mangihutton akka na taida.” (2 Kor. 5:7) Aha do maksud ni hata ni si Paulus i? Halak na ‘mangolu mangihutton haporseaon’, i ma halak na porsea tu tudu-tudu ni Jahowa jala diihutton ibana do i tikki naeng mambahen keputusan. Asing ni i, pos do rohana molo diihutton ibana prinsip na adong di Bibel, pasti pasu-pasuon ni Jahowa ma ibana saonari dohot di ari na naeng ro. (Ps. 119:66; Heb. 11:6) Alai molo halak na mangolu mangihutton akka na diida, i ma halak na mambahen keputusan holan mangihutton aha na diida, dibege, jala na dihilala ibana.

3. Aha do manfaatna molo mangolu mangihutton haporseaon hita? (2 Korint 4:18)

³ Sipata olo do tabahen keputusan holan mangihutton na taida dohot na tabege. Alai molo holan mangihutton i do hita mambahen keputusan, boi do gabe sala keputusanta i. Alana, aha na taida dohot na tabege i belum tentu sittong. Bahkan molo pe sittong i, olo do gabe taulahon akka ulaon na so sesuai tu lomo ni roha ni Debata. (Pjm. 11:9; Mat. 24:​37-39) Alai molo tabahen keputusan mangihutton haporseaon, boi ma tabahen keputusan “na dihalomohon Tuhan i”. (Eps. 5:10) Molo taihutton prinsip na dilehon Debata tikki mambahen keputusan, boi ma dame tahilala jala marlas ni roha. (Ps. 16:​8, 9; Jes. 48:​17, 18) Jala molo toktong taulahon songon i, boi ma hita mangolu saleleng ni lelengna.—Jaha 2 Korint 4:18.

4. Boha do carana mamboto mangolu mangihutton haporseaon do hita manang mangihutton aha na taida?

⁴ Boha do carana mamboto mangolu mangihutton haporseaon do hita manang mangihutton aha na taida? Asa taboto alusna, pikkirhon ma on: Tikki naeng mambahen keputusan, holan akka na tarida do na huihutton? Manang mangasahon Jahowa do au jala huihutton do akka prinsip na dilehon Ibana? Di artikel on, lao taparsiajari ma boha do caratta mangihutton haporseaon di tolu situasi on: Tikki naeng mamillit karejo, tikki naeng mamillit dongan saripe, dohot tikki adong tudu-tudu sian organisasi. Dung i, tabahas ma aha do na porlu tapikkirhon asa boi tabahen keputusan na denggan di akka situasi i.

TIKKI NAENG MAMILLIT KAREJO

5. Aha do na ikkon tapikkirhon tikki naeng mamillit karejo?

⁵ Pasti lomo do rohatta asa boi paradehon kebutuhanta dohot kebutuhan ni keluargatta. (Pjm. 7:12; 1 Tim. 5:8) Memang adong do piga-piga karejo na balga gajina. Gabe boi ma taparade kebutuhanta siganup ari, jala boi tong tasippan hepengta. Alai adong do tong piga-piga karejo na otik gajina. Gabe holan kebutuhan dasar ni keluargatta ma na boi taparade. Biasana tikki naeng tapillit sada karejo, pasti tapikkirhon do sadia balga gajina disi. Alai molo holan mangihutton i do hita mambahen keputusan, berarti mangolu mangihutton aha na tarida do hita disi.

6. Tikki naeng mamillit karejo, aha do na ikkon tapikkirhon asa mangihutton haporseaon keputusan na tabahen? (Heber 13:5)

⁶ Alai molo mangihutton haporseaon do hita, pasti tapikkirhon do aha pengaruh ni karejotta tu hubungatta tu Jahowa. Jadi andorang so mamillit karejo, pikkirhon ma sukkun-sukkun on: ‘Molo karejo au disi, gabe dohot do au mangulahon ulaon na dihasogohon Jahowa?’ (Poda 6:​16-19) ‘Gabe maol do annon au marpungu, marbarita, dohot belajar pribadi? Gabe ikkon hutinggalhon do annon keluargakku alani karejo on?’ (Plp. 1:10) Molo gabe songon i do situasina, unang ma hamu karejo disi nang pe maol mandapot karejo saonari. Bahen ma keputusan na patuduhon pos rohamuna tu Jahowa pasti paradeonna do kebutuhanmuna. (Mat. 6:33; jaha Heber 13:5.) Molo diulahon hamu songon i, berarti mangolu mangihutton haporseaon do hamu disi.

7-8. Songon dia do si Javier mambahen keputusan mangihutton haporseaon? (Ida gambar.)

⁷ Taida ma pengalaman ni si Javier,a sahalak donganta na sian Afrika Selatan. Didok ibana, “Hupangido ma asa naik jabatan au di inganakku karejo. Alana dua hali loppit do umbalga gajina sian karejokku sebelumna.” Alai lomo do tong roha ni si Javier asa merintis. Didok ibana ma muse, “Ujungna, dijou do au lao diwawancarai. Alai andorang so diwawancarai, martangiang ma au tu Jahowa. Pos do rohakku, diboto Jahowa do aha na dumenggan tu au. Memang lomo do rohakku molo balga gajikku. Alai molo gabe dang boi hukejar cita-cita rohanikku alani karejo on, dang olo au.” Marsitutu do si Javier mambahen keputusan mangihutton haporseaon.

⁸ Dung i didok si Javier do muse, “Tikki diwawancarai, didok manajer i ma asa boi au karejo disi, ikkon jotjot do au lembur. Alai denggan ma hupaboa tu ibana na so boi hujalo karejo i, alana olo do gabe targanggu ulaonku manomba Jahowa.” Ujungna, ditolak si Javier ma tawaran i. Dua minggu dukkon i, merintis ma ibana. Jala piga-piga bulan dukkon i, dapotna ma karejo paruh waktu. Didok si Javier ma, “Ditangihon Jahowa do tangiakku. Diurupi Jahowa do asa dapottu karejo na pas jala boi tong au merintis. Las hian do rohakku ala boi hulehon godang tikkikku lao melayani Jahowa jala mangurupi akka dongan.”

9. Parsiajaran aha do na tadapot sian pengalaman ni si Trésor?

⁹ Boha do molo karejotta saonari mambahen targanggu ulaonta manomba Jahowa? Taida ma pengalaman ni si Trésor sian Kongo. Didok ibana, “Denggan hian do karejokku jala timbo do jabatanku. Tolu hali loppit ma umbalga gajina sian karejokku na sebelumna.” Alai ala ikkon lembur gabe jotjot ma si Trésor dang marpungu. Olo do muse perusahaan i dang jujur tikki marbisnis, jala sipata dipaksa dongan sakarejona do si Trésor asa unang paboahon i tu na asing. Ala songon i situasina, gabe naeng kaluar do ibana sian perusahaan i. Alai mabiar do ibana dang adong be annon karejona. Aha ma na diulahon si Trésor? Didok ibana, “Huingot do Habakuk 3:​17-19. Alani i, gabe pos ma rohakku nang pe dang adong be annon karejokku jala otik nama hepengku, pasti dilehon Jahowa do akka na porlu di au. Jadi kaluar ma au sian perusahaan i.” Didok si Trésor muse, “Godang do akka bos ni perusahaan merasa molo balga dilehon gajitta, olo do hita mangulahon manang aha pe asa karejo di perusahaan i. Akibatna, dang adong be tikkitta lao mangulahon lomo ni roha ni Jahowa. Alai molo au, hupillit do lao mambahen las roha ni Jahowa. Jadi las do rohakku tu keputusan na hubahen i. Hira-hira sataon dukkon i, dapottu ma karejo na cocok. Gabe boi ma huparade akka na porlu di au. Pasu-pasu ni Jahowa do i. Alai na uppetting, boi ma godang tikkikku melayani Jahowa. Memang molo tajumolohon lomo ni roha ni Jahowa, olo do gabe susa hita di parhepengon. Alai pos ma rohatta, pasti dilehon Jahowa do akka na porlu di hita.” Jadi molo taoloi Jahowa jala pos rohatta tu Ibana, on patuduhon na mangolu mangihutton haporseaon do hita jala pasu-pasuon ni Jahowa ma hita.

TIKKI NAENG MAMILLIT DONGAN SARIPE

10. (a) Aha do biasana na dipikkirhon sasahalak tikki naeng mamillit dongan saripe? (b) Alai, aha do na ikkon diingot ibana?

¹⁰ Pasu-pasu sian Jahowa do parsaripeon. Alani i, dang sala molo naeng menikah sasahalak. Misalna molo naeng menikah sahalak donganta borua, biasana diparrohahon ibana do boha pangalaho ni calonna i, penampilanna, boha calonna i ditanda akka halak, parhepengonna, bertanggung jawab do ibana tu keluargana, jala boha do calonna maradoppon ibana.b Memang penting do sudena i. Alai molo holan i do na dipikkirhon donganta borua i, berarti holan mangihutton na tarida do ibana disi.

11. Aha do na patuduhon na mangihutton haporseaon do sasahalak tikki naeng mamillit dongan saripe? (1 Korint 7:39)

¹¹ Las do roha ni Jahowa ala diihutton akka dongan do parettana tikki naeng mamillit dongan saripe. Misalna, dipaima nasida do sahat tu na “cukkup umurna” baru pe marhallet. (1 Kor. 7:36) Tikki naeng mangalului na lao dongan saripena, dipastihon nasida do ikkon sesuai do pangalaho ni calonna i tu na dihalomohon roha ni Jahowa. (Poda 31:​10-13, 26-28; Eps. 5:33; 1 Tim. 5:8) Asing ni i, dang marhallet nasida tu na so Saksi Jahowa. Alana diihutton nasida do nasehat sian Bibel asa menikah holan tu “halak na mangihutton Tuan”. (Jaha 1 Korint 7:39.) Jadi toktong do nasida berupaya asa mangolu mangihutton haporseaon, alana pos do roha ni nasida diattusi Jahowa do perasaan ni nasida.—Ps. 55:22.

12. Aha do na taparsiajari sian pengalaman ni Rosa?

¹² Taida ma pengalaman ni si Rosa. Sahalak perintis do ibana di Kolombia. Guru do si Rosa, alai secara online do ibana mangajar. Adong do murid ni si Rosa on na marlomo ni roha tu ibana. Alai dang Saksi muridna i. Jala si Rosa pe lomo do rohana tu bawa i. Didok si Rosa, “Burju do huida ibana. Lomo do rohana mangurupi akka halak, dang parisap ibana, dang marnarkoba, jala dang parminum. Burju hian do ibana maradoppon au. Jadi didok rohakku cocok do ibana gabe suamikku, alai memang dang Saksi ibana. Di tikki i kesepian do au jala menikah ma nian au. Alai dang adong dope juppangku donganta na cocok di rohakku. Jadi borat do hurasa manolak bawa i.” Nang pe songon i, dang dibahen si Rosa keputusan holan mangihutton na tarida. Dipikkirhon ibana do molo marhallet ibana tu bawa i, boha ma annon hubunganna tu Jahowa. Ujungna diputusson ibana ma asa unang berkomunikasi be tu bawa i, jala toktong ma ibana sibuk melayani Jahowa. Dang leleng dukkon i, diundang ma ibana tu Sikkola tu Parbarita Harajaon. Jala saonari, gabe perintis istimewa do ibana. Didok si Rosa, “Massai godang do pasu-pasu na dilehon Jahowa tu au jala sudena i mambahen au marlas ni roha.” Memang, dang sai mura mangulahon lomo ni roha ni Jahowa tarlumobi molo adong hubunganna tu cinta. Alai molo berupaya hita mangihutton paretta ni Jahowa, pasti dapotta do pasu-pasu.

TIKKI ADONG TUDU-TUDU SIAN ORGANISASI

13. Sipata, aha do na mambahen maol hita mangihutton petunjuk na dilehon organisasi?

¹³ Jotjot do organisasi mangalehon petunjuk tu hita marhite akka sintua, pengawas wilayah, kantor cabang, manang sian Punguan na Mangaradoti. Sipata dang taboto boasa dibahen petunjuk i. Asing ni i, olo do ra didok rohatta gabe susa do hita molo taihutton petunjuk i. Bahkan ala taboto hahurangan ni akka donganta na pasahatton petunjuk i, olo do ra gabe maol hita mangihutton i. Alai molo songon i na taulahon, berarti holan mangihutton na tarida do hita disi.

14. Aha do na porlu taingot asa rade hita mangoloi petunjuk sian organisasi? (Heber 13:17)

¹⁴ Molo mangolu mangihutton haporseaon hita, pasti pittor taoloi do akka petunjuk na dilehon organisasi. (Jaha Heber 13:17.) Boasa olo hita mangulahon i? Alana pos do rohatta Jahowa do na mangarahon organisasina jala Ibana do na mamboto na dumenggan tu hita. Taingot do muse molo taoloi akka petunjuk i, boi do on mambahen huria toktong marsada. (Eps. 4:​2, 3) Jala nang pe dang sempurna akka donganta na pasahatton petunjuk i, alai molo taoloi nasida pasti dipasu-pasu Jahowa do hita. (1 Sam. 15:22) Molo pe porlu petunjuk i disesuaihon, pasti disesuaihon Jahowa do i annon di tikkina.—Mik. 7:7.

15-16. Aha do na mangurupi si Kevin asa rade mangihutton penyesuaian? (Ida gambar.)

¹⁵ Taida ma sada pengalaman na patuduhon massai penting do mangolu mangihutton haporseaon. Di Peru marbahasa Spanyol do akka halak. Alai godang do tong na marbahasa daerah, contohna bahasa Quechua. Saleleng martaon-taon, akka donganta na marbahasa Quechua marbarita holan tu akka halak na mamakke bahasa i di daerah dinas ni nasida. Alai ala lao mangihutton peraturan na terbaru sian pamaretta, ikkon disesuaihon nasida do cara ni nasida marbarita. (Rom 13:1) Memang, adong do piga-piga donganta na mandok, maol do dihilala nasida mangihutton petunjuk i. Nang pe songon i, dioloi nasida do i. Hasilna, dipasu-pasu Jahowa ma upaya ni nasida manjuppangi akka halak na marbahasa Quechua.

¹⁶ Adong ma sahalak sintua na margoar si Kevin di huria na marbahasa Quechua. Mulana marsak do ibana mamikkiri penyesuaian na terbaru i. Didok ibana, “Ragu do au, boi do annon juppangnami akka halak na marbahasa Quechua?” Aha do na diulahon si Kevin? Didok ibana, “Huingot ma Poda 3:5. Jala huingot do muse si Musa. Hea do dilehon Jahowa tu ibana petunjuk, alai hira na so masuk akkal do petunjuk i. Disuru Jahowa do si Musa mamboan halak Israel kaluar sian Mesir tu Laut Merah. Hape molo tusi nasida lao, dang boi be nasida lari manang tudia pe alana buntu do dalan i. Alai nang pe songon i, dioloi si Musa do Jahowa jala dipasu-pasu Jahowa do ibana.” (2 Mus. 14:​1, 2, 9-11, 21, 22) Diihutton si Kevin do penyesuaian i. Aha ma hasilna? Didok ibana, “Luar biasa do cara ni Jahowa mamasu-masu upayanami marbarita dison. Saleleng on, ikkon dao-dao do hami mardalan lao mangalului akka halak na marbahasa Quechua. Hape sipata holan sada manang dua halak do na juppangnami. Alai saonari, dipangido organisasi do asa lao hami tu akka daerah na godang halak na mamakke bahasa i disi. Hasilna, godang do halak na boi dijuppangi hami. Godang ma kunjungan kembali dohot parsiajar Bibel, jala lam godang do tong akka halak na ro marpungu.” Jadi sian on taboto ma, molo mangolu hita mangihutton haporseaon pasti dipasu-pasu Jahowa do hita.

17. Aha do naung taparsiajari di artikel on?

¹⁷ Nungnga tabahas be boha do carana mangolu mangihutton haporseaon di tolu situasi. Alai di akka situasi na asing pe, ikkon torus do hita mangolu mangihutton haporseaon. Contohna, tikki mamillit hiburan, tikki lao mambahen keputusan taringot sikkola, manang tikki pagodang-godangkon ianakkon. Alai, unang ma tabahen keputusan holan mangihutton akka na tarida. Ikkon tapikkirhon do aha do pengaruh ni keputusan na tabahen tu hubungatta tu Jahowa. Taingot ma aha do na dihalomohon Jahowa, jala pos ma rohatta pasti sai urupanna do hita. Alani i molo taulahon sudena i, boi ma hita “mardalan mangihutton goar ni Jahowa Debatanta saleleng ni lelengna”.—Mik. 4:​5, surat na di toru.