Hamu Akka na Poso, Tiru ma si Markus Dohot si Timoteus

1-2. Boasa dang mura di si Markus dohot si Timoteus lao mangalehon unggodang tikki melayani Jahowa?

HAMU akka bawa na poso, olo do hamu mangalehon unggodang tikki tu Jahowa jala mangurupi akka dongan di huria? Pos do rohanami pasti olo do hamu. Las do rohatta mangida godang donganta bawa na poso na rade mangulahon i! (Ps. 110:3) Alai adong do ra na mambahen gabe maol hamu lao mangulahon i. Olo do ra mabiar hamu ala mamikkiri songon dia ngolumuna sogot. Manang hurang percaya diri hamu ala dang godang dope pengalamanmuna. Alai dang holan hamu na hea makkilala songon i.

² Sarupa do perasaanmuna i tu si Markus dohot si Timoteus. Nang pe mabiar jala hurang percaya diri, olo do nasida mangalehon unggodang tikki lao melayani Jahowa. Di sada tikki, diundang si Paulus dohot si Barnabas ma si Markus asa dohot tu pardalanan utusan injil na parjolo. Hape tabo do ngolu ni si Markus rap dohot omakna. (Ul. 12:​12, 13, 25) Alai olo do ibana manadikkon i sude asa boi mangalehon unggodang tikki lao melayani Jahowa. Parjolo-jolo pinda ma ibana tu Antiokia, dung i lao ma ibana muse mandongani si Paulus dohot si Barnabas marbarita tu inganan na asing. (Ul. 13:​1-5) Suang songon i ma si Timoteus. Tikki diundang si Paulus ibana lao marbarita, tabo do ngoluna dohot natua-tuana. Poso dope ibana di tikki i jala dang godang dope pengalamanna. (Bandingkon tu 1 Korint 16:​10, 11 dohot 1 Timoteus 4:12.) Alai olo do ibana dohot mandongani si Paulus marbarita jala godang ma dapotna pasu-pasu.—Ul. 16:​3-5.

3. (a) Sian dia ma taboto na massai arga do si Markus dohot si Timoteus di si Paulus? (2 Timoteus 4:​6, 9, 11) (Ida gambar.) (b) Sukkun-sukkun aha do na lao tabahas di artikel on?

³ Ala olo do si Markus dohot si Timoteus marbarita tu inganan na dao, gabe godang ma pengalaman ni nasida. Nang pe poso dope nasida, godang do tanggung jawab di huria na dilehon tu nasida. Alani i ma arga hian do si Markus dohot si Timoteus di si Paulus. Buktina, tikki diboto si Paulus naeng mate nama ibana, dipangido ibana ma asa ro halak i na dua manjuppangi ibana. (Jaha 2 Timoteus 4:​6, 9, 11.) Di artikel on, lao tabahas ma boasa holong roha ni si Paulus tu si Markus dohot si Timoteus? Hamu akka bawa na poso, songon dia ma carana asa boi hamu maniru si Markus dohot si Timoteus? Jala aha ma na ikkon diulahon hamu asa boi mangihutton poda ni si Paulus?

TIRU MA SI MARKUS

4-5. Songon dia do cara ni si Markus patuduhon na olo do ibana mangurupi halak na asing?

⁴ Menurut sahalak pakar ni Bibel molo naeng mangurupi halak na asing hita, ikkon olo do hita bekerja keras jala toktong mangulahon i nang pe maol situasina. I ma na diulahon si Markus. Hea do gabe kecewa ibana jala haccit rohana tikki dang olo be si Paulus mamboan ibana tu pardalanan utusan injilna na paduahon. (Ul. 15:​37, 38) Alai toktong do olo si Markus mangurupi akka dongan.

⁵ Olo do si Markus marbarita tu inganan na asing rap dohot si Barnabas. Dung 11 taon, lao do ibana tu Rom asa boi patoguhon si Paulus di penjara. (Plm. 23, 24) Diargai si Paulus do na diulahon si Markus. Alani i, didok ibana ma, “[Si Markus] ma na patoguhon rohakku.”—Kol. 4:​10, 11.

6. Aha do manfaatna ala olo si Markus mardongan dohot akka dongan na togu haporseaonna? (Ida surat na di toru.)

⁶ Godang do pengalaman dapot ni si Markus ala olo ibana mardongan dohot akka dongan na togu haporseaonna. Misalna, dung sae dijuppangi ibana si Paulus di Rom, lao ma muse ibana tu Babilon lao marbarita dohot si Petrus. Gabe jonok ma hubungan ni nasida jala dijou si Petrus ma ibana “anakku si Markus”. (1 Ptr. 5:13) Saleleng rappak nasida, jotjot do si Petrus marcerita taringot hangoluan dohot pakkobasion ni Jesus. Alani i ma gabe boi si Markus manuratton taringot Jesus di sada bukku na adong di Bibel, i ma Injil Markus.a

7. Aha do na diulahon si Sandro asa boi maniru si Markus? (Ida gambar.)

⁷ Toktong do si Markus bekerja keras lao melayani Jahowa jala olo do ibana mardongan tu akka dongan na togu haporseaonna. Boha ma caramuna lao maniru si Markus? Hea do ra gabe kecewa hamu ala dang marna dilantik hamu gabe parhobas manang sintua di huria. Molo songon i situasimuna, sabar ma hamu. Toktong ma ulahon na boi diulahon hamu lao melayani Jahowa dohot mangurupi akka dongan di huria. Parrohahon ma pengalaman ni si Sandro,b naung gabe sintua di huria. Tikki poso dope ibana, jotjot do dibandingkon ibana dirina tu akka dongan na asing. Godang do tugas na dilehon tu akka donganna. Hape dang adong tugas manang aha pe dilehon tu ibana. Gabe kecewa jala metmet ma rohana. Jadi didok sahalak sintua ma tu ibana asa toktong ibana mangurupi akka dongan, nang pe sipata dang diida akka dongan i. Diihutton si Sandro ma hata ni sintua i. Diurupi ibana ma akka dongan naung matua. Asing ni i, dialap ibana do akka dongan na porlu diurupi asa boi marpungu. Saonari didok ibana ma, “Gabe huattusi ma aha do na ikkon huulahon asa boi mangurupi halak na asing. Las do rohakku boi mangurupi akka dongan.”

TIRU MA SI TIMOTEUS

8. Boasa ma si Timoteus na dipillit si Paulus mandongani ibana? (Pilippi 2:​19-22)

⁸ Adong do rencana ni si Paulus naeng ro muse tu akka kota na pendudukna hea menganiaya ibana. Jadi dilului ibana ma akka dongan na barani, na boi mandongani ibana. Na parjolo, dipillit ibana ma si Silas. Nungnga martaon-taon ibana melayani Jahowa. (Ul. 15:​22, 40) Dung i, dipillit ibana ma muse si Timoteus. Alai, boasa ma dipillit ibana si Timoteus? Ala godang na mandok, halak na burju do si Timoteus on. (Ul. 16:​1, 2) Jala parduli do ibana tu akka halak.—Jaha Pilippi 2:​19-22.

9. Aha do na patuduhon na holong do roha ni si Timoteus tu akka dongan?

⁹ Tikki rappak marbarita, boi ma diida si Paulus parduli do si Timoteus tu halak na asing, dang holan mamikkiri dirina sandiri. Alani i ma pos roha ni si Paulus maninggalhon si Timoteus di Berea, lao patoguhon halak Kristen na baru. (Ul. 17:​13, 14) Jala pasti godang do na boi diparsiajari si Timoteus sian si Silas tikki rap nasida di Berea. Dung i disuru si Paulus ma si Timoteus sahalakna lao patoguhon akka dongan na adong di Tessalonik. (1 Tes. 3:2) Saleleng 15 taon, torus do si Timoteus marsiajar lao patuduhon holong tu akka dongan. Alani i, gabe boi ma ibana patuduhon asi ni roha tu akka dongan na marsitaonon. (Rom 12:15; 2 Tim. 1:4) Hamu akka bawa na poso, songon dia ma caramuna lao maniru si Timoteus?

10. Aha do na diulahon si Jason asa boi lam parduli tu halak na asing?

¹⁰ Adong sahalak donganta na margoar si Jason. Berupaya do ibana asa lam parduli tu halak na asing. Tikki poso dope ibana, maol do dihilala ibana lao makkata-hatai dohot akka dongan naung matua. Jadi biasana tikki marpungu holan dijalang ibana ma nasida, dung i pittor lao. Adong ma sahalak sintua na paboahon tu ibana songon dia carana asa boi leleng ibana makkata-hatai dohot akka dongan di huria. Didok sintua i, porlu do dipikkirhon ibana akka na denggan sian akka dongan, jala dipaboa ma i tu nasida. Dung i pikkirhon ma lomo ni roha ni nasida. Jadi diihutton si Jason ma saran ni sintua i. Saonari nga gabe sintua be si Jason. Didok ibana, “Saonari nga mura be au makkata-hatai dohot akka dongan, dang soal tu akka naung matua, dakdanak, manang akka na poso. Las do rohakku mamboto situasi ni akka dongan, alana gabe lam mura ma au lao mangurupi nasida.”

11. Aha do na boi diulahon akka na poso asa lam parduli tu akka dongan di huria? (Ida gambar.)

¹¹ Hamu akka bawa na poso, berupaya ma hamu asa lam parduli tu halak na asing. Tikki di parpunguan, berupaya ma hamu makkata-hatai dohot akka dongan, dang soal sadia pe umurna jala songon dia pe latar belakangna. Asa boi hamu mangulahon i, parjolo-jolo sukkun ma kabar ni nasida, dung i tangihon ma nasida makkatai. Lam leleng gabe diboto hamu ma annon, aha do na boi diulahon hamu lao mangurupi nasida. Misalna, olo do ra gabe diboto hamu adong do donganta naung matua na porlu diurupi lao mamakke aplikasi JW Library^®. Manang adong do hape na so adong donganna marbarita. Dung i urupi ma nasida. Molo diulahon hamu songon i, gabe sitiruon ma hamu tu akka dongan di huria.

MARLABA DO PODA NI SI PAULUS TU HAMU

12. Aha do na ikkon diulahon akka bawa na poso asa boi mandapot manfaat sian poda ni si Paulus?

¹² Dipaboa si Paulus do tu si Timoteus akka poda na boi mangurupi ibana asa marlas ni roha di ngoluna jala toktong bersemangat melayani Jahowa. (1 Tim. 1:18; 2 Tim. 4:5) Dos do poda ni si Paulus on songon poda ni sahalak ama tu anakna. Marguna do tong poda ni si Paulus i tu akka bawa na poso saonari. Alani i, jaha ma dua surat ni si Paulus tu si Timoteus. Jala pikkirhon ma songon dia caramuna mangihutton i. Taida ma piga-piga contohna.

13. Aha do na porlu taulahon asa boi jonok tu Jahowa?

¹³ “Latik ma dirim mangoloi paretta ni Debata.” (1 Tim. 4:7b) Dijujui si Paulus do si Timoteus asa setia tu Jahowa jala marsitutu mambahen las rohana. Disi tubu hita dang pittor lomo rohatta mangoloi paretta ni Debata. Alani i ikkon talatik do diritta. Songon dia ma carana? Istilah “latik ma dirim” na dipakke si Paulus di ayat on, dibuat sian hata Junani na jotjot ditujuhon tu akka atlet na naeng martanding. Ikkon boi do sahalak atlet mangarajai dirina lao mangulahon hasomalan na denggan asa boi ibana monang. Hita pe ikkon tarajai do diritta lao mangulahon hasomalan na denggan asa boi jonok tu Jahowa.

14. Aha do sebenarna tujuanta manjaha Bibel? Bahen ma contoh.

¹⁴ Sada hasomalan na denggan na ikkon taulahon, i ma manjaha Bibel ganup ari. Alai porlu do diingot hamu tujuanmuna manjaha Bibel, i ma asa jonok tu Jahowa. Misalna tikki dijaha hamu cerita taringot Jesus dohot sahalak bawa na mamora, pikkirhon ma aha do na boi diparsiajari hamu taringot Jahowa. (Mrk. 10:​17-22) Sebenarna porsea do bawa i na Messias do Jesus, alai dang pos rohana lao gabe sisean ni Jesus. Nang pe songon i, holong do roha ni Jesus tu bawa i jala lambok do Jesus makkatai tu ibana. Alana lomo do roha ni Jesus asa dibahen ibana keputusan na denggan. Songon i do tong perasaan ni Jahowa tu ibana. (Joh. 14:9) Dung dijaha hamu cerita i, sukkun ma dirimuna, ‘Aha do na ikkon huulahon asa dang songon bawa na mamora i au? Songon dia ma carana asa boi au jonok tu Jahowa?’

15. Boasa ikkon gabe sitiruon akka bawa na poso tu akka dongan? Bahen ma contoh. (1 Timoteus 4:​12, 13)

¹⁵ “Gabe sitiruon ma ho tu akka halak na setia.” (Jaha 1 Timoteus 4:​12, 13.) Dijujui si Paulus do si Timoteus asa lam denggan manjaha dohot mangajari. Alai dang holan i. Lomo do roha ni si Paulus asa lam balga holong ni roha ni si Timoteus, lam togu haporseaonna, jala toktong ias pangalahona. Boasa? Alana molo holan hata, dang adong lapatan ni i. Ikkon adong do pambahenan. Misalna dilehon ma tu hamu sada tugas lao pasahatton jamita taringot boha carana asa semangat tikki marbarita. Pasti ummura do hamu pasahatton jamita i molo ringgas hamu marbarita saleleng on. Jala gabe lam taronjar ma roha ni akka dongan lao mangulahon na dipasahatmuna i.—1 Tim. 3:13.

16. (a) Songon dia do akka na poso boi gabe sitiruon? (b) Songon dia do carana akka bawa na poso boi gabe sitiruon “di pakkataion”?

¹⁶ Di 1 Timoteus 4:​12, dipaboa si Paulus do songon dia carana akka bawa na poso boi gabe sitiruon. Tikki parsiajaran pribadi, coba ma riset hamu taringot i. Molo naeng gabe sitiruon hamu “di pakkataion”, pikkirhon ma songon dia carana asa boi hatamuna patoguhon halak na asing. Misalna marsitutu ma hamu asa lam jotjot mandok mauliate tu natua-tuamuna. Tikki marpungu, coba ma mangalehon komentar mamakke hatamuna sandiri. Dung sae marpungu, puji ma akka dongan na pasahatton bagianna. Molo marsitutu hamu gabe sitiruon di pakkataion, boi ma diida akka dongan na lam togu parale-aleonmuna tu Debata.—1 Tim. 4:15.

17. Aha do na boi mangurupi akka bawa na poso lao mambahen cita-cita rohani? (2 Timoteus 2:22)

¹⁷ “Pasiding ma dirim sian hisap-hisap ni akka na poso alai bahen ma sian nasa gogom lao mangulahon na sittong.” (Jaha 2 Timoteus 2:22.) Dijujui si Paulus do si Timoteus asa mambolokkon hisap-hisap ni akka na poso. Alana boi do i mangabbati ibana lao mangalehon unggodang tikki tu Jahowa jala manegai hubunganna tu Jahowa. Songon i ma nang hamu akka na poso saonari. Adong do piga-piga ulaon na boi mangabbati hamu lao mangalehon unggodang tikki tu Jahowa nang pe dang sala akka ulaon i. Misalna, pagodangku tikki lao marolahraga, marinternet manang margame. Hape boi do dipakke hamu tikkimuna i lao paiasson Bale Harajaon, manang dohot manjaga rak beroda. Molo dipillit hamu lao mangulahon i olo do ra dapotmuna akka dongan na baru, na boi manjujui jala mangurupi hamu mambahen cita-cita rohani.

PASU-PASU ALA MANGURUPI AKKA DONGAN

18. Pasu-pasu aha do na dihilala si Markus dohot si Timoteus?

¹⁸ Godang do pengorbanan na dibahen si Markus dohot si Timoteus lao mangurupi akka dongan. Alai godang do pasu-pasu na didapot nasida jala marlas ni roha do nasida. (Ul. 20:35) Misalna ikkon lao do si Markus tu inganan na dao mangurupi akka dongan. Jala disurat ibana do taringot hangoluan dohot pakkobasion ni Jesus. Si Timoteus pe rade do mangurupi si Paulus lao mambahen akka huria na baru dohot patoguhon akka dongan. Pasti las hian do roha ni Jahowa mangida sude pengorbanan na dibahen si Markus dohot si Timoteus.

19. Boasa ikkon diihutton akka bawa na poso poda ni si Paulus tu si Timoteus, jala aha do manfaatna?

¹⁹ Sian surat ni si Paulus tu si Timoteus, boi ma taida holong hian do rohana tu si Timoteus. Jala sian akka surat i boi do taida, holong hian do roha ni Jahowa tu hamu akka bawa na poso. Lomo do roha ni Jahowa asa marlas ni roha hamu. Jadi ihutton ma poda ni si Paulus na dos songon poda ni sahalak ama. Jala marsitutu ma hamu lao mangurupi akka dongan. Molo diulahon hamu i, boi do marlas ni roha hamu saonari jala boi ma dapotmuna “hangoluan na saleleng ni lelengna di ari na naeng ro”.—1 Tim. 6:​18, 19.