Sai Diajari Guru na Sangap i do Hami

SITIRUON SIAN NATUA-TUAKKU

Di taon 1957, pinda ma natua-tuakku sian Italia tu kota Kindersley, Saskatchewan, Kanada. Dang sadia leleng, diboto nasida ma hasittongan. Jala hasittongan i ma gabe na uppetting di hami. Huingot dope tikki gelleng au, jotjot do au mardinas dohot keluargakku sadari manipat. Jadi sipata, margait-gait do au tu akka dongan mandok, “nga merintis” au tikki marumur ualu taon dope.

Pogos do hami, alai godang do pengorbanan na dibahen natua-tuakku lao melayani Jahowa. Misalna, di taon 1963, dijual nasida do godang arta ni nasida asa boi dohot tu parpunguan internasional di kota Pasadena, Kalifornia, Amerika Serikat. Di taon 1972, pinda ma hami tu kota Trail, British Columbia, Kanada, lao marbarita tu akka halak na marbahasa Italia. Dao ni kota i hira-hira 1.000 kilometer sian inganannami sebelumna. Bapakku karejo gabe petugas kebersihan dohot pemeliharaan gedung. Hea do ditawarhon tu ibana asa naik jabatan. Alai, dang olo ibana manjalo i asa toktong fokus melayani Jahowa. Jadi, sitiruon do natua-tuakki di au.

Mandok mauliate do au ala dilehon natua-tuakku sitiruon tu au, tu abangku, dohot tu dua itokku. Sitiruon sian nasida mangonjar rohakku toktong setia melayani Jahowa. Jala adong parsiajaran sian nasida na sai huingot sappe saonari: Molo huutamahon Harajaon ni Debata, pasti paradeon ni Jahowa do kebutuhanku.—Mat. 6:33.

PARJOLO SAHALI DOHOT TU DINAS SEPENUH WAKTU

Di taon 1980, menikah ma au dohot si Debbie, sahalak donganta borua na bagak na toktong fokus melayani Jahowa. Lomo do rohanami melayani sepenuh waktu. Jadi tolu bulan dung menikah hami, merintis ma si Debbie. Sia bulan dukkon i, pinda ma hami tu huria na makkaporluhon godang parbarita. Jala mulai ma au tong merintis.

Alai dung piga-piga tikki, adong ma na mambahen metmet rohanami jala naeng pinda ma hami. Alai andorang so pinda, makkatai ma hami dohot pengawas wilayah. Burju do ibana manangihon hami. Alai, dilehon ibana do nasehat na terus terang. Didok ibana, “Hurasa, hamu do na mambahen situasina gabe lam maol. Alana holan akka na negatif do na dipikkirhon hamu. Coba ma jo lului akka na positif.” Cocok hian do nasehatna i di hami. (Ps. 141:5) Pittor diulahon hami ma i, jala memang godang do akka na positif na diida hami disi. Misalna, adong do piga-piga dongan na rela berkorban asa boi toktong melayani Jahowa, termasuk ma i akka dakdanak dohot akka donganta borua na so Saksi Jahowa suamina. Dapotnami ma parsiajaran na massai arga sian i. Ikkon berfokus do hami tu akka na positif, jala ikkon sabar paimahon Jahowa padenggatton situasina. (Mik. 7:7) Jadi, mulak ma muse las ni rohanami. Ujungna, denggan ma muse situasinami disi.

Piga-piga instruktur di sikkola dinas perintisnami na parjolo hea do melayani di akka negara na asing. Dipatudu nasida ma akka foto, jala dipaboa ma akka tantangan dohot pasu-pasu na dihilala nasida. Alani i, lomo do rohanami naeng gabe utusan injil. Jadi dibahen hami ma i gabe cita-citanami.

Alani i, di taon 1984, pinda ma hami tu Quebec, na daona lobi sian 4.000 kilometer sian British Columbia. Ikkon marsiajar bahasa dohot budaya na baru do hami ala marbahasa Prancis do akka halak disi. Asing ni i, maol hian do parhepengonnami. Hea ma dang adong sipanganonnami. Jadi lao ma hami tu ladang ni sahalak pangula. Diloas do hami mambuat akka kentang sian sisa panen di ladangna. Malo do si Debbie mangaloppa akka kentang i gabe marragam sipanganon na tabo. Jadi nang pe godang sitaononnami, marsitutu do hami asa tetap marlas ni roha. Jala boi do dihilala hami songon dia Jahowa mangurus hami.—Ps. 64:10.

Sada tikki, ditelepon ma hami jala diundang tu Betel Kanada. Tarsonggot do hami tikki i. Alana, nungnga mendaftar hami tu Sikkola Gilead. Alai, tetap do dijalo hami undangan i. Dung sahat di Betel, disukkun hami ma sahalak anggota Panitia Cabang, i ma donganta si Kenneth Little. Didok hami ma, “Boha ma annon ate molo diundang hami tu Gilead?” Didok ibana, “Annon ma tahatai muse da, molo nga diundang hamu.”

Saminggu dukkon i, diundang ma hami tu Sikkola Gilead. Jadi ikkon dibahen hami do keputusan. Didok donganta si Little ma, “Tugas na dia pe na dipillit hamu, olo do ra sada tikki didok rohamuna tumagon hian do dibuat hamu tugas na sada nai. Alai ingot ma, sarupa do sude tugas. Manang aha pe tugasta, boi do dipasu-pasu Jahowa hita.” Jadi diputusson hami ma asa dohot tu Sikkola Gilead. Saleleng martaon-taon, boi dihilala hami tutu do hata ni donganta si Little i. Jotjot do dipaboa hami hatana i tu akka dongan na bingung mamillit tugas na lao jaloonna.

GABE UTUSAN INJIL

Di bulan April 1987, las hian do rohanami rap dohot 24 siswa na asing dohot tu Sikkola Gilead kelas-83. Di Brooklyn, New York do dibahen sikkola i. Donganta si Ulysses Glass dohot si Jack Redford ma instruktur utamanami. Dang terasa hatop do salpu tikki na lima bulan i hami sikkola. Lulus ma hami di tanggal 6 September 1987. Dung i, ditugasson ma hami tu Haiti raphon si John dohot si Marie Goode.

Mulai sian taon 1962, dang hea adong utusan injil sian Gilead na ditugasson tu Haiti. Utusan injil na parpudi dipalao do sian i di taon i. Tolu minggu dukkon lulus, sahat ma hami di Haiti. Ditugasson ma hami tu huria na gelleng, jala adong 35 penyiar disi. Dao-dao do jabu ni nasida jala di inganan na mardolok-dolok. Tikki i, poso dope hami jala dang godang pengalamannami. Holan hami do na tinggal di jabu ni utusan injil. Pogos hian do akka halak disi, jala godangan dang boi manjaha. Saleleng disan, godang do masalah na diadopi hami. Misalna, hea do masa badai, kerusuhan, jala jotjot do akka halak mangalo pamaretta dohot demo.

Alai, godang do na diparsiajari hami sian akka dongan di Haiti. Nang pe maol hian situasi disi, alai tetap do nasida marlas ni roha. Holong do roha ni nasida tu Jahowa, jala semangat do nasida marbarita. Misalna, adong ma sahalak donganta borua naung matua. Dang boi donganta i manjaha, alai adong hira-hira 150 ayat na dihafal ibana. Jadi, masalah na diadopi hami ganup ari mambahen hami lam semangat marbarita. Alana, holan Harajaon ni Debata do na boi pasaehon sude sitaonon. Las do tong rohanami ala piga-piga parsiajar Bibelnami gabe perintis biasa, perintis istimewa, dohot sintua.

Di Haiti, pajuppang ma au dohot sahalak misionaris Mormon. Poso dope ibana, goarna si Trevor. Sanga do piga-piga hali hami mambahas taringot Bibel. Martaon-taon dukkon i, tarsonggot do au ala mandapot surat sian ibana. Didok ibana, “Tardidi nama au di parpunguan wilayah annon! Dung i, naeng mulak ma muse au tu Haiti. Sai anggiat ma boi au gabe perintis istimewa di ingananku gabe misionaris Mormon najolo.” Jala memang saut do i. Melayani ma ibana disi rap dohot istrina saleleng martaon-taon.

EROPA DOHOT AFRIKA

Ditugasson ma hami tu sada daerah di Eropa na so pola be mangorai ulaonta marbarita. Di taon 1992, sahat ma hami di Kota Ljubljana, Slovenia. Magodang di jonok ni kota i do natua-tuakku andorang so pinda tu Italia. Tikki sahat hami disan, masa dope porang di akka inganan bekas negara Yugoslavia najolo. Ulaonta marbarita disan diawasi kantor cabang di Wina, Austria, di Zagreb, Kroasia, dohot di Beograd, Serbia. Saonari, adong do kantor cabang di ganup inganan bekas negara Yugoslavia najolo.

Dung pinda hami, ikkon marsiajar bahasa dohot budaya na baru do hami muse. Jotjot do halak dison mandok, “Maol hian do bahasanami daba.” Jala tutu do i! Alani i ma dipuji hami akka dongan na olo manjalo perubahan tugas. Boi do diida hami songon dia Jahowa mamasu-masu nasida. Boi do tong diida hami songon dia Jahowa pasaehon akka masalah marhite cara na denggan di tikki na pas. Di penugasannami sebelumna, godang do parsiajaran na mangurupi hami asa martahan mangadopi tantangan di Slovenia on. Jala dison pe, godang do parsiajaran na massai arga na dapotnami.

Di taon 2000, ditugasson ma hami tu Pantai Gading, Afrika Barat. Ala adong porang sipil disi, ikkon mangungsi ma hami tu Sierra Leone di bulan November 2002. Sasittongna hea do tong masa porang sipil di Sierra Leone saleleng 11 taon. Alai tikki sahat hami disi, dang adong be porang sipil. Borat hian do dihilala hami ala ikkon lao maninggalhon Pantai Gading. Alai parsiajaran na dapotnami saleleng on mangurupi hami asa tetap marlas ni roha.

Disi fokus ma hami mangurupi akka na olo marsiajar Bibel dohot akka donganta naung martahan saleleng masa porang. Pogos hian do nasida. Alai, olo do nasida mambagihon na adong di nasida. Lomo do rohanami maniru nasida. Misalna, adong ma sahalak donganta borua na naeng mangalehon piga-piga baju tu si Debbie. Di mulana i, dang olo si Debbie manjalo baju i. Alai didok donganta i ma, “Tikki masa porang, diurupi akka dongan sian negara na asing do hami. Jadi saonari gilirannami ma mangurupi hamu.”

Dung i, mulak ma muse hami tu Pantai Gading. Alai, masa ma muse kerusuhan alani masalah politik. Jadi di bulan November 2004, ikkon mangungsi ma muse hami. Marhelikopter ma hami jala holan sada tas do na boi huboan, na boratna 10 kilogram, songon i tong na diboan si Debbie. Di borngin i, marborngin ma hami di pangkalan militer Prancis jala modom di lante do hami. Marsogotna i, lao ma hami tu Swiss. Di tonga borngin, sahat ma hami di kantor cabang Swiss. Disi disambut Panitia Cabang dohot akka instruktur Sikkola Pelatihan Pelayanan do hami rap dohot istri ni nasida. Dihaol nasida ma hami, dilehon ma sipanganon, dohot godang coklat Swiss. Boi do dihilala hami holong ni nasida.

Ditugasson ma hami tu Ghana satokkin. Dung i, mulak ma muse hami tu Pantai Gading ala nga lam denggan situasina. Haburjuon ni akka dongan mangurupi hami martahan mangadopi akka tantangan dohot mangulahon tugasnami na satokkin i. Memang ikkon marsihaholongan do hita di organisasi ni Jahowa. Alai molo di au dohot si Debbie, istimewa do holong ni roha na tahilala i. Jala dapotnami do parsiajaran na massai arga sian akka tantangan na diadopi hami najolo.

TU TIMUR TENGAH

Di taon 2006, dikirim kantor pusat ma surat tu hami. Ditugasson ma hami tu Timur Tengah. Ikkon dibahen hami do godang penyesuaian. Alana ikkon marsiajar bahasa dohot budaya na baru do hami. Asing ni i, adong do muse tantangan na baru. Alana, jotjot do adong masalah politik dohot agama. Nang pe songon i, las do rohanami mangida akka dongan sian marragam latar belakang boi marsada ala mangihutton petunjuk sian organisasi. Dipuji hami do tong akka dongan dison. Alana, godangan sian nasida barani do mangadopi tantangan sian keluarga, dongan sasikkola, dongan sakarejo, dohot sian tetangga.

Di taon 2012, dohot ma hami tu parpunguan istimewa di Kota Tel Aviv, Israel. On ma parjolo sahali godang naposo ni Jahowa na marpungu disi, dukkon Pentakosta taon 33 M. Dang tarhalupahon hami parpunguan i!

Tikki di Timur Tengah, hea do ditugasson hami tu sada negara na mangorai ulaonta marbarita. Diboan hami ma piga-piga publikasi, marbarita do hami disi, jala dohot do hami tu parpunguan wilayah na holan saotik hadirinna. Manat do hami mangulahon i rap dohot piga-piga penyiar. Jadi aman do dihilala hami, nang pe tikki i godang pos pemeriksaan dohot akka tentara na mamboan sinjata.

MULAK MUSE TU AFRIKA

Di taon 2013, dapotnami ma tugas na berbeda. Diundang ma hami tu kantor cabang di Kota Kinshasa, Kongo. Massai uli do negara on jala luas. Alai pogos hian do akka halak disi, jala jotjot do masa porang. Mulana didok rohanami, ‘Kan nga hea hami di Afrika. Jadi rade do hami melayani disi.’ Hape godang dope na ikkon diparsiajari hami, tarlumobi taringot carana lao tu sada inganan na so adong dalan manang jembatanna. Nang pe songon i, godang do akka na positif na boi diida hami disi. Misalna, nang pe pogos hian akka dongan disi alai toktong do nasida setia jala marlas ni roha. Lomo hian do roha ni nasida marbarita. Marsitutu do nasida asa boi marpungu jala dohot tu parpunguan wilayah. Asing ni i, boi do diida hami songon dia Jahowa mamasu-masu ulaon marbarita disi. Alana, lam godang do na olo manangihon barita na uli. Jadi saleleng melayani di Kongo, dapotnami do parsiajaran na massai arga dohot akka ale-ale na songon keluarganami.

Di ujung ni taon 2017, dapotnami ma muse tugas na baru. Diundang ma hami tu Betel Afrika Selatan. Dang hea dope hami melayani di kantor cabang na songon i balgana. Jala tugasnami pe beda hian do. Jadi godang do muse na ikkon diparsiajari hami. Alai parsiajaran sian pengalamannami na sebelumna boi mangurupi hami. Godang do tong akka dongan naung melayani saleleng marpulu taon dison, jala massai holong do rohanami tu nasida. Luar biasa do keluarga Betel na di Afrika Selatan. Nang pe sian marragam suku dohot budaya, alai boi do nasida marsada. Jadi takkas do diida hami songon dia Jahowa mamasu-masu akka naposona na marsitutu patuduhon pangalaho na imbaru dohot na mandalatton prinsip ni Bibel. Dilehon Jahowa do hadameon tu nasida.

Nungnga godang tugas na dapotnami. Ikkon marsiajar bahasa dohot budaya na baru do hami, jala mambahen godang penyesuaian. Memang dang sai mura mangulahon i. Alai boi do toktong dihilala hami holong ni Jahowa na manoktong i marhite organisasina dohot akka dongan. (Ps. 144:2) Jadi pos do rohanami, sude pelatihan na dapotnami saleleng on mangurupi hami asa lam denggan di ulaon manomba Jahowa.

Mandok mauliate godang do au tu natua-tuakku, tu istrikku si Debbie, dohot tu akka dongan di liat portibi on. Alana boi do marsiajar au sian nasida sude. Jadi dang soal aha na lao masa, lomo do rohanami asa torus diajari Guru na Sangap i, i ma Jahowa.