Nungnga ‘Diparsiajari Hamu Aha Rahasiana’ asa Merasa Puas?

1. Aha do artina puas tu na adong di hita?

PUAS do hamu tu akka na adong di hamu? Halak na merasa puas pasti marlas ni roha do jala makkilala dame ni roha, ala diargai ibana akka na denggan naung dapotna sian Jahowa. Dang gabe jut rohana manang gabe muruk ala dang dapotna akka na diharappon ibana. Alai dang berarti gabe malas hita manang dang taulahon be manang aha. Misalna, dang sala molo lomo rohatta mandapot lam godang tugas di organisasi ni Jahowa. (Rom 12:1; 1 Tim. 3:1) Nang pe songon i, dang gabe mago las ni rohatta molo dang pittor hatop tadapot tugas tambahan i.

2. Aha do akibatna molo dang puas hita tu na adong di hita?

² Molo dang puas hita tu akka na adong di hita, olo do gabe tabahen keputusan na sala. Misalna, gabe jotjot ma hita kerja lembur asa boi tatuhor akka barang na sebenarna dang tahaporluhon. Bahkan adong do piga-piga halak Kristen na gabe manakko hepeng manang akka barang na dihalomohon nasida. Ra didok rohana, ‘Pantas do au mandapot on’, ‘Ikkon dapottu do barang on saonari’, manang ‘Dang pola boha molo hubuat hepeng on, hupaulak do annon’. Alai manang aha pe alasanna, sogo do roha ni Jahowa mangida i jala boi do i mambahen gabe lea goar ni Jahowa. (Poda 30:9) Adong do muse donganta na kecewa ala dang dapotna dope tugas tambahan songon na diharappon nasida. Akibatna, gabe dang olo be nasida manomba Jahowa. (Gal. 6:9) Boasa adong naposo ni Jahowa na gabe mambahen keputusan sisongon i? Ala dang puas nasida tu akka na adong di nasida.

3. Parsiajaran aha do na boi tadapot sian Pilippi 4:​11, 12?

³ Sude do hita boi merasa puas tu na adong di hita. Di suratna didok Apostel Paulus do, “Nungnga marsiajar au asa toktong marlas ni roha songon dia pe parngoluokku.” (Jaha Pilippi 4:​11, 12.) Tikki di penjara do si Paulus dibahen ibana suratna i. Alai dang gabe mago las ni rohana di tikki i. Alana, ‘nungnga diparsiajari ibana aha rahasiana’ asa boi merasa puas tu na adong di ibana. Maol do di hamu merasa puas tu na adong di hamu? Molo songon i na dihilala hamu, hata ni si Paulus i dohot pengalamanna boi paposson rohamuna na boi do tong hamu merasa puas tu na adong di hamu dang soal songon dia situasimuna. Memang dang sai mura mangulahon i, alana dang taboan tubu sifat i. Jadi, ikkon marsiajar do hita songon dia carana merasa puas tu na adong di hita. Di artikel on, lao tabahas ma akka sifat na boi mangurupi hita merasa puas tu na adong di hita.

ARGAI MA AKKA NA DENGGAN NAUNG DAPOTMUNA

4. Aha do manfaatna molo taargai akka na adong di hita? (1 Tessalonik 5:18)

⁴ Molo diargai sasahalak akka na adong di ibana, biasana gabe lam mura ma ibana merasa puas. (Jaha 1 Tessalonik 5:18.) Misalna, molo mandok mauliate hita ala nungnga tadapot akka kebutuhanta siganup ari, pasti gabe dang paholsohu be hita ala dang boi tadapot akka barang na tahalomohon. Jala molo taargai akka tugas di organisasi ni Jahowa naung tadapot saonari, pasti berupaya do hita mangulahon na dumenggan tu tugasta i. Gabe dang sai torus be tapikkirhon boha carana asa tadapot tugas na asing na tahalomohon. Diboto Jahowa do massai penting asa taargai akka na denggan naung tadapot. Alani i, didok di Bibel asa mandok mauliate hita tu Jahowa tikki martangiang. Molo taargai na adong di hita, boi ma tahilala ‘hadameon na so boi diattusi jolma, na boi manjaga roha dohot pikkiranta’.—Plp. 4:​6, 7.

5. Akka aha do na ikkon diingot halak Israel asa boi merasa puas? (Ida gambar.)

⁵ Pikkirhon ma na masa tu halak Israel. Jotjot do nasida marungut-ungut tu Jahowa ala dang adong sipanganon songon na hea diallang nasida tikki di Mesir. (4 Mus. 11:​4-6) Memang, susa do parngoluon di padang belantara. Alai aha do sebenarna na boi mangurupi nasida asa merasa puas? Ikkon di ingot jala diargai nasida do sude naung dibahen Jahowa tu nasida. Tikki di Mesir gabe budak do nasida, jala kejam do pambahenan ni halak Mesir tu nasida. Alai dibahen Jahowa do sappulu tulah tu halak Mesir lao paluahon halak Israel. Dung kaluar halak Israel sian Mesir, boi ma diboan nasida akka barang na sian mas, perak, dohot akka baju “sian halak Mesir”. (2 Mus. 12:​35, 36) Tikki terjebak nasida di Laut Merah, dibahen Jahowa do mukjizat. Dibola dua Jahowa do laut i asa boi nasida lewat sian i jala selamat. Tikki di padang belantara pe nasida, dilehon Jahowa do manna ganup ari lao allangon ni nasida. Attong, boasa marungut-ungut nasida alani sipanganon? Dang ala na so cukkup dilehon Jahowa sipanganon tu nasida. Alai, ala na so puas do nasida tu sude naung dilehon Jahowa tu nasida.

6. Songon dia do carana asa taargai akka na adong di hita?

⁶ Songon dia do carana asa boi hamu mangargai akka na adong di hamu? Na parjolo, bahen ma tikki ganup ari lao mamikkirhon akka na denggan naung dapotmuna. Boi do disurat hamu dua manang tolu pasu-pasu naung dapotmuna di bagasan sadari i. (And. 3:​22, 23) Na paduahon, mandok mauliate ma hamu tu akka halak naung mangulahon na denggan tu hamu. Jala na uppetting, mandok mauliate ma hamu tu Jahowa ganup ari. (Ps. 75:1) Na patoluhon, pillit ma akka dongan na sai mangargai akka na adong di nasida. Alana, molo mardongan hamu tu halak na jotjot marungut-ungut, hamu pe gabe jotjot do marungut-ungut. Alai molo mardongan hamu tu halak na sai mangargai akka na adong di nasida, hamu pe gabe songon i do. (5 Mus. 1:​26-28; 2 Tim. 3:​1, 2, 5) Molo talului kesempatan lao mandok mauliate, pasti gabe dang pamarsakku be hita mamikkiri sitaononta dohot akka na tahalomohon na so tadapot dope.

7. Aha do na diulahon si Aci asa boi merasa puas?

⁷ Pikkirhon ma pengalaman ni donganta na margoar si Aci, na tinggal di Indonesia. Didok ibana, “Saleleng pandemi COVID-19, jotjot do hubandingkon situasikku tu akka dongan na asing. Akibatna, gabe dang merasa puas be au tu akka na adong di au.” (Gal. 6:4) Alai aha do na mangurupi ibana asa manguba cara marpikkirna? Didok ibana muse, “Mulai ma hurimangi akka pasu-pasu naung dilehon Jahowa tu au ganup ari. Hurimangi do muse akka na denggan naung hudapot ala boi au gabe bagian sian organisasi ni Jahowa. Dung i, mandok mauliate do au tu Jahowa tu sudena i. Hasilna, gabe puas ma huhilala.” Jadi, molo dang marlas ni roha hamu alani situasimuna saonari, boi do dibahen hamu cara na sarupa songon na diulahon si Aci.

PATUDU MA SEREP NI ROHA

8. Aha do na masa tu si Baruk?

⁸ Hea do si Baruk sekretaris ni Panurirang Jeremia dang merasa puas tu tugas na didapot ibana. Memang, maol do tugasna, alana ikkon diurupi ibana do si Jeremia pasahatton barita panguhuman tu halak Israel ala dang dioloi nasida Jahowa. Alai di tikki i, dang berfokus si Baruk tu lomo ni roha Jahowa. Gariada, holan na dihalomohon rohana do na sai dipikkirhon. Alani i dipasingot Jahowa ma si Baruk marhite si Jeremia. Didok Jahowa do tu si Baruk, “Torus do dilului ho hasangapon tu dirim sandiri. Unang be lului akka sisongon i.” (Jer. 45:​3-5) Hira na didok Jahowa ma songon on tu si Baruk, “Puas ma ho tu tugasmu saonari.” Olo do si Baruk manjalo sipasingot i, jala toktong do ibana mambahen las roha ni Jahowa.

9. Aha do na boi taparsiajari sian 1 Korint 4:​6, 7? (Ida gambar.)

⁹ Olo do ra sasahalak marpikkir, pantas do ibana mandapot tugas tambahan di organisasi ni Jahowa. Alana didok rohana, godang do keterampilanna, kerja keras do ibana, manang nungnga leleng ibana melayani Jahowa. Hape halak na asing do na mandapot tugas na dihalomohon rohana i. Attong, aha do na mangurupi ibana tikki masa situasi sisongon i? Boi do dirimangi ibana hata ni Apostel Paulus na disurat di 1 Korint 4:​6, 7. (Jaha.) Taingot ma, sian Jahowa do sude tugas dohot keterampilan na adong di hita. Dang ala na unjago hita sian na asing umbahen na tu hita dilehon Jahowa tugas dohot keterampilan i. Alai dilehon Jahowa pe i sude, alani asi ni rohana na massai balga do tu hita.—Rom 12:​3, 6; Eps. 2:​8, 9.

10. Boha do carana asa boi hita gabe halak na serep roha?

¹⁰ Molo tarimangi jala tatiru teladan ni Jesus, boi do hita gabe halak na serep roha. Nang pe diboto Jesus Anak ni Debata do ibana, alai olo do ibana manussi pat ni akka apostelna. Didok Apostel Johannes do, ‘Nungnga diboto Jesus naung dipasahat Ama i saluhutna tu tanganna. Diboto ibana do na sian Debata ibana jala na ikkon mulak do ibana tu Debata. . . . Alai disussi ibana do pat ni akka siseanna i.’ (Joh. 13:​3-5) Di tikki i, boi do didok roha ni Jesus akka apostelna do na ikkon manussi patna. Alai dang hea ro tu roha ni Jesus songon i. Jala nang pe Anak ni Debata ibana, dang hea tarpikkir Jesus ikkon dapotna jabu na bagak, godang hepengna, manang ikkon sonang ngoluna. (Luk. 9:58) Serep do roha ni Jesus jala puas do ibana tu akka na adong di ibana. Gabe teladan na sempurna do Jesus tu hita.—Joh. 13:15.

11. Aha do na mangurupi si Dennis asa merasa puas?

¹¹ Sahalak donganta bawa na margoar si Dennis na tinggal di Belanda, berupaya do maniru Jesus asa gabe halak na serep roha. Didok ibana, “Sipata, molo huida sahalak donganta mandapot tugas na huhalomohon, gabe jut do rohakku. Alana menuruttu, au do na cocok mandapot tugas i. Alai tikki ro pikkiran sisongon i, huparsiajari ma topik taringot serep ni roha. Hupapungu ma akka ayat di JW Library^® taringot serep ni roha na boi hatop hubukka jala hujaha muse. Asing ni i, hudownload do di handphoneku piga-piga jamita taringot serep ni roha, jala jotjot do i hubege muse.a Marsiajar do au, molo sude tugas na taulahon di organisasi ni Jahowa dang lao pasangappon diritta, lao pasangappon Jahowa do. Jala Jahowa do na mambahen marhasil sude tugas na taulahon.” Jadi, molo metmet rohamuna ala dang dapot dope tugas na dihalomohon rohamuna, berupaya ma asa lam patuduhon serep ni roha. Molo serep rohamuna, gabe lam togu ma hubunganmuna tu Jahowa. Jala boi do i mangurupi hamu asa puas tu na adong di hamu.—Jak. 4:​6, 8.

RIMANGI MA JANJI NI JAHOWA

12. Akka janji ni Jahowa na dia do na boi mangurupi hita asa boi merasa puas? (Jesaya 65:​21-25)

¹² Boi do hita merasa puas molo tarimangi janji ni Jahowa. Di bukku Jesaya didok, diboto Jahowa do sude hasusaan na masa tu hita. Alai marjanji do tong Ibana na lao salpuhononna do i sude. (Jaha Jesaya 65:​21-25.) Lao tinggal ma hita di jabu na bagak, dapotta ma karejo na mambahen las rohatta, jala godang sipanganon na tabo dohot na bergizi. Asing ni i, dang khawatir be hita na lao masa bahaya tu hita manang tu gellengta. (Jes. 32:​17, 18; Hes. 34:25) Boi do pos rohatta na lao saut do sude janji ni Jahowa i.

13. Akka aha do hasusaan na tahilala saonari? Jala songon dia harapan na sian Jahowa boi mangurupi hita?

¹³ Boasa massai penting asa taingot janji ni Jahowa taringot ari na naeng ro? Alana mangolu “di ari parpudi” do hita saonari, jala godang do “hasusaan”. (2 Tim. 3:1) Alai nang pe songon i, diurupi Jahowa do hita asa boi martahan. Songon dia carana? Dilehon Ibana do petunjuk, gogo, dohot bantuan na tahaporluhon ganup ari. (Ps. 145:14) Asing ni i, dilehon Jahowa do harapan na boi mangurupi hita tikki masa hasusaan. Ra saonari, loja hian do dihilala hamu karejo holan lao mangalului kebutuhan ni keluargamuna. Alai na lao salelengna do hamu songon i? Daong. Nungnga marjanji Jahowa, lao lehononna do sude na dihaporluhon hamu di Paradeiso. (Ps. 9:18; 72:​12-14) Ra haccit do dagingmuna ganup ari ala nungnga matua. Adong do tong na gabe depresi, manang marsahit na parah. Alai na lao salelengna do hamu marsahit? Daong. Alana di tano na imbaru, dang adong be na marsahit manang na mate. (Pgk. 21:​3, 4) Ala adong harapan on, gabe dang jut be rohatta manang muruk tikki masa sitaonon. Boi do dame rohatta jala marlas ni roha nang pe adong na mambahen na so adil tu hita, mate halak na tahaholongi, manang masa sitaonon na asing di ngolutta. Alana taboto do, holan parsatokkinan do akka sitaonon i jala dang na lao susa be hita di tano na imbaru.—2 Kor. 4:​17, 18.

14. Aha do na boi taulahon asa lam pos rohatta tu janji ni Jahowa?

¹⁴ Massai penting do akka janji ni Jahowa i. Alana boi do i mangurupi hita asa merasa puas tu na adong di hita. Attong boha do carana asa lam pos rohatta tu janji ni Jahowa? Songon sasahalak na ikkon mamakke kacamata asa lam takkas mangida, hita pe asa lam pos rohatta tu janji ni Jahowa, tabayakkon ma diritta mangolu di Paradeiso. Misalna molo khawatir hita ala susa mangalului hepeng, boi do tabayakkon molo annon di Paradeiso dang porlu be di hita hepeng, jala dang adong be disi na pogos. Molo metmet rohatta ala dang dapotta dope tugas na taharappon, tarimangi ma dao do ummarga hangoluan na sempurna di Paradeiso sian akka tugas i. Disi boi ma hita melayani Jahowa sahat tu saleleng ni lelengna. (1 Tim. 6:19) Ra alani sitaonon na masa tu hita saonari, gabe maol tahilala lao mangarimangi janji ni Jahowa i. Alai molo jotjot tarimangi akka janjina i, boi ma i mangurupi hita asa unang holan mamikkirhon masalahta.

15. Aha do na boi diparsiajari hamu sian si Christa?

¹⁵ Marsiajar ma hita sian pengalaman ni si Christa, istri ni si Dennis na dipaboa nakkin. Didok ibana, “Adong do sahittu na mambahen gale otottu. Gabe markursi roda ma au jala sai peak di podoman. Haccit do huhilala ganup ari. Didok dokter dang na lao malum sahitton. Alai pittor hudok ma di bagasan rohakku, ‘Dang sarupa cara pandangku dohot cara pandang ni ibana taringot ari na naeng ro.’ Adong do harapan di au, jala i ma na mambahen dame pikkiranku. Saonari godang do memang sitaonokku, alai haduan di tano na imbaru lao marlas ni roha do au saleleng ni lelengna.”

“DANG HURANGAN MANANG AHA HALAK NA MAKKABIARI IBANA”

16. Boasa boi didok Raja Daud “dang hurangan manang aha” halak na makkabiari Jahowa?

¹⁶ Memang nang pe nga puas hita tu akka na adong di hita, sai adong dope akka hasusaan na masa tu hita. Pikkirhon ma contoh ni Raja Daud. Susa do dihilala ibana ala mate tolu anakna. Asing ni i, adong do halak na menuduh ibana jala menghianati ibana. Naeng dibunu sahalak raja do ibana, jala gabe buronan saleleng martaon-taon. Alai nang pe songon i, puas do si Daud tu akka na adong di ibana. Didok ibana do, “Dang hurangan manang aha halak na makkabiari [Jahowa].” (Ps. 34:​9, 10) Boasa boi didok si Daud songon i? Alana nang pe dipaloas Jahowa masa sitaonon i tu ibana, diboto si Daud do pasti lehonon ni Jahowa do sude na dihaporluhon ibana. (Ps. 145:16) Hita pe boi do songon si Daud. Pos ma rohatta, pasti urupan ni Jahowa do hita asa toktong setia tu Ibana nang pe adong sitaononta. Boi do tahilala dame ni roha jala marlas ni roha, dang soal songon dia situasitta.

17. Boasa bertekad hamu asa torus merasa puas tu akka na adong di hamu?

¹⁷ Lomo do roha ni Jahowa asa puas hamu tu akka na adong di hamu. (Ps. 131:​1, 2) Alani i, marsitutu ma hamu asa torus merasa puas. Torus ma argai akka na denggan na dapotmuna, serep ma rohamuna, jala ingot ma akka janji ni Jahowa. Molo diulahon hamu songon i, boi ma hamu merasa puas.—Ps. 16:​5, 6.