Diurupi Jahowa do Hamu asa Sabar jala Togu

1. Boasa dang sai mura toktong setia di ari parpudi on, jala ise do na boi mangurupi hita? (1 Petrus 5:10)

GODANG do hasusaan na taadopi di ari parpudi on. Misalna, adong do na marsahit na parah, mate halak na dihaholongi, manang adong tantangan sian keluarga dohot akka pamaretta. (Mat. 10:​18, 36, 37) Alai dang soal sitaonon aha na diadopi hamu, pos ma rohamuna pasti lehonon ni Jahowa do gogo tu hamu asa toktong setia tu Ibana.—Jaha 1 Petrus 5:10.

2. Ise do na boi mangurupi hita asa sabar jala togu manaon akka sitaonon?

² Molo sabar jala togu hita manaon akka hasusaan, berarti toktong do hita setia tu Jahowa. Nang pe adong sitaonon, dianiaya hita, manang digoda lao mangulahon dosa, boi do hita toktong marlas ni roha manomba Ibana. Jala ikkon pos do rohatta pasti lam denggan do annon situasitta. Alai, boi pe hita sabar jala togu ala dilehon Jahowa do gogo tu hita ‘lobi sian gogo ni sahalak jolma’. Jadi molo dang diurupi Jahowa, dang boi hita mangadopi sudena i. (2 Kor. 4:7) Di artikel on, lao tabahas ma akka na diparade Jahowa lao mangurupi hita asa sabar jala togu manaon akka hasusaan i. Jala tabahas ma muse aha do na porlu taulahon asa dapotta manfaat sian i.

TANGIANG

3. Boasa tadok tangiang i sada mukjizat?

³ Nang pe mardosa hita, diloas Jahowa do hita makkatai tu Ibana, jala olo do Ibana manangihon hita. Silehon-lehon na luar biasa do i sian Jahowa. (Heb. 4:16) Pikkirhon ma on: Boi do hita martangiang tu Jahowa manang sadihari pe, jala boi tapaboa tu Ibana sude na di rohatta. Asing ni i, dang soal bahasa aha na tapakke, diattusi Jahowa do i. Jala manang na didia pe hita, bahkan tikki di penjara manang di inganan na pinjil, ditangihon Jahowa do tangiangta. (Jona 2:​1, 2; Ul. 16:​25, 26) Tikki marsak situtu hita jala dang taboto aha na lao tadokkon tu Jahowa, boi do diboto Jahowa na di rohatta. (Rom 8:​26, 27) Jadi tutu ma, sada mukjizat do tangiang i.

4. Boi do tapangido tu Jahowa asa diurupi hita martahan mangadopi akka sitaononta?

⁴ Di Bibel, dipapos Jahowa do rohatta, “manang aha na tapangido sesuai tu lomo ni rohana, tangihononna do hita”. (1 Joh. 5:14) Attong, boi do tapangido tu Jahowa asa diurupi hita sabar jala togu manaon akka sitaononta? Boi. Alana, sesuai do i tu lomo ni rohana. Boasa tadok songon i? Molo sabar jala togu hita manaon akka sitaonon i, boi ma dialusi Jahowa tuduhan ni Sibolis. (Poda 27:11) Asing ni i, didok do tong di Bibel, lomo do roha ni Jahowa “mangurupi akka halak na manomba Ibana sian nasa rohana”. (2 Kron. 16:9) Jadi pos ma rohatta, lomo do roha ni Jahowa mangurupi hita, jala sanggup do Ibana mangulahon i.—Jes. 30:18; 41:10; Luk. 11:13.

5. Boasa tangiang boi mambahen dame rohatta? (Jesaya 26:3)

⁵ Sasittongna, godang do tong sitaonon na diadopi akka halak na so manomba Jahowa. Jala marsitutu do nasida mangalului cara asa boi dame roha ni nasida. Misalna, adong do piga-piga halak na mangulahon meditasi, na mambahen gabe kosong pikkiran ni nasida. Tujuanna, asa tenang dihilala nasida. Alai molo diulahon sasahalak songon i, bahaya do i tu dirina. Boi do gabe dipengaruhi akka suru-suruan na jahat ibana. (Bandingkon tu Mateus 12:​43-45.) Jala hadameon na dihilala nasida i holan satokkin do i. Alai molo hadameon na dilehon Jahowa, dao do undenggan sian i. Boasa tadok songon i? Alana didok di Bibel, tikki martangiang hita mangido bantuan ni Jahowa, lehonon ni Jahowa ma tu hita “hadameon na so boi diattusi jolma, na boi manjaga roha dohot [pikkiranta]”. (Plp. 4:7) Molo martangiang hita tu Jahowa, on patuduhon holan Ibana do na taasahon. Jala marjanji do Ibana, ‘toktong do lehononna tu hita hadameon i’. (Jaha Jesaya 26:3.) Boha do cara ni Jahowa mangulahon i? Diurupi Ibana do hita asa boi taingot akka naung taparsiajari sian Bibel. Akka ayat di Bibel boi paposson rohatta na massai holong do roha ni Jahowa tu hita, jala rade do Ibana mangurupi hita. Sudena i boi mambahen tenang jala dame rohatta.—Ps. 62:​1, 2.

6. Akka aha do na boi ditangiakkon hamu? (Ida gambar.)

⁶ Na porlu diulahon. Molo adong sitaonon na diadopi hamu, “pasahat ma holso ni [rohamuna] tu Jahowa” jala pangido ma asa dilehon dame ni roha tu hamu. (Ps. 55:22) Asing ni i, pangido ma bisuk sian Ibana asa diboto hamu aha na porlu ulahononmuna lao mangadopi sitaonon i. (Poda 2:​10, 11) Jala muse, unang ma lupa mandok mauliate tu Jahowa. (Plp. 4:6) Ganup ari, pikkirhon ma akka bantuan na dilehon Jahowa, jala mandok mauliate ma tu akka na denggan naung dilehon Ibana tu hamu. Jadi nang pe haccit dope ditaon hamu alani akka sitaonon i saonari, unang ma holan i na sai dipikkirhon hamu. Alai, akka pasu-pasu naung dijalo hamu saleleng on ma pikkirhon hamu.—Ps. 16:​5, 6.

HATA NI DEBATA

7. Boi do hata ni Debata mangurupi hita asa sanggup mangadopi akka sitaonon? Patorang ma.

⁷ Dilehon Jahowa do Hatana asa boi hita sabar jala togu mangadopi akka sitaonon. Godang do ayat di Bibel na paposson rohatta, pasti urupan ni Jahowa do hita. Misalna Mateus 6:8. Didok disi, “Nungnga diboto Amamuna manang aha na porlu di hamu andorang so dipangido hamu i tu Ibana.” Didok Jesus pe songon i, ala takkas do ditanda ibana Jahowa. Jadi pos ma rohatta, tikki masa sitaonon tu hita, diboto Jahowa do aha na tahaporluhon jala pasti urupanna do hita. Asing ni ayat i, godang nai dope ayat di Bibel na patoguhon rohatta asa tolap hita mangadopi akka sitaonon.—Ps. 94:19.

8. (a) Paboa ma contoh prinsip ni Bibel na boi mangurupi hita asa sabar jala togu mangadopi akka sitaonon. (b) Aha do na ikkon taulahon asa boi taingot akka prinsip ni Bibel?

⁸ Godang do prinsip di Bibel na boi mangurupi hita asa sabar jala togu mangadopi akka sitaonon. Jala akka prinsip i boi mambahen hita gabe marbisuk tikki lao mambahen akka keputusan. (Poda 2:​6, 7) Misalna didok di Bibel, unang ma pamarsakhu hita mamikkirhon aha na lao masa. Jala dijujui do hita asa toktong mangandalhon Jahowa ganup ari. (Mat. 6:34) Jadi, tapasomal ma manjaha jala mangarimangi Bibel ganup ari. Molo taulahon i, tikki ro hasusaan boi ma pittor taingot akka prinsip na hea taparsiajari.

9. Aha do manfaatna di hita molo tajaha pengalaman ni akka halak na disurat di Bibel?

⁹ Di Bibel, disurat do tong pengalaman ni akka halak na marhaposan tu Jahowa jala diurupi Jahowa do nasida. (Heb. 11:​32-34; Jak. 5:17) Molo tarimangi songon dia cara ni Jahowa mangurupi nasida, gabe lam pos ma rohatta tu Jahowa. Alana, Ibana do “parlinggomatta jala na mangalehon gogo tu hita, rade do Ibana mangurupi hita tikki masa hasusaan”. (Ps. 46:1) Jala molo tarimangi songon dia akka naposo ni Jahowa i toktong setia saleleng masa hasusaan, gabe taronjar ma rohatta asa maniru nasida.—Jak. 5:​10, 11.

10. Aha do na porlu diulahon hamu asa dapotmuna manfaat sian Bibel?

¹⁰ Na porlu diulahon. Jaha ma Bibel ganup ari, jala surat ma akka ayat na patoguhon rohamuna. Godang do akka donganta na manjaha ayat harian di tikki manogot. On mangurupi nasida mangarimangi akka parsiajaran na patoguhon roha di sadari i. Songon i ma pengalaman ni donganta borua na margoar si Marie.a Marsahit kanker do bapakna dohot omakna, jala nga naeng mate. Ibana do na mangurus nasida. Didok si Marie, “Tiap pagi, hujaha do ayat harian jala hurimangi do parsiajaran na dapottu sian i. Gabe boi ma au fokus mamikkirhon taringot Jahowa dohot akka janjina. Hasilna, dang holan sitaonokki be na sai hupikkiri.”—Ps. 61:2.

AKKA DONGAN SAHAPORSEAON

11. Boha do perasaanta mamboto akka donganta na asing pe mangadopi sitaonon songon hita?

¹¹ Silehon-lehon na asing na diparade Jahowa tu hita, i ma akka dongan sahaporseaon. Boi do nasida mangurupi hita asa sabar jala togu manaon akka hasusaan. Didok di Bibel, “akka [dongan sahaporseaotta] na di liat portibi on pe manaon sitaonon na songon i do”. On paposson rohatta, dang holan hita na mangadopi akka sitaonon i. (1 Ptr. 5:9) Lapatanna, adong do tong akka donganta na mangadopi situasi na sarupa songon hita. Jala toktong do nasida setia tu Jahowa. Jadi pos ma rohatta, hita pe boi do setia songon nasida!—Ul. 14:22.

12. Songon dia do hita boi marsiurupan dohot akka dongan? (2 Korint 1:​3, 4)

¹² Boi do dipatogu rohatta marhite hata dohot pambahenan ni akka dongan sahaporseaon. I ma na dihilala Apostel Paulus. Di suratna, dipaboa si Paulus do goar ni akka dongan na mangurupi ibana tikki gabe tahanan rumah ibana. Jala mandok mauliate situtu do si Paulus tu nasida. Alana rade do nasida mangapuli rohana, patoguhon ibana, jala mangalehon akka na dihaporluhon ibana. (Plp. 2:​25, 29, 30; Kol. 4:​10, 11) Saonari pe boi do tong tahilala sisongon i. Tikki masa sitaonon tu hita, rade do akka donganta mangurupi hita. Jala tikki masa sitaonon tu nasida, rade do hita mangurupi nasida.—Jaha 2 Korint 1:​3, 4.

13. Aha do na mangurupi si Maya asa sabar jala togu manaon sitaonon?

¹³ Taida ma pengalaman ni sahalak donganta borua di Rusia na margoar si Maya. Tikki masa sitaonon tu ibana, dipatogu akka dongan do ibana. Di taon 2020, ro ma polisi manggeledah jabuna. Dung i, diboan ma ibana tu pengadilan jala disukkuni ma ibana taringot haporseaonna. Didok si Maya, “Di tikki i, marsak hian do au jala lungun rohakku. Alai ditelepon akka dongan do au jala dikirim nasida do surat tu au. Didok nasida, massai holong do roha ni nasida tu au. Memang saleleng on, huboto do na holong roha ni akka dongan tu au jala nga songon keluargakku nasida. Alai dung na masa i, gabe lam pos ma rohakku na benar-benar holong do roha ni nasida tu au.”

14. Tikki masa sitaonon, aha do na porlu taulahon? (Ida gambar.)

¹⁴ Na porlu diulahon. Tikki masa sitaonon, unang ma gabe mandao hamu sian akka dongan. Jala unang ma maila hamu mangido bantuan sian akka sintua. Alana, boi do akka sintua “songon inganan partabunian sian alogo, songon inganan parlinggoman sian udan haba-haba”. (Jes. 32:2) Ingot ma muse, akka dongan sahaporseaonmuna pe mangadopi sitaonon do tong. Jadi urupi hamu ma nasida. Molo diulahon hamu songon i, boi ma hamu toktong marlas ni roha, sabar, jala togu manaon akka hasusaan.—Ul. 20:35.

JANJI NI JAHOWA

15. Aha do pengaruh ni janji ni Jahowa tu Jesus dohot tu hita? (Heber 12:2)

¹⁵ Lao mangurupi hita asa sabar jala togu mangadopi akka hasusaan, dipaboa Jahowa do akka janjina taringot ari na naeng ro. (Rom 15:13) Tikki di tano on dope Jesus, boi do ibana toktong sabar jala togu mangadopi akka sitaonon. Boasa? Alana, sai diingot ibana do akka janji ni Jahowa i. (Jaha Heber 12:2.) Diboto Jesus do molo toktong ibana setia, boi ma dibuktihon ibana pargabus do Sibolis i jala Jahowa do na ikkon dipasangap. Tarpaima do Jesus boi muse rap dohot Jahowa di surgo, gabe Raja, jala rap mamaretta dohot akka na miniahan. Dos songon i ma, ala taboto na boi do hita mangolu salelengna, gabe toktong ma hita sabar jala togu mangadopi akka sitaononta saonari.

16. (a) Aha do na mangurupi sahalak donganta borua asa sabar jala togu manaon sitaononna? (b) Aha do na taparsiajari sian pengalamanna i?

¹⁶ Taida ma pengalaman ni sahalak donganta borua na sian Rusia, goarna si Alla. Dipatogu do rohana ala mangingot janji ni Jahowa taringot ari na naeng ro. Ditakkup do suami ni si Alla jala dipenjarahon, hape dang diadili dope. Didok si Alla, “Jotjot do hutangiakkon taringot janji ni Jahowa i, jala sai hurimangi do i. Alani i, dang sai metmet be rohakku. Pos rohakku, salpu do annon hasusaan na hutaon on, jala Jahowa do na monang. Pasti pasu-pasuonna do hita.”

17. Boha do caratta patuduhon na arga do janji ni Jahowa i di hita? (Ida gambar.)

¹⁷ Na porlu diulahon. Rimangi ma akka janji ni Jahowa i. Bayakkon ma hamu nungnga di tano na imbaru, jala pasu-pasu aha na dihilala hamu disi. Ingot ma, akka sitaonon na taadopi saonari “parsatokkinan do i jala dang borat”. (2 Kor. 4:17) Asing ni i, paboa ma taringot janji ni Jahowa i tu na asing. Bayakkon ma songon dia situasi ni akka halak na so manomba Jahowa. Godang do tong sitaonon na diadopi nasida. Alai, dang diboto nasida taringot janji ni Jahowa. Nang pe holan saotik na dipaboa hamu tu nasida, boi do ra i mambahen nasida gabe naeng mamboto taringot Jahowa dohot akka janjina.

18. Boasa pos rohatta pasti saut do akka janji ni Jahowa i?

¹⁸ Godang do sitaonon na diadopi si Job. Alai, boi do diadopi ibana sudena i jala toktong setia tu Jahowa. Alani i, didok ibana ma tu Jahowa, “Saonari nungnga huboto be boi do sude diulahon Ho jala dang adong sakkapmu na so boi pasautonmu.” (Job 42:2) Diboto si Job do, dang adong na boi mangabbati Jahowa pasautton akka janjina. Molo taingot on, pasti gabe dipatogu do rohatta. Pikkirhon ma on: Adong sahalak borua na marsahit saleleng martaon-taon. Nungnga godang dokter dijuppangi ibana, alai dang adong na boi mangubati ibana. Gabe mandele do ibana alani i. Alai, pajuppang ma ibana dohot sahalak dokter na jago. Boi do dipaboa dokter i aha na mambahen ibana marsahit. Jala didok dokter i, pasti boi do ibana malum. Dung mambege hata ni dokter i, gabe lubbang ma pakkilalaan ni borua i jala boi ibana martahan mangadopi sahitna. Alai memang, ikkon sabar do ibana paimahon dokter i pamaluppon sahitna. Dos songon i ma, molo pos rohatta pasti saut janji ni Jahowa taringot Paradeiso, pasti boi do hita sabar jala toktong togu manaon akka hasusaan.

19. Asa toktong sabar jala togu manaon hasusaan, aha do na ikkon taulahon?

¹⁹ Songon naung tabahas, diparade Jahowa do bantuan asa boi hita sabar jala togu manaon akka hasusaan. Misalna, boi do hita martangiang tu Ibana, diparade Ibana do Hatana, akka dongan sahaporseaon, dohot akka janjina taringot ari na naeng ro. Jadi dang soal aha sitaonon na taadopi saonari, tamanfaatton ma sude na diparade Jahowa i. Molo taulahon i, boi ma hita toktong sabar jala togu sahat tu na salpu sude hasusaan di portibi on.—Plp. 4:13.