‘Jou ma Akka Sintua’

1. Aha do na patuduhon na massai arga do sude biru-biru ni Jahowa di Ibana?

MASSAI arga do di Jahowa sude biru-biruna. Nungnga dituhor Ibana nasida marhite mudar ni Jesus. Jala dilehon Ibana do akka sintua lao mangurus nasida. (Ul. 20:28) Dipangido Jahowa do asa denggan diurus akka sintua sude biru-biru i, jala ikkon diihutton nasida do tudu-tudu ni Jesus. Ikkon dipatogu nasida do sude biru-biru i jala diurupi asa toktong setia tu Jahowa.—Jes. 32:​1, 2.

2. Songon na dipaboa di Hesekiel 34:​15, 16, akka ise do na diurupi Jahowa?

² Parduli do Jahowa tu sude biru-biruna, tarlumobi tu akka na susa. Adong do ra sian hita na susa alani hasalaan na hea tabahen. Molo songon i situasitta, olo do Jahowa mangurupi hita marhite akka sintua. (Jaha Hesekiel 34:​15, 16.) Jadi talului ma bantuan. Martangiang ma hita tu Jahowa. Asing ni i, tapangido ma bantuan sian akka ‘parmahan dohot guru’ di huria.—Eps. 4:​11, 12.

3. Aha do manfaat na tadapot sian artikel on?

³ Di artikel on, lao tabahas ma songon dia Jahowa mangurupi akka halak na so togu be hubunganna tu Ibana marhite akka sintua. Dung i, tabahas ma sukkun-sukkun on: Andigan do porlu tapangido bantuan sian akka sintua? Boasa porlu taulahon i? Jala songon dia do akka sintua mangurupi hita? Mungkin saonari denggan do hubungatta tu Jahowa, jala dang porlu tapangido bantuan sian akka sintua. Alai artikel on boi mangurupi hita asa lam mangargai bantuan na diparade Jahowa. Taboto ma muse aha na ikkon taulahon molo tahilala porlu hita diurupi akka sintua.

ANDIGAN DO PORLU TAPANGIDO BANTUAN SIAN AKKA SINTUA?

4. Boasa boi tadok na dimaksud di Jakobus 5:​14-16, 19, 20 taringot halak na marsahit di partondion? (Ida gambar.)

⁴ Dipaboa si Jakobus do songon dia Jahowa mangurupi hita marhite akka sintua. Didok si Jakobus, “Adong do na marsahit di tonga-tongamuna? Dijou ibana ma akka sintua di huria.” (Jaha Jakobus 5:​14-16, 19, 20.) Halak na marsahit na dimaksud si Jakobus dison, i ma halak na marsahit di partondion manang halak na so togu be hubunganna tu Jahowa. Didok si Jakobus, halak na marsahit i ikkon manjou akka sintua di huria, dang manjou dokter. Didok ibana muse, boi do malum halak na marsahit i molo nungnga diampuni dosana. Hampir sarupa do na ikkon diulahon halak na marsahit di partondion dohot halak na marsahit di pardagingon. Halak na marsahit di pardagingon ikkon lao do tu dokter, dipaboa ibana ma boha dihilala ibana, jala ikkon diihutton do petunjuk ni dokter i. Dos songon i ma halak na marsahit di partondion. Ikkon dijuppangi ibana do akka sintua, dipaboa situasina, jala ikkon diihutton do nasehat na dilehon akka sintua i.

5. Boha do caratta mamboto denggan dope hubungatta tu Jahowa manang na dang?

⁵ Di Jakobus bindu 5, dijujui do hita asa manjuppangi akka sintua molo tahilala dang togu be hubungatta tu Jahowa. Ikkon hatop do i taulahon andorang so lam parah situasina! Ikkon jujur do hita tikki mamareso diritta. Alana didok di Bibel, molo dang manat hita boi do tadok di rohatta denggan dope hubungatta tu Jahowa, hape sebenarna dang songon i be. (Jak. 1:22) I ma na masa tu halak Kristen na di huria Sardis najolo, jala dipasingot Jesus do nasida. (Pgk. 3:​1, 2) Boha do caratta mamboto denggan dope hubungatta tu Jahowa manang na dang? Tabandingkon ma boha semangatta mangulahon lomo ni roha ni Jahowa saonari dohot najolo. (Pgk. 2:​4, 5) Misalna tapikkirhon ma on: ‘Toktong dope semangat au manjaha Bibel jala mangarimangi i? Moru do semangattu lao marpungu dohot persiapan? Toktong dope semangat au marbarita? Uppetting do di au mangalului hepeng saonari?’ Sian alusmuna tu akka sukkun-sukkun i, boi ma diboto hamu denggan dope hubunganmuna tu Jahowa manang na dang. Jadi molo adong na porlu dipadenggan hamu, berupaya ma hamu padenggatton i. Alai molo dang berhasil manang molo diulahon hamu dosa, pangido ma bantuan tu akka sintua.

6. Molo diulahon sasahalak dosa na balga, aha do na ikkon diulahon ibana?

⁶ Molo adong sasahalak na mangulahon dosa na balga jala dang olo bertobat, boi do gabe dipakaluar ibana sian huria. Alani i molo taulahon dosa na balga, ikkon makkatai do hita tu sintua. (1 Kor. 5:​11-13) Boasa? Alana, ikkon diurupi do hita asa denggan muse hubungatta tu Jahowa. Jala asa boi diampuni Jahowa hita, ikkon taulahon do “akka ulaon na patuduhon naung muba” hita. (Ul. 26:20) Sada sian akka ulaon i, i ma manjuppangi akka sintua jala mangakkui dosatta.

7. Akka ise do muse na porlu mangido bantuan sian akka sintua?

⁷ Dang holan akka halak na mangulahon dosa na balga na boi diurupi akka sintua. Alai dohot do tong akka halak na berjuang mangalo keinginan na sala. (Ul. 20:35) Misalna andorang so mananda hasittongan, adong do ra sian hita na marnarkoba, manonton pornografi, manang mangulahon seks na so patut. Alai sipata olo do ra tubu muse keinginan lao mangulahon i. Molo songon i situasina, unang ma mabiar mangido bantuan tu akka sintua. Makkatai ma tu sahalak sintua na dihilala hamu rade manangihon hamu, boi mangalehon nasehat na cocok, jala na boi paposson rohamuna pasti monang do hamu mangalo keinginan na sala i. (Pjm. 4:12) Alai molo metmet dope rohamuna alani keinginan na sala i, boi do akka sintua patoguhon rohamuna. Ra didokkon nasida ma, las do roha ni Jahowa ala dipangido hamu bantuan ni nasida. On berarti na penting do di hamu hubunganmuna tu Jahowa jala dang diasahon hamu dirimuna sandiri.—1 Kor. 10:12.

8. Ikkon tapaboa do sude kesalahan na tabahen tu akka sintua? Patorang ma.

⁸ Molo tabahen kesalahan, dang ikkon sai makkatai hita tu akka sintua. Misalna, olo do ra tadok hata na mambahen haccit roha ni donganta, manang muruk hita tu nasida. Molo songon i na masa, daripada langsung dipaboa hamu i tu akka sintua, tumagon do jolo diihutton hamu nasehat ni Jesus asa minta maaf jala mardame. (Mat. 5:​23, 24) Asing ni i, boi do diriset hamu sian publikasitta boha carana asa lam sabar, lambok, jala mangarajai diri. Alai molo dang berhasil dope, pangido ma bantuan sian akka sintua. I do na diulahon Apostel Paulus najolo tikki dibahen ibana surat tu halak Kristen di Pilippi. Tikki marsoal si Euodia dohot si Sintike, dipangido ibana ma sahalak donganta bawa di huria i lao mangurupi nasida. Dos songon i ma, akka sintua di huriamuna pe boi do mangurupi hamu.—Plp. 4:​2, 3.

BOASA PORLU TAPANGIDO BANTUAN SIAN AKKA SINTUA?

9. Boasa dang porlu maila hita mangido bantuan sian akka sintua? (Poda 28:13)

⁹ Molo taulahon dosa na balga manang tahilala dang sanggup hita mangalo keinginan na sala, porlu do hita makkatai tu akka sintua. Asa boi taulahon i, ikkon tapatudu do haporseaon jala ikkon barani do hita. Unang ma maila hita makkatai tu akka sintua. Boasa? Alana taboto, porlu do hita diurupi asa toktong mangulahon na sittong. Asing ni i, nungnga dilehon Jahowa tugas tu akka sintua lao mangurupi hita asa toktong togu hubungatta tu Jahowa. Jadi molo makkatai hita tu akka sintua, on patuduhon na porsea do hita tu Jahowa jala taoloi Ibana. (Ps. 94:18) Pos ma rohatta, olo do Jahowa mengampuni hita molo taakkui dosatta tu akka sintua jala dang taulahon be na sala i.—Jaha Poda 28:13.

10. Aha do na masa molo tatabunihon dosatta?

¹⁰ Molo olo hita mangakkui dosatta tu akka sintua, olo ma Jahowa mengampuni hita jala denggan ma muse hubungatta tu Ibana. Alai molo dang olo hita paboahon i tu akka sintua, boi do gabe lam parah situasina. I ma na masa tu Raja Daud. Sanga do ditabunihon ibana dosana. Akibatna gabe marsak ma ibana jala suda gogona, ala diboto ibana nga sega be hubunganna tu Jahowa. (Ps. 32:​3-5) Songon sasahalak na marsahit di pardagingon, molo dang pittor diubati boi do gabe lam parah sahitna i. Dos songon i ma halak na marsahit di partondion. Molo dang pittor diakkui ibana dosana tu akka sintua, lam leleng gabe sega ma hubunganna tu Jahowa. Dang lomo roha ni Jahowa masa i tu hita. Alani i ma dijujui Ibana hita asa “tapasae akka parsoalatta” dohot Ibana. Carana, makkatai ma hita tu akka sintua. Alana nasida do na boi mangurupi hita padenggatton hubungatta tu Jahowa.—Jes. 1:​5, 6, 18.

11. Aha do muse pengaruhna molo tatabunihon dosatta?

¹¹ Molo tatabunihon dosa na balga, berpengaruh do i tu na asing. Misalna dang karejo be tondi parbadia di huria, jala gabe dang marsada akka dongan. (Eps. 4:30) Alai boha do molo taboto adong sasahalak di huria na mangulahon dosa na balga? Ikkon tajujui do ibana asa makkatai tu akka sintua. Alai molo dang olo ibana, hape nungnga talehon tikki, ikkon hita do na paboahon i. Molo dang tapaboa i, gabe dohot do hita marsala disi. (3 Mus. 5:1) Boasa ikkon taulahon on? Ala holong rohatta tu Jahowa jala lomo rohatta asa setia tu Ibana. Asing ni i, boi do on mangurupi huria asa toktong ias jala asa denggan muse hubungan ni na mardosa i tu Jahowa.

SONGON DIA DO AKKA SINTUA MANGURUPI HITA?

12. Songon dia do akka sintua mangurupi halak na so togu be hubunganna tu Jahowa?

¹² Di Bibel, dijujui do akka sintua asa mangurupi halak na so togu be hubunganna tu Jahowa. (1 Tes. 5:14) Molo diulahon hamu dosa, disukkun do ra hamu lao ‘manimba’ sude na di roha dohot pikkiranmuna. (Poda 20:5) Memang dang sai mura paboahon i tu akka sintua. Bingung do ra hamu mamikkirhon sidohononmuna jala mabiar hamu so tung sala annon hatamuna. (Job 6:3) Alai unang ma maila manang mabiar hamu. Molo dipaboa hamu i tu akka sintua, na mangurupi nasida do hamu mamboto situasimuna. Ingot ma, dang olo akka sintua hatop-hatop mambahen kesimpulan. Jala pasti manat do hamu ditangihon asa diboto nasida sude faktana andorang so mangalehon nasehat. (Poda 18:13) Diboto akka sintua do tong, porlu do godang tikki lao mangurupi hamu jala dang cukkup holan sahali hamu pajuppang.

13. Tikki ditangiakkon akka sintua hita jala dilehon nasida nasehat sian Bibel, aha do manfaatna di hita? (Ida gambar.)

¹³ Dang olo akka sintua mambahen hamu gabe lam merasa bersalah. Gariada ditangiakkon nasida do hamu. Hilalaonmuna ma “margogo” do tangiang ni nasida i. Alana dukkon i, gabe dipatogu jala diapuli do rohamuna. Asing ni i, dibahen akka sintua ma “miak tu [hamu] di bagasan goar ni Jahowa”. (Jak. 5:​14-16) “Miak” na dimaksud dison, i ma Hata ni Debata. Dipakke akka sintua ma akka ayat ni Bibel lao mangapuli rohamuna, jala mangurupi hamu asa denggan muse hubunganmuna tu Jahowa. (Jes. 57:18) Nasehat ni nasida boi mambahen hamu margogo asa toktong mangulahon lomo ni roha ni Jahowa. Marhite nasida, hira na didokkon Jahowa ma tu hamu, “On do dalan i. Ihutton ma i.”—Jes. 30:21.

14. Songon na dipaboa di Galatia 6:​1, songon dia do akka sintua mangurupi sasahalak “na mangulahon na sala”? (Ida gambar.)

¹⁴ Jaha Galatia 6:1. Tikki adong sasahalak “na mangulahon na sala”, berarti dang diulahon ibana lomo ni roha ni Jahowa. Ra ala dibahen ibana keputusan na so denggan, manang diulahon ibana dosa na balga. Alai marsitutu do akka sintua ‘lambok mangurupi halak sisongon i asa muba’. Di bahasa Junani, hata “mangurupi” di ayat on manggombarhon sahalak dokter na boi padenggatton holi-holi na margeser asa unang sappe cacat permanen. Pasti berupaya do dokter i asa unang pahaccittu dihilala pasienna. Dos songon i ma akka sintua. Berupaya do nasida mangurupi halak na marsala i asa unang lam metmet rohana. Jala ikkon lambok do nasida pasingotton donganta i. Asing ni i, dipaingot do tong akka sintua asa “manat”. Ikkon diingot akka sintua do, nasida pe dang sempurna jala boi sala. Tikki lao mangalehon nasehat, unang ma didok roha ni nasida undenggan nasida sian halak na marsala i. Jadi ikkon serep do roha ni nasida jala patuduhon asi ni roha.—1 Ptr. 3:8.

15. Molo adong masalahta, aha do na porlu taulahon?

¹⁵ Porsea do hita tu akka sintua. Boasa? Alana nungnga diajari Jahowa nasida asa boi manjaga rahasia. Asing ni i, nungnga dilatik nasida asa mangalehon nasehat na sian Bibel, dang sian pikkiranna sandiri. Jala diajari do nasida lao mangurupi hamu mangatasi masalahmuna. (Poda 11:13; Gal. 6:2) Memang marasing-asing do sifat dohot pengalaman ni akka sintua. Alai unang ma mabiar hamu makkatai tu nasida manang sadihari pe. Sipata olo do ra tasukkun piga-piga sintua taringot situasitta. Alai tikki taulahon i, unang ma holan naeng mangalului nasehat na cocok tu rohatta. Alana tujuanta manjuppangi nasida, i ma lao mangalului “ajaran na sittong” na sian Hata ni Debata, dang holan lao mambege “hata na tabo begeon”. (2 Tim. 4:3) Asing ni i, tikki makkatai hamu tu sahalak sintua, disukkun do ra hamu nga adong sintua na asing na mamboto i, jala nasehat aha na dilehon tu hamu. Ala serep roha ni sintua i, olo do ra disukkun ibana pandapot ni sintua na asing taringot situasimuna.—Poda 13:10.

TANGGUNG JAWABTA

16. Aha do tanggung jawabta?

¹⁶ Memang, dilehon akka sintua do nasehat jala diurupi do hita tikki adong masalahta. Alai dang gabe nasida na mambahen keputusan di hita. Hita sandiri do na ikkon martanggung jawab tu na taulahon. Alani i sian hata dohot tindakanta, tapatudu ma na holong rohatta tu Jahowa jala lomo rohatta mambahen las rohana. Pasti diurupi Jahowa do hita mambahen keputusan na denggan jala toktong setia tu Ibana. (Rom 14:12) Alani i ma dang olo akka sintua manottuhon keputusan aha na ikkon tabahen. Alai dipakke nasida do Bibel lao mangurupi hita mangattusi pikkiran ni Jahowa. Molo tarimangi jala taulahon nasehat na dilehon nasida, gabe “tarlatik” ma hita mamboto dia na sittong dohot na sala, jala boi ma tabahen keputusan na denggan.—Heb. 5:14.

17. Aha do na dipangido Jahowa asa taulahon?

¹⁷ Massai las do rohatta boi gabe biru-biru ni Jahowa! Nungnga dilehon Jahowa “parmahan na burju”, i ma Jesus, naung mangalehon ngoluna asa boi hita mangolu salelengna. (Joh. 10:11) Jala songon naung dijanjihon Jahowa, dilehon Ibana do akka sintua lao manjaga hita. Didok Ibana, “Lehonokku ma tu hamu akka parmahan na mangulahon lomo ni rohakku. Lehonon ni nasida ma tu hamu parbinotoan jala urupan ni nasida ma hamu mangattusi.” (Jer. 3:15) Jadi molo tahilala dang togu be hubungatta tu Jahowa, manang porlu tapadenggan hubungatta tu Ibana, unang ma mabiar hita manjuppangi akka sintua. Dung i, taida ma songon dia Jahowa mangurupi hita marhite akka sintua.