Aha do na Ikkon Taulahon Tikki Masa Ketidakadilan?

1-2. Boha do tanggapan ni akka halak tikki mangida ketidakadilan, jala aha do na lao tabahas di artikel on?

GODANG do halak saonari na manaon ketidakadilan. Ra alani status ekonomi ni nasida, jenis kelamin, suku, manang budaya. Asing ni i, godang do halak na susa alani akka pejabat manang pebisnis na holan mamikkirhon hepeng. Berpengaruh do ra on sude tu hita manang tu halak na tatanda.

² Godang do halak saonari na gabe muruk alani ketidakadilan i. Boasa? Alana lomo do roha ni sude jolma asa dame ngoluna jala dibahen na adil tu nasida. Alani i, gabe marsitutu ma piga-piga halak lao mangatasi masalah ketidakadilan. Misalna, demo do nasida menentang pamaretta dohot hukum na marlakku. Manang dipillit nasida do pamimpin politik na marjanji lao mangatasi masalah ketidakadilan. Alai molo hita, dang songon i. Alana “dang sian portibi on” hita jala pos rohatta holan Harajaon ni Debata do na boi pasaehon masalah i. (Joh. 17:16) Memang lungun do rohatta jala muruk do hita molo dibahen na so adil tu halak na asing. Jala olo do ra didok rohatta, ‘Aha do na ikkon huulahon molo masa i?’ Lao mangalusi sukkun-sukkun i, tabahas ma perasaan ni Jahowa dohot Jesus tikki mangida ketidakadilan.

SOGO DO ROHA NI JAHOWA DOHOT JESUS TU KETIDAKADILAN

3. Boasa dang lomo rohatta mangida ketidakadilan? (Jesaya 5:7)

³ Boasa dang lomo rohatta mangida ketidakadilan? Alana dipaboa di Bibel, mirip songon Jahowa do hita ditoppa. “Holong do [roha ni Jahowa] tu na sittong dohot tu na tigor.” (Ps. 33:5; 1 Mus. 1:26) Sai adil do Jahowa jala dang lomo rohana mangida ketidakadilan! (5 Mus. 32:​3, 4; Mik. 6:8; Sak. 7:9) Misalna, di jaman ni Panurirang Jesaya, godang do halak Israel na mambahen na so adil tu dongan sabangsona. Boha do tanggapan ni Jahowa mangida i? Dibege Ibana do ‘andung-andung’ ni nasida. (Jaha Jesaya 5:7.) Asing ni i, dihukum Jahowa do halak na torus mangalo patikna jala na mambahen na so adil tu halak na asing.—Jes. 5:​5, 13.

4. Boha do perasaan ni Jesus molo dibahen na so adil tu sasahalak? (Ida gambar.)

⁴ Songon Jahowa, adil do tong Jesus jala dang lomo rohana mangida ketidakadilan. Aha ma buktina? Tikki di tano on Jesus, hea ma diida ibana sahalak bawa na mate tanganna sabbariba. Asi do roha ni Jesus mangida bawa i jala dipamalum ma bawa i. Alai tikki diida akka pamimpin agama i, muruk ma nasida. Didok nasida, dang diihutton Jesus patik taringot ari Sabat. Alana menurut nasida, uppetting do patik i sian pamaluppon bawa i. Boha do perasaan ni Jesus mangida nasida? Didok di Bibel, “Marsak ma ibana alani jogal ni roha ni nasida.”—Mrk. 3:​1-6.

5. Aha do pengaruhna molo dang takendalihon emositta tikki dibahen na so adil tu hita?

⁵ Muruk do Jahowa dohot Jesus tikki adong sasahalak na mambahen na so adil tu na asing. Jadi dang sala molo songon i tong perasaanta. (Eps. 4:26) Alai, ikkon takendalihon do emositta. Taingot ma, dang boi hita mangatasi masalah ketidakadilan. Jala molo sai torus hita muruk, boi do i mambahen hita gabe marsahit manang depresi. (Ps. 37:​1, 8; Jak. 1:20) Jadi aha do na ikkon taulahon molo dibahen na so adil tu hita manang tu halak na asing? Marsiajar ma hita sian Jesus.

NA DIULAHON JESUS TIKKI MASA KETIDAKADILAN

6. Ketidakadilan aha do na terjadi tikki di tano on Jesus? (Ida gambar.)

⁶ Tikki di tano on Jesus, jotjot do diida ibana akka halak mambahen na so adil tu halak na asing. Misalna, diida ibana do akka pamimpin agama mambahen godang aturan na mambahen susa ngolu ni akka halak. (Mat. 23:​2-4) Asing ni i, diida ibana kejam do pamarettaon ni Rom. Jadi godang do halak Jahudi na berharap asa bebas sian pamarettaon ni Rom. Sappe dibahen nasida do piga-piga kelompok lao mangalo pamarettaon ni Rom. Alai boha do molo Jesus? Dang olo Jesus dohot tu ulaon sisongon i. Tikki diboto Jesus na lao dibahen akka halak ibana gabe raja, lao do ibana maninggalhon nasida.—Joh. 6:15.

7-8. Tikki di tano on Jesus, boasa dang diatasi ibana masalah ketidakadilan? (Johannes 18:36)

⁷ Tikki di tano on Jesus, dang olo ibana dohot tu urusan politik lao mangatasi masalah ketidakadilan. Boasa? Alana diboto Jesus do, dang tolap jolma mamaretta jolma jala dang adong hak ni jolma lao mamaretta. (Ps. 146:3; Jer. 10:23) Asing ni i, dang boi jolma mangatasi penyebab ni sude masalah ketidakadilan. Aha ma i? Na parjolo, i ma Sibolis, na mangarajai portibi on. Kejam do ibana jala dipakke ibana do huasona lao mambahen ketidakadilan. (Joh. 8:44; Eps. 2:2) Na paduahon, i ma ketidaksempurnaan ni jolma. Nang pe burju sasahalak, dang boi sai torus ibana adil alana dang sempurna ibana.—Pjm. 7:20.

⁸ Diboto Jesus do muse holan Harajaon ni Debata do na boi mangatasi sude na mambahen ketidakadilan. Alani i ma dipakke ibana tikki dohot gogona “paboahon barita na uli taringot tu Harajaon ni Debata”. (Luk. 8:1) Dipapos Jesus do tong roha ni halak “na mauas male tu hasittongan”, satokkin nai dang adong be ketidakadilan dohot korupsi. (Mat. 5:6; Luk. 18:​7, 8) Alai dang boi pamarettaon ni jolma pasautton i. Holan Harajaon ni Debata do na boi pasautton i jala “dang sian portibi on” Harajaon i.—Jaha Johannes 18:36.

TIRU MA JESUS TIKKI MANGADOPI KETIDAKADILAN

9. Boasa pos rohatta holan Harajaon ni Debata do na boi mangatasi masalah ketidakadilan?

⁹ Mangolu di “ari parpudi” do hita saonari. Jadi pasti unggodang do terjadi ketidakadilan saonari sian di tikki ni Jesus najolo. Alai sian najolo, Sibolis dohot akka halak na mangihutton ibana do na mambahen ketidakadilan. (2 Tim. 3:​1-5, 13; Pgk. 12:12) Songon Jesus, taboto do holan Harajaon ni Debata do na boi manghancurhon penyebab ni masalah ketidakadilan. Ala Harajaon ni Debata na tadukung, unang ma dohot hita demo menentang pamaretta jala unang ma porsea hita na boi jolma pasaehon masalah ketidakadilan. Taparrohahon ma pengalaman ni sahalak donganta borua na margoar si Stacy.a Andorang so marsiajar Bibel, jotjot do si Stacy demo. Alai sada tikki, ragu ma ibana sittong do na diulahon ibana i manang na daong. Didok ibana, “Tikki dohot au demo najolo, sukkun-sukkun do rohakku, ‘Sittong do na huulahon on?’ Alai saonari, huboto ma holan Jahowa dohot Harajaonna do na boi mangatasi sude masalah dohot sude sitaonon. Molo au, dang tolap au mangulahon i.”—Ps. 72:​1, 4.

10. Sesuai tu Mateus 5:​43-48, boasa dang olo hita dohot tu akka kelompok na menentang pamaretta? (Ida gambar.)

¹⁰ Godang do halak saonari na bergabung tu akka kelompok na menentang pamaretta. Muruk do nasida, dialo nasida do hukum na marlakku, jala dibahen nasida do susa halak na asing. Alai, maralo do i tu na diajarhon Jesus tu hita. (Eps. 4:31) Taida ma na didokkon sahalak donganta na margoar si Jeffrey taringot on. Didok ibana, “Tikki demo akka halak, ra di mulana tertib do nasida. Alai boi do toppu muba situasina, gabe gaor jala marbadai.” Hape didok Jesus, ikkon tahaholongi do sude halak, bahkan halak na so sapandapot tu hita manang na menganiaya hita. (Jaha Mateus 5:​43-48.) Jadi ala halak Kristen hita, berupaya do hita asa unang taulahon na maralo tu ajaran ni Jesus.

11. Boasa sipata maol tahilala maniru Jesus?

¹¹ Memang taboto do holan Harajaon ni Debata do na boi pasaehon masalah ketidakadilan. Alai sipata molo dibahen na so adil tu hita, dang mura maniru Jesus. I ma na dihilala si Janiya. Jahat do piga-piga halak tu ibana alani warna ni kulitna. Didok ibana, “Lungun hian do rohakku alani pambahenan ni halak tu au, jala muruk situtu do au. Sappe didok rohakku do, dihukum ma nian halak i. Gabe naeng dohot ma au tu kelompok na mambela keadilan. Alana hurasa molo dohot au tu kelompok sisongon i, boi ma hubela dirikku.” Alai sada tikki sadar ma si Janiya, porlu do diuba ibana cara marpikkirna. Didok ibana, “Saleleng on hata ni jolma do hape na huihutton, dang huandalhon Jahowa. Alani i, huputusson ma asa kaluar au sian kelompok i.” Aha ma parsiajaranna tu hita? Memang, muruk do hita tikki dibahen na jahat manang na so adil tu hita. Alai manat ma, ikkon boi do takendalihon emositta jala unang ma sappe gabe bagian sian portibi on hita.—Joh. 15:19.

12. Boasa ikkon manat hita taringot aha na tajaha, tatotton, dohot na tabege?

¹² Tikki dibahen na so adil tu hita manang tu halak na asing, olo do gabe emosi hita. Attong boha do carana mengendalihon emositta? Sada carana i ma manat ma hita mamillit sijahaotta, aha na tatotton, dohot na tabege. Alana di media sosial, godang do dipaboa barita taringot ketidakadilan jala na manjujui hita asa menentang pamaretta. Alai, belum tentu sittong barita na dipaboa i. Molo pe sittong i jala sai tajaha, dang na gabe sae masalahna. Gariada gabe lam marsak do hita, lungun rohatta, jala muruk. (Poda 24:10) Bahkan olo do gabe lupa hita holan Harajaon ni Debata do na boi pasaehon masalah ketidakadilan.

13. Nang pe jotjot taida masa ketidakadilan, aha do manfaatna molo tajaha Bibel ganup ari?

¹³ Molo tajaha Bibel ganup ari jala tarimangi, boi do i mangurupi hita tikki dibahen na so adil tu hita manang tu halak na asing. Taida ma pengalaman ni si Alia. Lungun hian do rohana tikki adong na mambahen na jahat tu halak na asing. Jala muruk do ibana ala dang dihukum halak na jahat i. Alai sada tikki, muba ma cara marpikkirna. Didok ibana, “Huboto ma, ikkon pos do rohakku na lao pasaeon ni Jahowa do akka masalah sisongon i. Tikki i, hujaha ma ayat di Job 34:​22-29. Akka ayat i paingotton au, dang adong na buni di adopan ni Jahowa. Holan Jahowa do na marhak manguhumi. Jala pasti pasaeonna do sude masalah ketidakadilan.” Jadi, ikkon sabar do hita paimahon Harajaon ni Debata pasaehon sude masalah ni jolma. Alai, aha do na boi taulahon saonari?

AHA DO NA BOI TAULAHON SAONARI?

14. Aha do na boi taulahon saonari molo taida masa ketidakadilan? (Kolosse 3:​10, 11)

¹⁴ Dang boi takendalihon pambahenan ni sasahalak tu halak na asing. Alai molo hita, boi do takendalihon aha na lao taulahon. Songon naung taparsiajari, ikkon tatiru do Jesus na makkaholongi akka halak. Alana, boi do holong mangonjar rohatta asa burju tu sude halak, bahkan tu halak na menganiaya hita. (Mat. 7:12; Rom 12:17) Las do roha ni Jahowa molo burju jala adil hita tu sude halak.—Jaha Kolosse 3:​10, 11.

15. Aha do manfaatna molo tapaboa hasittongan na sian Bibel tu akka halak?

¹⁵ Cara na dumenggan lao mangurupi akka halak, i ma mangajari nasida taringot Jahowa. Boasa boi tadok songon i? Alana, “parbinotoan taringot Jahowa” boi mangurupi sasahalak asa muba. Halak na jahat jala na kejam hian, boi do muba gabe halak na burju jala parholong. (Jes. 11:​6, 7, 9) I ma na dihilala sahalak bawa na margoar si Jemal. Andorang so marsiajar Bibel ibana, dohot do ibana tu kelompok na menentang pamaretta. Alana, dihilala ibana kejam do pamaretta di ingananna. Alai dung marsiajar Bibel ibana, dang olo be ibana dohot tu kelompok sisongon i. Didok ibana, “Dang boi tapaksa sasahalak asa muba. Alai molo marsiajar Bibel sasahalak, boi do ibana muba. I do na huhilala.” Jadi molo lam godang halak na marsiajar Bibel jala muba, gabe lam otik ma halak na mambahen na so adil.

16. Boasa olo hita paboahon taringot Harajaon ni Debata tu akka halak?

¹⁶ Songon Jesus, semangat do hita paboahon tu akka halak holan Harajaon ni Debata do na boi pasaehon masalah ketidakadilan. On boi patoguhon roha ni akka halak na mangadopi ketidakadilan. (Jer. 29:11) I ma na dihilala si Stacy na dipaboa nakkin. Didok ibana, “Ala huboto pasti pasaeon ni Debata do sude masalah na adong di portibi on, gabe boi ma au tetap tenang tikki dibahen na so adil tu au manang tu halak na asing. Dipakke Jahowa do Bibel lao mangapuli rohakku.” Asa rade hita paboahon barita na uli i, ikkon denggan do i tapersiappon. Alana molo pos rohatta tu janji ni Debata, gabe lam pos ma rohatta paboahon i tu na asing. Misalna, tu dongan sasikkolatta manang tu dongan sakarejotta. Boi ma tapaboa tu nasida boasa susa hita jala aha do na naeng bahenon ni Jahowa lao pasaehon sude masalahta.b

17. Songon dia do Jahowa mangurupi hita mangadopi ketidakadilan?

¹⁷ Saleleng ‘di portibi na dirajai’ Sibolis on dope hita, pasti taadopi do godang ketidakadilan. Alai nungnga marjanji Jahowa lao mangurupi hita jala lao pamateonna do Sibolis dohot sude halak na jahat. Tarpaima do hita saut janji i. (Joh. 12:31) Marhite Bibel, dipaboa Jahowa do boasa godang ketidakadilan terjadi. Jala dipaboa Ibana do tong songon dia perasaanna mangida hita susa. (Ps. 34:​17-19) Sian Jesus, nungnga taboto boha do seharusna tanggapanta tikki dibahen na so adil tu hita. Jala satokkin nai, pasaeon ni Harajaon ni Debata nama ketidakadilan jala dang adong be halak na susa. (2 Ptr. 3:13) Jadi sai anggiat ma toktong hita semangat lao paboahon barita na uli taringot Harajaon ni Debata. Jala tapaima ma haduan gok “hatigoran dohot hasittongan” di tano on.—Jes. 9:7.