Taargai ma Sude Halak

1. Boha do perasaatta molo diargai halak hita? (Poda 22:1)

BOHA do perasaatta molo diargai halak hita? Pasti las do rohatta. Sude do halak merasa ikkon diargai. Alani i, las do rohatta molo diargai hita. Jala Bibel pe mandok, “Tumagon do dipasangap sian na dapotan perak dohot mas.”—Jaha Poda 22:1.

2-3. Aha do na mambahen gabe maol hita mangargai na asing, jala aha do na lao tabahas di artikel on?

² Memang, dang sai mura mangargai halak na asing. Ra, ala taboto hahurangan ni nasida jala ala godang halak di sakalilingta na so mangargai halak na asing. Alai unang ma tatiru nasida. Boasa? Alana, dipangido Jahowa do asa taargai “sude jolma”.—1 Ptr. 2:17.

³ Di artikel on, lao tabahas ma aha do lapatan ni patuduhon sangap manang mangargai halak na asing. Jala tabahas ma songon dia patuduhon i tu (1) anggota keluargatta, (2) dongan sahaporseaotta, dohot (3) akka na so Saksi. Dung i, tabahas ma muse songon dia carana asa toktong taargai akka halak, nang pe dang sai mura mangulahon i.

LAPATAN NI MANGARGAI HALAK

4. Aha do lapatan ni mangargai halak?

⁴ Aha do lapatan ni mangargai halak? Di piga-piga bahasa, adong do hubungan ni hata “mangargai” dohot “pasangappon”. Hata “mangargai”, i ma taringot songon dia cara pandangta tu sasahalak. Molo taargai na asing, berarti arga do nasida di hita jala layak taparrohahon. Ra, alani sifat ni nasida na denggan, akka naung diulahon nasida, manang alani tugas ni nasida. Molo hata “pasangappon”, i ma taringot caratta maradoppon sasahalak. Molo tapasangap sasahalak, berarti denggan do pambahenatta tu nasida jala tabahen nasida merasa diargai. Ikkon sian nasa rohatta do hita patuduhon sangap tu sasahalak.—Mat. 15:8.

5. Boasa olo hita mangargai halak na asing?

⁵ Dipangido Jahowa do asa taargai halak na asing, termasuk ma i asa unduk tu “pamaretta”. (Rom 13:​1, 7) Alai, adong do ra piga-piga halak na mandok, “Olo do au mangargai sasahalak molo denggan pambahenanna.” Alai denggan do songon i? Daong. Taboto do olo pe hita mangargai halak, dang alani akka naung diulahon ibana. Alai, ala dipangido Jahowa do i taulahon jala lomo rohatta mambahen las rohana.—Jos. 4:14; 1 Ptr. 3:15.

6. Taargai ma akka halak na so mangargai hita. Bahen ma contoh. (Ida sampul.)

⁶ Sukkun-sukkun do ra rohatta, ‘Boha ma carana mangargai halak na so mangargai iba?’ Taida ma piga-piga halak naung berhasil mangulahon i. Na parjolo, si Jonatan. Hea do dipaila si Saul si Jonatan di jolo ni godang halak. (1 Sam. 20:​30-34) Nang pe songon i, toktong do dipasangap si Jonatan bapakna i. Sahat tu na mate si Saul, torus do diurupi si Jonatan ibana marporang. (2 Mus. 20:12; 2 Sam. 1:23) Na paduahon, si Hanna. Hea do Sintua Malim Eli manudu si Hanna mabuk. (1 Sam. 1:​12-14) Diboto si Hanna do hahurangan ni si Eli. Dang dihukum si Eli akka anakna na mangulahon na jahat. Hape sahalak sintua ni malim do ibana di Israel. Nang pe songon i, toktong do sopan si Hanna makkatai tu si Eli. (1 Sam. 1:​15-18; 2:​22-24) Na patoluhon, Apostel Paulus. Didok halak Atena do ibana “sigodang hata”. (Ul. 17:18) Alai nang pe songon i, toktong do denggan si Paulus makkatai tu nasida. (Ul. 17:22) Sian on taboto ma, molo holong rohatta tu Jahowa jala lomo rohatta mambahen las rohana, pasti taargai jala tapasangap do halak na asing, nang pe dang sai mura mangulahon i. Saonari, tabahas ma akka ise do na ikkon taargai jala boasa taulahon i.

TAPATUDU MA SANGAP TU ANGGOTA KELUARGATTA

7. Boasa sipata maol patuduhon sangap manang mangargai anggota keluargatta?

⁷ Tantanganna. Ala sai rap do hita dohot anggota keluargatta, gabe taboto do akka sifat ni nasida na denggan dohot hahurangan ni nasida. Ra, adong do anggota keluargatta na marsahit manang hona gangguan kecemasan. Gabe maol ma hita mangurus nasida. Asing ni i, adong do ra anggota keluargatta na kasar makkatai jala dang denggan pambahenanna tu hita. Sudena on boi do mambahen hita maol mangargai anggota keluargatta. Molo dang saling mangargai hita, dang las be rohatta jala dang marsada be keluargatta. Dipatudos do sada keluarga songon pamatangta. Molo adong sada bagian di pamatangta na haccitan, dohot do bagian na asing sian pamatangta i haccitan. Dos songon i ma, molo dang marsada jala dang saling mangargai hita di keluarga, boi do gabe dang denggan kerja sama di keluarga i. Alai songon sahit na boi dipamalum, situasi di keluarga pe boi do dipadenggan asa boi saling mangargai.

8. Boasa penting patuduhon sangap tu anggota keluarga? (1 Timoteus 5:​4, 8)

⁸ Boasa ikkon taulahon i? (Jaha 1 Timoteus 5:​4, 8.) Di suratna na parjolo tu si Timoteus, didok si Paulus do ikkon denggan taurus keluargatta. Taulahon pe i, dang holan alani nga tanggung jawabta i. Alai ala naeng “mangoloi paretta ni Debata” do hita. Hatana i pe patuduhon, bagian sian ibadat tu Jahowa do pasangappon anggota keluargatta. Jadi molo tapasangap anggota keluargatta, na pasangappon Jahowa do hita disi. Alana Jahowa do na mambahen keluarga. (Eps. 3:​14, 15) On ma alasanna boasa ikkon tapasangap anggota keluargatta.

9. Songon dia do suami manang istri patuduhon sangap tu pasanganna? (Ida gambar.)

⁹ Cara mangulahon i. Molo holong do roha ni sahalak suami tu istrina, pasti sangap do dibahen ibana istrina. Dang holan tikki di jolo ni halak, alai dohot do tong tikki holan halak i na dua. (Poda 31:28; 1 Ptr. 3:7) Dang olo ibana mamukkul istrina, pailahon istrina i, jala dang dibahen ibana istrina merasa dang mararga. Taparrohahon ma pengalaman ni si Ariel,a na tinggal di Argentina. Didok ibana, “Sipata didok istrikku do akka hata na mambahen haccit rohakku. Alai songon i pe hatana ala na marsahit do ibana. Sai hudok ma di rohakku, kasar pe hatana alai dang sian rohana i. Jala huingot ma ayat na di 1 Korint 13:5. On mangurupi au asa toktong lambok makkatai tu ibana jala dang muruk.” (Poda 19:11) Dos songon i ma tong sahalak istri. Ikkon sangap do dibahen ibana suamina. (Eps. 5:33) Dang olo ibana mangaleai suamina, paroa-roahon suamina, manang mambahen gelar na so patuduhon sangap tu suamina. Molo diulahon ibana i, boi do gabe hancur perkawinan ni nasida. (Poda 14:1) Taparrohahon ma pengalaman ni sahalak donganta na sian Italia. Hona gangguan kecemasan do suamina. Didok ibana, “Hurasa na terlalu khawatir do suamikku. Najolo, jotjot do tarida sian hatakku dohot bohikku na so hupasangap ibana. Alai ujungna, muba do au. Manat ma au mamillit dongan. Dang olo au mardongan tu akka halak na so pasangappon na asing. Gabe ummura ma au pasangappon suamikku.”

10. Songon dia do cara ni akka dakdanak pasangappon natua-tuana?

¹⁰ Hamu akka dakdanak, oloi hamu ma natua-tuamuna. (Eps. 6:​1-3) Sopan ma hamu makkatai tu nasida. (2 Mus. 21:17) Lam tamba umur ni natua-tuamuna, porlu do ra diurus hamu nasida. Bahen ma na terbaik lao mangulahon i. Taparrohahon ma pengalaman ni si María. Dang Saksi Jahowa bapakna jala marsahit do bapakna. Denggan do diurus ibana bapakna i. Alai kasar do bapakna makkatai tu ibana. Alani i, borat do on di si María. Didok si María, “Hupangido do tu Jahowa asa diurupi au patuduhon sangap tu bapakku. Sai hupaingot do dirikku, Jahowa do na mangido asa hupasangap natua-tuakku. Jadi pasti lehononna do gogo tu au asa boi mangulahon i. Bahkan molo pe dang muba bapakki, ikkon toktong do hupasangap ibana.” Jadi molo tapasangap anggota keluargatta nang pe sipata maol mangulahon i, on patuduhon na taihutton do pengaturan na dibahen Jahowa.

TAPATUDU MA SANGAP TU AKKA DONGAN SAHAPORSEAON

11. Boasa sipata maol tahilala patuduhon sangap manang mangargai akka donganta?

¹¹ Tantanganna. Marsitutu do akka donganta mangulahon na diparsiajari nasida sian Bibel. Alai sipata, olo do dang denggan pambahenan ni nasida tu hita, salah paham, manang dibahen haccit rohatta. Molo ‘haccit rohatta dibahen’ nasida, olo do gabe maol tahilala pasangappon nasida. (Kol. 3:13) Tikki masa situasi songon i, aha do na boi mangurupi hita?

12. Boasa massai penting pasangappon akka dongan sahaporseaotta? (2 Petrus 2:​9-12)

¹² Boasa ikkon taulahon i? (Jaha 2 Petrus 2:​9-12.) Di suratna na paduahon, didok si Petrus adong do piga-piga halak Kristen di abad na parjolo na mangaleai “akka na sangap” manang akka sintua. Songon dia do akka suru-suruan mangida i? Pikkirhon ma on: Sempurna do akka suru-suruan. Nang pe songon i, dang olo nasida mangaleai akka pangalo i. Alana “dipasangap [akka suru-suruan i] do Jahowa”. Dipasahat nasida do parsoalan i tu Jahowa, asa Jahowa na mangadili jala na pasingotton akka pangalo i. (Rom 14:​10-12; bandingkon tu Judas 9.) Aha ma na taparsiajari sian akka suru-suruan i? Haru tu akka pangalo dang olo hita mambahen na so denggan, tarlumobi ma tu akka dongan sahaporseaotta. Alana dihaholongi nasida do Jahowa. Jala didok do di Bibel, ‘Parjolo ma hita pasangappon nasida.’ (Rom 12:10) Molo taulahon on, na pasangappon Jahowa do hita.

13-14. Songon dia do carana pasangappon akka dongan di huria? Paboa ma contoh. (Ida gambar.)

¹³ Cara mangulahon i. Hamu akka sintua, berupaya ma hamu mangajari mardongan holong. (Plm. 8, 9) Molo adong na porlu dinasehati hamu, unang ma ulahon i tikki muruk jala toktong ma hamu lambok. Hamu akka dongan borua, urupi ma akka dongan di huria asa pasangappon na asing. Carana, unang ma targoda hamu paroa-roahon halak na asing manang margosip. (Tit. 2:​3-5) Jala hita sude, tapasangap ma akka sintua. Carana, olo ma hita bekerja sama dohot nasida. Asing ni i, tadokkon ma mauliate ala nungnga bekerja keras nasida manguluhon parpunguan, mangarahon hita di ulaon marbarita, dohot mangurupi akka halak “na mangulahon na sala”.—Gal. 6:1; 1 Tim. 5:17.

¹⁴ Taparrohahon ma pengalaman ni donganta borua na margoar si Rocío. Hea do ibana dinasehati sahalak sintua, jala dang tarjalona nasehat i. Didok si Rocío, “Dang lomo rohakku mangida sintua i. Alana, dang denggan cara ni ibana menasehati au. Tikki di jabu, hupaboa ma akka na so denggan taringot ibana. Memang, dang hupatudu na sogo rohakku tu sintua i. Alai, tetap dope dang tarjalo au nasehatna i. Alana huhilala, dang benar-benar parduli ibana tu au.” Aha do na mangurupi si Rocío? Didok ibana, “Tikki manjaha Bibel au, hujaha ma 1 Tessalonik 5:​12, 13. Husadari ma, dang hupasangap hape sintua i jala on mambahen gabe targanggu panggora ni rohakku. Alani i, martangiang ma au tu Jahowa jala hubahen ma riset asa boi hupauba cara marpikkirhu. Gabe huattusi ma, au do hape na sala, dang sintua i. Huboto ma muse, molo dang serep rohakku, pasti maol do au pasangappon halak na asing. Memang sahat tu saonari, marsiajar do au lao pasangappon halak na asing. Alai pos do rohakku, pasti diargai Jahowa do sude upaya na hubahen i.”

TAARGAI MA AKKA NA SO SAKSI

15. Boasa maol sipata mangargai akka halak na so Saksi Jahowa?

¹⁵ Tantanganna. Tikki marbarita, jotjot do hita pajuppang dohot akka halak na so parduli tu Debata jala na so olo manangihon barita na tapasahat. (Eps. 4:18) Asing ni i, adong do ra dongan sakarejotta dohot dongan sasikkolatta na kasar tu hita. Jala bosta manang gurutta dang hea puas tu na taulahon. Molo taadopi akka situasi i, lam leleng gabe maol do ra hita mangargai akka halak sisongon i. Jala dang denggan be caratta maradoppon nasida.

16. Boasa massai penting mangargai akka na so Saksi? (1 Petrus 2:12; 3:15)

¹⁶ Boasa ikkon taulahon i? Taingot ma, diparrohahon Jahowa do boha pambahenatta tu akka na so Saksi. Jala didok Apostel Petrus tu halak Kristen, molo denggan pambahenan ni nasida, olo do gabe taronjar roha ni piga-piga halak lao ‘mamuji Debata’. Alani i ma, ikkon ‘lambok jala sangap do dibahen nasida akka halak’ tikki patorakkon haporseaonna. (Jaha 1 Petrus 2:12; 3:15.) Jadi tikki tapaboa haporseaotta tu halak na asing manang tabela haporseaotta di pengadilan, ikkon taargai do nasida. Alana, diparrohahon jala dibege Jahowa do aha na tadokkon dohot caratta paboahon i. Jadi on ma alasanna boasa ikkon taargai akka na so Saksi!

17. Boha do carana mangargai akka na so Saksi?

¹⁷ Cara mangulahon i. Tikki marbarita, jotjot do ra hita pajuppang dohot akka halak na otik parbinotoanna taringot Bibel. Tikki makkatai hita tu nasida, unang ma tabahen hira na hita na ummalo sian nasida. Taingot ma, arga do tong nasida di Jahowa jala ikkon taargai do nasida. (Hag. 2:7; Plp. 2:3) Jadi molo adong na paroa-roahon haporseaotta, unang ma tabalos nasida jala toktong ma sopan hita makkatai. (1 Ptr. 2:23) Bahkan molo sala hatatta tu nasida, pittor minta maaf ma hita. Boha molo di tempat karejo? Ikkon ringgas do hita jala ikkon burju do hita tu dongan sakarejotta dohot tu bosta. (Tit. 2:​9, 10) Molo ringgas hita karejo jala jujur, pasti las do roha ni halak mangida hita. Alai na terutama, las ma roha ni Jahowa.—Kol. 3:​22, 23.

18. Boasa massai penting patuduhon sangap manang mangargai akka halak?

¹⁸ Massai godang do alasanta lao patuduhon sangap manang mangargai halak na asing. Nungnga tabahas be, molo tapasangap anggota keluargatta, na pasangappon Jahowa do hita disi. Asing ni i, molo tapasangap akka dongan sahaporseaotta, na pasangappon Jahowa do tong hita. Jala molo taargai akka na so Saksi, olo do ra gabe taronjar roha ni nasida lao pasangappon manang mamuji Debata Jahowa. Nang pe dang diargai halak hita, toktong ma taargai jala tapatudu sangap tu nasida. Boasa? Alana nungnga marjanji Jahowa pasti pasu-pasuonna do hita. Didok Ibana, “Ai sangap do bahenokku halak na pasangappon Au.”—1 Sam. 2:30.