Hatop ma Taurupi Akka Halak na “Marpangalaho na Denggan”

1. Boha do tanggapan ni akka halak tikki marbarita hita tu nasida? (Ulaon ni Apostel 13:​47, 48; 16:​14, 15)

DI ABAD na parjolo, godang do halak na las rohana manjakkon barita na uli taringot Jesus, jala pittor olo do nasida gabe halak Kristen. (Jaha Ulaon ni Apostel 13:​47, 48; 16:​14, 15.) Dos songon i ma saonari. Tikki parjolo sahali mambege barita na uli, adong do piga-piga halak na lomo rohana manjakkon i. Memang adong do akka halak na so pola berminat di mulana. Alai di pudian ni ari, gabe olo do nasida marsiajar jala manomba Jahowa. Jadi, aha do na ikkon taulahon molo pajuppang hita dohot akka halak na “marpangalaho na denggan”?

2. Boasa boi dipatudos ulaon marbarita na uli songon ulaon ni sasahalak na karejo di ladang?

² Dipatudos do ulaon marbarita na uli songon ulaon ni partani. Molo nungnga adong hasil ni ladangna na boi dipanen, pasti pittor dipanen ibana do i. Jala buah na asing na so boi dope dipanen, tetap do i disiram jala dirawat. Dos songon i ma hita tikki marbarita. Tikki pajuppang hita dohot akka halak na olo manjalo barita na uli, pasti pittor taurupi do nasida asa boi gabe sisean ni Jesus. Jala berupaya do tong hita mangurupi akka halak na so pola berminat. (Joh. 4:​35, 36) Molo taulahon songon i, boi ma taboto songon dia cara na terbaik lao mangurupi nasida. Di artikel on, lao tabahas ma aha na ikkon taulahon tikki parjolo sahali pajuppang dohot akka halak na berminat. Jala tabahas ma muse songon dia carana mangurupi nasida asa lam jonok tu Jahowa jala gabe Saksi.

CARA MANGURUPI AKKA HALAK NA BERMINAT

3. Aha do na ikkon taulahon tikki pajuppang dohot akka halak na berminat? (1 Korint 9:26)

³ Tikki pajuppang hita dohot akka halak na berminat, pasti pittor naeng taurupi do nasida mananda Jahowa, jala asa lam jonok nasida tu Ibana. Jadi tikki parjolo sahali pajuppang dohot nasida, unang ma ragu manogihon nasida marsiajar Bibel dohot marpungu.—Jaha 1 Korint 9:26.

4. Paboa ma pengalaman ni sahalak borua na pittor olo marsiajar Bibel.

⁴ Togihon ma asa marsiajar Bibel. Adong do piga-piga halak na pittor olo marsiajar Bibel. Misalna, adong pengalaman ni sahalak borua di Kanada na ro mandapotton rak beroda. Tikki i ari Kamis. Dibuat ibana ma brosur Mangolu Saleleng ni Lelengna sian rak beroda. Dipaboa donganta borua na manjaga disi, boi do ibana marsiajar Bibel gratis mamakke brosur i. Olo do borua i marsiajar Bibel jala dilehon ibana ma nomorna tu donganta i. Di ari i, di-chat ibana ma donganta i jala disukkun ma andigan nasida boi marsiajar. Didokkon donganta i ma, “Boha molo ari Sabtu?” Didok borua i, “Boha molo sogot? Boi do au.” Di ari Jumatna i, pittor marsiajar ma nasida jala di ari Mingguna ro do ibana marpungu. Dung i, torus do ibana mambahen kemajuan.

5. Aha do na porlu taulahon molo dang pittor olo sasahalak marsiajar? (Ida gambar.)

⁵ Alai memang dang boi taharappon sude halak songon borua i. Alana dang sude halak pittor olo marsiajar. Ra porlu do jolo tabahas akka topik na menarik tu nasida. Asing ni i, molo toktong burju jala parduli hita tu nasida, gabe olo do ra nasida marsiajar. Aha do na boi tadokkon tikki manogihon nasida marsiajar Bibel? Taida ma pengalaman ni akka donganta naung marhasil mamulai parsiajaran Bibel.

6. Aha do na boi tadok tu sasahalak na so olo dope marsiajar Bibel?

⁶ Didok akka donganta i, di piga-piga inganan molo naeng tatogihon sasahalak marsiajar Bibel, unang ma tapakke istilah “marsiajar”, “kursus Bibel”, manang “lomo rohanami naeng mangajari hamu”. Dumenggan do molo tapakke istilah “martukkar pikkiran”, jala “makkata-hatai taringot Bibel”. Asa olo sasahalak i makkatai muse tu hita, boi do tadokkon songon on, “Luar biasa ate Bibel on. Boi do dialusi sukkun-sukkun taringot parngoluotta on.” Manang, “Dang holan taringot Debata na dipaboa di Bibel. Godang do tong nasehat na marguna tu ngolutta.” Jala boi do muse tadokkon, “Holan 10 sahat tu 15 menit pe, nga boi tadapot parsiajaran na denggan sian Bibel.” Asing ni i, unang ma pola tadok tu nasida, “Ganup minggu ro hami tuson da.” Alana hata sisongon i boi do mambahen nasida merasa wajib tajuppangi.

7. Aha do biasana na mambahen pos roha ni sasahalak tu hasittongan? (1 Korint 14:​23-25)

⁷ Togihon ma asa ro marpungu. Di tikki ni Apostel Paulus, ra adong do piga-piga halak na gabe pos rohana nga dapotna hasittongan dung parjolo sahali ro marpungu. (Jaha 1 Korint 14:​23-25.) Dos songon i ma saonari. Godang do halak na mambahen kemajuan jala lam jonok tu Jahowa dung ro nasida tu parpunguanta. Andigan do tikki na pas lao manogihon sasahalak asa marpungu? Memang dibahas do taringot i di bukku Mangolu Saleleng ni Lelengna parsiajaran 10. Alai unang ma tapaima sahat tu parsiajaran 10, baru pe tatogihon nasida marpungu. Tikki parjolo sahali hita makkatai tu nasida, boi do pittor tatogihon nasida asa ro marpungu. Ra boi do tapaboa judul ni jamita na lao dipasahat manang parsiajaran na lao diulas di Joujou Paboahon.

8. Aha do na porlu tapaboa tikki naeng manogihon sasahalak tu parpunguanta? (Jesaya 54:13)

⁸ Tikki tatogihon sasahalak asa ro marpungu, tapatorang ma berbeda do parpunguanta dohot kebiasaan ni agama na mungkin diihutton ibana. Adong ma sahalak parsiajar Bibel na parjolo sahali mangihutton parsiajaran Joujou Paboahon. Disukkun ibana ma tu guru studina, “Ditanda na memandu i do sude goar ni halak dison?” Didok donganta i ma tu ibana, “Berupaya do hami mananda sude goar ni akka dongan dison. Alana nga songon keluarga hami.” Gabe diattusi parsiajar Bibel i ma berbeda do hape parpunguanta dohot garejana. Boi do tong tapaboa boasa berbeda parpunguanta sian agama na asing. (Jaha Jesaya 54:13.) Tujuanta marpungu, i ma lao manomba Jahowa, marsiajar taringot Ibana, jala masipatoguan. (Heb. 2:12; 10:​24, 25) Alani i ma, denggan do sude acara parpunguanta diatur jala dang adong dibahen akka ritual. (1 Kor. 14:40) Asing ni i, tiur do dibahen cahaya di Bale Harajaonta asa mura hita marsiajar disi. Dang dibahas disi taringot politik jala dang adong na berdebat. Boi do tong tapatudu tu parsiajar Bibelta video Aha do na Dipatupa di Bale Harajaon? Molo taulahon songon i, gabe diattusi ibana ma songon dia parpunguanta.

9-10. Asa unang mabiar sasahalak ro marpungu, aha do na porlu tapaboa tu ibana? (Ida gambar.)

⁹ Adong do halak na mabiar ro marpungu. Boasa? Ala dirippu ibana, pittor gabe Saksi Jahowa annon ibana. Alai papos ma rohana molo holan manangihon pe ibana ro, dang pola boha. Dang na pittor gabe Saksi Jahowa ibana. Asing ni i, tapaboa ma las do rohatta manjakkon sude na ro termasuk akka dakdanak. Di parpunguanta, rap hundul jala rap marsiajar do akka natua-tua dohot gellengna. Alani i, boi ma diawasi natua-tua gellengna jala diboto aha na diajarhon tu gellengna i. (5 Mus. 31:12) Asing ni i, dang adong kolekte manang durung-durung di parpunguanta. Alana taihutton do hata ni Jesus na mandok, “Ala dang margarar dijalo hamu sudena i, lehon hamu ma i dang margarar.” (Mat. 10:8) Paboa ma muse tu ibana, dang ikkon marpakkean na arga ibana tu parpunguan. Alana roha do na diida Jahowa, dang akka na tarida sian luar.—1 Sam. 16:7.

¹⁰ Molo ro sasahalak marpungu, tajakkon ma ibana. Tapatandahon ma ibana tu akka sintua dohot tu akka dongan na asing. Molo burju jala parduli hita tu ibana, olo do ra marpungu muse ibana di tikki na asing. Molo dang adong dope Bibelna, hita ma na mambukkahon Bibel tu ibana. Tapatudu ma tu ibana ayat na dia na dijaha jala dipatorang parjamita. Jala tapatudu ma bahan na lao dibahas asa boi diihutton ibana parpunguan i.

NA PORLU TAINGOT TIKKI MANGURUPI SASAHALAK MARSIAJAR BIBEL

11. Ala taboto sibuk parsiajar Bibelta, aha do na ikkon taulahon?

¹¹ Aha do na ikkon taingot tikki taurupi sasahalak marsiajar Bibel? Taingot ma pasti sibuk do parsiajar Bibelta i, jala otik do ra tikkina lao marsiajar. Jadi nang pe dang biasa akka halak di ingananmuna tepat waktu, alai molo nungnga marjanji hamu naeng ro tu jabuna, misalna jam tolu, ro ma hamu jam nasa i. Asing ni i, denggan do molo dang pola pagodangku na dibahas hamu tikki parjolo sahali marsiajar. Piga-piga donganta na berpengalaman mandok unang ma palelengku hita tikki marsiajar dohot nasida, nang pe lomo dope rohana mambege hatorangan na tapasahat. Asing ni i tikki marsiajar, unang ma hita na pagodangku makkatai. Tapaloas ma parsiajar Bibelta i paboahon boha perasaanna dohot aha na dipikkirhon ibana.—Poda 10:19.

12. Aha do tujuanta tikki taurupi sasahalak marsiajar Bibel?

¹² Aha do tujuanta tikki taurupi sasahalak marsiajar Bibel? Tujuanta, i ma asa ditanda ibana Jahowa dohot Jesus jala asa holong rohana tu nasida. Boha do cara mangulahon on? Tapakke ma Bibel tikki mangajari nasida. Unang ma holan mangandalhon parbinotoanta sandiri. (Ul. 10:​25, 26) Dibahen Apostel Paulus do sitiruon na denggan tu hita. Jotjot do dipaboa si Paulus taringot Jesus Kristus tikki makkatai tu akka halak. Alana Jesus do na disuru Jahowa lao mangurupi hita asa mananda jala makkaholongi Ibana. (1 Kor. 2:​1, 2) Dipaboa si Paulus do muse, massai penting do mangurupi parsiajar Bibel patuduhon akka sifat na denggan, songon makkabiari Jahowa, mamboto dia na sittong dohot na sala, marbisuk, jala patuduhon haporseaon. (Ps. 19:​9, 10; Poda 3:​13-15; 1 Ptr. 1:7) Dipatudos do akka sifat na denggan i songon mas, perak, dohot akka batu na arga. (1 Kor. 3:​11-15) Alani i, tatiru ma si Paulus. Taurupi ma parsiajar Bibelta asa lam togu haporseaonna jala lam jonok tu Jahowa.—2 Kor. 1:24.

13. Ikkon sabar jala marbisuk do hita tikki mangurupi sasahalak marsiajar Bibel. Boha do carana mangulahon i? (2 Korint 10:​4, 5) (Ida gambar.)

¹³ Tatiru ma Jesus. Sabar jala marbisuk ma hita tikki mangajari parsiajar Bibelta. Unang ma tabahen sukkun-sukkun na mambahen nasida maila. Molo adong parsiajaran na maol di ibana, unang ma palelengku topik i tabahas. Alai talanjutton ma tu parsiajaran na berikutna jala tabahas ma topik na maol i di tikki na asing. Unang ma tapaksa ibana manjalo hasittongan. Talehon ma tikki tu ibana lao mangarimangi na diparsiajari ibana jala paubahon cara marpikkirna. (Joh. 16:12; Kol. 2:​6, 7) Di Bibel dipatudos do ajaran na sala i songon inganan “naung togu dipajongjong”, jala i ma na lao ‘taruppakkon’. (Jaha 2 Korint 10:​4, 5.) Ra maol do parsiajar Bibelta maninggalhon parbinotoan na dihaporseai ibana saleleng on. Alani i, taurupi ma jo ibana asa lam jonok hubunganna tu Jahowa. Molo nga taulahon songon i, pasti mura do di ibana lao maninggalhon parbinotoanna na sala i.—Ps. 91:9.

NA PORLU TAINGOT TIKKI RO AKKA PEMINAT TU PARPUNGUANTA

14. Ikkon songon dia do hita maradoppon akka peminat na ro marpungu?

¹⁴ Dipangido Jahowa do asa tahaholongi sude halak. Dang soal sian dia nasida ro, aha sukuna, manang sadia godang hepengna. (Jak. 2:​1-4, 9) Attong, songon dia do carana patuduhon na tahaholongi akka peminat na ro marpungu?

15-16. Asa boi akka halak na parjolo sahali ro marpungu menikmati parpunguanta, aha do na ikkon taulahon?

¹⁵ Adong do piga-piga halak na ro marpungu ala penasaran nasida songon dia parpunguanta dibahen manang adong na manjujui nasida asa ro. Jadi tajakkon ma halak na parjolo sahali ro marpungu. Alai unang ma palobihu caratta manjakkon nasida. Alana boi do i mambahen nasida gabe dang nyaman. Togihon ma asa rap hundul hamu. Bukkahon ma Bibel dohot akka bahan na dibahas di parpunguanta, manang lehon ma tu nasida Bibel dohot akka publikasi na lao dibahas. Asing ni i, pikkirhon ma aha do muse na porlu diulahon hamu asa dinikmati nasida parpunguanta. Adong pengalaman ni sahalak bawa na ro tu parpunguanta. Didok ibana tu donganta na manjakkon ibana, maila do ibana ala marbaju santai. Dipaboa donganta i ma, marpakkean na rapi do Saksi Jahowa marpungu. Alai jolma biasa do tong nasida. Gabe tenang ma bawa i mambege hatana i. Di pudian ni ari, tardidi ma bawa i jala sai diingot ibana do burju ni donganta i manjakkon ibana. Jadi taingot ma on: Tikki makkatai hita tu akka halak na parjolo sahali ro marpungu, tapatudu ma na parduli hita tu nasida. Alai unang ma tasukkuni sude, asa unang maila nasida.—1 Ptr. 4:15.

¹⁶ Asing ni i, ikkon manat do hita mandok hatatta. Tarlumobi molo na tadokkon i, adong hubunganna tu akka na so Saksi manang haporseaon ni nasida. Misalna tikki makkata-hatai, mangalehon komentar, manang pasahatton bagian sian jolo. Jala unang ma tapakke akka istilah na boi mambahen haccit roha ni nasida manang gabe dang olo be nasida ro marpungu. (Tit. 2:8; 3:2) Misalna, unang ma taparoa-roa haporseaon ni nasida. (2 Kor. 6:3) Alani i, ikkon manat do akka donganta bawa na marjamita. Jala ikkon diingot nasida do molo adong istilah manang ajaran na so diattusi akka na so Saksi, ikkon denggan do i dipatorang.

17. Aha do na porlu taulahon tikki pajuppang dohot akka halak na “marpangalaho na denggan”?

¹⁷ Saonari, ikkon lam marsitutu do hita mangurupi akka halak marsiajar Bibel. Alani i, torus ma talului akka halak na “marpangalaho na denggan na mambahen nasida tama mandapot hangoluan saleleng ni lelengna”. (Ul. 13:48) Tikki pajuppang hita dohot nasida, pittor tatogihon ma nasida marsiajar Bibel dohot marpungu. Molo taulahon songon i, na taurupi do nasida asa mardalan di “dalan tu hangoluan”.—Mat. 7:14.