Tongtong ma Netral di Portibi on
”Lehon hamu ma tu Debata, na sian Debata!”—MAT. 22:21.
1. Songon dia do hita mangoloi Debata jala mangoloi pamarenta?
BIBEL manjujui hita asa mangoloi pamarenta, alai didok do muse, ingkon tongtong do hita mangoloi Debata. (Ul. 5:29; Tit. 3:1) Songon dia do on boi? Jesus paboahon prinsip na mangurupi hita mamboto ise do na ingkon taoloi. Didok ibana, ”Lehon hamu tu Kesar, na sian Kesar i; jala lehon hamu ma tu Debata, na sian Debata!”[1] (Ida catatan.) (Mat. 22:21) Hita mangalehon ”tu Kesar, na sian Kesar” tingki taoloi uhum ni pamarenta, mangargai pamarenta jala manggarar pajak. (Rom 13:7) Alai, molo disuru pamarenta hita mangulahon ulaon na so dihalomohon ni Debata, ndang olo hita mangulahon i.
2. Songon dia do hita patuduhon na so parsidohot hita tu partai politik?
2 Molo ndang parsidohot hita tu politik, on ma sada cara hita mangalehon ”tu Debata, na sian Debata”. Ingkon netral do hita tu politik. (Jes. 2:4) Ala Jahowa do na paloashon pamarenta manggomgomi, ndang boi hita mangalo nasida. Alai, hita pe ndang boi dohot tu ulaon patriotik manang nasionalistis. (Rom 13:1, 2) Ndang boi hita dohot laho pajongjongkon sasahalak laho mamarenta manang parsidohot tu politik, jala ndang boi hita dohot mamillit tingki pemilihan manang gabe sahalak parpolitik.
3. Boasa hita ingkon tongtong netral?
3 Adong do alana boasa dipangido Debata hita netral. Na parjolo, hita maniru Jesus ”na so sian portibi on”. Ndang hea ibana dohot marpolitik manang marporang. (Joh. 6:15; 17:16) Na paduahon, hita mangkirim tu Harajaon ni Debata. Hita mamaritahon holan Harajaon ni Debata do na tolap paluahon jolma sian hasusaan. Dung i, boi hita marsada dohot angka donganta di liat portibi on ala tongtong do hita netral. Ndang songon agama palsu na parsidohot tu politik, gabe mambahen jolma marmusu.—1 Ptr. 2:17.
4. (a) Sian dia do taboto ndang na lam mura laho patuduhon kenetralan? (b) Boasa ingkon sian saonari tapatogu rohanta asa boi tongtong netral?
4 Di ingananta, olo do ra ndang dipaksa hita parsidohot tu politik. Alai, ala naung lam jonok hita tu ujung ni pamarentaon ni Sibolis, olo do on mambahen maol hita tongtong netral. Torop halak saonari ndang olo mardame jala sai songon na sude do diboto, mambahen nasida ndang marsada. (2 Tim. 3:3, 4) Adong do donganta na gabe susa ala muba politik di negara ni nasida. I do alana, porlu taparade rohanta sian saonari asa boi netral tingki masa hasusaan alani politik. Taparsiajari ma opat na boi mangurupi hita asa boi hita rade.
PINGKIRHON MA PANGKILALAAN NI JAHOWA TU PAMARENTAON NI JOLMA
5. Songon dia do pangkilalaan ni Debata mangida pamarentaon ni jolma?
5 Laho paradehon rohanta saonari asa boi tongtong netral, tapingkirhon ma pangkilalaan ni Jahowa tu pamarentaon ni jolma. Ndang dilehon Jahowa tu jolma huaso laho mamarenta donganna tingki ditompa nasida. (Jer. 10:23) Sada keluarga do sude jolma di Ibana. Alai, pamarentaon ni jolma mambahen halak ndang marsada ala didok nasida, negarana do na dumenggan. Nang pe sada pamarentaon idaon denggan, alai ndang boi nasida paluahon jolma sian hasusaan. Dung i, ndang diangkui nasida Harajaon ni Debata naung mamarenta di surgo taon 1914. Alani i, ndang sadia leleng nai, pasohoton ni Harajaon ni Debata ma sude pamarentaon ni jolma.—Jaha Psalmen 2:2, 7-9.
Tapingkirhon ma pangkilalaan ni Jahowa tu pamarentaon ni jolma
6. Songon dia do hita maradophon halak na berwenang di pamarentaon?
6 Dipaloas Debata pe jolma mamarenta ala boi do nasida manjaga hadameon. Alani i, boi hita denggan marbarita na uli. (Rom 13:3, 4) Dijujui do hita manangiangkon pamarenta asa boi hita denggan manomba Jahowa. (1 Tim. 2:1, 2) Tingki hita susa alani halak na asing, boi do tapangido pangurupion sian pamarenta. Songon i ma na hea diulahon apostel Paulus. (Ul. 25:11) Nang pe Bibel mandok Sibolis do nampuna harajaon ni portibi on, alai ndang hea didok sude jolma na adong di pamarentaon i dirajai Sibolis. (Luk. 4:5, 6) Alani i, ndang boi hita paroaroahon manang ise pe, songon na didok di Bibel.—Tit. 3:1, 2.
7. Pamingkirion na songon dia do na ingkon tapasiding?
7 Hita mangoloi Debata molo ndang parsidohot tu sada partai politik, nang pe janji ni nasida parohon laba tu hita. Sipata, ndang mura mangulahon on. Umpamana, ndang olo hita parsidohot mangalo sada pamarentaon, nang pe pamarentaon i parohon hasusaan tu rakyatna dohot tu Sitindangi Ni Jahowa. Alai, songon dia do pangkilalaanta molo adong halak na asing mangalo tu pamarentaon i? (Eps. 2:2) Molo netral hita, ndang dohononta dumenggan do na sada sian na asing. Jala, tarida do i sian pangkataion dohot sian na taulahon.
JAGA JALA IAS
8. Tingki manaon hasusaan alani kenetralan, songon dia do hita boi jaga jala ias?
8 Paduahon, na ingkon taingot asa tongtong netral, i ma pantas (jaga) marroha songon ulok, lidang (ias) songon darapati! (Jaha Mateus 10:16, 17.) Hita jaga tingki tapingkirhon hasusaan na laho masa di joloan ni ari on. Hita ias molo tongtong do hita netral nang pe manaon hasusaan. Taulas ma songon dia on boi masa, jala aha do ulahononta asa tongtong netral.
9. Aha do na ingkon taingot taringot pangkataionta?
9 Pangkataion. Ingkon manat do hita tingki halak manaringoti politik. Umpamana, tingki marbarita taringot Harajaon ni Debata, ndang boi hita mandok setuju manang na ndang setuju tu pandapot ni partai politik. Ndang boi pamarentaon ni jolma paluahon hita sian hasusaan. Alani i, marhite Bibel, patuduhon ma holan Harajaon ni Debata do na boi paluahon hita sian hasusaan. Molo adong na manungkun taringot perkawinan sejenis manang aborsi, paboa ma aha do didok Bibel taringot i jala songon dia hita mangulahon i. Molo sasahalak mandok, undang-undang do na ingkon dipadenggan, unang ma tataringoti i jala unang pola taalo halak na mandok i.
Tingki manangihon sada barita, tapahombar ma tu ”poda na tingkos” na adong di Bibel
10. Songon dia do hita boi tongtong netral tingki manonton tv manang manjaha koran?
10 Media. Jotjot do media mamihak tu sada partai politik, tarlumobi molo media i diatur pamarenta. Molo media manang wartawan mamihak, ingkon manat do hita asa unang mangihuthon nasida. Umpamana, tasungkun ma dirinta, ’Lomo do rohangku manangihon siaran ni tv ala setuju ahu tu na nidokna taringot politik?’ Asa tongtong hita netral, unang ma tatonton manang tajaha barita manang laporan na mamihak tu sada partai politik. Alai, talului ma barita sian media na so mamihak. Jala, tingki manangihon sada barita, denggan ma molo tapahombar tu ”poda na tingkos” na adong di Bibel.—2 Tim. 1:13.
11. Songon dia do materialisme mangkorhon tu kenetralanta?
11 Holongan di hepeng. Molo hepeng manang arta na rumingkot di hita, boi do on mambahen hita maol netral. Dung taon 1970, godang Sitindangi Ni Jahowa di Malawi habis artana ala ndang olo nasida parsidohot tu politik. Alai, adong do na so tahan manaon hasusaan i. Sahalak donganta na margoar si Rut mandok, ”Rap do hami tingki i di pengungsian, alai deba ndang tahan di kamp pengungsian i, ujungna mulak tu jabu jala margabung tu partai politik.” Alai, ndang sude naposo ni Debata songon i. Godang do na tongtong netral nang pe mago sude artanasida.—Heb. 10:34.
12, 13. (a) Songon dia do pangkilalaan ni Jahowa mangida sude jolma? (b) Sian dia do taboto molo hita pasangaphu tu dirinta manang tu luatta sandiri?
12 Hasangapon. Jotjot do halak mangkilala umsangap do nasida sian na asing, umpamana taringot ras, suku, hasomalan, huta manang negara ni nasida. Alai, dos do sude jolma di adopan ni Jahowa. Nang pe godang ragam ni suku ditompa Jahowa, alai boi do hita marlas ni roha rap marsaor dohot nasida. Ndang lomo roha ni Jahowa patutoru manang patimbohon suku manang hasomalanta.—Rom 10:12.
13 Unang ma tadok dumenggan do bangso manang negaranta sian na asing. Alai, molo songon i do pangkilalaanta, on mambahen hita maol netral. Hea do masa na songon on di abad na parjolo. Ndang denggan dibahen halak Kristen na marhata Heber maradophon angka halak Kristen na mabalu na marhata Junani. (Ul. 6:1) Sian dia do boi taboto hita mangkaringkothon hasangapon? Molo adong donganta sian luat na asing mangalehon pandapot laho mangurupi hita, pintor juaonta do jala tadok di rohanta, ’Dumenggan do na taulahon di ingananta saleleng on?’ Molo songon i do, taingot ma poda na mandok, ”Sian toruk ni rohamuna be ma rajumi hamu donganmuna sumurung sian dirimuna!”—Plp. 2:3.
URUPAN NI JAHOWA DO HITA
14. Songon dia do tangiang boi mangurupi hita, jala sitiruon aha do na dipaboa di Bibel?
14 Patoluhon, asa tongtong hita netral, marpangunsandean ma tu Jahowa. Tapangido ma tondi parbadia laho mangurupi hita asa sabar jala boi mangarajai diri. Parange sisongon on boi mangurupi hita mangadopi pamarentaon na so tigor. Tapangido ma pangurupion dohot bisuk sian Jahowa laho mamboto situasi na mambahen hita maol netral, jala asa taboto mamillit mangulahon na sintong tingki masa situasi sisongon i. (Jak. 1:5) Olo do ra hita diuhum manang dipenjarahon ala mangoloi Jahowa. Alani i, martangiang ma hita mangido habaranion asa barani paboahon boasa hita netral. Pos ma rohanta, urupan ni Jahowa hita asa marhabengeton manang sabar.—Jaha Ulaon ni Apostel 4:27-31.
Mangingot ayat ni Bibel boi mangurupi hita netral, umpamana ayat na manggombarhon tano na imbaru
15. Songon dia do Bibel boi mangurupi hita asa tongtong netral? (Ida kotak ”Hata ni Debata Patoguhon Roha ni Nasida.”)
15 Dilehon Jahowa do Bibel laho patoguhon hita. Tajaha jala tarimangi ma ayat ni Bibel na mangurupi hita tongtong netral. Taingot ma angka ayat i asa tongtong hita togu, tarlumobi tingki ndang boi hita manjaha Bibel. Bibel pe boi do patoguhon pangkirimonta tu janji ni Debata. Pangkirimon on mangurupi hita manaon hasusaan alani haporseaon. (Rom 8:25) Rimangi ma ayat na manggombarhon na masa di tano na imbaru, jala tapingkirhon ma dohot hita disi.
SITIRUON SIAN NAPOSO NI JAHOWA NA MARSIHOHOT
16, 17. Aha do na taparsiajari sian naposo ni Debata na tongtong netral? (Ida gombar di mula ni parsiajaran.)
16 Paopathon, na mangurupi hita asa tongtong netral marhite sitiruon sian naposo ni Jahowa. Disurat do di Bibel taringot halak na barani, jala mamangke bisuk asa nasida tongtong netral. Pingkirhon ma si Sadrak, si Mesak dohot si Abednego na so olo manomba patung na dipajongjong ni pamarenta ni Babilon. (Jaha Daniel 3:16-18.) Pengalaman ni nasida mangurupi godang Sitindangi ndang parsidohot laho manghormat bendera. Ndang parsidohot Jesus tu politik manang tu ulaon na mambahen halak marmusu. Diboto ibana do, sitiruon na binahenna boi mangurupi angka na mangihuthon ibana. Didok ibana, ”Pos ma rohamuna: Nunga talu hubahen portibi on.”—Joh. 16:33.
17 Torop do Sitindangi di tingkinta on tongtong netral. Adong do na gabe marsitaonon, dipenjarahon manang dibunu ala tongtong marsihohot tu Jahowa. Nasida boi gabe sitiruon laho patoguhon hita. Sahalak donganta sian Turki mandok, ”Si Franz Reiter, sahalak na poso diuhum mate ala ndang olo gabe tentara ni si Hitler. Surat na binahenna tu omakna di borngin andorang so diuhum mate ibana, patuduhon haporseaonna na togu jala pos ni rohana tu Jahowa. Sitiruon do on di ahu molo masa pangunjunan.”[2]—Ida catatan.
18, 19. (a) Songon dia do donganta di huria mangurupi hita asa tongtong netral? (b) Aha do na ingkon taulahon?
18 Angka donganta di huria, boi do mangurupi hita tongtong netral. Paboa ma tu sintua molo adong situasi na maol dihilala hamu. Lehonon ni nasida do poda sian Bibel. Dung i, molo diboto donganta di huria do hasusaan na taadopi, boi do urupan ni nasida hita. Tadokkon ma asa ditangiangkon hita. Jala hita pe, taurupi ma donganta jala tatangiangkon nasida. (Mat. 7:12) Laho mamboto goar ni angka dongan na dipenjarahon, ida ma di artikel jw.org na paboahon ”Sitindangi Ni Jahowa Dipenjarahon alani Haporseaon ni Nasida—Ingananna,” di toru ni RUANG BERITA > BERITA HUKUM. Pillit ma goar ni nasida jala tangiangkon ma asa diurupi Jahowa nasida patoguhon rohanasida asa tongtong marsihohot.—Eps. 6:19, 20.
19 Lam jonok ari i, olo do paksaon ni pamarenta hita asa mamihak. I do alana, ringkot sian saonari hita rade asa boi tongtong netral di portibi on!
^ [1] (paragraf 1) Pamarenta do na nidok ni Jesus tingki didok ibana taringot Kesar. Tingki i, Kesar do na mamarenta jala na manggomgomi.
^ [2] (paragraf 17) Ida ma di buku Saksi-Saksi Yehuwa—Pemberita Kerajaan Allah, halaman 662, dohot kotak ”Ia Mati Demi Kehormatan Allah” fasal 14 syap di buku Kerajaan Allah Memerintah!