Aha do na Didok Bibel Taringot Dukungan ni Halak Kristen tu Parporangan?

Saleleng porang di Ukraina, godang do pamimpin agama Kristen na mendukung jala manjujui halak asa dohot marporang. Parrohahon ma songon dia akka pamimpin agama mendukung negara ni nasida di porang i:

• “Gok hasangapon dohot hamauliateon tu sude pejuangnami na mambela huta hatubuanna, Ukraina, sian akka musu . . . Sai hutangiakkon hami jala sai hudukung hami do hamu.”—Epiphanius I, uskup metropolitan Kyiv, na dipaboa di The Jerusalem Post, 16 Maret 2022.

• “Dibahen pamimpin ni Gereja Ortodoks Rusia ma acara ibadat khusus tu akka tentara Rusia di ari Sabtu. Dihimbau ibana ma nasida lao mambela negara ni nasida ‘mamakke cara na holan boi diulahon halak Rusia’, saleleng kampanye militer di Ukraina.”—Reuters, 3 April 2022.

Boi do dohot halak Kristen marporang? Aha do na didok di Bibel taringot on?

Aha do sasittongna na diajarhon di Bibel

Dipaboa do di Bibel dang marporang akka halak na tutu mangihutton Jesus Kristus.

• “Pamasuk ma podangmi tu ingananna. Ai manang ise na manittak podang, mate do dibahen podang.”—Mateus 26:52.

  Boha do molo holan setuju sasahalak tu parporangan? Tong do dang mangihutton hata ni Jesus ibana disi?

• “Hulehon ma tu hamu paretta na imbaru, marsihaholongan ma hamu. Ikkon dihaholongi hamu do akka donganmuna na asing dos songon carakku makkaholongi hamu. Molo marsihaholongan hamu, botoon ni sude jolma ma na siseanku hamu.”—Johannes 13:34, 35.

  Molo marpihak ma sasahalak di sada parporangan manang didukung ibana parporangan i, na patuduhon holong do ibana disi? Jala patuduhon na sisean ni Jesus do ibana?

Asa lam takkas diboto hamu taringot on, jaha ma artikel “Apakah Perang Sejalan dengan Kekristenan?”

Songon dia do halak Kristen mangida porang na masa saonari

Adong do haroa halak Kristen saonari na so dohot marporang? I do. Nungnga dipaboa Bibel hian taringot akka halak na ro sian marragam bangso di “ari parpudi”, i ma di tikkitta saonari on, na ‘so marsiajar marporang be’ sesuai tu ajaran ni Jesus.—Jesaya 2:2, 4.

• Asa lam takkas diboto hamu taringot on, jaha ma artikel di Joujou Paboahon na marjudul “Songon Dia do Roha ni Debata Mangida Porang?”

Satokkin nai marhite harajaonna, paluaon ni Jahowa,a “Debata silehon dame” i ma akka halak na burju “sian akka halak na manusai nasida dohot sian halak na kejam”.—Pilippi 4:9; Psalmen 72:14.

• Lao mamboto taringot on, tonton ma video Aha do Harajaon ni Debata I?