Boasa Saksi Jahowa Marbarita na Uli tu Halak Naung Maragama?

Godang do halak naung maragama marlomo ni roha mangulas isi ni Bibel dohot hami. Alai, diargai hami do hak ni na asing lao mamillit agama, jala dang dipaksa hami akka halak asa manjalo barita na dipasahat hami.

Tikki mangulas taringot agama, marsitutu do hami mangihutton poda sian Bibel asa mamakke “roha na lambok” jala patuduhon “roha na hormat” tu na asing. (1 Petrus 3:16, Bibel siganup ari) Diboto hami do adong halak na so olo manjakkon barita na dipasahat hami. (Mateus 10:14) Alai, ikkon makkatai do hami tu nasida asa diboto hami songon dia pandapot ni nasida. Jala diboto hami do boi muba situasi ni sasahalak.

Umpamana, di sada tikki olo do godang ulaon ni sasahalak na mambahen ibana dang sanga makkatai dohot hami. Alai di tikki na asing, olo do ibana rade makkatai tu hami. Adong do muse halak na marsak alani sitaonon dohot parukkilon. Ala porlu pangurupion di nasida, taronjar ma roha ni nasida manjakkon barita na uli. Alani i ma, dang holan di sada tikki hami manjuppangi na asing.