Boi do Taboto Akka Ise na Manurat Bibel?

Na didok Bibel

Godang do halak na mandok dang boi taboto akka ise do sasittongna na manurat Bibel. Alai sebenarna jotjot do dipaboa di Bibel ise goar ni akka na manurat Bibel i. Contohna di piga-piga ayat di Bibel adong do didok, “on ma hata ni si Nehemia”, “on ma parnidaan ni si Jesaya”, dohot “on ma hata na dipasahat Jahowa marhite si Joel”.—Nehemia 1:1; Jesaya 1:1; Joel 1:1.

Godang do akka panurat ni Bibel mandok molo nasida manuratton isi ni Bibel i di bagasan goar ni Jahowa, i ma Debata na sittong. Jala diakkui nasida do, Jahowa na mangurupi nasida manurat Bibel. Adong do lobi sian 300 hali akka panurirang na manurat Akka Bukku Heber mandok, “Songon on ma na didok Jahowa.” (Amos 1:3; Mika 2:3; Nahum 1:12) Asing ni i, dipasahat Debata do muse Hatana tu akka panurat ni Bibel marhite suru-suruan.—Sakaria 1:7, 9.

Hira-hira saleleng 1.600 taon ma Bibel disurat, jala adong 40 bawa na manurat i. Adong do piga-piga sian nasida na manurat lobi sian sada bukku. Sude isi ni Bibel adong 66 bukku. Adong ma 39 bukku na gabe bagian ni Akka Bukku Heber, na jotjot didok Perjanjian Lama. Jala adong 27 bukku na gabe bagian ni Akka Bukku Junani Kristen, na jotjot didok Perjanjian Baru.