Songon dia do Bibel Paboahon Perhitungan Waktu taringot Taon 1914?

Alus ni Bibel

Bibel paboahon taon 1914 do Harajaon ni Debata jongjong di surgo. Boi ma on taboto sian surirang na disurat di Daniel bindu 4.

Inti ni surirang i. Dibahen Debata ma marnipi si Nebukadnesar raja ni Babel taringot sada hau na balga na ditobang. Diikkat do pakkal ni hau i asa unang tubu tunasna saleleng “pitu masa”, alai dukkon i martunas do pakkalna i.​—Daniel 4:​1, 10-​16, surat na di toru.

Andigan do parjolo terjadi surirang na di nipi i. Hau na balga i manggombarhon Raja Nebukadnesar i do. (Daniel 4:​20-​22) Jala hau na ‘ditobang’ i manggombarhon si Nebukadnesar na rittik jala turun sian tahtana saleleng pitu taon. (Daniel 4:​25) Alai dipamalum Debata do si Nebukadnesar, waras ma muse ibana, mamaretta ma muse si Nebukadnesar, jala diakkui ibana do pamarettaon ni Debata.​—Daniel 4:​34-​36.

Bukti na patuduhon terjadi dope muse surirang i jala umbalga do na terjadi. Dipaboa do di Bibel tujuan ni surirang i, i ma “asa sude jolma mamboto Natumimbul i do Parhuaso ni harajaon na adong di tano on. Jala lehononna do harajaon i tu manang ise pe lomo ni rohana. Gariada, lehononna do i tu halak na uppogos”. (Daniel 4:​17) Attong na lao dilehon Debata do harajaon i tu si Nebukadnesar na sombong i? Daong, alana sebelum dapot ni ibana nipi na disurat di Daniel 4, nungnga marnipi hian ibana dibahen Debata jala di nipi i dipaboa do dang si Nebukadnesar manang parhuaso politik na asing na mandapot harajaon i. Justru “sada Harajaon na so boi dihancurhon” do na lao dipajongjong Debata.​—Daniel 2:​31-​44.

Najolo dibahen Debata do sada harajaon di tano on lao mewakili pamarettaonna, i ma pamarettaon ni bangso Israel. Dipasombu Debata do harajaon i “hancur” ala dang setia akka na marhuaso di harajaon i. Alai nungnga dipaboa Ibana hian na lao dilehon do harajaon i tu halak “na marhak lao mandapot i”. (Hesekiel 21:25-​27) Bibel patuduhon holan Jesus Kristus do na marhak lao mandapot harajaon na so boi dihancurhon i. (Lukas 1:​30-​33) Dang songon si Nebukadnesar Jesus i, ‘serep do roha ni Jesus’ songon na disurirakkon hian.​—Mateus 11:29.

Aha do na digombarhon ni hau na di Daniel 4 i? Di Bibel sipata dibahen do hau lao manggombarhon pamarettaon. (Hesekiel 17:22-​24; 31:​2-5) Jadi di penggenapan na paduahalihon taringot surirang na di Daniel 4 i, hau i manggombarhon pamarettaon ni Debata.

Aha do lapatan ni hau na ditaba i? Dos songon na dipaboa sebelumna, hau na ditobang i manggombarhon pamarettaon ni si Nebukadnesar na hea dang mamaretta saleleng piga-piga taon. Dos songon i ma, hau na ditobang on patuduhon dang mamaretta be pamarettaon ni Debata di tano on. Ai tikki dihancurhon si Nebukadnesar Jerusalem, dang adong be pamarettaon ni Debata di tano on, ai disi do “tahta ni Jahowa” i, inganan ni akka raja na gabe wakil ni Debata lao mamaretta.​—1 Kronika 29:23.

Aha do na digombarhon ni “pitu masa” i? “Pitu masa” i manggombarhon leleng ni Debata pasombuhon akka bangso mamaretta tano on. Saleleng na “pitu masa” i dang ikut campur harajaon na dipajongjongna i tu pamarettaon ni jolma di tano on. Songon na dipaboa di Bibel, na “pitu masa” i dietong mulai sian Oktober 607 SM, ai di tikki i do Jerusalem dihancurhon halak Babel.a​—2 Raja-Raja 25:​1, 8-​10.

Sadia leleng do na “pitu masa” i? Na “pitu masa” on dang holan pitu taon songon na masa di tikki ni si Nebukadnesar. Alai boi do taboto taringot on sian hata ni Jesus na mandok, “Didege-dege akka bangso ma Jerusalem [lambang ni pamarettaon ni Debata] sahat tu na juppang tikki naung ditottuhon tu akka bangso.” (Lukas 21:24) “Tikki naung ditottuhon” Debata i patuduhon sadia leleng Debata pasombuhon pamarettaonna “didege-dege akka bangso”. Jala istilah “tikki naung ditottuhon” sarupa do tu istilah “pitu masa” na di Daniel bindu 4. Jadi tikki Jesus di tano on, dang gok dope na “pitu masa” i, berlangsung dope.

Dipaboa do di Bibel songon dia carana manottuhon surirang taringot “pitu masa” i. Didok do di Bibel tolu satonga “masa” sarupa tu 1.260 ari, jadi “pitu masa” sarupa ma i tu 2x1.260 manang 2.520 ari. (Pangungkapon 12:​6, 14) Molo tapakke do aturan “sadari tu sataon” lao mangetong surirang i, jadi 2.520 ari manggombarhon 2.520 taon. Alani i molo dietong “pitu masa” manang 2.520 taon i, marujung ma i di bulan Oktober 1914.​—4 Musa 14:34; Hesekiel 4:6.