Boasa Ikkon Jujur?

Boasa adong na so jujur

Di jamanta saonari, hira na so adong do gunana molo jujur hita. Adong do na mandok songon on:

• ‘Molo dang margabus au tu natua-tuakku, pasti nga dihukum nasida au.’

• ‘Molo dang menyontek au, dang boi au lulus ujian annon.’

• ‘Molo dang hutakko barang on, ikkon jolo menabung ma au asa boi hutuhor on.’

Piga-piga halak mandok, ‘Gabe boha huroa molo dang jujur iba? Ai sude do halak songon i.’

Dang sude halak songon i. Godang do halak, termasuk akka na poso mandok, godang do manfaatna molo jujur hita. Bibel mandok, “Manang aha na disuan sasahalak, i do panenonna.” (Galatia 6:7) Artina, sude tindakanta balga do pengaruhna, boi do i denggan manang na dang.

Parrohahon ma piga-piga akibatna molo dang jujur.

“Hea do au marhallet tu sahalak bawa, alai dang hupaboa taringot on tu omak. Diboto ibana ma na margabus au. Muruk hian ma omak, ala nga tolu hali au margabus. Gabe dang boi au kaluar sian jabu saleleng dua minggu. Dang boi au mar-HP dohot manonton TV saleleng sabulan. Mulai sian i, dang olo be au margabus tu natua-tuakku!”​—Si Anita.

Pikkirhon ma: Boasa porlu tikki di si Anita asa boi dihaporseai omakna muse?

Na didok Bibel: “Ala dang olo be hamu margabus, ganup ma halak makkatahon na sittong tu donganna.”​—Epesus 4:25.

“Hurippu dang diboto natua-tuakku na margabus au. Alai gabe tarboto do tikki disuru nasida asa huceritahon muse aha na terjadi. Hape dang huingot be aha naung sanga huceritahon. Molo pittor jujur hita, pasti dang songon i na terjadi!”​—Si Anthony.

Pikkirhon ma: Aha do na seharusna diulahon si Anthony asa unang sappe terjadi songon i?

Na didok Bibel: “Magigi do Jahowa tu pargabus, alai lomo do rohana tu halak na setia.”​—Poda 12:22.

“Adong do donganku na lomo rohana margabus. Jotjot do ibana manamba-nambai cerita. Holong do nian rohakku tu ibana jala berupaya do au asa unang mamikkiri akka na didokna i. Alai, gabe maol do au porsea tu ibana.”​—Si Yvonne.

Pikkirhon ma on: Boasa boi gabe sega reputasi ni dongan ni si Yvonne ala jotjot margabus jala palobi-lobihon cerita?

Na didok Bibel: “Lomo do rohanami asa jujur di saluhutna.”​—Heber 13:18.

Aha do manfaatna molo jujur

Parrohahon ma piga-piga manfaatna molo jujur hamu.

“Adong ma borua mardalan di jolokku, madabu hepengna. Hugora ma ibana jala hulehon ma hepengna i. Mandok mauliate do ibana tu au jala didok, ‘Bah burju nai ho poang. Nga jarang saonari halak na jujur.’ Las hian do rohatta molo diargai akka halak tikki tabahen na denggan!”​—Si Vivian.

Pikkirhon ma on: Boasa tarsonggot borua i tikki dipaulak si Vivian hepengna i? Aha do manfaatna tu si Vivian?

Na didok Bibel: “Marlas ni roha ma halak . . . na sai mangulahon na sittong.”​—Psalmen 106:3.

“Mambukka usaha jasa cleaning service do keluarganami. Tikki paiasson kantor, sipata olo do adong dapotnami hepeng logam na peak di lantai. Biasana, dipeakkon hami do hepeng i di meja jonok tu inganan ni hepeng i madabu. Adong ma sada pegawai di kantor i na heran mamereng hami. Menurut ibana, terlalu jujur do hami. Didok ibana, ‘Holan hepeng logam do i.’ Alai ala jujur hami, gabe porsea do ibana tu hami.”​—Si Julia.

Pikkirhon ma on: Ala ditanda si Julia halak na jujur, aha do hira-hira manfaatna autsugari mangalamar karejo ibana di tempat na asing?

Na didok Bibel: “Marsitutu ma ho mambahen dirim gabe halak na dihalomohon Debata.”​—2 Timoteus 2:​15.

“Holan 64 jam do au karejo, hape dilean gajikku gaji ni 80 jam. Lumayan do nian molo hupasip i, alai dang mungkin huulahon i. Hupaboa ma i tu boshu. Mandok mauliate do ibana tu au. Sebenarna dang sadia hepeng i molo di perusahaan, alai sarupa tu na manakko do au disi molo dang hupaboa i.”​—Si Bethany.

Pikkirhon ma on: Tutu do dang pola boha manakko sian perusahaan daripada manakko sian jolma?

Na didok Bibel: “Sogo do roha ni Jahowa tu pangoto-otoi, alai marale-ale do Ibana tu halak na tigor marroha.”​—Poda 3:32.