SUKKUN-SUKKUN NI AKKA NA POSO
Boasa Ikkon Manat Au Mamillit Musik?
“Mambege musik do au tiap ari. Tikki di mobil au, huputar do musik. Tikki santai, tikki paiasson jabu, jala tikki manjaha pe huputar do musik. Ikkon hubege do musik tiap ari.”—Si Carla.
Lomo do rohamuna mambege musik songon si Carla? Molo ido, boi do artikel on mangurupi hamu lao mamboto manfaat dohot bahaya ni musik. Jala boi do artikel on mangurupi hamu asa manat mamillit musik.
Manfaat ni musik
Mambege musik, sarupa do songon na mangallang sipanganon. Molo diallang hamu sipanganon na sehat jala dang pagodangku, boi do i bermanfaat tu hamu. Musik pe songon i do. Misalna:
Boi do musik mambahen las rohatta.
“Tikki dang semangat au, huputar do musik favorittu. Alani i, gabe tabo ma perasaanku.”—Si Mark.
Boi do musik paingotton hamu tu akka kenangan na denggan.
“Biasana, adong do lagu na paingotton au tu akka kenangan na denggan. Tikki hubege lagu i, gabe las ma rohakku.”—Si Sheila.
Boi do musik mambahen hita marsada.
“Tikki i, dohot do au tu parpunguan internasional ni Saksi Jahowa. Tikki sude halak na disi rap mangendehon lagu penutup, gabe tangis ma au jala terharu. Marasing-asing do nian bahasanami, alai boi do musik mambahen hami gabe marsada.”—Si Tammy.
Boi do musik mangurupi hamu patuduhon akka sifat na denggan.
“Boi do hita gabe lam sabar jala lam denggan mangatur waktu molo marsiajar alat musik. Alana, dang boi pittor malo hita di bagasan sadari, ikkon marlatik do hita.”—Si Anna.
Diboto hamu do? Bukku na unggodang pasalna di Bibel, i ma bukku Psalmen, na marisi 150 ende.
Manat ma hamu mamillit musik songon mamillit sipanganon
Bahaya ni musik
Songon sipanganon na busuk, adong do musik na berbahaya. Ida ma alasanna.
Godang do lagu na lirikna jelas-jelas taringot seks.
“Akka lagu na dihalomohon halak di tikkitta saonari godangan taringot seks. Takkas do on tarida sian lirikna.”—Si Hannah.
Na didok Bibel: “Unang ma hea dihatai hamu taringot tu seks na so patut, akka ulaon na ramun, dohot hahisapon.” (Epesus 5:3) Pikkirhon ma, ‘Boi do musik na hubege mangurupi au lao mangihutton nasehat ni Bibel i?’
Boi do piga-piga musik mambahen gabe lungun rohamuna.
“Sipata di tikki borngin, olo do hubege musik na mambahen lungun rohakku. Alani musik i gabe hupikkiri ma akka na mambahen lungun rohakku.”—Si Tammy.
Na didok Bibel: “Sian sude na ikkon jagaonmu, jaga ma roham.” (Poda 4:23) Pikkirhon ma, ‘Gabe sai lungun do rohakku ala mambege musik on?’
Boi do piga-piga musik mambahen hamu gabe mura-mura muruk.
“Berbahaya do molo hubege musik na lirikna taringot sogo ni roha, muruk tu diri sandiri dohot tu halak na asing. Alana olo do dang husadari, gabe muba sikaphu dung mambege musik sisongon i. Jala songon i do didok keluargakku tu au.”—Si John.
Na didok Bibel: “Pasiding hamu ma rimas, muruk, hajahaton, hata na mangaleai, dohot akka hata na rorang sian pamanganmuna.” (Kolosse 3:8) Pikkirhon ma, ‘Boi do musik na hubege mambahen au gabe kasar, bahkan dang parduli tu perasaan ni na asing?’
Intina: Manat ma hamu tikki mamillit musik. I do na diupayahon si Julie. Didok ibana, “Taratur do huperiksa akka lagu na jotjot hubege, jala huhapus do na hurasa dang denggan. Memang dang mura i, alai huboto do nga sittong na huulahon on.”
I do tong na diulahon sahalak borua na margoar si Tara. Didok ibana, “Sipata adong do di radio lagu na tabo begeon. Alai tikki hubege lirikna, husadari ma ikkon hugatti do siaranna. Dang mura mangulahon i. Sarupa do i songon mambolokkon kue na tabo, hape otik dope na taallang! Jadi, molo boi hutolak lagu taringot seks, pasti boi do hutolak godaan lao mangulahon seks sebelum menikah. Dang huanggap sepele pengaruh ni musik tu dirikku.”