Tutu do si Maria i Ina ni Debata?

Na didok Bibel

Dang. Dang hea didok di Bibel molo si Maria i ina ni Debata. Jala dang hea halak Kristen disuru asa manomba si Maria.a On ma buktina:

Dang hea didok si Maria molo ibana ina ni Debata. Jala didok di Bibel, manubuhon “Anak ni Debata” do ibana, dang manubuhon Debata.—Markus 1:1; Lukas 1:32.
Dang hea didok Jesus molo si Maria i, ina ni Debata jala ikkon dipasangap. Hea do sahalak borua mandok, marlas ni roha do si Maria ala manubuhon Jesus. Alai dipasingot Jesus do borua i. Didok Jesus, “Ndang songon i. Halak na manangihon hata ni Debata jala na mangulahon i do na marlas ni roha!”—Lukas 11:27, 28.
Dang adong disurat di Bibel hata “Ina ni Debata” dohot “Theotokos” (na manubuhon Debata).
Dang si Maria na didok “Ratu na sian Surgo”. Alai dewi do i, na disomba akka halak Israel na murtad. (Jeremia 44:15-19) Ra, “Ratu na sian Surgo” i maksudna si Istar, dewi ni halak Babel.
Halak Kristen di abad na parjolo pe dang manomba si Maria, jala dang pasangaphu si Maria dibahen nasida. Sahalak sejarawan mandok molo halak Kristen di abad na parjolo “dang olo manomba jolma, jala mabiar do nasida, molo disomba si Maria, olo ma annon gabe dirimpu akka halak dos do i songon na manomba dewi”.—In Quest of the Jewish Mary.
Didok do di Bibel, nungnga adong Debata sian najolo. (Psalmen 90:1, 2; Jesaya 40:28) Dang marmula Debata. Jadi dang adong na manubuhon Ibana. Jala, dang mungkin Debata adong di bortian ni si Maria. Alana takkas do dipaboa di Bibel, gari langit pe dang siat gabe inganan ni Debata.—1 Rajaraja 8:27.

Ina ni Jesus do si Maria, dang “Ina ni Debata”

Halak Jahudi do si Maria jala keturunan ni Raja Daud do ibana. (Lukas 3:23-31) Las do roha ni Debata mangida si Maria ala burju jala togu haporseaonna. (Lukas 1:28) I do umbahen dipillit Debata ibana gabe ina ni Jesus. (Lukas 1:31, 35) Asing ni Jesus, adong do muse anak ni si Maria sian si Josep.—Markus 6:3.

Didok di Bibel, sisean ni Jesus do si Maria. Alai dang godang hatorangan na dipaboa di Bibel taringot si Maria.—Ulaon ni Apostel 1:14.

Boasa godang halak mandok si Maria i ina ni Debata?

Menurut bukti, di ujung ni abad na paopatton ma akka halak mulai manomba si Maria. Tikki i, Gereja Katolik ma na gabe agama resmi ni Kekaisaran Rom. Ujungna, akka halak na manomba dewa-dewi hian gabe halak Kristen do. Alai gabe dipakke akka gareja do ajaran Tritunggal. Hape dang adong dipaboa taringot i di Bibel.

Alani ajaran Tritunggal on, gabe didok akka pargareja do Jesus i Debata, jala si Maria ina ni Debata. Taon 431 M, adong konsili gareja di Epesus na mandok molo si Maria i “Ina ni Debata”. Dung i, gabe disomba akka halak ma si Maria jala pasangaphu do ibana dibahen (manang didok ma on Mariolatry). Gabe rarat do ajaran on. Asing ni i, lam godang do akka sisomba dewa-dewi hian gabe pargareja. Dibahen nasida ma patung dohot gombar Perawan Maria lao manggantihon akka patung dewi kesuburan ni nasida, songon Artemis (di halak Rom goarna si Diana) dohot Isis.

Taon 432 M, diparettahon Paus Sixtus III do asa dibangun gareja di Rom lao pasangaphon “Ina ni Debata”. Gareja i dibahen jonok ni inganan ni kuil hian. Kuil i najolo dibangun lao pasangaphon dewi Lucina, i ma dewi kelahiran na disomba halak Rom. Sahalak penulis mandok molo gareja i gabe “simbol na patuduhon nungnga domu be ajaran taringot Ibu Agung tu ajaran taringot si Maria”.—Mary—The Complete Resource.

a Godang agama mangajarhon molo si Maria i ina ni Debata. Didok do muse, si Maria i do “Ratu na sian Surgo”. Molo di hata Junani, didok do i Theotokos. Lapatanna, “na manubuhon Debata”.