4 Musa

28 Dung i didok Jahowa ma tu si Musa, 2 “Paboa ma paretta on tu halak Israel, ‘Ikkon lehononmuna do peleanmuna na songon sipanganon* i di Au di tikki naung ditottuhon.+ Ikkon ditutung do pelean i dohot api na uapna palashon rohakku.’

3 “Paboa ma tu nasida, ‘On ma pelean na ditutung na ikkon dilehon hamu tu Jahowa: dua biru-biru jantan na sehat jala na marumur sataon. Ikkon dilehon hamu do i ganup ari lao gabe pelean situtungon.+ 4 Pelehon ma sada biru-biru jantan i di manogotna, jala dung bonom* mataniari pelehon ma na sada nai.+ 5 Pelehon ma i rap dohot saparsappulu epa* topung na halus na dicampur dohot saparopat hin* miak jetun. Pelehon ma i gabe pelean sipanganon.*+ 6 Akka i ma pelean situtungon na ikkon dilehon ganup ari,+ naung ditottuhon di Dolok Sinai. Akka i ma na gabe pelean na ditutung dohot api tu Jahowa, jala uapna palashon rohana. 7 Tikki mamelehon sada biru-biru, pelehon hamu ma saparopat hin siinumon na maralkohol lao gabe pelean siinumon.+ Usehon ma i di inganan na badia gabe pelean siinumon tu Jahowa. 8 Jala dung bonom* mataniari pelehon ma biru-biru na sada nai. Songon na dibahen ganup manogot, ikkon pelehononmuna do muse pelean sipanganon dohot pelean siinumon na sarupa lao gabe pelean na ditutung dohot api tu Jahowa, jala uapna palashon rohana.+

9 “‘Alai di ari Sabat,+ ikkon pelehononmuna do dua biru-biru jantan na sehat jala na marumur sataon. Pelehon ma i rap dohot dua parsappulu epa topung na halus na dicampur dohot miak, lao gabe pelean sipanganon rap dohot pelean siinumon. 10 Akka i ma pelean situtungon na ikkon dilehon di ari Sabat, tamba ni pelean situtungon na ikkon dilehon ganup ari rap dohot pelean siinumonna.+

11 “‘Di mula ni ganup bulan, ikkon lehononmuna do dua lombu jantan na poso, sada biru-biru jantan, dohot pitu biru-biru jantan na sehat jala na marumur sataon lao gabe pelean situtungon tu Jahowa.+ 12 Ganup dipelehon hamu sada lombu jantan, ikkon pelehononmuna do tolu parsappulu epa topung na halus na dicampur dohot miak lao gabe pelean sipanganon.+ Jala ganup dipelehon sada biru-biru jantan, ikkon dipelehon hamu do dua parsappulu epa topung na halus na dicampur dohot miak lao gabe pelean sipanganon.+ 13 Ganup dipelehon hamu sada biru-biru jantan anakna, pelehon hamu ma saparsappulu epa topung na halus na dicampur dohot miak gabe pelean sipanganon. Pelehon ma sudena i gabe pelean situtungon, na ditutung dohot api na uapna palashon roha ni Jahowa.+ 14 Ikkon dipelehon hamu do muse pelean siinumon satonga hin anggur tu ganup lombu jantan,+ sapartolu hin anggur tu ganup biru-biru jantan,+ jala saparopat hin anggur tu ganup biru-biru jantan anakna.+ Akka i ma pelean situtungonmuna ganup bulan di bagasan sataon. 15 Jala ikkon dilehon hamu do muse sada hambing na poso lao gabe pelean hasesaan ni dosa tu Jahowa, tamba ni pelean na ikkon dilehon hamu ganup ari rap dohot pelean siinumonna.

16 “‘Di ari na pasappulu opatton, di bulan na parjolo, i ma ari Paska tu Jahowa.+ 17 Jala adong do perayaan di ari na pasappulu limahon di bulan i. Ikkon mangallang roti na so marragi do hamu saleleng pitu ari.+ 18 Di ari na parjolo, ikkon marpungu do hamu manomba Au. Jala dang adong sian hamu na boi karejo. 19 Ikkon dipelehon hamu do dua lombu jantan na poso, sada biru-biru jantan, dohot pitu biru-biru jantan anakna na marumur sataon lao gabe pelean situtungon tu Jahowa. Ikkon na sehat do sude binatang na lao dipelehon i.+ 20 Sudena i ikkon dipelehon rap dohot pelean sipanganon, i ma topung na halus na dicampur dohot miak.+ Tolu parsappulu epa ma tu sada lombu jantan, dua parsappulu epa ma tu biru-biru jantan, 21 jala saparsappulu epa ma tu ganup biru-biru jantan anakna na pitu i. 22 Ikkon dipelehon hamu do muse sada hambing lao gabe pelean hasesaan ni dosa, na lao dipakke tikki dipangido asa disesa dosamuna. 23 Ikkon dipelehon hamu do sudena i tamba ni pelean situtungon na dilehon hamu ganup ari di tikki manogot. 24 Bahen hamu ma songon i saleleng pitu ari. Ikkon dipelehon hamuna do i ganup ari gabe songon sipanganon.* I ma na gabe pelean na ditutung dohot api, na uapna palashon roha ni Jahowa. Ikkon dipelehon do i rap dohot pelean situtungon na dilehon ganup ari rap dohot pelean siinumonna. 25 Di ari na papituhon, ikkon marpungu do hamu manomba Au.+ Jala dang adong sian hamu na boi karejo.+

26 “‘Ikkon marpungu do hamu manomba Au tikki Perayaan Dung Pitu Minggu,+ i ma tikki dibuat hamu hasil panen na parjolo sahali sian ladangmuna+ jala tikki diboan hamu pelean sipanganon na baru tu Jahowa.+ Dang boi hamu karejo di ari i.+ 27 Ikkon boanonmuna do dua lombu jantan na poso, sada biru-biru jantan jala pitu biru-biru jantan anakna na marumur sataon. Pelehon ma i gabe pelean situtungon, na uapna palashon roha ni Jahowa.+ 28 Jala pelehon ma muse topung na halus na dicampur dohot miak lao gabe pelean sipanganon. Pelehon ma tolu parsappulu epa tu sada lombu jantan, dua parsappulu epa tu biru-biru jantan, 29 jala saparsappulu epa tu ganup biru-biru jantan anakna na pitu i. 30 Jala pelehon hamu ma sada hambing na poso lao dipakke tikki dipangido asa disesa dosamuna.+ 31 Ikkon dipelehon hamu do sudena i rap dohot pelean siinumonna tamba ni pelean situtungon na dilehon ganup ari rap dohot pelean sipanganonna. Sude binatang na dipelehon i ikkon na sehat do.+