Jeremia
52 Marumur 21 taon ma si Sedekia+ tikki gabe raja, jala saleleng 11 taon ma ibana mamaretta di Jerusalem. Si Humuntal+ boru ni si Jeremia na sian Libna do omakna. 2 Sai diulahon ibana do na jahat di jolo ni Jahowa, songon na binahen ni si Jehoyakim.+ 3 Masa pe songon i, ala muruk do Jahowa tu Jerusalem dohot tu Juda. Ujungna dipalao Ibana ma nasida sian jolona.+ Dung i, mangalo ma si Sedekia tu raja ni Babel.+ 4 Di ari na pasappuluhon, di bulan na pasappuluhon, di taon na pasiahon pamarettaon ni si Sedekia, ro ma Raja Nebukadnesar* na sian Babel dohot sude tentarana mangalo Jerusalem. Markemah ma nasida di jolo ni kota i, jala dibahen ma tembok makkaliangi kota i.+ 5 Dihaliangi ma kota i sahat tu taon na pasappulu sadahon pamarettaon ni Raja Sedekia.
6 Di ari na pasiahon, di bulan na paopatton,+ masa ma haraparon di kota i, jala dang adong be sipanganon ni akka halak na di luat i.+ 7 Ujungna, diruppakkon ma tembok ni kota Jerusalem. Gabe lari ma sude tentara di tikki borngin sian kota i. Lari ma nasida sian gerbang na di holang-kolang ni tembok na marlappis dua na jonok tu taman ni raja. Tikki dihaliangi halak Kasdim dope kota i, lao ma nasida tu dalan na tu Araba.+ 8 Alai dilele tentara ni halak Kasdim ma si Sedekia,+ jala dapot ma ibana di Gurun Jeriko. Gabe lari ma sude tentara ni si Sedekia maninggalhon ibana. 9 Ditakkup ma si Sedekia jala diboan tu raja ni Babel di Ribla, di luat ni halak Hamat. Dung i, dihukum ma ibana. 10 Dipamate raja ni Babel ma akka anak ni si Sedekia di jolona. Jala dipamate raja ni Babel i do muse sude pamimpin ni Juda di Ribla. 11 Dibahen raja ni Babel ma mapitung mata ni si Sedekia.+ Diratte ma patna mamakke ratte na sian tombaga, jala diboan ma ibana tu Babel. Dipenjarahon ma ibana disi sahat tu na mate.
12 Di ari na pasappuluhon, di bulan na palimahon, di taon na pasappulu siahon Raja Nebukadnesar* raja ni Babel i mamaretta, ro ma si Nebusaradan pegawai ni raja i tu Jerusalem.+ Si Nebusaradan do kepala ni akka pengawal ni raja ni Babel. 13 Ditutung si Nebusaradan ma jabu ni Jahowa,+ istana ni raja, sude jabu na adong di Jerusalem, dohot sude jabu na balga di luat i. 14 Tikki i, adong do akka tentara ni halak Kasdim na rap dohot si Nebusaradan kepala ni akka pengawal i. Diruppakkon akka tentarana i ma tembok na makkaliangi kota Jerusalem.+
15 Diboan si Nebusaradan kepala ni panjaga i ma piga-piga halak na so sangap dohot akka halak na mangolu dope di kota i. Diboan ibana do muse akka halak na marpihak tu raja ni Babel dohot akka tukkang na malo na mangolu dope.+ 16 Alai ditinggalhon si Nebusaradan kepala ni panjaga i do deba akka halak na pogos di luat i. Dipaksa do nasida gabe hatoban jala mangula porlak anggur.+
17 Diruppakkon halak Kasdim ma tiang ni jabu+ ni Jahowa na sian tombaga. Diropukkon nasida ma muse akka kareta+ dohot Laut Tombaga+ na adong di jabu ni Jahowa. Dung i, diboan nasida ma sude tombaga i tu Babel.+ 18 Diboan nasida do muse inganan ni sirabun, akka sekop, akka alat pamatehon api, akka makkuk,+ akka cakkir,+ dohot sude barang na sian tombaga na dipakke di bagas joro i. 19 Dibuat si Nebusaradan kepala ni panjaga i ma akka baskom,+ akka inganan ni gara ni api, akka makkuk, akka inganan ni sirabun, akka inganan ni lampu,+ akka cakkir, dohot akka makkuk na sian mas murni dohot perak.+ 20 Massai godang do tombaga na sian dua tiang i,+ sian Laut Tombaga i, sian 12 patung lombu jantan na di toru ni Laut Tombaga i, dohot sian akka kareta na binahen ni Raja Salomo di jabu ni Jahowa. Dang tartimbang be tombaga i alani godangna.
21 Ganup tiang timbona 18 asta.* Kaliling ni ganup tiang 12 asta.+ Tobalna nasa opat jari-jari.* Jala kosong do isi ni sude tiang i. 22 Ulu ni tiang i dibahen sian tombaga. Lima asta ma timbo ni ganup ulu ni tiang i.+ Adong do muse jaring dohot hiasan buah delima di sakaliling ni ulu ni tiang i na dibahen sian tombaga. Sarupa do muse ukkuran ni tiang na paduahon i, songon i nang akka hiasan buah delimana. 23 Adong 96 buah delima na tarida di ulu ni tiang i. Sude buah delima na di sakaliling ni jaring i adong 100.+
24 Diboan si Nebusaradan kepala ni panjaga i ma si Seraya+ malim kepala* i. Diboan do muse si Sepania+ wakil ni malim kepala i dohot tolu sijaga pintu.+ 25 Diboan si Nebusaradan ma sahalak pejabat ni istana na mamimpin akka tentara. Diboan ibana ma pitu penasehat ni raja na adong di kota i. Jala diboan ma muse sekretaris ni pamimpin ni tentara. Sekretaris i do na papunguhon akka halak na di luat i lao gabe tentara. Diboan ibana do muse 60 rakyat na adong dope disi. 26 Diboan si Nebusaradan kepala ni panjaga i ma nasida sude tu raja ni Babel di Ribla. 27 Dipamate raja ni Babel ma nasida sude di Ribla+ na di luat Hamat. Songon i ma halak Juda dipalao sian luat i jala diboan tu luat ni musu.+
28 Songon on ma godang ni halak na diboan si Nebukadnesar* tu kotana: Di taon na papituhon diboan do 3.023 halak Jahudi.+
29 Di taon na pasappulu ualuhon pamarettaon ni si Nebukadnesar,*+ diboan do 832 halak sian Jerusalem.
30 Di taon na paduapulu toluhon pamarettaon ni si Nebukadnesar,* diboan si Nebusaradan kepala ni panjaga i ma 745 halak Jahudi tu kotana.+
Jadi 4.600 halak ma sude na diboan tu luatna.
31 Dung gabe raja ni Babel si Epil-merodak, dipalua ibana ma si Jehoyakin+ raja ni Juda sian penjara.+ Tikki i, i ma ari na paduapulu limahon, bulan na pasappulu duahon, taon na patolupulu pituhon dung dipenjarahon Raja Jehoyakin di Babel. 32 Burju do si Epil-merodak tu si Jehoyakin. Jala dibahen do untimbo jabatanna sian akka raja na asing na adong di Babel. 33 Digatti si Jehoyakin ma baju tahananna, jala toktong ma ibana rap mangan dohot raja saleleng ni ngoluna. 34 Ganup ari, sai diparade raja ni Babel do sipanganonna saleleng mangolu ibana sahat tu na mate.