Hesekiel

25 Dung i didok Jahowa ma muse tu au, 2 “Ale anak ni jolma, ida ma doppak halak Ammon+ jala paboa ma aha na lao masa taringot tu nasida.+ 3 Dokkon ma taringot tu halak Ammon, ‘Tangihon ma hata ni Jahowa Tuan Natumimbul i. Songon on ma didok Jahowa Tuan Natumimbul i, “Tikki hubahen ramun* inganakku na badia i, tikki hubahen tarulang luat ni halak Israel, jala tikki hupasombu diboan musu halak Juda, didok hamu do ‘Tuani ma masa i!’ 4 Alani i, pasahatonku ma hamu gabe appuna ni halak na di sabola Timur. Dipajongjong nasida ma perkemahan di tonga-tongamuna, jala dibahen nasida ma akka tenda di tonga-tongamuna. Allangon ni nasida ma hasil panen ni ladangmuna, jala inumon ni nasida ma susu ni binatang na dipiaro hamu. 5 Bahenokku ma kota Rabba+ gabe inganan panjappalan ni unta. Jala luat ni halak Ammon pe gabe inganan lao maradi tu akka binatang na diparmahan. Sian i, botoonmuna ma na Au do Jahowa.”’”

6 “Ai songon on do didok Jahowa Tuan Natumimbul i, ‘Lea do roham mangida na masa tu luat ni halak Israel.+ Martopak tangan do ho,+ jala marinjak-injak alani las ni roham mangida na masa i. 7 Alani i, angkatokku ma tanganku lao mangalo ho. Pasahatonku ma ho tu akka bangso. Buaton ni nasida ma akka artam. Bahenokku ma ho mago sian tonga-tonga ni bangso, jala dang adong be ho di tonga-tonga ni luat.+ Ai pamateonku nama hamu sude. Sian i botoonmuna ma na Au do Jahowa.’

8 “Songon on ma hata ni Jahowa Tuan Natumimbul i, ‘Didok halak Moab+ dohot halak Seir+ do, “Ida ma! Sarupa do halak Juda songon sude bangso na asing.” Ala didok nasida songon i, 9 pasombuonku ma diserang akka kota na di parbatasan ni Moab, dohot ma i akka kota na uli na adong di luat i, Bet-jesimot, Baal-meon sahat tu Kiriataim.+ 10 Pasahatonku ma sudena i rap dohot halak Ammon gabe appuna ni halak na di sabola Timur.+ Alani i, dang diingot be halak Ammon di tonga-tonga ni bangso.+ 11 Parookku ma hukuman tu Moab,+ jala sian i botoon ni nasida ma na Au do Jahowa.’

12 “Songon on ma hata ni Jahowa Tuan Natumimbul i, ‘Nungnga dibaloshon halak Edom be Juda. Alai dosa na balga do na binahenna i.+ 13 Alani i, songon on ma hata ni Jahowa Tuan Natumimbul i, “Angkatokku ma tanganku lao mangalo halak Edom. Jala pamateonku ma sude jolma dohot sude binatang na dipiaro nasida. Dung i bahenokku ma tarulang luat ni nasida.+ Jala pakkeonku ma podang pamatehon sude halak mulai sian Teman sahat tu Dedan.+ 14 Balosokku ma Edom marhite tangan ni halak Israel bangsokki.+ Bahenon ni nasida ma Edom makkilala na muruk situtu Au tu nasida. Alani i, dihilala Edom ma songon dia haccitna molo Au na mambalos,’+ ninna Jahowa Tuan Natumimbul i.”’

15 “Songon on ma hata ni Jahowa Tuan Natumimbul i, ‘Ala torus do sogo roha ni halak Palistim tu* halak Israel, marsitutu do nasida torus mangulahon na jahat tu bangso i. Naeng dibalos nasida do halak Israel jala naeng dipamate do nasida sude.+ 16 Alani i, songon on ma hata ni Jahowa Tuan Natumimbul i, “Angkatokku ma tanganku lao mangalo halak Palistim.+ Pamateonku ma sude halak Heret.+ Jala pamateonku ma sude halak na mangolu dope na tinggal di topi ni laut.+ 17 Balosokku ma nasida, jala parookku ma hukuman na borat tu nasida. Tikki hubalos nasida, botoon ni nasida ma na Au do Jahowa.”’”