Toho do Didok di Bibel Datar Bentuk ni Bumi on?
Na Didok Bibel
Dang adong didok di Bibel molo bumi i datar.a Nang pe dang bukku ilmu pengetahuan Bibel i, alai sasittongna dang adong isi ni Bibel na bertentangan tu ilmu pengetahuan. Jala sude isina ”boi do i dihaporseai”.—Psalmen 119:138.
Aha do maksud ni hata “ujung ni tano on” na adong di Bibel?
Hata ni Bibel na mandok “ujung ni tano on” dang na berarti molo bumi i bentukna petak jala adong ujungna. (Jesaya 11:12; Job 37:3) Sebalikna, lapatan ni hata na adong di ayat i maksudna saluhut portibi on. Hea do tong dipakke di Bibel opat arah mata angin lao manggombarhon hata na sarupa.—Lukas 13:29.
Tarbukti do na datar bentuk ni bumi on tikki digoda Sibolis Jesus?
Tikki digoda Jesus “ditogihon Sibolis ma ibana muse tu sada dolok na massai timbo jala dipatudu ma sude harajaon ni portibi on dohot hasangaponna”. (Mateus 4:8) Piga-piga halak manganggap ayat ni Bibel on patuduhon molo saluhut portibi on boi tarida sian sada tempat, gabe dirippu nasida ma na datar do bumi on. Hape hata dolok na massai timbo na adong di ayat i holan gombaran do i jala dang sada lokasi na sesungguhna. On ma piga-piga alasan boasa tadok songon i.
Nang pe nakkok hita tu dolok na untimbo di portibi on dang mungkin hita boi mangida sude harajaon na adong di portibi on.
Dang holan harajaon na dipatudu Sibolis tu Jesus, alai dohot do “sude hasangaponna”. Gombaran na sisongon i dang boi tarida sian na dao, jadi hira na dipakke Sibolis do parnidaan lao patuduhon i tu Jesus. Sarupa ma i songon adong halak na mamakke sada layar lao patuduhon gombar ni sude inganan di portibi on tu sasahalak.
Di Lukas 4:5 mandok ‘di bagasan satokkin do sude harajaon ni portibi on’ dipatudu Sibolis tu Jesus. Normalna, dang sanggup mata ni jolma mangida i sude holan di bagasan satokkin. Jadi, boi tasimpulhon dang secara langsung dipatuduhon Sibolis sude na i tu Jesus, pasti mamakke cara na asing do ibana.
a Bibel mandok molo Debata “tinggal di atas ni portibi na bulat on”. (Jesaya 40:22)