• “Nungnga Jumpang be Tikkina”
    Ibadat na Sittong tu Jahowa—Ujungna Dipadenggan!

    • 6. (a) Aha do na dipatudu si Hesekiel sian peragaan na patoluhon i? (b) Aha do maksud ni paretta ni Debata na mandok ‘timbang jala bagi ma obukmi’?

      6 Dihancurhon Jerusalem dohot pendudukna. Adong dua na dipatudu si Hesekiel di peragaan na patoluhon on. Na parjolo, diperagahon ibana do aha na lao diulahon Jahowa. Jahowa mandok tu ibana, “Buat ma podang na tajom. Jala bahen ma i gabe piso cukkur.” (Jaha Hesekiel 5:1, 2.) Tangan ni si Hesekiel na maniop podang i manggombarhon tangan ni Jahowa na lao manghukum Jerusalem marhite tentara ni Babel. Na paduahon, diperagahon si Hesekiel ma aha na lao masa tu halak Jahudi. Songon on ma didok Jahowa, “Cukkur ma obukmi dohot janggutmi.” On patuduhon na lao diserang jala dihancurhon do halak Jahudi. Ai manggombarhon penduduk ni Jerusalem do obuk ni si Hesekiel i. Didok do muse tu si Hesekiel, “Timbang ma jala bagi ma [obukmi] gabe piga-piga bagian.” On patuduhon dang asal-asalan panguhuman na dibahen Jahowa tu Jerusalem. Nungnga direncanahon Ibana i, jala pasti hona tu sude pendudukna.