”TARHINSAT SI HENOK, GABE NDANG DIIDA HAMATEAN”

Songon dia do ujung ni parngoluon ni si Henok? Otik do hatorangan na dipaboa Bibel taringot hangoluan dohot hamatean ni si Henok. Buku 1 Musa mandok, ”Jala sai marparange, mardonganhon Debata ma si Henok, dung i ndang disi be ibana, ai dialap Debata do ibana.” (1 Musa 5:24) Songon dia do dibahen Debata mangalap ibana? Apostel Paulus paboahon, ”Hinorhon ni haporseaon i do tarhinsat si Henok, gabe ndang diida hamatean, jadi ndang jumpang be ibana, ala naung dihinsat Debata; ai andorang so tarhinsat, dihatindangkon do ibana, halomoan ni Debata.” (Heber 11:5) Aha do lapatan ni hata na mandok ”tarhinsat si Henok, gabe ndang diida hamatean”? Pigapiga terjemahan Bibel mandok si Henok diboan tu surgo. Alai ndang tutu i. Bibel paboahon, Jesus Kristus do na parjolo dipahehe tu surgo.​—Johannes 3:13.

Aha do lapatan ni hata na mandok si Henok ”tarhinsat” gabe ”ndang diida hamatean”? Olo do ra dibahen Debata asa ndang dihilala si Henok tingki mate ibana. Alai ”andorang so tarhinsat, dihatindangkon do ibana, halomoan ni Debata.” Songon dia carana? Andorang so mate ibana olo do ra si Henok mandapot parnidaan sian Debata, hira na diida ibana ma paradeiso di tano on. Huhut diida parnidaan i, tarpodom ma si Henok laos mate. Taringot si Henok dohot angka baoa nang borua na marsihohot, didok apostel Paulus, ”Di bagasan haporseaon do mate nasida sude.” (Heber 11:13) Dung i, dilului angka musuna ma bangkena alai ”ndang jumpang be”, olo do ra ala nunga dipamago Jahowa asa unang dipangke tu panombaon na so sintong.b

Huhut taingot ayat i, tarimangi ma ujung ni hangoluan ni si Henok. On ma hirahira na masa: nunga loja be si Henok marlojong. Nunga jonok be angka musuna na tarrimas alani barita na dipasahat ibana. Martabuni ma si Henok di sada inganan. Diboto ibana do ndang boi salelengna ibana martabuni. Nunga lam jonok be angka musuna na laho pamatehon ibana. Huhut martabuni, martangiang ma ibana tu Debata. Dung i, dame situtu ma pangkilalaanna. Diida ibana ma parnidaan jala dihilala ibana hira na dohot ma ibana disi.

Pingkirhon ma parnidaan na diida ni si Henok imbar situtu tu na diida ibana saleleng on. Diida ibana ma sada inganan na uli dos songon porlak Eden. Alai ndang adong kerubim na manjaga inganan i. Sude halak na tading disi baoa nang borua, ndang adong be na marsahit jala hisar dagingna. Dihilala nasida ma hadameon, ndang adong be hajahaton dohot agama na so sintong na diida si Henok saleleng on. Gabe pos ma roha ni si Henok na dihaholongi Debata do ibana. Jala pos do rohana, na laho sipardohot do ibana di inganan i. Huhut mangkilala hadameon alani parnidaan i, tarpodom ma ibana laos mate.

Disi dope ibana sahat tu saonari, tarpodom di hamatean, alai diingot Jahowa do ibana! Songon janji ni Jesus, na laho ro ma tingkina, begeon ni saluhut halak naung mate na adong di bagasan parningotan ni Debata ma soara ni Jesus jala hehe. Idaon ni nasida ma tano na imbaru na uli jala gok hadameon.​—Johannes 5:28, 29.