KOTAK PARSIAJARAN 19A
Sunge na Parohon Pasu-Pasu sian Jahowa
Parrohahon ma songon dia akka ayat ni Bibel mamakke hata “sunge” dohot “aek” lao manggombarhon pasu-pasu na sian Jahowa. Akka ayat i paposson rohatta na lao dipasu-pasu Jahowa do hita.
JOEL 3:18 Surirang na di ayat on paboahon mata mual na kaluar sian inganan na badia na di bagas joro. Aekna mambahen maraek inganan na koring di “Rura Sittim”. Parrohahon ma, aek na di parnidaan ni si Joel dohot si Hesekiel ro sian jabu ni Jahowa manang bagas joro, jala parohon hangoluan.
SAKARIA 14:8 Diida Panurirang Sakaria do mardalan “aek hangoluan” sian kota Jerusalem. Satonga aek i mardalan tu laut na di sabola timur manang Laut Mati, jala satonga nai tu laut na di sabola barat, manang Laut Tengah. Didok do Jerusalem “kota ni Raja na sangap i”, i ma Debata Jahowa. (Mat. 5:35) Kota Jerusalem na dipaboa si Sakaria paingotton hita, na lao mamaretta do Debata tu liat portibi on. Asing ni i, parnidaan taringot aek on patuduhon adong dua kelompok na lao dipasu-pasu Jahowa di Paradeiso. Na parjolo, i ma halak na malua sian hasusaan bolon jala na paduahon i ma halak na lao dipahehe disi.
PANGUNGKAPON 22:1, 2 Sunge na diida Apostel Johannes mirip do tu sunge na diida si Hesekiel. Alai sunge na diida si Johannes mardalan sian tahta ni Jahowa, dang sian bagas joro. Jadi songon parnidaan ni si Sakaria, parnidaan on pe manggombarhon akka pasu-pasu na lao dijalo di Pamarettaon Saribu Taon.
Pasu-pasu na sian pamarettaon i mirip do tu pasu-pasu na di parnidaan ni si Hesekiel taringot sunge i. Sude pasu-pasu i ro sian Jahowa jala dilehon tu halak na setia.
PSALMEN 46:4 Sunge na dipaboa di ayat on parohon las ni roha tu “kota ni Debata” dohot tu ‘tabernakel na badia appuna ni Natumimbul i’. “Kota ni Debata” patuduhon pamarettaon ni Jahowa jala ‘tabernakel na badia appuna ni Natumimbul i’ paboahon taringot ibadat na sittong.
Sian akka surirang on taboto ma adong dua cara na dipakke Jahowa lao mangalehon pasu-pasu tu halak na setia. Na parjolo, sian pamarettaon ni Debata jala na paduahon, sian pengaturan na dibahen tu ibadat na sittong. On ma cara na dipakke Jahowa lao mangalehon pasu-pasu tu hita sahat tu saleleng ni lelengna. Jadi torus ma tainum “aek hangoluan” na diparade Jahowa, Debata parholong dohot Anakna i asa mangolu hita salelengna!—Jer. 2:13; Joh. 4:10.