Diargai Punguan Bolon do Pengorbanan ni Debata dohot Kristus

1. Tikki dibege sahalak bawa sada jamita di kebaktian taon 1935, aha do pengaruhna tu ibana?

PARSIAJAR Bibel do najolo didok goar ni Saksi Jahowa. Adong ma sada keluarga na dohot tu punguan Parsiajar Bibel i. Tolu ma anakna jala dua boruna. Diajar-ajari nasida do anakna i asa manomba Debata Jahowa jala maniru Jesus Kristus. Sada sian anakna i marumur 18 taon, jala tardidi ma ibana di taon 1926. Ganup taon dohot do anakna i mangallang roti dohot manginum anggur tikki acara Borngin Parningotan ni Tuan. Ai sude do Parsiajar Bibel di tikki i mangulahon i. Alai dung dibege ibana sada jamita na marjudul “Punguan Bolon”, dang mangallang roti dohot minum anggur be ibana ala nga muba be harapanna. Jamita i dipasahat donganta J. F. Rutherford di kebaktian na dibahen di Washington, D.C., Amerika Serikat taon 1935. Hasittongan aha do na diboto Parsiajar Bibel sian kebaktian i?

2. Hasittongan aha do na dipaboa donganta si Rutherford di jamitana?

² Di jamita i, dipaboa donganta si Rutherford ma ise do “punguan bolon” na dipaboa di Pangungkapon 7:9. Najolo na diattusi Parsiajar Bibel, dohot do punguan on tu surgo alai dang dohot nasida mamaretta rap dohot Jesus. Alana hurang togu do haporseaon ni nasida. Alai di kebaktian i, dipatorang donganta si Rutherford ma sian Bibel, molo punguan bolon i dang dipillit lao mangolu di surgo. Nasida ma na didok Jesus biru-biru na asingb na malua sian hasusaan bolon jala mangolu salelengna di tano on. (Pgk. 7:14) Didok Jesus, “Adong dope biru-birukku na asing na so sian handang on jala ikkon dohot do akka i boanokku. Tangihonon ni nasida ma soarakku, gabe sada punguan ma nasida jala sada parmahan.” (Joh. 10:16) Akka biru-biru na asing na dimaksud dison, i ma akka naposo ni Jahowa na setia na naeng mangolu salelengna di Paradeiso di tano on. (Mat. 25:31-33, 46) Jadi mulai sian i, godang ma naposo ni Jahowa na gabe muba harapanna, termasuk ma bawa na marumur 18 taon i.​—Ps. 97:11; Poda 4:18.

PANGATTUSION NA BARU MANGUBA HARAPAN NI MARRIBU HALAK

3-4. Aha do na diattusi marribu halak na ro tu kebaktian di taon 1935?

³ Di kebaktian i didok donganta si Rutherford ma, “Hamu sude na naeng mangolu salelengna di tano on, jongjong ma hamu!” Sahalak donganta na dohot tu kebaktian i paboahon, sian 20.000 halak na ro, lobi sian satonga na jongjong. Dung i didok donganta si Rutherford ma, “Ida ma! On ma punguan bolon i.” Marlas ni roha ma akka halak na ro i. Diattusi akka halak na jongjong i ma, dang dipillit Debata nasida lao mangolu di surgo. Marsogotna i, adong ma 840 halak na tardidi. Jala godangan sian nasida biru-biru na asing do.

⁴ Dung mambege jamita i, donganta bawa na poso nakkin, dohot marribu halak na asing dang mangallang roti jala manginum anggur be di Borngin Parningotan ni Tuan. Songon on ma didok sahalak donganta bawa, “Di taon 1935 ma au parpudi mangallang roti dohot manginum anggur di acara Parningotan. Ala huboto, dang tu surgo au dipillit Jahowa alai mangolu salelengna di tano on do, jala dohot mambahen tano on gabe Paradeiso.” (Rom 8:16, 17; 2 Kor. 1:21, 22) Mulai sian i, lam godang ma halak na gabe bagian sian punguan bolon. Jala torus do diurupi nasida akka halak na dipillit tu surgo na mangolu dope di tano on.

5. Songon dia do pandangan ni Jahowa tu akka halak na so dohot be mangallang roti dohot manginum anggur di acara Parningotan?

⁵ Dung taon 1935 gabe godang do na so mangallang roti dohot na so manginum anggur di acara Parningotan. Saonari pe adong do Saksi Jahowa na hea mangallang roti dohot manginum anggur, alai ujungna diboto ibana ma dang tarpillit ibana tu surgo. Songon dia do pandangan ni Jahowa tu nasida? (1 Kor. 11:28) Jadi diallang nasida pe roti i jala diinum nasida pe anggur i, ala na so takkas dope diattusi nasida tudia harapanna. Alai nang pe songon i, tetap do dipillit Jahowa nasida gabe bagian sian biru-biru na asing molo serep rohana mangakkui naung sala pangattusionna, dang dohot be mangallang roti dohot manginum anggur, jala toktong setia manomba Jahowa. Jala torus do nasida ro tu acara Parningotan ala diargai nasida do sude naung diulahon Jahowa dohot Jesus.

HARAPAN NA ISTIMEWA

6. Aha do na diparettahon Jesus tu akka suru-suruan?

⁶ Ro nama hasusaan bolon, jadi denggan do molo taparsiajari Pangungkapon bindu 7 taringot halak Kristen na dipillit tu surgo dohot punguan bolon. Di tikki i, diparettahon Jesus do tu akka suru-suruan asa ditahan alogo na ro sian opat ujung ni tano on, asa unang mangullus alogo i tu tano on. Ditahan nasida do i sappe sae sude halak Kristen na tarpillit tu surgo dimateraihon, jala sappe didok Jahowa nasida toktong setia. (Pgk. 7:1-4) Ala toktong do nasida setia, gabe raja dohot malim ma nasida rap dohot Jesus di surgo. (Pgk. 20:6) Pasti massai las do roha ni Jahowa, Jesus, dohot akka suru-suruan mangida 144.000 halak na tarpillit manjalo upa ni nasida di surgo.

7. Sesuai tu Pangungkapon 7:9, 10, ise do na diida ni si Johannes jala aha do na diulahon nasida? (Ida gambar sampul.)

⁷ Di parnidaan ni si Johannes diida ibana ma raja dohot malim na 144.000 i. Diida ibana do muse “sada punguan bolon” na malua sian Armagedon. Dang taretong sadia godang halak na gabe bagian sian punguan bolon i. (Jaha Pangungkapon 7:9, 10.) Dipakke nasida do “jubah na bottar”. Lapatanna toktong do nasida ias jala setia tu Jahowa dohot Kristus, nang pe mangolu di portibi ni Sibolis. (Jak. 1:27) Sai didok nasida do, sian Jahowa dohot Jesus Anak ni Biru-Biru ni Debata do ro haluaon. Ditiop nasida do muse dakka ni hau palem. Lapatanna marlas ni roha do nasida ala nungnga dipillit Jahowa Jesus gabe Raja.​—Bandingkon tu Johannes 12:12, 13.

8. Sesuai tu Pangungkapon 7:11, 12, aha do na diida si Johannes di surgo?

⁸ Jaha Pangungkapon 7:11, 12. Diida si Johannes do keluarga ni Jahowa na di surgo marlas ni roha mangida punguan bolon i. Gabe dipuji nasida ma Debata ala malua do punguan bolon i sian hasusaan bolon.

9. Sesuai tu Pangungkapon 7:13-15, aha do na diulahon punguan bolon saonari?

⁹ Jaha Pangungkapon 7:13-15. Dipaboa si Johannes do molo punguan bolon i manussi “jubah ni nasida jala bottar dibahen di bagasan mudar ni Anak ni Biru-Biru i”. Lapatanna, ias do panggora ni roha ni nasida, jala halak na tigor marroha do nasida di jolo ni Jahowa. (Jes. 1:18) Halak Kristen naung tardidi do nasida, na porsea tu tobusan ni Jesus, jala togu parale-aleonna tu Jahowa. (Joh. 3:36; 1 Ptr. 3:21) Alani i do haduan boi nasida jongjong di jolo ni tahta ni Debata jala marhobas tu Ibana “arian nang borngin” di tano on. Alai saonari pe, ikkon semangat do nasida marbarita na uli dohot mambahen sisean. Ala diboto nasida Harajaon ni Debata do na uppetting di ngolu ni nasida.​—Mat. 6:33; 24:14; 28:19, 20.

10. Aha do na paposson roha ni punguan bolon, jala janji aha do na dipaima-ima nasida?

¹⁰ Pos do roha ni punguan bolon naung malua sian hasusaan bolon, na sai didongani Jahowa do nasida. Alana “Ibana na hundul di tahta i do na manjaga nasida”. Di ari na naeng ro saut do janji na dipaima-ima biru-biru na asing i. “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be.”​—Pgk. 21:3, 4.

11-12. (a) Songon na didok di Pangungkapon 7:16, 17, pasu-pasu aha do na lao dijalo punguan bolon? (b) Boasa ikkon ro biru-biru na asing tu acara Parningotan?

¹¹ Jaha Pangungkapon 7:16, 17. Adong do naposo ni Jahowa na kelaparan, ala susa di parhepengon manang alani porang. Na asing dipenjarahon alani haporseaon ni nasida. Alai diboto nasida do, dapotna do haduan gok sipanganon jala boi ma nasida toktong marale-ale tu Jahowa molo dung dihancurhon portibi na jahat on. Asing ni i muse, tikki diusehon Jahowa rimasna lao manghancurhon portibi ni Sibolis on, linggomanna do akka naposona. Dung salpu hasusaan bolon, togu-toguon ni Jesus do nasida tu “aek hangoluan” asa boi mangolu saleleng ni lelengna. Jadi istimewa do harapan ni punguan bolon na malua i. Alana, sian marmilliar halak na hea mangolu, nasida ma na so hea mate.​—Joh. 11:26.

¹² Pasti mandok mauliate do biru-biru na asing tu Jahowa dohot tu Jesus, ala dilehon do tu nasida harapan na istimewa. Jala sarupa do balga ni holong ni Jahowa tu nasida dohot tu halak na dipillit tu surgo. Jadi dang soal harapan ni nasida naeng mangolu salelengna di tano on manang naeng tu surgo, ikkon diargai nasida do pengorbanan ni Jahowa dohot Kristus. Sada cara patuduhon i, i ma ro tu Borngin Parningotan ni Tuan.

PATUDU MA PANGARGAION TU DEBATA DOHOT TU KRISTUS DI ACARA PARNINGOTAN

13-14. Boasa ikkon ro hita tu Parningotan Ari Hamamate ni Kristus?

¹³ Piga-piga taon na parpudi on, 1 banding 1.000 do na mangallang roti dohot manginum anggur di acara Parningotan. Jadi unggodang do halak na so mangallang roti dohot na so manginum anggur di acara i. On patuduhon, godangan halak na ro tu acara Parningotan i harapanna mangolu salelengna di tano on. Attong boasa ikkon ro nasida tu Borngin Parningotan ni Tuan i? Dos do nasida songon halak na ro tu pesta perkawinan ni donganna. Ala holong rohana tu donganna i, ro do ibana tu pesta i. Suang songon i ma akka biru-biru na asing, ro do nasida tu acara Parningotan ala holong do roha ni nasida tu Kristus dohot tu akka halak na tarpillit tu surgo. Jala ro do nasida tu acara i lao patuduhon na tung massai diargai nasida do tobusan ni Jesus. Ai alani tobusan i do boi nasida mangolu salelengna di tano on.

¹⁴ Aha dope muse na mambahen biru-biru na asing ikkon ro tu acara Parningotan? Ala paretta ni Jesus do i. Tikki parjolo hian dibahen Jesus acara Parningotan on, didok ibana do tu akka apostelna, “Toktong ma ulahon on bahen parningotan di au.” (1 Kor. 11:23-26) Jadi saleleng adong dope di tano on akka halak na tarpillit tu surgo, ikkon torus do ro biru-biru na asing tu Borngin Parningotan ni Tuan. Jala digokkon nasida do na asing asa ro tu acara i.

15. Aha do na porlu taulahon di acara Parningotan?

¹⁵ Di acara Parningotan adong ma kesempatanta marende dohot martangiang lao patuduhon holong dohot pangargaionta, dang holan tu Jahowa alai dohot do tu Jesus. Jamita na dipasahat di taon on i ma, “Patuduhon ma Pangargaion tu na Binahen ni Debata dohot Kristus Humokkop Hita!” Di jamita i dipatorang ma songon dia asa lam tamba pangargaionta di sude pengorbanan ni Jahowa dohot Jesus. Tikki diedarhon roti dohot anggur, taingot ma manggombarhon mudar dohot daging ni Jesus do i. Jala taingot ma pengorbanan ni Jahowa mangalehon Anakna i mate humokkop hita asa boi hita mangolu salelengna. (Mat. 20:28) Jadi sude na marholong ni roha tu Jahowa dohot tu Anakna i, pasti ro do tu acara Parningotan.

MANGARGAI HARAPAN NA SIAN JAHOWA

16. Aha do na patuduhon na arga do di Jahowa sude naposona?

¹⁶ Sude do naposo ni Jahowa arga di Ibana, dang soal tudia harapanna. Jala sarupa do arga ni tobusan na digarar Jahowa lao manobus akka na tarpillit tu surgo dohot akka biru-biru na asing. Ai ditobus do nasida sude marhite mudar ni Anak haholonganna i. Jadi nang pe dang sarupa harapan ni nasida, alai ikkon toktong do rap setia nasida tu Jahowa dohot tu Kristus. (Ps. 31:23) Jala taingot ma, sesuai tu kebutuhan ni naposona do dilehon Jahowa tondi parbadiana, dang soal tarpillit tu surgo manang biru-biru na asing.

17. Aha do na dipaima-ima halak na tarpillit tu surgo?

¹⁷ Dang mulai sian tubu sasahalak tarpillit lao mangolu tu surgo. Debata do na mangalehon harapan i tu nasida. Alani i dipikkiri nasida do harapanna i, ditangiakkon, jala berupaya do nasida mandapot hangoluan na di surgo i, nang pe dang boi dope dibayangkon nasida mardaging na songon dia nasida di surgo. (Plp. 3:20, 21; 1 Joh. 3:2) Alai sai tarpaima-ima do nasida boi pajuppang dohot Jahowa, Jesus, akka suru-suruan, dohot akka donganna na asing na tarpillit tu surgo. Jala tarpaima do nasida boi rap mamaretta di Harajaon i.

18. Aha do na dipaima-ima biru-biru na asing di ari na naeng ro?

¹⁸ Las do roha ni biru-biru na asing paimahon ngolu na salelengna di tano on. Ai nungnga dibahen Debata i tu roha ni jolma mulai sian na tubu nasida. (Pjm. 3:11) Tarpaima-ima do nasida boi paubahon saluhut tano on gabe Paradeiso. Dung i boi ma nasida mambangun jabuna sandiri, mambahen ladang, jala gelleng ni nasida pe sempurna. (Jes. 65:21-23) Boi ma didalani saluhut tano on, mulai sian akka dolok sahat tu topi ni laut. Jala boi ma diparsiajari nasida akka toppaan ni Jahowa. Massai sonang do haduan ngolu ni nasida. Alai na paling mambahen nasida marlas ni roha, i ma parale-aleon na lam togu tu Jahowa.

19. Aha do na tapatudu molo ro hita tu acara Parningotan, jala andigan do acara i dibahen di taon on?

¹⁹ Nungnga dilehon Jahowa tu akka naposona na setia janji na luar biasa. (Jer. 29:11) Jala di acara Parningotan Ari Hamamate ni Kristus adong ma kesempatanta patuduhon holong dohot pangargaionta, dang holan tu Jahowa alai dohot do tu Jesus. Ai nungnga ditobus hita jala boi mandapot hangoluan na saleleng ni lelengna. Alani i ganup taon, diulahon halak Kristen do ulaon na massai penting on. Di taon on, dibahen ma acara i dung bonom mataniari di ari Sabtu, 27 Maret 2021. Molo di negara na so mangorai ulaon marbarita do hita tinggal, pasti las do rohatta marpungu dohot na asing di acara on. Alai molo di negara na diorai pe hita tinggal, berupaya do hita ro tu acara i. Misalna adong do na mambahen acara Parningotan di penjara. Pasti diida Jahowa, Jesus, dohot akka keluargana na di surgo do sude upayatta asa boi mangulahon acara parningotan, dang soal sahalakta manang dohot huria.