Adong do Sitindangi Ni Jahowa na tinandamu? Deba sian hami olo do ra hombar jabumu, dongan sakarejo, dongan sasingkola. Manang hea do ra hamu martungkar pingkiran sian Bibel dohot hami. Ise do hami sasintongna, jala boasa ditaringoti hami haporseaon nami tu angka dongan na asing?

Hami songon halak na deba. Hami marharoroan sian marragam houm dohot hasomalan. Adong do naung marugamo uju i, jala adong muse do na so pola porsea tu Debata. Alai, andorang so Sitindangi Ni Jahowa, sude hami manat do mamareso ajaran ni Bibel. (Ulaon Ni Apostel 17:11) Dioloi hami do sude na pinarsiajaran nami, jala hami sandiri do na mamillit laho manomba tu Debata Jahowa.

Dihilala hami do labana marsiajar Bibel. Songon angka na asing, dohot do hami manaon hasusaan songon i parungkilon binahen ni hagaleon. Alai, ala diihuthon hami do prinsip ni Bibel, lam denggan ma dihilala hami parngoluon nami. (Psalmen 128:1, 2) I ma sada siala dibahen na olo hami pasahathon angka na denggan na pinarsiajaran nami sian Bibel.

Diulahon hami do prinsip-prinsip ni Bibel di parngoluon nami. Angka prinsip on mangurupi hami asa marlas ni roha jala denggan maradophon jolma, suang songon i laho pataridahon parange parroha na pintor dohot habasaon. Margogo do prinsip-prinsip on laho mangurupi angka jolma marparange huhut mangulahon na denggan, jala paulihon parsaripeon asa ture. Pos do roha nami ”na so siida bohi Debata”, i do mambahen hami marsada ni roha dohot angka dongan sahaporseaon di liat portibi on malua sian roha panihai binahen ni politik. Tutu do hami songon na deba, alai songon sada ruas, hami marimbar.​—Ulaon ni Apostel 4:13; 10:34, 35.

• Dia ma pardos ni Sitindangi Ni Jahowa dohot godang halak?

• Angka prinsip aha ma na diparsiajari angka sitindangi sian Bibel?

Dirimpu godangan halak do molo Sitindangi Ni Jahowa goar ni ugamo na baru. Alai, lobi sian 2.700 taon naung salpu, holan sasada i do ruas ni Debata na sintong digombarhon gabe ’sitindangiNa’. (Jesaya 43:10-12) Sahat tu taon 1931, digoari do hami Parsiajar Bibel. Boasa hami gabe mamangke goar Sitindangi Ni Jahowa?

Goar i patuduhon ise do Debata nami. Molo di pustaha na jolo, goar ni Debata, i ma Jahowa, disurat marribu hali di Bibel. Di godangan Bibel, goar i diganti dohot panggoaran, songon Tuhan manang Debata. Alai, tingki mangkatai tu si Musa, Debata na sintong patoranghon goarNa, Jahowa, jala didok, ”I do goarHu ro di salelenglelengna.” (2 Musa 3:15) Goar i pataridahon na marimbar do Ibana tu debata na so sintong. Balga do roha nami mamangke goar ni Debata na badia i.

Goar i manggombarhon taringot siulaon nami. Godang halak sian na jolo, mulana sian si Habel na partigor, manghatindanghon molo nasida marhaporseaon tu Jahowa. Sian abad tu abad naung salpu, si Noak, si Abraham, si Sara, si Musa, si Daud, dohot angka na asing marsada dohot ”torop ni sitindangi humaliang” on. (Heber 11:4–12:1) Songon sahalak panindangi di sada pangadilan laho mambela na so marsala, marsitutu do hami laho paboahon hasintongan taringot tu goar ni Debata na badia i.

Hami maniru Jesus. Di Bibel, didok do ibana ”Sitindangi haposan jala na sintong”. (Pangungkapon 3:14) Didok Jesus do ”nunga hupabotohon tu nasida goarMi” Jala ”asa huhatindanghon hasintongan i” taringot Debata. (Johannes 17:26; 18:37) Alani i, siihuthon Jesus na sintong ingkon mamangke dohot paboahon goar ni Jahowa. I ma na diulahon angka Sitindangi Ni Jahowa.

• Boasa angka Parsiajar Bibel gabe mamangke goar Sitindangi Ni Jahowa?

• Mulai nandigan do adong Sitindangi Ni Jahowa di tano on?

• Ise do na tarbarita na parjolo manghatindanghon taringot tu Jahowa?