Disuriranghon Bibel do ia dung mate Kristus, marroan ma angka guru pargapgap sian tongatonga ni halak Karisten di tingki parjolo na manegai hasintongan ni Bibel. (Ulaon ni Apostel 20:29, 30) Di pudian ni ari, toho ma i masa. Dipadomu nasida ma pangajarion ni Jesus tu pangantusion ni ugamo sipelebegu, laos rarat ma Karisten na so sintong. (2 Timoteus 4:3, 4) Songon dia ma asa pos rohanta molo hita saonari marpangantusion na mansai sintong taringot Aha do sasintongna na diajarhon Bibel?

Ro ma tingki ni Jahowa laho mangungkap hasintongan. Disuriranghon Ibana do molo ”jumpang tingki panimpuli, jadi torop halak manulingkit hata i”. (Daniel 12:4) Di taon 1870, diantusi sada punguan na metmet na mangalului hasintongan ma molo godang pangajarion ni gareja na so hombar tu hata ni Bibel. Alani i, marsitutu do nasida laho mangantusi ajaran ni Bibel na sasintongna, jala dipasupasu Jahowa do nasida, dilehon pangantusion partondion.

Angka halak na tobok roha radot mamparsiajari Bibel. Angka parsiajar na ringgas i, i ma na manjoloani hami, mamparsiajari Bibel songon na binahen nami nuaeng. Nasida mangulas Bibel sian judul tu judul. Molo adong ayat na maol antusan, dilului nasida do ayat na asing na boi patangkashon. Dung dapot rimpun na hombar tu sude isi ni Bibel, disurat nasida ma. Jadi, Bibel i sandiri do dibahen nasida laho patangkashon angka ayat na adong disi. On ma isara nasida laho pataridahon muse hasintongan taringot Harajaon ni Debata, sangkapNa tu jolma manisia dohot tu tano on, taringot halak naung mate, dohot haheheon. Laos malua ma nasida sian angka haporseaon dohot hasomalan na so sintong.​—Johannes 8:31, 32.

Di taon 1879, diantusi angka parsiajar ni Bibel ma naung ro tingki laho pararathon hasintongan. Jadi, di taon i, dibahen nasida ma majalla na dipabinsar hami dope sahat tu saonari, Joujou Paboahon Barita Harajaon ni Jahowa. Saonari, nunga dipasahat hami be hasintongan ni Bibel di 240 bangso hirahira di bagasan 750 bahasa. Mansai marganda ma parbinotoan na sintong i!

• Dung mate Kristus, aha ma na masa tu hasintongan ni Bibel?

• Songon dia do hami boi pataridahon muse hasintongan na sian Hata ni Bibel?

Nunga marpulu taon Sitindangi Ni Jahowa, mambahen jala pasarhon marragam salinan Bibel. Alai, didok roha nami porlu do mambahen sada salinan na imbaru, na boi mangurupi sude halak ”mananda hasintogan i”, songon na nihalomohon ni Debata tu sude jolma. (1 Timoteus 2:3, 4) Dibahen i, di taon 1950, dipungka hami ma mambahen Bibel Terjemahan Dunia Baru di bagasan hata na maju, mulana mardebadeba. Bibel on nunga disalinhon mansai jamot tu lobi sian 130 bahasa.

Dihaporluhon Bibel na mura antusan. Ianggo hata, lam leleng lam ganda do jala godang salinan ni Bibel mamangke pandohan na jolo na maol antusan. Asing ni i, jumpang muse angka pustaha naung leleng na tumangkas. Ala ni i, hata Heber, Aram, dohot Junani i ma angka hata na dipangke di Bibel, boi lam diantusi.

Dihaporluhon salinan hata ni Debata na so muba. Na so tupa do bahenon ni parsalin Bibel laho paubahon hata na sinurathon ni Debata; ingkon bahenonna do dos songon mulana lapatan ni hata i. Alai, godang do Bibel disalin na so manurathon goar ni Debata, Jahowa.

Dihaporluhon Bibel na pasangaphon PangarangNa. (2 Samuel 23:2) Di Terjemahan Dunia Baru, goar ni Jahowa dipataridahon do muse dos songon na adong di pustaha Bibel na jolo i, na manurathon goar i hirahira 7.000 hali. Gombar na di toruon ma sada tiruanna. (Psalmen 83:19) Songon hasil ni panulingkiton na jamot saleleng martaontaon, Bibel on tabo jahaon jala tangkas pasahathon pingkiran ni Debata. Adong manang na ndang Terjemahan Dunia Baru di hamu, ditogihon hami do hamu laho pasomalhon manjaha hata ni Debata ganup ari.​—Josua 1:8; Psalmen 1:2, 3.

• Boasa porlu didok roha nami mambahen salinan Bibel na imbaru?

• Aha do na ingkon ulahonon ni angka na olo mamparsiajari lomo ni roha ni Debata ganup ari?