Lam tu Dengganna Marbarita—Marbarita di Daerah Bisnis

Boasa Ringkot: Ala godang halak karejo parsadarian, isara na denggan laho pasahathon barita na uli tu nasida, i ma marbarita tu inganan parkarejoanna. Marbarita di daerah bisnis boi denggan jala marhasil, ala parkarejo somalna pantun do manjangkon halak na ro. Asa dijangkon nasida haroronta, pantun ma hita mangkatai dohot marpahean. (2 Kor. 6:3) Alai, sintua na mangaradoti ulaon marbarita, porlu mangatur ise na laho marbarita jala sadia jotjot sada daerah bisnis dikarejoi.

Songon dia Mangulahon:

Parade ma sada presentasi na jempek. Molo leleng hita mangkatai tu sahalak parkarejo, on mambahen hita maol manjumpangi nasida muse.
Jumpangi ma nasida tingki ndang godang panuhor, songon tingki manogot.
Jumpangi ma parjolo bos manang halak na mangaradoti parkarejo disi. Ramah jala lambok ma mangkatai. Dokhon hamu ma, ”Las rohanami manjumpangi angka jolma satongkin di inganan parkarejoan, ala maol jumpangnami nasida di jabu.” Bahen ma presentasi na jempek, dung i lehon ma sada risalah, majalah manang buku na asing. Asa unang didok nasida na sales hita, unang ma tataringoti sian dia hepeng laho mancetak majalah.
Molo ramah do bosna i, pangido ma asa mangkatai satongkin dohot parkarejo na asing. Di pigapiga daerah bisnis, denggan do molo tasungkun boi manang ndang manadingkon angka lektur di inganan parmanganan ni parkarejo.
Unang ma tapaksa halak manangihon jala marpangantusion ma. Umpamana, molo sahalak parkarejo mangkatai tu panuhor, tapaima ma ibana sahat tu na sae.

Ulahon ma On Saleleng Sabulan:

Molo disuru hamu marbarita di daerah bisnis, marlatik ma hamu mambahen presentasi na jempek, di tingki mangulahon panombaon na sasaripe.