NUNGA leleng halak Israel maringanan di Mesir, jala nunga lam torop nasida. Alai, adong ma raja na baru na so mananda si Josep. Mabiar ma raja i, ala diida lam torop halak Israel gabe diparhatoban ma nasida. Dibahen ma parenta asa dipamate sude posoposo baoa na baru tubu. Alai, ditabunihon sada ina ma posoposona tu poti jala dipeakhon tu bona ni arung. Diida boru ni si Firaun ma posoposo i, dibahen ma goarna si Musa jala magodang ma ibana di inganan ni raja Firaun.

Dung marumur 40 taon si Musa, dipamate ma sahalak mandur ni Mesir. Maporus ma ibana tu luat na dao. Dung marumur 80 taon si Musa, disuru Jahowa ma ibana mandapothon si Firaun asa diloas halak Israel ruar sian Mesir.

Ndang ditangihon si Firaun si Musa. Diuhum Debata ma bangso Mesir. Ro ma muse si Musa mandapothon si Firaun, alai tongtong do ndang ditangihon ibana si Musa. Ujungna, mate ma anak siangkangan ni sude halak Mesir sian jolma ro di pinahan—dipalua surusuruan do jabu na mambahen tanda mudar di pintu ni jabuna. Dibahen halak Israel ma ari i, ari parningotan i ma Paska.

Dung mate anak siangkangan ni si Firaun, diloas ma halak Israel manadingkon Mesir. Dung ruar halak Israel tompu ma muba roha ni si Firaun. Diboan ma tentarana mangadu halak Israel. Jala diida ma tarsosak nasida di topi ni Laut Mera. Alai, bola dua do Laut Mera i dibahen Jahowa, jala mardalan ma halak Israel di tongatonga ni laut na mahiang! Tingki dihudus halak Mesir laho mandapothon halak Israel tu Laut Mera i, mulak ma aek i songon na somal, dilonongkon ma sude hureta ni halak Mesir dohot si Firaun ro di tentarana tu tonga ni laut i.

Dung i maringanan ma halak Israel di dolok Sinai, dibahen Jahowa ma padan tu nasida. Dilehon Debata patik marhite si Musa na manogunogu halak Israel. Molo dijangkon nasida parenta ni Jahowa, urupanNa jala pasupasuonNa ma nasida.

Alai, torop sian halak Israel ndang marsihohot tu Jahowa. Maringanan ma nasida di halongonan saleleng 40 taon. Dung i, dipillit si Musa ma si Josua manggantihon ibana manguluhon halak Israel. Jala bongot ma nasida tu Kanaan, tano na dijanjihon ni Debata tu si Abraham.

—Dibuat sian 2 Musa; 3 Musa; 4 Musa; 5 Musa; Psalmen 136:10-15; Ulaon ni Apostel 7:17-36.

MARABAD andorang so dibongoti bangso Israel tano Kanaan, dijanjihon Jahowa hian do tano i laho inganan ni pinompar ni si Abraham. Saonari, dung si Josua manguluhon bangso i, rade ma nasida laho mangingani Tano Kanaan.

Nunga manguhum Jahowa tu halak Kanaan na ripashononNa nasida. Nunga digohi nasida ulaon na rorang di tano i, songon angka parmainanon dohot pamunuon. Laho siaphononNa do luhut huta na adong di Kanaan.

Andorang so bongot tu tano i, disuru si Josua dua matamata tu Jeriko jala sahat ma nasida tu jabu ni si Rahab. Ditabunihon si Rahab ma nasida nang pe diboto halak Israel. Porsea do si Rahab tu Debata ni halak Israel ala naung dibege songon dia Jahowa paluahon bangsoNa. Didok ma tu matamata i, asa paluaonna ibana dohot sude keluargana.

Dung bongot bangso Israel tu Kanaan jala ditaluhon Jeriko, dibahen Jahowa ma tanda halongangan, marumpak tembok ni Jeriko dibahen. Dibongoti jala ditaban tentara ni si Josua ma Jeriko i, alai dipalua do si Rahab dohot sude keluargana. Di bagasan onom taon, nunga godang huta naung ditaluhon si Josua di tano Kanaan. Dung i dibagihon ma tano i tu marga ni Israel.

Dung matua si Josua, dipapungu ma sude bangso i. Didok ma, songon dia panghongkop ni Jahowa tu nasida di tingki naung salpu. On patoguhon roha nasida asa mangoloi Jahowa. Alai, dung mate si Josua dohot angka donganna ditadingkon bangso Israel ma Jahowa jala marsomba tu debata na asing. Hirahira tolu ratus taon, ndang mangoloi parenta ni Jahowa be bangso i. Dipasombu Jahowa ma halak Palistim manaluhon nasida. Alai, molo mangido pangurupion bangso Israel tu Jahowa dilehon Ibana do angka panguhum​—12 halak godangna​—laho paluahon nasida.

Angka Panguhum on, mulai sian si Otniel sahat tu si Simson, halak na gogo. Hasintongan na dipatuduhon di buku Panguhum, on ma: Pangoloion tu Jahowa parohon pasupasu, alai manundalhon Jahowa mambahen ro mara.

—Dibuat sian buku Josua; Panguhum; 3 Musa 18:24, 25.