DUNGKON si Simson, si Samuel ma gabe panurirang jala panguhum. Alai, dipangido halak Israel do asa songon bangso na asing nasida diparenta sada raja. Nang pe ndang lomo roha ni Jahowa, didok do tu si Samuel asa dioloi pangidoan ni bangso i. Dipillit Jahowa ma sahalak na serep roha gabe raja, i ma si Saul. Di pudian ni ari, gabe ginjang do roha ni si Saul jala ndang marsihohot tu Jahowa. Sogo ma roha ni Jahowa gabe didok ma tu si Samuel asa dipillit raja na asing—goarna si Daud. Alai, dung dipillit si Daud gabe raja leleng dope asa hot pamarentaan ni ibana.

Tingki poso si Daud, laho ma ibana mangida angka hahana tu parporangan. Tingki i mabiar do tentara ni Israel, alani si Goliat na timbona lobi sian 3 meter jala diasangi do halak Israel. Sogo roha ni si Daud alani asangasangna i, diboan ma ambalang dohot batu di tanganna, didapothon ma si Goliat laho mangalo ibana. Alai, mangasahan Jahowa do si Daud! Ditaluhon ibana ma si Goliat holan sahali mangambalang, dibuat ma podang ni si Goliat i, laos diponggol ma uluna. Mabiar ma sude parangan ni halak Pilistim.

Mulana, lomo do roha ni si Saul mangida si Daud, jala dibahen ma ibana manguluhon angka tentarana. Sai monang do si Daud di parporangan, alai gabe mangiburu si Saul tu ibana. Alani i, maporus ma si Daud paluahon hosana ala sai tongtong do ibana dipaburuburu si Saul saleleng martaontaon. Nang pe songon i sai marsihohot do ibana tu raja na dimiahi ni Jahowa. Dung mate si Saul, mamarenta ma si Daud gabe raja.

Tingki raja si Daud, las rohana laho pajongjonghon bagas joro ni Jahowa. Alai didok Jahowa, anakna do na laho paulihon i. Jala si Salomo, anak ni si Daud ma na pajongjonghon joro i. Marjanji ma Jahowa tu si Daud, sian pinomparna do na gabe angka raja. Jala sian pinomparna ma na gabe Sipalua, manang Pinompar, na dijanjihon di porlak Eden. I ma na digoari Messias, lapatanna ”Halak na Dimiahi” Debata. Dipaboa Jahowa Messias i, raja na laho mamarenta salelenglelengna.

Las do roha ni si Daud disi, jala dipapungu ibana do godang bahan bangunan laho pajonjong bagas joro i. Dibahen ibana do godang angka ende pujipujian. Dung laho mate ibana, didok si Daud ma: ”Tondi ni Jahowa do mangkatai sian ahu jala hata sinihathonna di atas dilangku.”​—2 Samuel 23:2.

—Dibuat sian 1 Samuel; 2 Samuel; 1 Kronika; Jesaya 9:7; Mateus 21:9; Lukas 1:32; Johannes 7:42.

SONGON dia do hangoluan ni sada bangso molo rajana mangihuthon Jahowa? Tarida ma i sian pamarentaon ni si Salomo saleleng 40 taon.

Nunga dipillit si Daud hian anakna si Salomo gabe raja. Marhite parnipion, disungkun Jahowa ma aha pangidoan ni si Salomo. Dipangido si Salomo ma habisuhon dohot pangantusion, asa tigor jala marbisuk ibana manguhumi bangsona. Las roha ni Jahowa tu pangidoanna i, dilehon ma bisuk dohot roha pangantusion. Dilehon Jahowa muse hamoraon, hasangapon, dohot ganjang ni umur molo sai dioloi ibana Jahowa.

Tarbarita ma si Salomo alani habisuhonna manguhumi. Adong ma parsoalan ni dua ina, na manggulut sada posoposo. Diparentahon si Salomo ma, asa dibola posoposo i jala dilehon sambola be tu nasida. Sada ina i, dioloi do asa dibola posoposo i, alai na sada na i ndang olo. Tangkas ma diida si Salomo molo ina na marasi roha i do ina ni posoposo i. Diboto bangso i ma naung dilehon Debata tu ibana habisuhon laho manguhumi di bagasan hasintongan.

Ulaon ni si Salomo na umbalga, i ma pajongjongkon joro ni Jahowa—bagas na uli di Jerusalem, inganan parpunguan laho manomba Jahowa di Israel. Laho mambongoti bagas joro i martangiang ma si Salomo: ”Ida ma, gari langit ni langitan ndang hahaliangansa Ho, baliksa apala joro on na hupaulion on!”​—1 Rajaraja 8:27.

Tarbarita ma si Salomo sahat tu inganan ni ratu Seba sian Arab. Ro ma ratu Seba laho mangida hasangapon ni si Salomo dohot hamoraonna. Diuji ibana ma parbinotoan ni si Salomo. Longang roha ni ratu Seba marnida habisuhon ni si Salomo dohot hamoraon ni bangso Israel. Dipuji ma Jahowa ala dipillit si Salomo gabe raja ni Israel. Tutu ma, marhite pasupasu ni Jahowa, pamarentaon ni si Salomo ma na umbalga jala na umdame di Israel na jolo.

Alai, si Salomo ndang marsihohot sahat tu ujungna. Dioli do godang angka borua na manomba debata na asing. Lam leleng ditaiti ma roha ni si Salomo laho manomba debata nasida. Alani i, dibuat Jahowa ma deba harajaon i sian si Salomo. Nang pe ndang marsihohot si Salomo tu Jahowa, diingot do janjiNa tu si Daud, janji taringot harajaon.

—Dibuat sian 1 Rajaraja bindu 1 sahat tu 11; 2 Kronika bindu 1 sahat tu 9; 5 Musa 17:17.