BUKU na gumodang di Bibel punguan ni ende do. Buku on disurat hirahira 1000 taon. Buku Psalmen patuduhon panghilalaan ni jolma songon las ni roha, pujipujian, hamuliateon, dok ni roha, habot ni roha dohot hamubaon ni roha. Taboto ma molo panurat ni buku on marpos ni roha tu Debata. Ida ma tema ni angka ende on.

Jahowa Parhuaso na tumimbul, tama disomba jala dipuji. ”Ho do na margoar Jahowa, Natumimbul gumomgom liat portibi on,” disurat di Psalmen 83:19. Deba panurat ni buku Psalmen on, mamuji Jahowa alani angka tompaanNa, langit na gok bintang, hangoluan di tano on, dohot pardagingon ni jolma na mambahen longang. (Psalmen 8, 19, 139, 148) Na deba nai, pasangaphon Jahowa Debata sipalua na mangondingi halak na marsihohot tu Ibana. (Psalmen 18, 97, 138) Na asing muse, patuduhon Ibana Debata hatigoran, na parohon haluaon tu na manaon uhum na so tigor jala manguhumi halak parjahat.​—Psalmen 11, 68, 146.

Jahowa mangurupi jala mangapul roha ni halak na mangkaholongi Ibana. Lomo do ra, rohanta manjaha ende di Psalmen 23, ala di son tajaha Jahowa digombarhon songon parmahan na burju, na manogunogu, mangondingi jala na marmahan birubiruNa. Psalmen 65:3 manungguli angka sisomba Debata, na Jahowa do ”Sitangihon tangiang”. Tarapul do roha ni na mangulahon dosa tingki dijaha Psalmen 39 dohot 51, di son dipaboa hamubaon ni si Daud sian dosana na balga jala pos do rohana sesaon ni Jahowa dosana. Di Psalmen 55:23 dijujui do hita asa marpos ni roha tu Jahowa jala pasahathon arsak ni roha tu Ibana.

Jahowa padengganhon tano on marhite Harajaon Messianik. Deba sian ayat na disurat di buku Psalmen masa tu Messias. Di Psalmen 2 disurat, ripashonon ni Raja on do sude bangso na mangalo ibana. Di Psalmen 72 dipaboa, Raja on pasohothon haraparon, hajahaton jala padalanhon uhum na tigor. Di Psalmen 46:10, marhite Harajaon ni Messias, pasohotonNa ma porang. Di psalmen 37, taboto ma halak na jahat ripashononNa, alai angka parlambok roha mangolu salelenglelengna di tano on. Jala hilalaon nasida ma hadameon dohot hasonangan.

—Dibuat sian buku Psalmen.

TUTU do Jahowa Panggomgomi na marbisuk? Tutu do podaNa denggan? Tutu do molo taulahon podaNa i parohon laba tu hita? Raja Salomo na marbisuk manurat pandohan manang umpama. Umpama na disuratna on, denggan ulahonon ganup ari. Ida ma piga sian umpama i.

Marpos ni roha tu Debata. Pos ni roha do mula ni paralealeon tu Jahowa. Songon surat ni si Salomo: ”Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri. Sai Ibana ma tanda di nasa dalanmu, asa Ibana patigor angka dalanmu.” (Poda 3:5, 6) Marhaposan tu Debata, marhite manangihon jala mangulahon hataNa parohon laba tu hita. Molo taulahon songon on, mambahen las roha ni Jahowa jala boi dialusi hata ni Sibolis.​—Poda 27:11.

Marbisuk tingki marsaor dohot sude jolma. Poda na nilehon ni Jahowa tu tunggani doli, tunggani boru, dohot tu dakdanak dihaporluhon saonari. ”Dihalashon roham ma jolma ni haposoonmu!” Debata mandok tu tunggani doli jala ndang jadi tinggalhononna tunggani boruna. (Poda 5:18-20) Ina na mandapot sangap dohot pujian alani parniulaonna na denggan, tu ianakhon dohot tunggani dolina dipaboa di buku Poda. (Poda, bindu 31) Dakdanak dipodai asa mangoloi natuatuana. (Poda 6:20) Ringkot marsaor dohot dongan, ala halak na papulikhon diri holan na ringkot di ibana do dipingkiri. (Poda 18:1) Alai, marbisuk ma mamillit aleale ala mangkorhon do i tu dirinta.​—Poda 13:20; 17:17.

Marbisuk manarihon na porlu di hita. Di buku Poda on adong sipasingot tingki minum tuak, mangorom muruk, gabe parkarejo na ringgas jala burju. (Poda 6:6; 14:30; 20:1) Di buku Poda on dipaingot do muse molo tumangihon hata ni jolma sian hata ni Debata boi parohon jea. (Poda 14:12) Dijujui do asa tajaga rohanta, ala ”sian i do ruar angka mual hangoluan.”​—Poda 4:23.

Marjuta halak di portibi on mandok ngolu ni nasida lam denggan ala mangulahon angka poda on. Jala mambahen nasida manjangkon Jahowa, panggomgomi di nasida.

—Dibuat sian buku Poda.