• Raja na Burju dohot Raja na Jahat
    Bibel—Aha do Isina?
    • Raja Israel na poso

      BAGIAN 13

      Raja na Burju dohot Raja na Jahat

      Tarbagi dua bangso Israel. Margantiganti do raja di Israel, jala torop sian nasida ndang marsihohot tu Jahowa. Ujungna, dilengsehon halak Babel ma Jerusalem

      SONGON surirang ni Jahowa, tarbagi dua bangso Israel. Si Rehabeam raja ni Israel na jungkat manggantihon si Salomo. Ujungna, ditadingkon sampulu marga ni Israel ma si Rehabeam dipajongjong ma harajaon Israel di utara. Alai, dua sian marga ni Israel gabe harajaon Juda di selatan, nasida ma na marsihohot tu raja Daud dohot pinomparna.

      Harajaon na tarbagi dua on, jotjot maralo ala raja nasida ndang mangoloi Jahowa. Jala raja ni Israel di utara manjujui bangsona manomba tu angka ganaganaan. Nang pe diida nasida huaso na pinatuduhon ni panurirang si Elia dohot si Elisa—na pahehehon halak na mate—alai, sai hajahaton do diula halak Israel di utara. Dipaloas Jahowa ma halak Assur mangalengsehon nasida.

      Saabad ma umleleng jongjong harajaon Juda sian Israel alai ujungna diuhum Jahowa do nasida. Adong do raja ni Juda na manangihon panurirang asa mulak mangoloi Jahowa. Songon raja Josia na manegai pamelean tu ganaganaan jala ditogihon bangsona mangoloi patik ni Jahowa, dung i dipadenggan bagas joro. Tingki dapot nasida buku Patik ni si Musa, marsitutu ma raja Josia paulihon panombaon na sintong tu Jahowa.

      Alai, ndang diihuthon anakna dohot pinomparna si Josia. Ro ma halak Babel manaluhon Juda jala marongrong ma Jerusalem dohot bagas joro. Pangisi ni Jerusalem na mangolu ditaban ma tu Babel. Songon surirang ni Jahowa, 70 taon ma lelengna nasida tartaban. Saleleng 70 taon i, tarulang ma Jerusalem dohot Juda, paima jumpang tingkina mulak muse nasida tu Jerusalem songon naung dijanjihon.

      Alai, ndang adong be raja di Jerusalem sian pinompar ni si Daud, sahat tu na ro Sipalua na dijanjihon, i ma Messias. Angka raja na mamarenta di Jerusalem patuduhon, ndang tolap jolma pajongjongkon pamarentaon na denggan. Holan harajaon ni Messias do na boi mambahen i. I do alana didok Jahowa tu raja na parpudi di Juda: ”Tanggali ma talitalim. . . . Alai ndang masa dope on saleleng so ro dope sahalak na Hupillit manguhumi kota i. Dung i pasahatonKu ma i tu ibana.”​—Hesekiel 21:26, 27, Bibel Siganup Ari.

      —Dibuat sian 1 Rajaraja; 2 Rajaraja; 2 Kronika bindu 10 sahat tu 36; Jeremia 25:8-11.

  • Debata Mangkatai marhite Panurirang
    Bibel—Aha do Isina?
    • Panurirang pasahathon barita sian Debata

      BAGIAN 14

      Debata Mangkatai marhite Panurirang

      Angka panurirang dimiahi Jahowa laho paboahon ari panguhuman, taringot tu panombaon na sintong dohot panghirimon tu haroro ni Messias

      DI MASA ni harajaon ni Israel dohot Juda, adong baoa sapunguan na pasahathon hata ni Debata—angka panurirang. Angka baoa on togu do haporseaonna jala angka na barani laho paboahon hata ni Debata. Parrohahon ma opat judul na ringkot na dipasahat marhite angka panurirang.

      1. Hasesega ni Jerusalem. Andorang so masa i, angka panurirang ni Debata songon—si Jesaya dohot si Jeremia—paboahon sipasingot taringot hasesega ni Jerusalem jala laos tarulang ma. Tangkas do dipaboa panurirang i boasa marrimas Debata tu Jerusalem. Didok naposo ni Jahowa do nasida, hape disomba do ganaganaan jala nasida mangulahon hajahaton.​—2 Rajaraja 21:10-15; Jesaya 3:1-8, 16-26; Jeremia 2:1–3:13.

      2. Paulihon panombaon na sintong. Dung 70 taon di tano habuangan, dipalua Debata ma bangsoNa sian Babel. Mulak nasida tu tano naung tarulang jala paulihon joro ni Jahowa di Jerusalem. (Jeremia 46:27; Amos 9:13-15) Hirahira 200 taon andorang so masa i, nunga disurirangkon si Jesaya goar ni halak na manaluhon Babel—si Sirus—jala na paloashon bangso ni Debata paulihon panombaon na sintong. Dipatorang si Jesaya do songon dia isara na laho bahenon ni si Sirus manaluhon kota Babel.​—Jesaya 44:24–45:3.

      Halak Jahudi na di tano habuangan manadingkon Babel jala mulak tu Jerusalem

      3. Haroro ni Messias dohot angka na masa di ngoluna. Messias tubu di huta Betlehem. (Mika 5:2) Ibana halak na serep roha, ro ibana tu Jerusalem marsihundul di halode. (Sakaria 9:9) Halak na lambok jala na burju do ibana, alai dileai jala ndang dijangkon ibana. (Jesaya 42:1-3; 53:1, 3) Ditaon do na hansit jala dipamate. On do ujung ni Messias i? Daong, dipelehon pe dirina asa boi do manesa dosa ni torop halak. (Jesaya 53:4, 5, 9-12) Jala marhite haheheonna do asa boi on saut.

      4. Pamarentaon ni Messias tu tano on. Ndang margogo jolma pajongjongkon pamarentaon na dame tu donganna. Alai, Messias on didok ma ibana, Raja ni Hadameon. (Jesaya 9:6, 7; Jeremia 10:23) Di harajaonna, sude jolma boi mardame, jolma dohot jolma jala jolma dohot sude binatang. (Jesaya 11:3-7) Ndang adong be sahit. (Jesaya 33:24) Jala ndang adong be hamatean. (Jesaya 25:8) Di harajaon ni Messias i, paheheonna ma na mate jala mangolu di tano on.​—Daniel 12:13.

      —Dibuat sian buku Jesaya, Jeremia, Daniel, Mika dohot Sakaria.