SI DANIEL sahalak na poso, na marsihohot tu Jahowa, tartaban tu Babel andorang so hasesega ni Jerusalem. Ibana dohot donganna—ditaban sian harajaon utara di Juda—nang pe songon i, diloas do nasida mangula ulaonna. Saleleng ngoluna di Babel dipasupasu Debata do si Daniel, dipalua sian singa jala dilehon parnidaon na masa tu ari na naeng ro. Disurirangkon si Daniel do taringot Messias dohot harajaonNa.

Diboto si Daniel do andigan Messias ro. Dipaboa tu si Daniel andigan bangso ni Debata boi mangida ”Messias” na hinirim ni nasida—69 minggu taon dungkon parenta padengganhon tembok ni Jerusalem. Saminggu lelengna pitu ari; antong minggu taon i lelengna pitu taon. Parenta laho padengganhon tembok ni Jerusalem dungkon masa ni si Daniel taon 455 A.S.M. Mula ni dipungka 69 ”minggu” i, 483 taon ma lelengna sahat tu taon 29 D.M. Di parsiajaran na mangihut di buku on, taboto ma aha na masa di taon i. Diida si Daniel do muse molo Messias i diago manang dipamate laho manobus dosa.​—Daniel 9:24-26.

Messias gabe Raja di surgo. Parnidaon ni si Daniel taringot surgo, diida ma Messias songon ”anak ni jolma”, manjonok tu habangsa ni Jahowa. Dilehon Jahowa tu Ibana ”pamarentaon dohot hamuliaon dohot harajaon.” Hot do Harajaon i salelenglelengna. Dipaboa muse taringot tu harajaon ni Messias—mamarenta Raja i didongani sada punguan ni halak, na digoari ”angka na badia ni na tumimbul i.”​—Daniel 7:13, 14, 27.

Ropuhan ni Harajaon i ma nasa harajaon na di tano on. Dilehon Debata tu si Daniel pangantusion laho patorangkon nipi na mambahen marsak si Nebukadnesar. Diida raja i sada patung na mansai balga, ulu ni patung i sian mas, andorana dohot tanganna sian perak, butuhana dohot haehaena sian tombaga, bitisna sian bosi jala patna deba sian bosi deba na i sian tano liat. Madabu ma sada batu na balga sian dolokdolok manipa pat ni patung i, gabe masarsar dibahen. Dipatorang si Daniel do angka bagian ni patung i, manggombarhon angka raja na mangarajai portibi on. Parjolo Babel, i ma ulu na sian mas. Dipaboa do tu si Daniel harajaon na parpudi na mangarajai portibi on sahat tu na ro Harajaon ni Debata mamarenta. Ropuhan ni Harajaon i ma sude angka harajaon na mamarenta di tano on. Dung i, Harajaon ni Debata mamarenta salelenglelengna.​—Daniel bindu 2.

Nunga matua si Daniel tingki diida ibana lengser huta Babel. Ditaluhon Raja Sirus do Babel songon naung disurirangkon angka panurirang. Jumpang ma tingkina, halak Jahudi malua sian tano habuangan—songon naung disurirangkon, 70 taon ma lelengna tarulangkononna tano i. Diuluhon angka gubernur, angka malim, dohot angka panurirang na marsihohot, dipadenggan halak Jahudi ma Jerusalem jala dipauli ma joro ni Jahowa. Aha ma na laho masa di ujung ni 483 taon i?

—Dibuat sian buku Daniel.

DIURUPI Jahowa do halak laho mananda Messias naung dijanjihon i? I do. Taida ma na binahen ni Debata. On masa di abad paopathon, dung disurat Buku na Badia marhata Heber. Di huta Nasaret, ro surusuruan na margoar si Gabariel mandapothon si Maria, sahalak na marbaju. Dipaboa surusuruan i, patuduon ni Debata huasoNa tu ibana, marhite tondi parbadia, gabegabean ma si Maria jala manubuhon anak baoa. Anakna on ma Raja naung leleng dijanjihon jala na mamarenta salelenglelengna! Anak ni Debata sandiri do ibana, jala hangoluanna dipapinda sian surgo tu bortian ni si Maria.

Sian serep ni rohana, dioloi si Maria ma hata ni surusuruan i. Dung diboto si Josep gabegabean si Maria sian tondi parbadia, dialap ma ibana gabe ripena. Alai, songon dia ma digohi surirang na mandok Messias ro sian huta Betlehem? (Mika 5:1) Huta na daona hirahira 140 kilometer sian Nasaret.

Parenta ni kesar Rom mandok asa disensus sude jolma na di gomgomanna. Disuru rakyatna mulak pasurathon dirina tu tano hatubuanna be. Ala huta ni si Josep dohot si Maria di Betlehem, mulak ma nasida tusi. (Lukas 2:3) Dapot ma tingki ni si Maria tubutubuan, ditubuhon ma anak, jala dipeakhon ma di panggagatan. Dipaboa surusuruan ni Debata ma tu angka parmahan, molo dakdanak na tubu i, Messias manang Kristus naung dijanjihon.

Di pudian ni ari, torop ma halak manghatindakhon Jesus i do Messias naung dijanjihon. Disurirangkon si Jesaya do sahalak baoa na paradehon dalan tu Messias, i ma si Johannes pandidi. (Jesaya 40:3) Dung diida ibana Jesus, ninna ma: ”On do Birubiru ni Debata, na mamorsan dosa ni portibi on!” Dung i, laho ma deba sisean ni si Johannes mangihuthon Jesus. Sahalak sian nasida mandok: ”Nunga jumpang hami Messias i.”​—Johannes 1:29, 36, 41.

Tanda na asing muse, tingki tardidi Jesus tarbege ma soara ni Debata sian surgo. Marhite tondi parbadia dimiahi Debata ma Jesus gabe Messias jala didok: ”On do Anakku, Haholongan i; halomoan ni rohangku do Ibana.” (Mateus 3:16, 17) Messias naung leleng dijanjihon i nunga ro!

Andigan ma masa i? Taon 29 D.M. i ma pa-483 taonhon songon na sinurirangkon ni si Daniel. On ma tanda na patuduhon molo Jesus, Messias manang Kristus. Aha ma barita na dipaboa ibana saleleng di tano on?

—Dibuat sian Mateus bindu 1 sahat tu 3; Markus bindu 1; Lukas bindu 2; Johannes bindu 1.