AHA do ulaon ni Jesus di tano on? Ibana sandiri mandok: ”Ingkon dohot do tu angka huta na asing hubaritahon Harajaon ni Debata, ai ala ni i do Ahu disuru.” (Lukas 4:43) Parrohahon ma opat na diajarhon ni Jesus taringot Harajaon, pamusatan ni ulaon na gabe tema ni pangajarionna.

1. Jesus na laho gabe Raja. Dipaboa Jesus do tangkas ibana Messias na disurirangkon i. (Johannes 4:25, 26) Ibana do Raja na niida ni si Daniel di parnidaonna i. Dipaboa Jesus tu angka apostel, rap hundul do ibana dohot nasida di ”habangsa hasangaponna i.” (Mateus 19:28) Digoari ma punguan on ”punguan na metmet,” alai adong dope birubiru na asing na so sian punguan on.​—Lukas 12:32; Johannes 10:16.

2. Harajaon ni Debata pasauthon hatigoran. Jesus patuduhon Harajaon ni Debata do pasohon hageduhon na masa parjolo sahali. Jala pabadiahon goar ni Debata Jahowa sian sude gabus ni Sibolis di porlak Eden. (Mateus 6:9, 10) Sude jolma diajari Jesus, baoa dohot borua, na mora dohot na pogos, dos do dibahen tu ganup jolma. Nang pe halak Jahudi na ingkon ajaranna alai diurupi do halak Samaria dohot halak na asing. Ndang songon angka na manguluhon parugamaon di tingki i, ndang dipaimbar ibana jolma.

3. Harajaon ni Debata ndang sian portibi on. Jesus mangolu di tingki godang hasusaan. Bangsona dipatunduk tu bangso na asing. Alai, tingki torop halak mambahen ibana raja laho do ibana sumurut sian nasida. (Johannes 6:14, 15) Dipaboa ibana tu sahalak parpolitik: ”Ndang sian portibi on harajaonku.” (Johannes 18:36) Didok tu na mangihuthon ibana: ”Ndang sian portibi on hamu.” (Johannes 15:19) Jala diorai do nasida mamangke podang laho paluahon Jesus sian musuna.​—Mateus 26:51, 52.

4. Pamarentaon ni Kristus mardasor tu holong. Didok Jesus pasonangonna na loja dohot na sorat. (Mateus 11:28-30) Diulahon do songon na dihatahonna. Dilehon do poda asa unang holsoan, mardame tu dongan jolma, unang holongan di hepeng jala asa martua. (Mateus bindu 5-7) Ala parholong do ibana, las roha ni sude jolma manjonoki ibana. Halak na manaon uhum na so tigor pe, ro tu Jesus, pos roha nasida ala diboto asi do rohana jala sarihonon ni Jesus do nasida. Tarida ma sian on Jesus do Panggomgomi na denggan di ari na naeng ro!

Adong do isara na asing dipangke Jesus laho mangajar jolma taringot Harajaon ni Debata. Dibahen ibana do godang tanda halongangan. Boasa diulahon ibana sisongon i? Taida ma.

—Dibuat sian angka buku Mateus, Markus, Lukas, dohot Johannes.

DILEHON Debata huaso tu Jesus mangulahon ulaon na so boi diulahon jolma. Dibahen Jesus godang tanda halongangan—jala jotjot diulahon i di jolo ni godang halak. Tanda halongangan on patuduhon marhuaso do Jesus mangalo musuna jala pasohothon abatabat na so hea tolap dipasohot jolma. Parrohahon ma angka tudosan on.

Paradehon sipanganon dohot siinumon. Halongangan na parjolo, dibahen aek gabe anggur. Dua hali ibana mangalehon marribu halak mangan holan marhite saotik roti dohot dengke. Gariada lobi dope sipanganon i.

Pamalumhon na marsahit. Jesus ”pamalum nasa sahit dohot na niae ni halak na disini.” (Mateus 4:23) Na mapitung dibahen marnida, na nengel marbinege, dipamalum na marsahit kusta, na solpoton, na pangpang. Ndang adong sahit na so boi dipamalum.

Pasohon Habahaba. Tingki marparau Jesus dohot angka siseanna manaripari Laut Galilea, masa ma habahaba. Mabiar ma angka siseanna. Ditatap Jesus ma alogo i jala didok: ”Sip ma! So!” laos so ma alogo i. (Markus 4:37-39) Di tingki na asing, mardalan ibana di ginjang ni aek tingki gogo alogo.​—Mateus 14:24-33.

Huaso Palaohon Tondi na Jahat. Gumogo do tondi na jahat sian jolma. Torop halak ndang boi malua sian huaso ni musu ni Debata on. Alai, di godang angka na masa, dipalua Jesus do halak sian huaso ni tondi na jahat, disuru ruar tondi i sian nasida. Ndang mabiar Jesus tu angka tondi i. Laos tondi i do na mabiar tu ibana ala diboto na gumogo do huaso ni Jesus sian nasida.

Manaluhon hamatean. Hamatean boi ma didok ”musu na parpudi,” hamatean i ma musu na so boi ditaluhon jolma. (1 Korint 15:26) Alai, dipahehe Jesus do halak na mate. Dipahehe do sahalak dolidoli dohot sahalak anak boru. Dipahehe muse si Lasarus alealena, di jolo ni na torop nang pe naung opat ari mate! Diparhatutu musu ni Jesus do na dibahen ibana halongangan i.​—Johannes 11:38-48; 12:9-11.

Boasa dibahen Jesus tanda halongangan on? Nang pe mate halak na dipahehena i, alai marlaba do tanda halongangan na binahen ni Jesus sahat tu saonari. On patuduhon, sude hata ni panurirang taringot pamarentaon ni Jesus tutu do masa. Ndang hurang be pos ni rohanta tu Raja na pinillit ni Debata laho pasohothon haraparon, angka sahit, habahaba, tondi na jahat, dohot hamatean. Nunga dipatuduhon na dilehon Debata godang huaso tu ibana.

—Dibuat sian buku Mateus, Markus, Lukas, dohot Johannes.