DI DOLOK Jetun, inganan na boi manatap tu bagas joro di Jerusalem, didapothon opat sisean ni Jesus ma ibana jala dipatangkas angka na didok ni Jesus. Dipaboa Jesus do, bagas joro na di Jerusalem laho lengsehononna. Andorang so i dope, nunga dipaboa tu nasida taringot ”ajal ni hasiangan on.” (Mateus 13:40, 49) Disungkun angka sisean i ma: ”Dia ma tanda ni harorom dohot ajal ni hasiangan on?”​—Mateus 24:3.

Dipaboa Jesus do na masa andorang so dilengsehon Jerusalem. Alai surirang on, digohi dope sahat tu tingkinta saonari. Na masa di portibi on, gabe tanda do di hita. Tanda na patuduhon haroro ni Jesus jala naung jongjong ibana gabe raja di surgo. Tanda i patuduhon, Harajaon on satongkinnari, pasohothon hajahaton jala parohon hadameon tu jolma. Na masa naung disurirangkon on, gabe tanda ariari parpudi ni hasiangan on i ma—ruhut ni ugamo, ruhut ni politik, dohot sosial na adong saonari—dung i, dipungka ma ruhut na imbaru.

Dung gabe Raja Jesus di surgo, masa ma porang marluatluat, haraparon, lalo, dohot angka ragam ni sahit. Angka siose uhum lam godang. Dibaritahon barita na uli taringot Harajaon ni Debata di liat portibi on. Saluhutna on dipaujung di ”haporsuhon” bolon na so hea masa di tano on.​—Mateus 24:21.

Sian dia do diboto siihuthon Jesus naung jonok haporsuhon bolon i? Jesus mandok: ”Sian hau ara i ma guruhon hamu tudosanna.” (Mateus 24:32) Molo tubu pusuk ni hau ara di angka dangkana, i ma tandana jonok nama ari logo. Songon i ma, molo rap masa saluhut angka na sinurirangkon ni Jesus, i ma tanda naung jonok ari i. Holan Ama i do na mamboto andigan masa hasusaan bolon i. I do alana, didok Jesus tu angka siseanna: ”Dungo ma hamu, ai ndang diboto hamu manang sadihari tingkina i!”​—Markus 13:33.

—Dibuat sian Mateus bindu 24 dohot 25; Markus bindu 13; Lukas bindu 21.

DUNG tolu satonga taon Jesus marbarita, diboto ma naung otik tingkina. Nunga martahi sintua ni ugamo Jahudi mambunu Jesus. Alai, mabiar nasida gabe gaor na torop i ala godang do porsea Jesus i panurirang. Dielaela Sibolis ma si Judas Iskariot—laho manjehehon Jesus. Dilehon sintua ni ugamo Jahudi hepeng 30 perak asa dijehehon Jesus.

Marpungu ma Jesus dohot angka siseanna mangulahon Paska. Dung laho si Judas, dibahen Jesus ma ulaon na baru, Borngin Parningotan ni Tuan. Dibuat ma roti, ditangianghon, diponggoli ma jala dilehon tu siseanna na 11 i. ”Dagingku do on, na nilehon humongkop hamu,” ninna ibana. ”Ula hamu ma i bahen parningotan di Ahu.” Dibahen muse songon i tu panginuman i, jala didok: ”Ia panginuman on, padan na imbaru do i, marhitehite mudarhu.”​—Lukas 22:19, 20.

Di borngin i, dipaboa Jesus ma sada parenta na baru—asa masihaholongan nasida. Didok ibana: ”Apala sian on ma tanda on ni halak saluhutna, hamu siseanku: Molo masihaholongan hamu.” (Johannes 13:34, 35) Dipapos ma roha nasida asa unang pola marsak. Ditangiangkon Jesus nasida dohot angka na ringkot di nasida. Dung i, marende jala borhat ma nasida tu porlak Getsemane.

Dung sahat di Getsemane, martangiang ma Jesus. Dung i, ro ma sarombongan tentara, malim, dohot angka na asing laho manangkup ibana. Ro ma si Judas jonok tu lambung ni Jesus laos diumma asa ditanda nasida. Tingki ditangkup Jesus, maporus ma sude sisean i.

Di jolo ni pangadilan ugamo Jahudi, dipaboa Jesus ma ibana Anak ni Debata. Alai, didok ma ibana marsala ala dileai Debata jala patut diuhum. Dung i, diboan ma Jesus tu si Latus Gubernur ni Rom. Nang pe ndang dapotna sala ni Jesus, dipasahat ibana do Jesus tu na torop i na mangidohon asa dibunu ibana.

Diboan ma Jesus tu Dolok Golgata, dipakuhon ma tu sada tiang. Di tonga ari tompu ma holom luat i. Jala ndang leleng mate ma Jesus, humutur do tano alani lalo na gogo. Dipeakhon ma bangkena tu liang na di dolok batu. Marsogotna, ro ma malim manegel kuburan i, dibahen ma panjaga ni kuburan i. Antong, tongtong do Jesus peak di kuburan i? Daong. Laho masa ma tanda halongangan bolon.

—Dibuat sian Mateus bindu 26 dohot 27; Markus bindu 14 dohot 15; Lukas bindu 22 dohot 23; Johannes bindu 12 sahat tu 19.