DUNG mate Jesus, diida angka siseanna borua ma naung magulang batu panutup ni kuburan i. Jala kuburan i pe nunga kosong!

Alai, dua surusuruan jongjong disi. Sada surusuruan mandok: ’Dilului hamu do Jesus na sian Nasaret. Nunga hehe ibana.’ (Markus 16:6) Hatop ma angka borua i marlojong paboahon tu angka apostel. Di dalan dope nasida, nunga jumpang dohot Jesus. ”Unang hamu mabiar!” ninna ibana. ”Laho ma hamu mandokkon angka anggingku tu Galilea, disi ma idaonnasida Ahu.”​—Mateus 28:10.

Laos di ari i, mardalan ma dua siseanna sian Jerusalem tu huta Emmaus. Adong ma na ro mandapothon jala manungkun nasida. Dialusi nasida ma, Jesus do na ni hataanna. Hape, Jesus do na manungkun i, alai ndang ditanda nasida. Dipatorang ma taringot Messias na tarsurat di Buku na Badia. Jala Jesus ma na manggohi sude surirang taringot Messias.a Satongkin i, diboto sisean i ma Jesus do i, naung dipahehe mardaging tondi alai ndang tarida be ibana.

Mulak ma sisean na dua i tu Jerusalem. Jumpang nasida ma angka sisean na asing marpungu di sada inganan. Tingki dipaboa na jumpang nasida dohot Jesus di pardalanan, dipatuduhon Jesus ma dirina tu nasida. Longang ma angka siseanna i jala mabiar ala ndang porsea nasida! ”Boasa songon na ganggu rohamuna?” ninna Jesus. ”Songon i do tarsurat hian, manaon na porsuk Kristus i jala hehe sian na mate di ari patoluhon.”​—Lukas 24:38, 46.

Dipatuduhon Jesus do dirina tu angka siseanna. Dipatudu ma tu lobi 500 halak! Jala di tingki i ma, diparentahon tu siseanna asa mangulahon ulaon na ringkot on: ”Laho ma hamu, podai hamu ma saluhut bangso, . . . laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!”​—Mateus 28:19, 20.

Tingki pajumpang ibana parpudi sahali dohot apostel na 11 i, dijanjihon Jesus ma: ”Alai jaloonmuna do hagogoon ni tondi parbadia na songgop tu hamu, gabe sitindangingku ma hamu . . . sahat ro di ujung ni tano on.” (Ulaon ni Apostel 1:8) Dung i, tarhindat ma Jesus jala diholipi ombun manaek ibana tu surgo.

—Dibuat sian Mateus bindu 28; Markus bindu 16; Lukas bindu 24; Johannes bindu 20 dohot 21; 1 Korint 15:5, 6.

SAMPULU ari dung manaek Jesus tu surgo, marpungu ma siseanna hirahira 120 halak di Jerusalem tingki ari Pentakosta, 33 D.M. Tompu ma tarbege soara na gogo songon alogo. Gabe boi ma sisean i mangkatai di hata na asing. Aha do na mangula di pudi ni sude na masa on? Dilehon Jahowa pasupasu marhite tondi parbadia.

Di tingki i, godang halak marpungu na ro sian saluhut bangso laho tu ulaon Pentakosta i. Longang ma nasida ala dibege angka sisean i mangkatai tu hata nasida sandiri. Dipaboa si Petrus ma surirang ni panurirang Joel na mandok: ”usehonon” ni Jahowa tondiNa, asa boi nasida mambahen tanda halongangan. (Joel 2:28, 29, Bibel Siganup Ari) Tingki tondi parbadia songgop tu nasida, on ma patuduhon: Dipillit Debata bangsoNa na baru, i ma huria Kristen. Saonari, asa gabe bangso ni Debata ingkon taihuthon do Jesus.

Dung i, masa ma hasusaan tu angka sisean, ditangkup jala dihurung ma nasida. Alai, dipalua surusuruan do nasida jala disuru asa tongtong marbarita. Diulahon nasida ma songon i. Diajarhon nasida ma barita na uli taringot Jesus. Alai, diorai sintua ni ugamo Jahudi ma nasida asa unang marbarita. Dialusi angka apostel i ma: ”Ingkon oloan do iba di Debata asa di jolma!”​—Ulaon ni Apostel 5:28, 29.

Lam posi ma hasusaan i dibahen tu nasida. Didangguri do si Stepanus sampe mate. Diida—si Saulus na sian Tarsus—do si Stepanus didangguri jala las do rohana disi. Laho ma ibana tu Damaskus manangkup angka sisean ni Jesus. Di pardalanan, tompu ma ro sinondang sian langit mambahen ibana mapitung, jala dibege ibana ma soara na mandok: ”Saulus, Saulus! Boasa lelean mu Ahu?” Dialusi si Saulus ma: Ise do ho? ninna soara i mangalusi: ”Jesus do Ahu.”​—Ulaon ni Apostel 9:3-5.

Dung tolu ari, disuru Jesus ma si Ananias asa dipamalum parnidaan ni si Saulus. Dung tardidi si Saulus laho ma ibana mambaritahon barita taringot Jesus di bagasan habaranion. Gabe sahalak apostel ma si Saulus jala parbarita na uli na ringgas.

Dibaritahon sisean ni Jesus ma barita taringot Harajaon ni Debata tu halak Jahudi dohot Samaria. Ro ma surusuruan tu si Kornelius, tentara ni Rom na manghabiari Debata, disuru ibana laho manjou si Petrus. Dibaritahon si Petrus ma dohot donganna barita na uli tu si Kornelius dohot tu sude sisolhotna. Tingki mangkatai dope si Petrus, songgop ma tondi Parbadia tu si Kornelius dohot tu sisolhotna jala tardidi ma nasida marhite goar ni Jesus. Saonari, bungka ma dalan tu sude bangso laho mandapot hangoluan salelenglelengna. Laos rade ma Huria Kristen mambaritahon barita na uli di sude inganan.

—Dibuat sian Ulaon ni Apostel 1:1–11:21.