DUNG gabe Kristen si Paulus, parbarita Harajaon ni Debata ma ibana—godang do hasusaan na ro tu ibana. Laho ma Apostel on tu angka luat na dao, pararathon barita na uli taringot Harajaon ni Debata.

Di Listra do parjolo sahali si Paulus marbarita na uli, adong ma disi dipamalum ibana sahalak baoa na pangpang. Ro ma torop halak mamboan pelean huhut marsomba tu si Paulus dohot si Barnabas jala ndang taroraan nasida. Ala ni halak Jahudi na marsogo ni roha tu si Paulus gabe didangguri na torop i ma ibana, jala disarat tu ruar ni kota, laos ditadingkon ala dirimpu naung mate. Alai, mulak do ibana tu kota i, laho patoguhon haporseaon ni angka siihuthon Jesus.

Tubu ma parsoalan di halak Jahudi naung Kristen, mandok ingkon ihuthonon ni halak Kristen na so Jahudi do patik ni si Musa. Dipasahat si Paulus ma parsoalan on tu angka apostel dohot sintua di Jerusalem. Dung disulingkiti surat na Badia jala marhite pangurupion ni tondi parbadia, ditongos ma surat tu sude huria huhut dilehon sipasingot asa padaohon diri sian ganaganaan, sian mudar, sian binatang na mate so sineat dohot parmainanon. Parenta on ma na ”ringkot” diulahon, ndang na ingkon mangihuthon patik ni si Musa nasida.​—Ulaon ni Apostel 15:28, 29.

Tu Berea do pardalanan ni si Paulus na paduahon marbarita, Junani ma i saonari. Dijangkon halak Jahudi na disi do si Paulus di bagasan las ni roha, disulingkiti nasida do hata ni Debata ganup ari laho patangkashon hata na diajarhon ni si Paulus. Adong ma muse hasusaan di Berea, laho ma ibana sian i tu huta Aten. Dipatuduhon si Paulus do isara marbarita mamangke bisuk tu halak Aten na gabe sitiruon saonari.

Dung sian Aten, laho ma si Paulus tu Jerusalem. Tingki laho ibana tu bagas joro, marsangkap do halak Jahudi laho mamunu ibana. Asa malua ibana sian Gubernur Festus na naeng pasahathon ibana tu halak Jahudi, dipangido ma asa diboan ibana tu Rom tu jolo ni Kesar. Didok ibana ma: ”Raja Kesar i do pangondianku!” dialusi si Festus: ”Tu raja Kesar ma ho borhat!”​—Ulaon ni Apostel 25:11, 12.

Markapal do si Paulus diboan tu Italia laho diuhumi. Ala harom kapalna di pardalanan, so ma nasida di pulo Malta. Dung sahat di Rom disewa ibana ma jabu ingananna. Nang pe dijaga tentara ni Rom, tongtong do dipasahat ibana barita na uli tu halak na ro mangida ibana.

—Dibuat sian Ulaon ni Apostel 11:22–28:31.

HURIA Kristen na baru jongjong manggohi sangkap ni Jahowa. Alai godang do hasusaan na ro tu nasida. Marsihohot do nasida tingki ro hasusaan sian luar ni huria manang sian bagas ni huria i? Buku na Badia na disurat marhata Junani, marisi 21 surat taringot sipasingot dohot na patoguhon haporseaon.

Sampulu opat sian angka surat i—i ma buku Rom sahat tu buku Heber—disurat apostel Paulus. Digoari ma hombar tu na manjalo—boi do goar ni jolma manang goar ni huria. Parrohahon ma angka hatorangan na diulas di surat ni si Paulus.

Sipasingot taringot pangalaho. Angka na mangulahon parmainanon, pangalangkup, dohot angka dosa na asing, ndang manean Harajaon ni Debata. (Galatia 5:19-21; 1 Korint 6:9-11) Ingkon marsada do saluhut sisomba Debata nang pe nasida ro sian sude bangso. (Rom 2:11; Epesus 4:1-6) Marlas ni roha ma mangurupi dongan sahaporseaon. (2 Korint 9:7) ”Sai martangiang ma hamu,” didok si Paulus. Dijujui do angka sisomba Jahowa laho pasahathon nasa na di rohana marhite tangiang. (1 Tessalonik 5:17 Bibel Siganup Ari; 2 Tessalonik 3:1; Pilippi 4:6, 7) Asa ditangihon Debata tangiangta, martangiang ma hita di bagasan haporseaon.​—Heber 11:6.

Aha do na mambahen parsaripeon asa boi tongtong marlas ni roha? Ingkon dihaholongi tunggani doli ma tunggani boruna songon dirina sandiri. Ingkon patuduhonon ni tunggani boru unduk na sian roha maradophon tunggani dolina. Ingkon oloan ni dakdanak natuatuana ala on do na dihalomohon ni Debata. Ingkon togutoguon, ajaran ni natuatua do ianakhonna di bagasan holong mamangke prinsip ni Debata.​—Epesus 5:22–6:4; Kolosse 3:18-21.

Pangantusion tu sangkap ni Debata. Marlaba do patik ni si Musa laho mangondingi dohot manogunogu halak Israel sahat tu na ro Kristus. (Galatia 3:24) Alai, ndang sude patik ni si Musa na ingkon siulahonon ni halak Kristen. Marhite surat na ditongos ni si Paulus tu halak Heber—manang Jahudi naung Kristen—dipatorang si Paulus do tu nasida patik dohot sangkap ni Debata naung digohi marhite Kristus. Godang na diulahon mangihuthon patik ni si Musa manogu nasida tu Kristus. Umpamana, pelean binatang manggombarhon tobusan ni Jesus, na boi paluahon jolma sian dosa. (Heber 10:1-4) Dung mate Jesus, salpu ma padan na parjolo i.​—Kolosse 2:13-17; Heber 8:13.

Tudutudu laho manguluhon huria. Angka baoa na mangaradoti huria ingkon marparange na denggan jala mangihuthon tudutudu na disurat di Bibel. (1 Timoteus 3:1-10, 12, 13; Titus 1:5-9) Ingkon marpungu do angka sisomba Jahowa dohot angka dongan sahaporseaon asa masipajujuan. (Heber 10:24, 25) Sude parpunguan ingkon parohon na denggan jala parohon pangajarion na uli.​—1 Korint 14:26, 31.

Di Rom do si Paulus tingki ditongos surat na paduahon tu si Timoteus; di hurungan do ibana paima adong haputusan sian panguhum. Ndang piga na ro mangida ibana tusi. Diboto si Paulus do na laho masa tu ibana. Didok ibana: ”Nunga hupasidung paraloan na denggan i, nunga hupaujung parlojongonki; ramot hubahen haporseaon i.” (2 Timoteus 4:7) Dungkon i do ra, mate martir si Paulus. Alai, angka surat ni apostel on manogunogu angka na marsihohot tu Jahowa sahat tu sadarion.

—Dibuat sian Rom; 1 Korint; 2 Korint; Galatia; Epesus; Pilippi; Kolosse; 1 dohot 2 Tessalonik; 1 dohot 2 Timoteus; Titus; Pilemon; Heber.