Referensi tu Parpunguan Hangoluan dohot Pangkobasion Na Laho Diparsiajari
4-10 JUNI
ARTA NA ARGA NA ADONG DI BIBEL | MARKUS 15-16
“Jesus Manggohi Surirang”
Hatorangan sian nwtsty-E taringot Mrk 15:24, 29
dibagi-bagi ma abitna: Adong do hatorangan di buku Johannes na so dipaboa di buku Mateus, Markus, dohot Lukas. Umpamana di Johannes 19:23, 24. Dipaboa disi taringot abit luar ni Jesus. Dibahen nasida ma undi, “dibagi opat ma i, sabagian be ma ganup tentara i”. Dung i, dibuat ma muse abit na asing jala dibahen ma undi. Alana, ndang olo nasida mangaribahi abitna i. Sasintongna, na diulahon nasida gabe manggohi surirang di Psalmen 22:19. Jadi, somal do di tentara ni Rom do mambahen undi taringot abit ni parjahat andorang so diuhum mate. Dibuat nasida ma abitna dohot artana laho pailahon parjahat i.
mangupir: Somalna on diulahon huhut manginsahi halak. Ndang diboto na mangulahon i, hape na manggohi surirang di Psalmen 22:8 do nasida.
Hatorangan sian nwtsty-E taringot Mrk 15:43
Josep: Marragam do hatorangan ni angka panurat buku Injil taringot si Josep. Umpamana, si Mateus sahalak pemungut pajak mandok, si Josep i “sahalak baoa na mora”. Molo si Markus, na jotjot manurat tu halak Kristen di Rom mandok, si Josep i “sahalak anggota ni Pengadilan Agama Jahudi” na mangkirim tu Harajaon ni Debata. Molo si Lukas mandok, “burju do ibana jala diulahon na sintong”, na so mangihuthon Sanhedrin laho mangalo Jesus. Alai si Johannes mandok, “Sisean ni Jesus do [si Josep] alai ndang dipaboa ibana tu halak na asing, ala mabiar do ibana tu halak Jahudi.”—Mat 27:57-60; Mrk 15:43-46; Luk 23:50-53; Joh 19:38-42.
Mangalului Arta na Adong di Bibel
Hatorangan sian nwtsty-E taringot Mrk 15:25
hira-hira jam sia manogot: Manang, jam patoluhon. Songon na imbar do hatorangan on tu na disurat di Johannes 19:14-16, na mandok, “hira-hira jam 12 arian” tingki disuru si Latus Jesus asa diuhum mate. Nang pe ndang sude dipatorang taringot imbar ni hatorangan on di Bibel, alai adong na ingkon taboto. Pas do sude jom na dipaboa di buku Injil taringot tingki ari parpudi Jesus di tano on. Sude buku Injil on paboahon, angka malim dohot angka sintua pajumpang dung bonom mata ni ari. Dung i, diboan nasida ma Jesus tu si Latus Gubernur i. (Mat 27:1, 2; Mrk 15:1; Luk 22:66–23:1; Joh 18:28) Si Mateus, si Markus, dohot si Lukas paboahon, dung dipakkuhon Jesus, gabe holom ma inganan i mulai “jam 12 arian . . . sahat tu jam tolu botari”. (Mat 27:45, 46; Mrk 15:33, 34; Luk 23:44) Tingki naeng diuhum Jesus, tong do dilinsingi ibana. Piga-piga halak na dilinsingi i boi do mate andorang so dipakkuhon. I do na mambahen ndang tolap Jesus mamboan hau partinaonan i. Gabe disuru ma halak na asing mamboan i. (Luk 23:26; Joh 19:17) Adong na mandok, Jesus mulai diuhum tingki dilinsingi, ndang pintor dipakkuhon. Hombar do hatorangan on tu Mateus 27:26 dohot Markus 15:15 na paboahon, Jesus dilinsingi dohot dipakkuhon di tingki na sarupa. Alai, marasing-asing do pandapot ni halak taringot andigan Jesus mulai diuhum. Sian hatorangan on, boi ma taboto boasa longang roha ni si Latus ala pintor mate Jesus dung dipakkuhon. (Mrk 15:44) Asing ni i, dipaimbar panurat ni Bibel do tingki gabe opat bagian, ganup bagian i lelengna tolu jom sahali jala sae ma di tingki borngin. Ala songon i do dibahen nasida, i do na mambahen jotjot tajaha di Bibel taringot jam patoluhon, paonomhon, dohot pasiahon, na dietong hira-hira mulai jam onom manogot. (Mat 20:1-5; Joh 4:6; Ul 2:15; 3:1; 10:3, 9, 30) Jala, ndang adong dope di tingki i jam na patuduhon tingki na pas. I do alana jotjot hata “hira-hira” dipangke laho manontuhon tingki, songon na disurat di Johannes 19:14. (Mat 27:46; Luk 23:44; Joh 4:6; Ul 10:3, 9) Sian on taboto, si Markus paboahon taringot Jesus mulai tingki dilinsingi jala dipakkuhon. Alai si Johannes holan paboahon taringot Jesus tingki dipakkuhon. Jadi tingki paboahon taringot on, diihuthon nasida do tingki na dietong tolu jom sahali. Alai si Johannes mamangke hata “hira-hira” laho paboahon taringot i. Jadi, i do ra na mambahen boasa songon na marasing-asing hatorangan ni nasida. Sasintongna, ala nunga salpu marpulu taon tingki disurat si Johannes bukuna, on patuduhon ndang ditiru si Johannes na disurat si Markus.
Hatorangan sian nwtsty-E taringot Mrk 16:8
ai mabiar do nasida: Molo diida manuskrip na adong saonari taringot panutup ni buku Markus, holan 8 ayat do na adong di buku i. Hape adong na mandok, ndang holan 8 ayat di buku i, adong do sambungan ni ayat i. Alai molo taida sian cara ni si Markus manurat, ndang dihaporluhon be hatorangan na asing. Jala angka pakar di abad paopathon na margoar si Jerome dohot si Eusebius paboahon, hata “ai mabiar do nasida” adong di manuskrip na leleng.
Godang do manuskrip Junani dohot terjemahan na asing na manambai sambungan ni ayat 8. Ditambai nasida do 12 ayat di Kodeks Aleksandrinus, Kodeks Efraemi, dohot Kodeks Bezae sian abad palimahon masehi. Jala adong do i dibahen di Vulgata Latin, di Siria Cureton, dohot di Pesyita Siria. Alai ndang adong hatorangan i di dua manuskrip Junani sian abad paopathon, di Kodeks Sinaitikus dohot Kodeks Vatikanus, manang di Kodeks Siria Sinaitikus sian abad paopathon manang palimahon masehi. Jala ndang adong disurat di manuskrip buku Markus na leleng, i ma Sahidic Coptic. Asing ni i, holan 8 ayat do di manuskrip buku Markus na leleng di bahasa Armenia dohot Georgia.
Di pudian ni ari, angka manuskrip Junani dohot terjemahan na asing manambai panutup na jempek (i ma piga-piga kalimat tu Markus bindu 16). Asing ni i Kodeks Regius sian abad na paualuhon masehi, manambai dua panutup. Alai panutup na jempek do na parjolo dipamasuk. Andorang so panutup i dibahen nasida do hatorangan na mandok, angka panutup i dipangke holan di piga-piga terjemahan.
11-17 JUNI
ARTA NA ARGA NA ADONG DI BIBEL | LUKAS 1
“Tiru ma Serep ni Roha ni si Maria”
”Naposo ni Tuhan I do Ahu”
12 Alus ni si Maria tu surusuruan i patuduhon serep ni roha dohot pangoloionna. Ninna ibana do, ”Naposo ni Tuhan i do ahu. Sai saut ma tu ahu songon na nidokmi!” (Luk. 1:38) Dipatudos si Maria do ibana songon sahalak naposo boruboru. Naposo borua manang hatoban borua do na umlea sian sude hatoban, jala saguru di tuanna do hangoluanna. Songon i ma pangkilalaan ni si Maria tu Jahowa. Pos do roha ni si Maria, ondingan ni Jahowa ibana. Lehonon ni Jahowa do pasupasu jala urupanNa do ibana mangulahon na pinangidoNa.—Ps. 18:26.
“Naposo ni Tuhan I do Ahu”
15 Dung i mangkatai ma si Maria, jala disurat do hatana on di Bibel. (Jaha Lukas 1:46-55.) On ma hata ni si Maria na gumodang dipaboa di Bibel, jala boi ma tatanda ibana sian i. Dipuji ibana do Jahowa alani hak na sumurung na jinalona, gabe ina ni Messias. Togu ni haporseaonna tu Jahowa tarida do tingki didok, na dipatutoru Jahowa do siginjang roha, alai diurupi do halak na pogos na serep marroha. Tarida ma muse na bagas pangantusion ni si Maria. Adong hirahira 20 hali dienet ibana ayat sian Padan na Robi!
16 Nang pe diboto si Maria jala diantusi ibana godang Hata ni Debata, alai dipatuduhon do serep ni roha. Tingki mangalehon hatorangan, ndang diihuthon ibana pangantusionna sandiri, alai dienet ibana do angka ayat ni Bibel. Songon si Maria, Jesus pe serep do rohana. Didok ibana, “Anggo podangku, ndada sian Ahu sandiri, sian na marsuru Ahu do.” (Joh. 7:16) Alani i, tasungkun ma dirinta, ‘Hupatudu do pangargaion tu Bibel? Manang, huihuthon do pangantusionku sandiri tingki patorangkon isi ni Bibel?’
Mangalului Arta na Adong di Bibel
Hatorangan sian nwtsty-E taringot Luk 1:69
sipalua na marhuaso: Manang “tanduk haluaon”. Di Bibel, tanduk ni binatang somalna manggombarhon huaso, haluaon, dohot hamonangan. (1 Sam 2:1; Ps 75:5, 6, 11; 148:14) Tanduk on boi do manggombarhon pamarentaon dohot aturan na denggan manang na jahat. Jala tingki monang di parporangan, ditiup do tanduk i. (5 Mus 33:17; Dan 7:24; 8:2-10, 20-24) Asing ni i, hata “tanduk haluaon” manggombarhon Messias na marhuaso laho paluahon.
Hatorangan sian nwtsty-E taringot Luk 1:76
mardalan ma ho di jolo ni Jahowa: Si Johannes Pandidi ‘mardalan di jolo ni Jahowa’. Lapatanna, ibana ma na gabe pamungka dalan tu Jesus, na disuru Bapana jala ro di bagasan goar ni Bapana.—Joh 5:43; 8:29; ida hatorangan taringot Jahowa di ayat on.
18-24 JUNI
ARTA NA ARGA NA ADONG DI BIBEL | LUKAS 2-3
“Hamu Angka na Poso—Togu do Parale-aleonmuna tu Jahowa?”
Hatorangan sian nwtsty-E taringot Luk 2:41
somal do natua-tuana: Di patik ni si Musa, ndang diloas borua ro tu pesta Paska. Alai, nunga somal si Maria mandongani si Josep tu pesta Paska di Jerusalem ganup taon. (2 Mus 23:17; 34:23) Jala, dao ni pardalanan ni nasida dohot keluargana adong 300 kilometer.
Hatorangan sian nwtsty-E taringot Luk 2:46, 47
manungkuni nasida: Longang do roha ni na manangihon Jesus. Alana sungkun-sungkun ni Jesus ndang songon sungkun-sungkun ni sahalak dakdanak. (Luk 2:47) Hata Junani “manungkuni”, boi do lapatanna songon manungkun tingki di pengadilan. (Mat 27:11; Mrk 14:60, 61; 15:2, 4; Ul 5:27) Sejarawan mandok, somal do angka pamimpin agama di bagas joro nang pe nunga sidung paska i. Diajari do angka halak di sada inganan di bagas joro i. Ro ma angka halak hundul tu jonok ni nasida laho manangihon jala manungkuni nasida.
longang do sude: Di ayat on, hata Junani “longang”, boi do lapatanna songon tarhatotong manang ngongong.
Hatorangan sian nwtsty-E taringot Luk 2:51, 52
tongtong do dioloi: Manang “unduk”. Di ayat on, hata Junani “unduk” patuduhon, pintor dioloi Jesus do natua-tuana asa mulak nasida dungkon sae Jesus mangkata-hatai dohot angka guru i. Imbar do cara ni Jesus mangoloi sian cara ni dakdanak na asing. Jala, na mangihuthon sude Patik ni si Musa do ibana disi.—2 Mus 20:12; Gal 4:4.
Mangalului Arta na Adong di Bibel
Hatorangan sian nwtsty-E taringot Luk 2:14
dame ma di tano on di tonga-tonga ni jolma na hinalomohon ni rohana: Piga-piga manuskrip paboahon molo ayat on boi do dibahen gabe “dame di tano on, dihalomohon Debata ma angka jolma”. Dibahen do hata on di piga-piga terjemahan ni Bibel. Alai, umtangkas do hatorangan sian manuskrip na dipangke di Terjemahan Dunia Baru. Hata ni suru-suruan dison ndang na laho patuduhon sude halak dihalomohon Debata alani parange ni nasida. Alai hata on naeng patuduhon, sasahalak dihalomohon Debata ala marhaporseaon tu Debata jala mangihuthon AnakNa.—Ida hatorangan taringot na hinalomohon ni rohana di ayat on.
jolma na hinalomohon ni rohana: Hata “hinalomohon” na dipaboa suru-suruan i, sian Debata do i ndang sian jolma. Hata Junani eu·do·kiʹa boi do lapatanna “palashon roha manang na dihalomohon”. Jala hata eu·do·keʹo dipangke do di Mateus 3:17; Markus 1:11; dohot Lukas 3:22 (ida hatorangan taringot Mat 3:17; Mrk 1:11). Jala didok Debata do on tu Jesus dung tardidi. Sasintongna lapatan ni hata on, i ma “na dihalomohon, manang palashon roha”. Jadi hata “jolma na hinalomohon ni rohana” (an·throʹpois eu·do·kiʹas) patuduhon sasahalak na dihalomohon Debata. Jadi ndang sude halak dihalomohon Debata, alai holan angka halak na marhaporseaon tu Ibana jala mangihuthon AnakNa do. Nang pe hata Junani eu·do·kiʹa sipata patuduhon na hinalomohon ni jolma (Rom 10:1; Plp 1:15), alai jotjot do i dipangke laho patuduhon na dihalomohon Debata (Mat 11:26; Luk 10:21; Eps 1:5, 9; Plp 2:13; 2 Tes 1:11). Di Psalmen 51:20 [50:20, LXX] terjemahan Septuaginta, hata on patuduhon aha na “hinalomohon” ni Debata.
Diboto Hamu Do?
Ise do bapak ni si Josep?
Si Josep, sahalak tukang sian Nasaret do bapak tiri ni Jesus. Alai, ise do bapak ni si Josep? Sian buku Mateus, taboto ma si Jakkob do bapakna. Alai, buku Lukas manurat, “anak ni si Eli” do si Josep. Boasa marimbar hatorangan on?—Lukas 3:23; Mateus 1:16.
Disurat do di buku Mateus, “anak ni si Jakkob do si Josep”. Sian hata Junani, ayat on patuduhon si Jakkob do sasintongna bapak ni si Josep. Jala na disurat di buku Mateus, i ma silsilah ni si Josep sian pinompar ni raja Daud. On patuduhon, sian uhum marhak do anak tirina, i ma Jesus gabe raja.
Buku Lukas manurat, “si Josep, i ma anak ni si Eli”. Hata “anak ni”, boi do mangartihon “hela ni”. Songon di Lukas 3:27, sasintongna si Jekonya do bapak ni si Sealtiel, alai didok do ibana “anak ni si Neri”. (1 Kronika 3:17; Mateus 1:12) Si Sealtiel mangalap boru ni si Neri gabe tungganeboruna. Alani i ma, didok ibana anak manang hela ni si Neri. Dos songon i ma na mambahen si Josep didok “anak” ni si Eli, ala ibana mangalap si Maria, boru ni si Eli. Alani i, na disurat buku Lukas, i ma silsilah ni Jesus sian “dagingna” manang jasmani marhite omakna, si Maria. (Rom 1:3) Jadi, Bibel manurat dua hatorangan taringot silsilah ni Jesus na tangkas jala paposhon rohanta.
25 JUNI–1 JULI
ARTA NA ARGA NA ADONG DI BIBEL | LUKAS 4-5
“Tiru ma Jesus Tingki Mangadopi Ela-ela”
w13-IN 15/8 25 ¶8
Pangalaho na Songon Dia do na Ingkon Tapatudu?
8 Dipangke Sibolis dope cara na sarupa laho mangela-ela Jesus tingki di padang pasir. Male do Jesus ala 40 ari, 40 borngin ibana puasa. Gabe diela-ela Sibolis ma ibana taringot sipanganon. Didok ibana ma, “Molo tutu do ho anak ni Debata, dok ma batu on gabe roti.” (Luk 4:1-3) Boi do dipangke Jesus huasona laho mangulahon i. Alai, diboto ibana do ndang lomo roha ni Amana molo huasona dipangke mangkaringkothon dirina. Nang pe male dihilala ibana, alai ummarga do paralealeonna tu Amana. Jadi didok Jesus ma, “Tarsurat do.” Dungkon i didok ibana do muse, “mangolu do tahe jolma i sian ganup hata na ruar sian pamangan ni Jahowa”.—Luk 4:4.
w13-IN 15/8 25 ¶10
Pangalaho na Songon Dia do na Ingkon Tapatudu?
10 Bibel mandok, “dipatudu ma di bagasan satongkin sude harajaon ni portibi on. Dung i ninna Sibolis ma tu ibana, ‘Lehononku ma tu ho huaso dohot hasangapon ni sude harajaon on’ ”. (Luk 4:5, 6) Songon dia do Jesus mangadopi ela-ela ni Sibolis i? Sasintongna, ndang na pintor diida Jesus sude harajaon ni portibi on tingki i. Alai dipatudu Sibolis do hasangapon harajaon ni portibi on laho mangela-ela Jesus. Dung i, pintor didok Sibolis do, “Molo disomba ho ahu holan sahali pe, di ho ma i sude.” (Luk 4:7) Ndang dioloi Jesus na dipangido Sibolis. Didok Jesus, “Tarsurat do, ‘Jahowa Debatam do na ingkon sisombaonmu jala holan tu Ibana do ho marhobas.’ ”—Luk 4:8.
Media sian nwtsty-E
Punsu ni Tembok ni Bagas Joro
Ra, tutu do Jesus diboan Sibolis tu “punsu ni tembok”. Jala disuru Sibolis do Jesus asa mandabuhon dirina. Alai ndang dipaboa didia do ibana tindang. Hata “joro” dison lapatanna boi do tarmasuk sude bangunan na di joro i. Ra Jesus tindang di bagian tenggara ni joro i, manang di bagian na asing. Atik na di bagian dia pe ibana tindang tingki i, alai molo didabuhon dirina, tontu mate do ibana molo ndang diurupi Jahowa.
w13-IN 15/8 26 ¶12
Pangalaho na Songon Dia do na Ingkon Tapatudu?
12 Ndang songon si Hawa, serep do roha ni Jesus! Nang pe diela-ela Sibolis muse Jesus mamangke cara na asing, alai ndang dioloi ibana hata ni Sibolis. Alana, molo dioloi Jesus hatana, na patuduhon ginjang ni roha do Jesus disi jala mangunjuni Debata do ibana. Jadi, tangkas do didok Jesus tu Sibolis, “Ai didok do, ‘Ndang jadi unjunanmu Jahowa Debatam.’ ”—Jaha Lukas 4:9-12.
Mangalului Arta na Adong di Bibel
Hatorangan sian nwtsty-E taringot Luk 4:17
gulungan ni panurirang Jesaya: Gulungan ni si Jesaya manang jotjot didok Gulungan Laut Mati, marisi 17 perkamen na dipasada. Ganjangna 7,3 meter jala marisi 54 kolom. Ra, sarupa do ganjang ni gulungan on tu gulungan na dipangke di sinagoga na di Nasaret. Alai di abad na parjolo, ala ndang adong dope dibahen bindu dohot ayat di gulungan i, tontu ingkon ditandai Jesus do bagian na laho jahaonna. Jadi, ala boi do dapot ni Jesus bagian na ringkot di angka gulungan i, on patuduhon tangkas do diboto ibana Hata ni Debata.
Hatorangan sian nwtsty-E taringot Luk 4:25
saleleng tolu satonga taon: Songon na disurat di 1 Rajaraja 18:1, dipaboa si Elia do na laho sidung nama haleon potir dung “patolutaonhon”. Jadi adong na mandok, imbar do hatorangan di buku 1 Rajaraja on tu hata ni Jesus. Didok di Angka Buku Heber, haleon potir i masa ndang gok tolu taon. Hata “patolutaonhon” dimulai tingki didok si Elia tu si Ahab taringot haleon potir i. (1 Raj 17:1) Sasintongna, hata on nunga dipaboa si Elia tingki masa logo ni ari. Alai sipata, olo do lobi sian onom bulan masa logo ni ari. Asing ni i, haleon potir i ndang sidung dope tingki si Elia manjumpangi si Ahab. Alai sidung do haleon potir i dungkon parsoalan di Dolok Karmel. (1 Raj 18:18-45) Jadi, hata ni Jesus di ayat on sarupa songon na disurat di Jakobus 5:17, na hombar tu hatorangan di 1 Rajaraja 18:1.