Referensi tu Parpunguan Hangoluan dohot Pangkobasion Na Laho Diparsiajari
1-7 JULI
ARTA NA ARGA NA ADONG DI BIBEL KOLOSSE 1-4
“Tanggalhon Pangalaho na Leleng, jala Pangke Pangalaho na Imbaru”
w11-IN 15/3 10 ¶12-13
Jalo ma Tondi ni Debata, Unang Tondi ni Portibi on
12 Sian parangengku tarida do tondi ni Debata na hujalo? (Jaha Kolosse 3:8-10, 13.) Angka hisap-hisap ni daging do na dihalomohon portibi on. (Gal. 5:19-21) Tarida do tondi na dia na tajalo molo adong donganta na mambahen hansit rohanta manang mambahen na sala tu hita. Asing ni i, tingki di jabu pe hita boi do tarida tondi na dia do na manogu-nogu hita. Tasungkun ma dirinta, ‘Hutiru do Jesus saleleng onom bulan na parpudi on? Manang, angka na so denggan do na huhatahon jala huulahon?’
13 Boi do tondi ni Debata mangurupi hita asa ‘mananggalhon pangalaho na leleng dohot angka na taulahon najolo’, jala asa tapangke “pangalaho na imbaru”. Gabe ummura ma hita patuduhon holong jala burju. Gabe rade ma hita manalpuhon hasalaan ni halak jala sabar nang pe adong na mambahen hansit rohanta. Molo adong pe na mambahen na so denggan tu hita, ndang pintor tapatudu “sogo ni roha, muruk, rimas, songgak-songgak dohot angka hata na mangaleai”. Gariada “marasi ni roha” do hita.—Eps. 4:31, 32.
w13-IN 15/9 21 ¶18-19
Nunga Muba be Hamu?
18 Asa boi Hata ni Debata paubahon ngolunta, ndang cukup holan manjaha jala mamparsiajari Bibel. Godang do halak na jotjot manjaha Bibel jala mamboto isina. Ra, hea do jumpangta halak sisongon i tingki marbarita. Boi do diapil nasida angka ayat di Bibel. Alai na dijaha nasida i ndang tarida sian parniulaonna dohot carana marpingkir. Jadi aha do muse na porlu diulahon? Ingkon dirimangi sasahalak do Hata ni Debata di bagasan rohana asa boi paubahon dirina. Alani i, tasungkun ma dirinta, ‘Pos do rohangku molo na huparsiajari on ndang holan ajaran sambing? Aha do buktina hasintongan do na huparsiajari on? Nunga huulahon be on di ngolungku, jala ndang holan hupaboa tu na asing? Boi do huhilala hira na Jahowa na mangkatai tu ahu?’ Molo tarimangi angka sungkun-sungkun i boi ma gabe lam togu parale-aleonta tu Jahowa. Gabe lam holong ma rohanta tu Ibana. Jala boi ma hita gabe lam denggan.—Poda 4:23; Luk. 6:45.
19 Molo tajaha jala tarimangi Bibel ganup ari, gabe taronjar ma rohanta asa tongtong marsitutu ‘mananggalhon pangalaho na leleng dohot angka na taulahon najolo, jala mamangke pangalaho na imbaru na nilehon ni Debata dung tatanda Ibana’. (Kol. 3:9, 10) Boi do hita marhasil mangulahon i molo lam taantusi Hata ni Debata jala tahilala adong pengaruhna tu hita. Gabe marpangalaho na imbaru ma hita jala diondingi ma hita sian ela-ela ni Sibolis.
Mangalului Arta na Adong di Bibel
it-1-IN 1243-1244 ¶4-6
Harajaon ni Debata
“Harajaon ni Anak Haholonganna”. Dung sampulu ari Jesus naik tu surgo, i ma di ari Pentakosta taon 33 M, dilehon Jesus do tondi parbadia tu angka siseanna. On ma bukti na patuduhon ‘dipatimbo Debata do Jesus tu siamunna’. (Ul 1:8, 9; 2:1-4, 29-33) Alani i, nunga marlangku be “parjanjian na imbaru” di nasida. Jala nasida ma na gabe pusat ni “bangso na badia” i manang Israel ni Debata.—Heb 12:22-24; 1Ptr 2:9, 10; Gal 6:16.
Nunga hundul be Jesus di siamun ni Amana. Jala ibana ma na gabe Ulu ni huria Kristen. (Eps 5:23; Heb 1:3; Plp 2:9-11) Molo tajaha di Bibel taboto ma mulai sian Pentakosta taon 33 M, adong sada harajaon na dibahen Jesus dohot angka siseanna. Di surat na dibahen si Paulus tu angka halak Kristen na di Kolosse, dipaboa ibana do nunga adong harajaon ni Jesus Kristus. Didok, “Nunga dipalua [Debata] hita sian huaso ni haholomon jala dipapinda tu harajaon ni Anak haholonganna.”—Kol 1:13; bandingkon tu Ul 17:6, 7.
Harajaon ni Kristus, i ma harajaon na dibahen mulai sian ari Pentakosta taon 33 M. Jala harajaon on ma na mamarenta tu Israel ni Debata, i ma angka halak Kristen na ditubuhon sian tondi parbadia, jala gabe angka anak ni Debata. (Joh 3:3, 5, 6) Dung dapot ni angka halak Kristen i upa sian surgo, ndang be gabe rakyat nasida di portibi on. Alai gabe raja do nasida raphon Kristus di surgo.—Pgk 5:9, 10.
w08-IN 15/8 28 ¶8
Angka na Denggan sian Buku Galatia, Epesus, Pilippi, dohot Kolosse
2:8—Angka aha do na “sian portibi” na didok si Paulus asa tapasiding? I ma angka na adong di portibi on. (1 Joh. 2:16) Tarmasuk ma i, ajaran ni angka halak di portibi on, holongan di hepeng, dohot agama palsu na adong di portibi on.
8-14 JULI
ARTA NA ARGA NA ADONG DI BIBEL 1 TESSALONIK 1-5
“Masiurupan ma Hamu jala Patogu ma na Asing”
w11-IN 15/6 26 ¶12
“Parsangapi Hamu ma Angka na So Marnaloja Mangaradoti Huria”
12 “Mamimpin” huria lapatanna ndang holan mangajar. Dipangke do hata i di 1 Timoteus 3:4. Disi didok si Paulus, sahalak pangaradoti ingkon “denggan mamimpin keluargana, anakkonna pangoloi jala marpangalaho na denggan”. Di ayat i, hata “mamimpin” lapatanna, ndang holan mangajari ianakhonna, alai ingkon gabe sitiruon do nasida di keluargana. Jala ianakhonna pe ingkon unduk. Jadi, ingkon gabe sitiruon do sintua di huria, jala ingkon diurupi nasida do sude dongan asa unduk tu Jahowa.—1 Tim. 3:5.
w11-IN 15/6 28 ¶19
“Parsangapi Hamu ma Angka na So Marnaloja Mangaradoti Huria”
19 Boha do pangkilalaanmuna molo adong na mangalehon hadiah na arga tu hamu? Tontu, diargai hamu do hadiah i. Dos songon i ma, diparade Jahowa do ‘angka halak na gabe silehon-lehon’ marhite Jesus Kristus. Songon dia do caranta mangargai i? Carana, sai tatangihon ma angka jamita na dipasahat angka sintua, jala ulahon ma angka na dipasahat di jamita i. Jala talehon ma komentar di parpunguan. Dohot ma hita marbarita na uli. Molo nunga tahilala adong labana mangihuthon poda sian sahalak sintua, tapaboa ma i tu ibana. Jala tadok ma mauliate tu keluargana. Taingot ma, nunga loja nasida mangurupi huria jala mambagi tingki ni nasida tu keluargana dohot tu huria.
“Mangkaholongi . . . Marhite-hite Pambahenan dohot Hasintongan”
13 Urupi ma dongan na gale. Adong do parenta ni Bibel na mandok, “Anju hamu ma angka na gale, lambas ma rohamuna dompak saluhutna!” On boi patuduhon na tutu do holongta manang na ndang. (1 Tes. 5:14) Piga-piga dongan na gale boi do gabe togu muse. Alai, adong do donganta na gale jala leleng asa boi togu muse. Di tingki sisongon i, ingkon sabar do hita mangurupi nasida, jala tahaholongi ma nasida. Carana? Pangke ma Bibel laho patoguhon nasida. Togihon ma nasida marbarita. Rade ma manangihon nasida. Unang ma tapaimbar-imbar donganta na “gogo” dohot na “gale” di partondion. Alana, ganup jolma adong be do hagaleon dohot halobionna. Gariada apostel Paulus pe adong do hagaleonna. (2 Kor. 12:9, 10) Alani i, porlu do hita masiurupan jala masipatoguan.
w15-IN 15/2 9 ¶16
Tiru ma Jesus na Serep Roha jala Lambok
16 Pangkataionta. Molo lambok hita, gabe taronjar do rohanta laho ‘mangapuli na marsak’. (1 Tes. 5:14) Aha ma na boi tadok laho patoguhon nasida? Paboa ma tu nasida na holong do rohanta tu nasida. Puji ma nasida asa diboto adong do na denggan sian nasida. Paboa ma, Jahowa do na mangurupi nasida mandapot hasintongan. Jadi arga situtu do nasida di adopan ni Jahowa. (Joh. 6:44) Papos ma roha ni nasida sai disarihon Jahowa do angka naposona “na marsak roha” jala “mandele”. (Ps. 34:19, Bibel siganup ari) Molo lambok pangkataionta, boi do i patoguhon nasida.—Poda 16:24.
Mangalului Arta na Adong di Bibel
it-2-IN 463 ¶6
Parmainanon
Halak na mangulahon parmainanon boi do gabe dipabali manang dipecat sian huria. (1Kor 5:9-13; Heb 12:15, 16) Didok si Paulus do molo halak na mangulahon parmainanon boi mambahen dirina gabe mardosa. Alana, dipangke ibana do organ seksna tu ulaon na so suman. Gabe sega ma parale-aleonna tu Jahowa, gabe ramun ma huria, jala boi do marsahit ibana ala mangulahon i. (1Kor 6:18, 19) Jala ibana gabe mambahen na so hasea tu angka donganna. (1Tes 4:3-7) Alana, (1) gabe ramun jala gabe roa ma goar ni huria i (Heb 12:15, 16), (2) dongan na mangulahon parmainanon i pe gabe sega ma goarna, jala molo dung marhasohotan gabe ndang badia be ibana (3) gabe pailahon keluargana sandiri, jala (4) mambahen hansit roha ni natua-tua, dongan saripe, manang tunangan ni donganna mangulahon parmainanon i. Ndang na mangalo uhum ni jolma ibana, alana di piga-piga halak ndang pola boha mangulahon i. Alai uhum ni Debata do na dialo ibana, jala Debata ma na laho manguhumi ibana.—1Tes 4:8.
“Nunga Jonok Haluaonmuna”!
14 Aha do na masa dung diroro Gog sian Magog naposo ni Debata? Bibel mandok “Laos disi ma suruonna [Anak ni jolma] angka pardisurgo papunguhon angka na pinillitna i sian desa na ualu i, sian suhi ni tano sahat ro di suhi ni langit.” (Markus 13:27; Mateus 24:31) Ulaon papunguhon on ndang na tingki laho mamillit halak Kristen na nimiahan. Jala ndang tingki na parpudi laho manahapi (pemeteraian) halak Kristen na nimiahan ni tondi na adong dope di tano on. (Mateus 13:37, 38) Disi masa hasusaan bolon, dimulai ma ulaon on. (Pangungkapon 7:1-4) Alani i, ulaon papunguhon aha do on? On ma tingkina angka na nimiahan na adong di tano on mandapot upa nasida jala manaek tu surgo. (1 Tessalonik 4:15-17; Pangungkapon 14:1) Masa ma on ndang leleng dung ro paraloan sian Gog dohot Magog. (Hesekiel 38:11) Dung i, songon na didok Jesus, “marsinondang angka partigor songon mata ni ari di harajaon ni Ama nasida.”—Mateus 13:43.
15 Godang halak Kristen na so sintong mandok, nasida boi mangida Jesus. Alai tangkas do dipatorang Bibel, ndang boi taida Jesus tingki ro muse tu tano on. Ala Bibel mandok: “Di tingki i ma binsar di langit i tanda ni Anak ni jolma i” jala “ro di atas ombun ni langit.” (Mateus 24:30) Bibel pe mandok: “Ndang tarbahen sibuk dohot mudar manean harajaon ni Debata.” Alani i, sude na laho manaek tu surgo parjolo-jolo ingkon paubaonna “tompu di bagasan sangkidop mata, di pangkuling ni sarune na parpudi i.” (Jaha 1 Korint 15:50-53.) Alani i, rampak jala tompu ma dipauba halak Kristen na nimiahan na adong dope di tano on.
15-21 JULI
ARTA NA ARGA NA ADONG DI BIBEL 2 TESSALONIK 1-3
“Tarida ma Halak na Mangalo Patik ni Debata i”
it-2-IN 386 ¶1
Manomba Debata
Adong do hubungan ni on tu rahasia na asing, na so domu tu “rahasia na badia” sian Jahowa. Didok ma on ulaon na “buni dope” taringot “halak na mangalo patik”. Gabe rahasia do on di halak Kristen di jaman ni si Paulus. Alana di tingki i, ndang adong dope na mamboto ise do angka “halak na mangalo patik”, jala ndang adong dope punguan ni nasida. Dung adong pe punguan ni nasida, tong do gabe rahasia i di angka halak. Alana sai hira na marsitutu do nasida manomba Debata jala mangulahon ulaon na hombar tusi. Hape sasintongna, angka na murtad do nasida jala munafik. Didok si Paulus, nunga adong be punguan on di jamanna. Adong do pengaruh ni nasida tu huria Kristen, jala gabe adong ma punguan ni angka na murtad. Alai dung gabe raja Jesus, tarida do ise na mangalo patik ni Debata jala ndang sada be nasida dohot halak Kristen na sintong. Nang pe songon i, dibahen angka halak na murtad i do “dirina tumimbo sian sude debata manang sian sude sisombaon” (Jun., sebasma). Dipangke Sibolis do nasida laho mangulahon i. Dibahen nasida do gabe lilu angka halak na mangihuthon nasida jala marjea. Marhasil do angka “halak na mangalo patik” on mangulahon ulaonna. Alana munafik do nasida. Sai hira na tutu do nasida manomba Debata.—2Tes 2:3-12; bandingkon tu Mat 7:15, 21-23.
it-1-IN 617 ¶6
Gabus
Dipasombu Debata do angka halak “dililuhon”. Gabe umlomo ma roha ni nasida ‘porsea tu angka gabus’ sian apala porsea tu barita na uli taringot Jesus Kristus. (2Tes 2:9-12) Boi ma taboto taringot on molo tajaha muse angka na masa tu Raja Ahab. Didok angka panurirang na palsu do tu si Ahab, na laho monang do ibana mangalo Ramot-gilead. Alai panurirang ni Jahowa na margoar si Mika mandok, marjea do molo diulahon nasida i. Dung i, dilehon Debata ma parnidaan tu si Mika. Di parnidaan i, dipasombu Jahowa do sada suru-suruan mambahen “angka panurirang ni si Ahab gabe pargabus”. Lapatanna, gabe dibahen suru-suruan i do asa unang na sintong na dipaboa angka panurirang i. Gabe dipaboa nasida do lomo ni roha ni nasida dohot na dihalomohon si Ahab. Nang pe si Ahab nunga dipasingot, alai umlomo do rohana manangihon gabus ni angka panurirang i, jala gabe marjea ma ibana.—1Raj 22:1-38, Bibel siganup ari; 2Kron 18.
Mangalului Arta na Adong di Bibel
it-1-IN 159 ¶3
Api
Didok si Petrus, “Disimpan do langit dohot tano na adong saonari laho uhumonna marhite api.” Molo taida angka kalimat di ayat on jala tapahombar tu angka ayat na asing, api na didok disi lapatanna hamatean saleleng ni lelengna. Di jaman ni si Noak, angka parjahat do na diripashon Debata marhite Aek na Sumar, ndang langit dohot tano on. Suang songon i ma, tingki ro Jesus Kristus rap dohot angka suru-suruan na dipatudos songon api na marsigorgor, ndang langit dohot tano on na laho diripashon. Alai angka parjahat do na laho diripashon rap dohot organisasi ni nasida.—2Ptr 3:5-7, 10-13; 2Tes 1:6-10; bandingkon tu Jes 66:15, 16, 22, 24.
w08-IN 15/9 11 ¶17
Jahowa do “Sipalua” Hita
17 Marjanji do Jahowa laho mangalehon angka na tahaporluhon. (Jaha Mateus 6:33, 34 dohot Heber 13:5, 6.) Alai, ndang na gabe so karejo hita. (2 Tes. 3:10) Lapatan ni janji i: Molo jumolo talului Harajaon ni Debata jala talului karejonta, boi ma pos rohanta sai na lehonon ni Jahowa do angka na tahaporluhon. (1 Tes. 4:11, 12; 1 Tim. 5:8) Sipata, lehononna do i sian na so panagaman ni rohanta. Umpamana, adong do ra dongan sahaporseaon na mangalehon karejo tu hita jala mangurupi hita.
22-28 JULI
ARTA NA ARGA NA ADONG DI BIBEL 1 TIMOTEUS 1-3
“Marsitutu Mandapot Ulaon na Denggan”
Ringkot do Tongtong Maju di Partondion?
3 Jaha 1 Timoteus 3:1. Dipuji si Paulus do baoa na naeng “mangalului” hasintuaon. Rimangi ma tingki sasahalak naeng mambuat sada barang na dao sian ibana, ingkon marusaha do ibana asa boi buatonna. Suang songon i ma, sahalak baoa na naeng gabe parhobas di huria, ingkon marsitutu do patuduhon parange na denggan. Dung gabe parhobas, ingkon marsitutu do muse asa boi gabe sintua.
km-E 9/78 4 ¶7
“Denggan Pandapot ni Halak” taringot Nasida
7 Jadi tangkas do taboto boasa didok si Paulus ingkon ‘denggan pandapot ni halak’ taringot angka baoa na marhobas di huria. Alai ndang sarupa on songon na dibahen angka gareja. Alana, pasu-pasu sian Jahowa dohot Jesus do molo adong parhobas na ‘denggan marhobas’ di huria. Patut do nasida taargai jala taurupi. “Ndang adong be na mangambati ibana paboahon haporseaonna taringot tu Kristus Jesus.” Jadi mansai taargai do sude naung diulahon nasida di huria. Togu do haporseaon ni nasida tu Jahowa, jala barani mangulahon na sintong.
Mangalului Arta na Adong di Bibel
it-2-IN 819-820 ¶2
Tarombo
Ndang adong gunana molo sai mambahas taringot tarombo, tarlumobi ma tingki dibahen si Paulus surat on tu si Timoteus. Ndang porlu be diingot angka tarombo i laho mambuktihon ise do ompunta. Alana ndang dipaimbar-imbar Debata be na dia halak Jahudi dohot na so halak Jahudi di huria. (Gal 3:28) Jala nunga tangkas be diboto taringot tarombo ni Jesus Kristus, i ma sian pinompar ni si Daud. Asing ni i, ndang sadia leleng dung dibahen si Paulus surat on, diripashon nama Jerusalem. Tontu dohot do catatan taringot tarombo ni halak Jahudi diripashon. Alana ndang adong sangkap ni Debata mambahen catatan sisongon i tongtong adong. Jadi, marsak do si Paulus molo gabe habis tingki ni si Timoteus dohot angka dongan na asing holan mambahas taringot tarombo. Ndang adong guna ni i tu haporseaon ni nasida. Jadi tarombo na rumingkot di halak Kristen, i ma tarombo ni Jesus Kristus. Jala tangkas do dipaboa taringot i di Bibel. Adong pe angka tarombo na asing na disurat di Bibel, laho patuduhon na sintong do isi ni Bibel, jala pas do isina tu catatan sejarah.
cl-IN 12 ¶15
“Ida ma on do Debatanta”
15 Adong dope gelar na asing na dipangke Jahowa. Umpamana, “Raja na manongtong”. (1 Timoteus 1:17; Pangungkapon 15:3) Aha do lapatan ni i? Memang maol do ra taantusi taringot i. Alai boi ma tadok, nunga adong Jahowa sian najolo sahat tu ari na naeng ro. Didok di Psalmen 90:2, “Nunga adong hian Ho, ale Debata, sian salelenglelengna ro di salelenglelengna.” Ndang marmula Jahowa; tongtong do adong Ibana. Jadi, pas do molo dibahen gelarna “Ibana na So Suda Arina”. Nunga mangolu Ibana andorang so adong dope angka tompaan na asing. (Daniel 7:9, 13, 22) Antong, boi do adong na so setuju molo Ibana na mamarenta?
29 JULI–4 AGUSTUS
ARTA NA ARGA NA ADONG DI BIBEL 1 TIMOTEUS 4-6
“Dia do na Rumingkot, Debata manang Hamoraon?”
w03-IN 1/6 9 ¶1-2
Carana Asa Mangkasabamhon na Adong
Sada na mambahen si Paulus marlas ni roha, i ma ala mangkasabamhon na adong. Lapatanna, las do rohana tu angka na adong di ibana. Didok ibana tu si Timoteus, “Sasintongna godang do labana manomba Debata, molo las do rohana tu na adong di ibana. Ai ndang adong na taboan tingki tubu hita tu portibi on jala ndang adong na taboan molo dung mate hita. Alani i molo adong sipanganon dohot pangkeanta, las ma rohanta disi.”—1 Timoteus 6:6-8.
Adong do hubungan ni mangkasabamhon na adong tu mangoloi parenta ni Debata. Didok si Paulus, boi do hita marlas ni roha molo mangoloi parenta ni Debata. Carana, unang ma mangalului arta manang hamoraon na rumingkot di ngolunta. Alai mangulahon parenta ni Debata ma na rumingkot di ngolunta. Porlu do ‘sipanganon dohot pangkean’ di hita asa boi tongtong mangoloi parenta ni Debata. Alani i, boi do si Paulus mangkasabamhon na adong ala tongtong porsea tu Jahowa, ndang soal aha pe situasina.
g-IN 6/07 6 ¶2
Sai Mangalului Hamoraon—Pengaruhna tu Hamu
Tontu, ndang na pintor mate halak na sai mangalului hamoraon. Alai, molo sai mangalului hamoraon, ndang boi ibana marlas ni roha di ngoluna. Asing ni i, gabe susa do parngoluonna ala stres karejo manang gabe susa di parhepengon. Boi do i mambahen ibana gabe jotjot holsoan, ndang boi modom, gabe hansit uluna dohot lambungna. Gabe jempek ma umurna alani i. Nang pe diboto sasahalak na ingkon muba ibana, alai ra nunga tarlambat. Ra ndang dihaporseai dongan saripena be ibana, jala angka ianakhonna pe dohot do gabe susa alani i. Jala gabe jotjot ma ibana marsahit. Ra adong do na boi dipadenggan, alai olo do gabe godang tingki mangulahon i. Tangkas ma, angka halak sisongon i, gabe “parohon na hansit tu dirina binahen ni godang hasusaan”.—1 Timoteus 6:10.
g-IN 11/08 6 ¶4-6
Onom Cara Asa Boi Marhasil
Songon na taida di artikel na parjolo, angka halak na sai mangalului hamoraon, sasintongna dos do i songon na manangkup alogo. Didok roha ni nasida, ingkon mamora do sasahalak asa boi marhasil. Hape sasintongna, gabe godang do na mandele jala susa alani i. Umpamana, ala sai mangalului hamoraon gabe ndang denggan be hubungan ni sasahalak dohot keluarga manang donganna. Alani godang ni ulaonna manang ala paholsohu, adong do na gabe hurang modom. Parjamita 5:11 mandok, “Renge do modom halak na loja mangula, nang otik, nang godang dipangan; hape balisaon do anggo mata ni halak na mora dibahen pargadombusonna.”
Hepeng, dipatudos do songon tuan na jahat jala na mangaliluhon. Hea do didok Jesus taringot “holong ni roha tu hamoraon”. (Markus 4:19) Ndang boi hamoraon parohon las ni roha. Gariada lam godang do hasusaan na masa alani i. Parjamita 5:9 mandok, “Manang ise na holong roha di perak, ndang olo marnamahap di perak.”
Boi ma tadok halak na holongan di hepeng mambahen jea tu dirina sandiri. Ujungna, boi do ibana gabe mandele, stres, jala gabe mangulahon hajahaton. (Poda 28:20) Alai molo burju sasahalak mangalehon, olo manalpuhon hasalaan, marpangalaho na denggan, patuduhon holong, jala togu parale-aleonna tu Debata, boi do ibana marlas ni roha jala marhasil.
Mangalului Arta na Adong di Bibel
Songon dia do Asa Tongtong Ias Panggora ni Rohanta?
17 Apostel Petrus mandok, “Ulahon hamu ma i marhite roha na lambok dohot roha na hormat dohot panggora ni roha na ias.” (1 Petrus 3:16, Bibel siganup ari) Panggora ni roha na ias, i ma silehon-lehon na arga sian Debata. Saonari, torop halak ndang ias be panggora ni rohana. Si Paulus mandok, “Naung mate panggora ni rohana, songon na matutung binahen ni bosi na mohop.” (1 Timoteus 4:2, Bibel siganup ari) Panggora ni roha na mate, dos songon sibuk na mate ala matutung binahen ni bosi na mohop. Torop do halak mate panggora ni rohana gabe ndang maila manang mabiar nasida tingki mangulahon na sala. Jala torop do halak saonari na so mamingkirhon panggora ni rohana.
it-2-IN 340 ¶2-3
Manjahahon di Jolo ni Natorop
Di Huria Kristen. Di abad na parjolo, otik do halak nampuna salinan gulungan ni Bibel. Alani i, mansai ringkot do manjahahon i di jolo ni natorop. Dipangido apostel Paulus do asa dijahahon angka suratna di parpunguan ni huria Kristen. Jala didok ibana asa ditorushon angka surat i tu huria na asing, asa boi dijahahon muse. (Kol 4:16; 1Tes 5:27) Dilehon si Paulus do poda tu si Timoteus, sahalak sintua na poso dope asa marsitutu laho “manjahahon i di jolo ni natorop, mamodahon jala mangajarhon i”.—1Tim 4:13.
Ala tujuanna laho mangajari na asing, ingkon denggan do sasahalak tingki manjaha di jolo ni natorop. (Hab 2:2) Ingkon diantusi ibana do aha na dijaha dohot na dihalomohon na manurat i. Ingkon manat do dijaha ibana asa unang sala pangantusion ni na manangihon. Songon na didok di Pangungkapon 1:3, marlas ni roha ma halak na manjaha surirang i marhite soara na gogo. Songon i nang halak na manangihon dohot na mangoloi angka na tarsurat di surirang i.