Referensi tu Parpunguan Hangoluan dohot Pangkobasion na Laho Diparsiajari
5-11 AGUSTUS
ARTA NA ARGA NA ADONG DI BIBEL 2 TIMOTEUS 1-4
“Tondi Parbadia na Nilehon ni Debata tu Hita Ndang Mambahen Hita Mabiar”
w09-IN 15/5 15 ¶9
Hamu Angka na Poso, Maju ma Hamu
9 Didok si Paulus tu si Timoteus, “Tondi parbadia na nilehon ni Debata tu hita ndang mambahen hita mabiar. Alai mambahen hita margogo, marholong ni roha, jala marbisuk.” (2 Tim. 1:7) Halak na “marbisuk”, masuk di angkal do cara marpingkirna jala tolap mangadopi marragam situasi, nang pe adong situasi na borat. Alai adong do piga-piga na poso na so togu parale-aleonna tu Debata. Molo adong sitaonon ni nasida, olo do gabe holan na modom nasida, manonton TV, marnarkoba, mabuk, marsonang-sonang, manang mangulahon seks na so patut. Jadi di Bibel, dijujui do hita asa tapasiding “pangalaho na so pasangaphon Debata dohot hisap-hisap ni portibi on. Alani i, boi ma torang pingkiranta, boi ma taulahon na sintong dohot lomo ni roha ni Debata di tingki on”.—Titus 2:12.
w03-IN 1/3 9 ¶7
‘Barani ma Hamu jala Marsihohot!’
7 Didok si Paulus tu si Timoteus, “Ai tondi parbadia na nilehon ni Debata tu hita ndang mambahen hita mabiar. Alai mambahen hita margogo . . . Alani i, unang ma maila ho mamaritahon taringot tu Tuanta.” (2 Timoteus 1:7, 8; Markus 8:38) Dung tajaha ayat on, tasungkun ma dirinta: ‘Barani do ahu paboahon haporseaonku, manang maila do ahu? Hupaboa do tu dongan karejoku manang dongan singkolaku na Saksi Jahowa do ahu, manang maila do ahu paboahon i? Maila do ahu gabe imbar sian angka halak, manang bangga do ahu gabe Saksi Jahowa?’ Molo adong na mabiar marbarita na uli manang maila gabe imbar sian angka halak, ingot ma poda ni Jahowa tu si Josua, ‘Barani ma hamu jala marsihohot!’ Ingot ma, pandapot ni Jahowa dohot Jesus do na ringkot di hita, ndang pandapot ni angka halak.—Galatia 1:10.
Mangalului Arta na Adong di Bibel
Lului ma Hamoraon na Sasintongna
13 Sahalak na marhaporseaon do si Timoteus. Didok si Paulus do ibana “parangan na denggan di Kristus Jesus”. Laos didok ma, “Ndang olo alit parporang tu angka ulaon pandaraman [manang, partiga-tigaan], asa halomoan ibana di na marsuru ibana.” (2 Tim. 2:3, 4) Angka sisean ni Jesus dohot angka dongan na mangalehon sude tingkina tu Jahowa, marsitutu do mangulahon poda i. Ndang tarela-ela nasida alani iklan di portibi na ahut on. Diingot nasida do prinsip on, “Ingkon mangadop [do] parutang tu baoa parutangan.” (Poda 22:7) Lomo do roha ni Sibolis asa suda tingkinta mangalului arta. Adong do na marutang asa boi marjabu, manuhor mobil, marsingkola, manang marhasohotan. Molo ndang manat, boi do gabe tarutang hita saleleng martaon-taon. Na marbisuk do hita molo ndang pagodanghu barang na tatuhor, ndang marutang jala ndang pasudahon godang hepeng. Molo taulahon on, gumodang ma tingkinta marhobas tu Debata jala ndang gabe hatoban ni sistem partiga-tigaan ni portibi on be hita.—1 Tim. 6:10.
w14-IN 15/7 14 ¶10
‘Ditadingkon Angka Naposo ni Jahowa do Hajahaton’
10 Saonari, jarang do adong halak na murtad di huria. Alai, adong dope ra angka halak na paboahon ajaran na murtad. Manang ise pe na paboahon ajaran i, tapasiding ma. Unang ma marsaor hita tu halak na murtad, umpamana sian internet, mangkatai langsung dohot nasida, manang sian cara na asing. Nang pe taronjar rohanta laho mangurupi nasida, alai molo mangkatai hita dohot nasida, on patuduhon na so taoloi do Debata. Didok Ibana do tu hita asa unang marsaor tu nasida jala pasidingkon ajaran na murtad.
12-18 AGUSTUS
ARTA NA ARGA NA ADONG DI BIBEL TITUS 1–PILEMON
“Pillit ma Angka Baoa na Gabe Sintua”
w14-IN 15/11 28-29
Sungkun-Sungkun sian na Manjaha
Nang pe najolo ndang sude dipaboa boha carana melantik sasahalak asa gabe sintua, alai dipaboa do tudu-tudu laho mangulahon i. Tingki parjolo sahali si Paulus dohot si Barnabas gabe misionaris, “dipillit [nasida] ma angka sintua di ganup huria. Martangiang ma nasida, marpuasa, jala dipasahat nasida ma angka sintua i tu Jahowa naung hinaporseaan ni nasida”. (Ul. 14:23) Dung martaon-taon, didok si Paulus do tu si Titus, “Hutadingkon do ho di Pulo Kreta asa boi padengganonmu angka na humurang. Jala pillit ma angka baoa na gabe sintua di ganup kota mangihuthon tudu-tudu on.” (Titus 1:5) Suang songon i do tugas na dilehon si Paulus tu si Timoteus, ala jotjot do rap nasida ro tu angka huria. (1 Tim. 5:22) Sian on tangkas ma taboto, pengawas wilayah do na melantik sasahalak gabe sintua. Ndang angka apostel manang angka sintua di Jerusalem.
Diihuthon Punguan na Mangaradoti Organisasi do cara melantik sintua manang parhobas di huria songon na dipaboa di Bibel. Mulai sian 1 September 2014, songon on ma tudu-tudu laho mangulahon i: Molo diusulhon angka sintua sahalak donganta laho gabe sintua manang parhobas, ingkon manat do i dipingkirhon pengawas wilayah. Tingki ro pengawas wilayah i tu huria, ingkon ditanda nasida do donganta na diusulhon i. Molo boi, rap ma nasida marbarita. Dung rapat angka sintua dohot pengawas wilayah taringot i, dilantik pengawas wilayah ma donganta i gabe sintua manang parhobas. Jadi, gabe sarupa ma cara melantik sintua manang parhobas di tingkinta saonari dohot di abad na parjolo.
“Naposo haposan jala na marbisuk” pe dohot do mambahen pengaturan on. Alana nasida do na martanggung jawab mangajari naposo ni Debata. (Mat. 24:45-47) Tugas ni nasida termasuk ma mangalului hatorangan sian Bibel jala paradehon tudu-tudu dohot angka prinsip ni Bibel tu angka huria di liat portibi on. Sude on diulahon marhite pangurupion ni tondi parbadia. Asing ni i, nasida do na melantik pengawas wilayah dohot anggota Panitia Cabang. Ganup kantor cabang mangurupi angka huria asa boi mangihuthon tudu-tudu sian naposo haposan. Angka sintua do na mamastihon molo adong donganta na memenuhi syarat gabe sintua manang parhobas. Dung i, pengawas wilayah ma na ingkon manat mamingkirhon jala manangiangkon angka donganta na diusulhon i, dung i baru pe dilantik nasida.
w89-IN 15/5 30 ¶5
Sungkun-Sungkun sian na Manjaha
Ndang setuju si Paulus taringot angka hata na paroa-roahon halak Kreta. Alana diboto si Paulus, adong do halak Kristen na burju di Kreta i jala lomo do roha ni Debata mangida nasida. I do umbahen dilehon Debata tondi parbadia tu nasida. (Ul. 2:5, 11, 33) Godang do halak Kristen disi. I do umbahen adong huria di “ganup huta”. Memang ndang sempurna nasida. Alai ndang pargabus jala ndang malas nasida. Alana molo songon i do nasida, tontu ndang lomo roha ni Debata mangida nasida. (Pilippi 3:18, 19; Pangungkapon 21:8) Songon di tingkinta saonari, di Kreta i pe adong do angka halak na lomo rohana mambege barita na uli, jala sogo rohana mangida angka na rorang di humaliangna.—Hesekiel 9:4; bandingkon tu Ulaon ni Apostel 13:48.
w08-IN 15/10 31 ¶5
Angka na Denggan sian Buku Titus, Pilemon, dohot Heber
15, 16—Boasa ndang dipangido si Paulus tu si Pilemon asa dipalua si Onesimus? Alana ndang olo ibana mamparsoalhon taringot perbudakan. Tugasna do na dipingkirhon si Paulus, i ma ‘mamaritahon Harajaon ni Debata dohot mangajarhon taringot tu Tuan Jesus Kristus’.—Ul. 28:31.
19-25 AGUSTUS
ARTA NA ARGA NA ADONG DI BIBEL HEBER 1-3
“Haholongi na Sintong jala Hagigihon Hajahaton”
w14-IN 15/2 5 ¶8
Jangkon ma Kristus, Rajanta!
8 Dilantik Jahowa do Jesus gabe Raja di surgo taon 1914. Pos do rohanta, tigor do pamarentaonna. Alana “tungkot hatigoran do tungkot ni Harajaon ni [Jesus]”. Ala Jahowa do na melantik Jesus, tama do ibana gabe Raja di ‘habangsa ni Debata’. Gabe Raja ma ibana “saleleng ni lelengna”. Tontu las situtu do rohanta manomba Jahowa, ala Jesus Kristus na gabe Raja di Harajaonna.
w14-IN 15/2 4-5 ¶7
Jangkon ma Kristus, Rajanta!
7 Jaha Psalmen 45:7, 8. Dihaholongi Jesus do hatigoran, jala sogo do rohana molo adong na mangaleai Amana. Alani i, dilantik Jahowa do ibana gabe Raja di Harajaonna. Mamangke “miak halalas ni roha” do Jesus dilantik. Imbar do cara ni Jahowa melantik ibana sian ‘angka donganna’, i ma angka raja ni halak Juda sian pinompar ni Raja Daud. Boasa boi tadok songon i? Alana, Jahowa do na langsung melantik Jesus. Asing ni i, dilantik Jahowa do ibana gabe Raja huhut gabe Sintua ni Malim. (Ps. 2:2; Heb. 5:5, 6) Marhite tondi parbadia do ibana dimiahi, jala sian surgo do ibana mamarenta, ndang di tano on.
Mangalului Arta na Adong di Bibel
it-1-IN 763 ¶1
Gombar; Patung
Tongtong do ditiru Jesus sude parange ni Jahowa?
Jesus gombaran ni Debata jala ibana do na parjolo sahali ditompa. (2Kor 4:4) Jesus do dongan ni Debata mangkatai tingki didok Debata, “Tole ma, itatompa ma jolma, tumiru rupanta.” Jadi nunga suman ibana songon Amana mulai sian tingki ditompa. (1Mus 1:26; Joh 1:1-3; Kol 1:15, 16) Tingki di tano on Jesus, ditiru ibana do parange ni Amana. I do alana didok ibana, “Manang ise na mangida ahu, nunga diida ibana Ama i.” (Joh 14:9; 5:17, 19, 30, 36; 8:28, 38, 42) Lam tarida do na ditiru ibana Amana, dung dipahehe ibana jala tingki dilehon Debata “saluhut huaso na di banua ginjang dohot na di tano on” tu ibana. (1Ptr 3:18; Mat 28:18) Dung dilehon Debata “inganan na tumimbo” tu Jesus, gabe lam suman ma ibana tu Debata, lobi sian tingki di tano on dope ibana. (Plp 2:9; Heb 2:9) Jadi saonari, “ibana do na suman situtu tu Debata”.—Heb 1:2-4.
it-1-IN 1394 ¶1
Langit dohot Surgo
Sasintongna, Psalmen 102:26, 27 laho patorangkon taringot Jahowa do. Alai dienet si Paulus ayat on laho patorangkon taringot Jesus. Alana Anak sasada ni Debata do Jesus. Jala ibana do na dipangke Debata gabe Wakilna laho manompa saluhutna. Didok si Paulus, imbar do Jesus sian angka tompaan na asing. Molo Jesus, tongtong do ibana adong saleleng-lelengna. Alai molo tompaan na asing, didok di Bibel boi do ‘lompiton ni Debata i songon jubah’.—Heb 1:1, 2, 8, 10-12.
26 AGUSTUS–1 SEPTEMBER
ARTA NA ARGA NA ADONG DI BIBEL HEBER 4-6
“Marsitutu ma Asa Boi Masuk tu Ari Paradianan i”
w11-IN 15/7 24 ¶3-5
Aha do Lapatan ni Ari Paradianan ni Debata?
3 Adong dua bukti na patuduhon molo ari na papituhon i masa dope sahat tu abad na parjolo Masehi. Bukti na parjolo, tingki adong na mangorai Jesus pamalumhon halak di ari Sabbat, didok ibana do, “Tongtong do karejo Damang sahat tu saonari, jala ahu pe tongtong do songon i.” (Joh. 5:16, 17) Aha do lapatan ni i? Tingki i, ditudu do Jesus karejo di ari Sabbat. Jadi didok ibana ma, “Tongtong do karejo Damang.” Hira na didok ibana ma tu nasida, ‘Sarupa do karejoku dohot karejo ni Bapakku. Tongtong dope karejo Bapakku sahat tu saonari, nang pe ari sabbat dope on di Ibana. Jadi ahu pe tongtong dope karejo di ari Sabbat.’ Sian on taboto ma, masa dope ari Sabbat i manang ari paradianan i sahat tu jaman ni Jesus.
4 Bukti na paduahon, boi taboto sian hata ni si Paulus. Tingki dienet si Paulus 1 Musa 2:2 taringot ari paradianan ni Debata, didok ibana do, “Masuk do hita tu ari paradiananna i, ai tapatudu do haporseaonta.” (Heb. 4:3, 4, 6, 9) Jadi masa dope ari papituhon i sahat tu jaman ni si Paulus. Sadia leleng do masa ari paradianan i?
5 Asa taboto alusna, taingot ma boasa dibahen ari na papituhon i. Di 1 Musa 2:3, didok “Dipasupasu Debata ma ari papituhon i, jala diparbadiai.” Jadi dipabadia Jahowa do ari i laho pasauthon sangkapna. Sangkapna, i ma laho lehononna do tano on tu angka halak na mangoloi Ibana. Jala nasida ma na laho mangurus sude na adong di tano on. (1Mus. 1:28) Jadi asa saut tujuan ni Jahowa dohot Jesus, na gabe “Tuan ni ari Sabbat”, ‘tongtong do karejo nasida sahat tu saonari’. (Mat. 12:8) Tongtong dope masa ari paradianan i sahat tu ujung ni Pamarentaon Saribu Taon. Di tingki i, saut ma sangkap ni Debata.
w11-IN 15/7 25 ¶6
Aha do Lapatan ni Ari Paradianan ni Debata?
6 Tangkas do dipaboa Debata tu si Adam dohot si Hawa taringot sangkapna. Alai ndang dioloi nasida hata ni Debata. Asing ni si Adam dohot si Hawa, adong marjuta halak na so mangoloi Debata. Termasuk ma halak Israel, bangso na pinillitna. Alani i, dipasingot si Paulus do halak Kristen di abad na parjolo asa unang songon halak Israel. Didok ibana, “Alani i, tabahen ma sian nasa gogonta asa boi hita masuk tu ari paradianan i. Asa unang adong sian hita na mangihuthon halak na so mangoloi i.” (Heb. 4:11) Maksud ni si Paulus, halak na so mangoloi Debata ndang boi masuk tu ari paradianan i. Boi do hita masuk tu ari paradianan i molo taalo sangkap ni Debata? Ringkot do taboto alus ni sungkun-sungkun on, jala on ma na laho taulas. Alai saonari taulas ma taringot halak Israel, jala aha do na mambahen nasida gabe ndang masuk tu ari paradianan i.
w11-IN 15/7 27-28 ¶16-17
Aha do Lapatan ni Ari Paradianan ni Debata?
16 Memang, ndang sude Patik ni si Musa i gabe syarat di hita saonari asa boi malua. Songon hata ni si Paulus tu halak Epesus, “Hamu angka na porsea, marhite asi ni roha ni Debata na mansai balga i do hamu dipalua. Ndang alani pambahenanmuna umbahen na malua hamu, alai silehon-lehon ni Debata do i. Nda tung alani pambahenanmuna i, alani i unang ma ginjang rohamuna.” (Eps. 2:8, 9) Jadi boha do carana asa boi hita masuk tu ari paradianan ni Debata? Dibahen Debata do ari papituhon i laho pasauthon sangkapna di tano on. Alani i, asa boi hita masuk tu ari paradiananna, ingkon taulahon do sangkapna jala taihuthon tudu-tuduna marhite organisasina.
17 Molo ndang taargai poda ni Bibel marhite naposo haposan jala holan lomo ni rohanta na taihuthon, berarti na taalo do sangkap ni Debata. Boi do on manegai parale-aleonta tu Debata. Di artikel na mangihut, taulas ma keputusan dohot situasi na songon dia do na mambahen naposo ni Debata gabe ndang masuk tu ari paradianan i.
Mangalului Arta na Adong di Bibel
Sungkun-Sungkun sian na Manjaha
Di Heber 4:12 didok, “hata ni Debata” mangolu jala margogo. Aha do lapatan ni “hata ni Debata” di ayat i?
▪ Hata on mangurupi hita mangantusi aha na nidok ni si Paulus taringot tu sangkap ni Debata na boi tadapot di Bibel.
Jotjot do Heber 4:12 dipangke di publikasinta na patuduhon boi do Bibel mambahen muba parngoluon jala tutu do i masa. Alani i, marlaba do hata na disurat si Paulus di Heber 4:12. Dijujui ibana do halak Kristen Heber asa sai mangulahon na hombar tu sangkap ni Debata. Godang do sangkap ni Debata taboto marhite Bibel. Dipangke si Paulus do tudosan taringot halak Israel na dipalua Debata sian Mesir. Marpangkirimon do nasida laho bongot tu “tano inganan ni susu dohot situak ni loba”, i ma inganan paradianan ni nasida.—2 Mus. 3:8, Bibel siganup ari; 5 Mus. 12:9, 10.
On ma sangkap ni Debata. Alai, ndang dijangkon Jahowa be bangso Israel ala ndang diihuthon nasida tudu-tudu jala ndang dipatuduhon nasida haporseaon tu Debata. Alani i, ndang boi nasida bongot tu inganan paradianan i. (4 Mus. 14:30; Jos. 14:6-10) Alai, dipaboa si Paulus adong dope “bagabaga laho masuk tu paradiananna i”. (Heb. 3:16-19; 4:1) “Bagabaga” i sada sian sangkap ni Debata. Songon halak Kristen di Heber, boi ma tajaha taringot i jala mangulahon hombar tusi. Laho patangkashon baga-baga i na tutu dipaboa di Bibel, dienet si Paulus do 1 Musa 2:2 dohot Psalmen 95:11.
Las do rohanta ala taboto na “hot dope bagabaga laho masuk tu paradiananna i”. Porsea do hita tu na nidok ni Bibel taringot laho masuk tu paradiananna, jala boi do hita masuk tusi. Alai asa boi dihalomohon Jahowa, ndang sae holan mangihuthon Patik ni si Musa dohot mangulahon na denggan. Ala marhaporseaon tu Debata, las do rohanta tongtong mangulahon na hombar tu sangkapNa. Marribu halak di liat portibi on nunga marsiajar Bibel, jala mamparsiajari taringot tu sangkap ni Debata. On ma na mangurupi godang halak marhamubaon, marhaporseaon, dung i tardidi. Pangkorhon ni Hata ni Debata tangkas patuduhon mangolu jala margogo do Hata ni Debata. Sangkap ni Debata na dipaboa di Bibel, mangkorhon do tu ngolunta jala tongtong mambahen hita margogo.
it-1-IN 868 ¶5
Pangkirimon
Pos do roha ni angka “na dohot dijou tu banua ginjang” laho mandapot hangoluan na salelengna, jala dilehon ma pamatang na so boi busuk tu nasida. (Heb 3:1) Boasa pos roha ni nasida? Adong dua alasanna. Na parjolo, ndang boi Debata margabus taringot janjina. Na paduahon, Jesus sandiri pe nunga didapot ibana hangoluan na salelengna di surgo. I do umbahen didok, “Songon jangkar ni kapal do pangkirimon i di ngolunta na mambahen hita togu, marpos ni roha, jala na mamboan hita masuk tu pudi ni tire i. Nunga parjolo Jesus masuk tusi, laho mambungka jala paradehon dalan tu hita. Ibana do sintua ni malim na saleleng ni lelengna na songon si Melkisedek.”—Heb 6:17-20.